ເດືອນພຶສຈິກາ ປີ 2023, ລາວ ຂາດດຸນການຄ້າ 297.5 ລ້ານໂດລ້າຣ໌ສະຫະຣັຖ

ພອນ ພູມມີທອນ
2024.01.11
ເດືອນພຶສຈິກາ ປີ 2023, ລາວ ຂາດດຸນການຄ້າ 297.5 ລ້ານໂດລ້າຣ໌ສະຫະຣັຖ ການຊື້-ຂາຍ ທີ່ຕລາດສົດແຫ່ງນຶ່ງ ໃນນະຄອນປາກເຊ ແຂວງຈຳປາສັກ (TS), ເດືອນພຶສຈິກາ ປີ 2023.
RFA

ມູນຄ່າ ການນໍາເຂົ້າ ແລະ ສົ່ງອອກສິນຄ້າ ປະຈໍາເດືອນ ພຶສຈິກາ ປີ 2023 ທີ່ຜ່ານມາ ຢູ່ທີ່ 1,085 ລ້ານໂດລ້າຣ໌ ສະຫະຣັຖ, ມູນຄ່າການນໍາເຂົ້າ 696 ລ້ານໂດລ້າຣ໌ ສະຫະຣັຖ, ມູນຄ່າການສົ່ງອອກ 389.5 ລ້ານໂດລ້າຣ໌ ສະຫະຣັຖ, ຂາດດຸນການຄ້າ 297.5 ລ້ານໂດລ້າຣ໌ ສະຫະຣັຖ ໂດຍໂຕເລຂມູນຄ່າການນໍາເຂົ້າ ແລະ ສົ່ງອອກນີ້ ຍັງບໍ່ກວມເອົາຂໍ້ມູນ ການນໍາເຂົ້າ ແລະ ສົ່ງອອກໄຟຟ້າເທື່ອ. ອີງຕາມຂໍ້ມູນ ຈາກສູນຂໍ້ມູນ ຂ່າວສານ ດ້ານການຄ້າຂອງ ສປປ ລາວ ຫລື Lao PDR Trade Portal.

ການຂາດດຸນການຄ້າ ໃນເດືອນພຶສຈິກາ ເປັນ 4 ເດືອນຕິດຕໍ່ກັນແລ້ວ ແລະ ມູນຄ່າການຂາດດຸນ ເພີ່ມຂຶ້ນເລື້ອຍໆ ຄື:

  • ເດືອນຕຸລາ ຂາດດຸນການຄ້າ ຈຳນວນ 264 ລ້ານໂດລ້າຣ໌ ສະຫະຣັຖ,
  • ເດືອນ ກັນຍາ ຂາດດຸນການຄ້າ 218 ລ້ານໂດລ້າຣ໌ ສະຫະຣັຖ ແລະ
  • ເດືອນ ສິງຫາ ຂາດດຸນ 88 ລ້ານໂດລ້າຣ໌ ສະຫະຣັຖ

ສາເຫດ ທີ່ເຮັດໃຫ້ ສປປ ລາວ ຂາດດຸນການຄ້າ ເປັນຈໍານວນຫຼາຍ ເກີດຈາກປັດໃຈຫຼາຍຢ່າງ ເຊັ່ນເງິນສໍາຮອງ ໃນຄັງບໍ່ພຽງພໍ ປະກອບກັບ ເງິນກີບອອ່ນຄ່າ, ອັດຕຣາເງິນເຟີ້, ອັດຕຣາແລກປ່ຽນ ລະຫວ່າງເງິນກີບກັບບາທ, ກີບກັບໂດລ້າຣ໌ ແລະ ກີບກັບຢວນ.

ດັ່ງ ເຈົ້າໜ້າທີ່ ທີ່ກ່ຽວຂ້ອງ ຜູ້ຂໍສງວນຊື່ ແລະ ຕໍາແໜ່ງ ທ່ານນຶ່ງ ກ່າວຕໍ່ວິທຍຸ ເອເຊັຽ ເສຣີ ໃນມື້ວັນທີ 11 ມົກຣາ 2024 ນີ້ວ່າ: 

ຍ້ອນເສຖກິຈ ເຣຶ່ອງເງິນຕຣາຫັ້ນນ່າ ເຮົາບໍ່ມີເງິນຕຣາ ເຮົາຫັ້ນວິກິດດ້ານການເງິນວ່າຈັ່ງຊັ່ນສາ ຄືເຮົາຫັ້ນ ຂາດດຸນການຄ້າຕລອດເນາະ ແລ້ວເງິນຫັ້ນນ່າ ໃນຄັງ ເງິນສໍາຮອງ ເວົ້າເຣຶ່ອງເງິນສໍາຣອງ ເງິນໂດລ້າຣ໌ ວ່າຈັງຊັ້ນສາ ເງິນບາທ ມັນບໍ່ມີ. 

ອີງຕາມຣາຍງານ ຂອງກະຊວງອຸດສາຫະກັມ ແລະ ການຄ້າ ປະຈໍາເດືອນ ພຶສຈິກາ ປີ 2023 ລະບຸວ່າ ສິນຄ້ານໍາເຂົ້າ 10 ອັນດັບໄດ້ແກ່:

  1. ນໍ້າມັນກາຊວນປະມານ6 ລ້ານໂດລ້າຣ໌, 
  2. ອຸປະກອນກົນຈັກ3 ລ້ານໂດລ້າຣ໌, 
  3. ພາຫະນະທາງບົກ5 ລ້ານໂດລ້າຣ໌, 
  4. ເຫຼັກແລະ ເຄື່ອງທີ່ເຮັດດ້ວຍເຫຼັກ-ເຫຼັກກ້າ7 ລ້ານໂດລ້າຣ໌, 
  5. ເຄື່ອງໄຟຟ້າແລະ ອຸປະກອນໄຟຟ້າ6 ລ້ານໂດລ້າຣ໌, 
  6. ຊິ້ນສ່ວນອາໄຫຼ່ຣົຖ9 ລ້ານໂດລ້າຣ໌, 
  7. ເຍື້ອໄມ້ແລະ ເສດເຈັ້ຍ2 ລ້ານໂດລ້າຣ໌, 
  8. ນໍ້າມັນແອັດຊັງ8 ລ້ານໂດລ້າຣ໌, 
  9. ເຄື່ອງໃຊ້ທີ່ເຮັດດ້ວຍພລາສະຕິກ9 ລ້ານໂດລ້າຣ໌ ແລະ
  10. ເຄື່ອງດື່ມ(ນໍ້າ, ນໍ້າອັດລົມ, ຊູກໍາລັງ)ປະມານ 14 ລ້ານໂດລ້າຣ໌.

ສ່ວນການຄ້າສົ່ງອອກ 10 ອັນດັບ ໄດ້ແກ່:

  1. ຄຳປະສົມ ຄຳແທ່ງ1 ລ້ານໂດລ້າຣ໌, 
  2. ຢາງພາຣາ8 ລ້ານໂດລ້າຣ໌, 
  3. ເຈັ້ຍແລະ ເຄື່ອງທີ່ເຮັດດ້ວຍເຈັ້ຍ4 ລ້ານໂດລ້າຣ໌, 
  4. ແຮ່ທອງ2 ລ້ານໂດລ້າຣ໌, 
  5. ເຄື່ອງນຸ່ງຫົ່ມ3 ລ້ານໂດລ້າຣ໌, 
  6. ເຄື່ອງດື່ມ(ນໍ້າ, ນໍ້າອັດລົມ,ຊູກໍາລັງ)6 ລ້ານໂດລ້າຣ໌, 
  7. ກ້ວຍ4 ລ້ານໂດລ້າຣ໌, 
  8. ເຍື້ອໄມ້ແລະ ເສດເຈັ້ຍ1 ລ້ານໂດລ້າຣ໌, 
  9. ນໍ້າຕານ8 ລ້ານໂດລ້າຣ໌ແລະ 
  10. ແປ້ງມັນຕົ້ນປະມານ12 ລ້ານໂດລ້າຣ໌.

ດ້ານຜູ້ປະກອບການ ຍາງພາຣາສົ່ງອອກ ຢູ່ເມືອງໄຊ ແຂວງອຸດົມໄຊ ທ່ານນຶ່ງກ່າວວ່າ ປັດຈຸບັນ ລາຄາຍາງພາຣາ ຢູ່ທີ່ 15,000 ກີບ ຕໍ່ ກິໂລກຣາມ ເຊິ່ງຖືວ່າສູງທີ່ສຸດ ທີ່ເຄີຍໄດ້ມາ ແຕ່ກໍເສັຍປຽບ ເຣຶ່ອງອັດຕຣາແລກປ່ຽນ ແລະ ເງິນກີບທີ່ອອ່ນຄ່າ ຍ້ອນຕົ້ນທຶນ ໃນການຜລິຕ ທັງຄ່ານ້ໍາມັນ ນັ້ນສູງຂຶ້ນ ເຮັດໃຫ້ການລາຄາທີ່ໄດ້ມາ ກໍຍັງບໍ່ກຸ້ມທຶນປານໃດ.

ດັ່ງ ທ່ານກ່າວວ່າ: 

ປີກາຍປີກ່ອນ ກໍໄດ້ແຕ່ 11,000-12,000 ແຕ່ປີນີ້ຂຶ້ນຮອດ 15,000 ກີບ ຄ່າຊື້ຂາຍ ແຕ່ລະປີ ກໍຂຶ້ນໜ້ອຍນຶ່ງຫັ້ນແຫລະ ແຕ່ວ່າອັດຕຣາເງິນເຟີ້ກໍຖືວ່າ ຍັງບໍ່ໄດ້ເທົ່າທີ່ ນັ້ນເທື່ອ ເພາະວ່າມັນເຟີ້ຫລາຍ ຄ່າເງິນກີບມັນເຟີ້ຫລາຍ ແລ້ວກໍເຄື່ອງນໍາເຂົ້າ ປະເພດຢາ ປະເພດປຸ໋ຍນີ່ ມັນແພງກວ່າເກົ່າ ມັນເພີ່ມຂຶ້ນ. 

ເພື່ອຫລຸດຜ່ອນ ການນໍາເຂົ້າສິນຄ້າ ທີ່ບໍ່ຈໍາເປັນ ແລະ ປ້ອງກັນເງິນຕຣາໄຫລອອກ ນຶ່ງໃຫ້ມາຕການ ທີ່ທາງການລາວ ພະຍາຍາມນໍາໃຊ້ ຊ່ວຍຫລຸດຜ່ອນ ບັນຫາດັ່ງກ່າວ ຄືການຊຸກຍູ້ ສົ່ງເສີມ ໃຫ້ປະຊາຊົນລາວ ນໍາໃຊ້ຜລິຕພັນ ທີ່ຜລິດໃນປະເທດລາວເອງ.     

ເຖິງຢ່າງໃດກໍຕາມ ແນວທາງດັ່ງກ່າວ ກໍບໍ່ຄ່ອຍໄດ້ຜົລປານໃດ, ຍ້ອນສິນຄ້າຫລາຍປະເພດ, ສປປ ລາວ ຍັງບໍ່ສາມາດຜລິດເອງໄດ້. ສ່ວນສິນຄ້າທີ່ມີຢູ່ ຍັງບໍ່ໄດ້ມາຕຖານ ຈຶ່ງບໍ່ໄດ້ຮັບຄວາມນິຍົມ ຈາກຜູ້ ບໍຣິໂພກ. 

ປັດຈຸບັນ, ສິນຄ້າອຸປໂພກ-ບໍຣິໂພກ ເກືອບທຸກໝວດໝູ່ ທີ່ຂາຍຢູ່ໃນຮ້ານຄ້າທົ່ວໄປ ຈຶ່ງເປັນສິນຄ້ານໍາເຂົ້າ ຈາກຕ່າງປະເທດ, ເປັນຕົ້ນ ປະເທດໄທຍ, ຈີນ ແລະ ວຽດນາມ ສ່ວນປະເພດສິນຄ້າ ທີ່ຜລິດໃນລາວນັ້ນ ຍັງມີໜ້ອຍ ແລະ ຕົວເລືອກບໍ່ຫລາກຫລາຍ.

ດັ່ງ ແມ່ຄ້າຂາຍເຄື່ອງຍ່ອຍ ຢູ່ແຂວງຜົ້ງສາລີ ນາງນຶ່ງກ່າວວ່າ:

ຂອງຈີນກໍມີ ຂອງວຽດກໍມີ ຂອງໄທຍກໍມີ ແຕ່ຫລາຍສຸດນີ້ຂອງໄທຍ ເຄື່ອງຍັງຫລາຍທີ່ສຸດ ບໍ່ວ່າຈະເປັນເຄື່ອງສໍາອາງ ເຄື່ອງໃຊ້ ແມ່ນຫຍັງກະຂອງໄທຍຫລາຍກວ່າ. ແປ້ງນົວ ເຂົາເຈົ້າໃຊ້ແຕ່ຂອງໄທຍ ຂອງລາວກໍມີໜ້ອຍ ຂອງລາວບໍ່ໄດ້ໃຊ້ຫລາຍປານຂອງໄທຍ. ສ່ວນຫລາຍ ຂອງລາວມີແຕ່ສິນຄ້າ ຢາສູບ ກັບບຽຍລາວຫັ້ນ ໂຕອື່ນ ເຄື່ອງໃຊ້ສອຍ ກໍບໍ່ເຫັນຈະມີ.  

ດ້ານ ເຈົ້າຂອງຮ້ານຂາຍເຄື່ອງຍ່ອຍ ອີກນາງນຶ່ງ ຢູ່ເມືອງອະນຸວົງ ແຂວງໄຊສົມບູນ ກ່າວຄືກັນວ່າ ໃນຮ້ານ ຂາຍສິນຄ້າຈາກທັງໄທຍ, ຈີນ, ລາວ ແລະ ວຽດນາມ ແຕ່ສິນຄ້າທີ່ໄດ້ຮັບຄວາມນິຍົມຫລາຍທີ່ສຸດ ແມ່ນສິນຄ້າ ຈາກປະເທດໄທຍ.

ດັ່ງ ຍານາງກ່າວວ່າ:

ເຄື່ອງນີ້ກໍເຄື່ອງຈີນ, ເຄື່ອງວຽດ, ເຄື່ອງໄທຍ ເຄື່ອງລາວກໍຂາຍເບິດຫັ້ນນ່າ (ສິນຄ້າ) ຕ່າງປະເທດຫລາຍກວ່າຢູ່ລາວ ຢູ່ລາວບໍ່ມີອີ່ຫຍັງຫລາຍດອກ ເຄື່ອງໄທຍນີ້ໄປດີກວ່າເຄື່ອງຈີນ. ເຄື່ອງວຽດ ກໍໄປ ແຕ່ວ່າໄປຊ້າກວ່າເຄື່ອງໄທຍ.” 

ກ່ອນໜ້ານີ້ ຜແນກອຸຕສາຫະກັມ ແລະ ການຄ້າ ແຂວງບໍ່ແກ້ວ ໄດ້ດໍາເນີນການຊຸກຍູ້ ໃຫ້ພໍ່ແມ່ປະຊາຊົນ ຊົມໃຊ້ ສິນຄ້າພາຍໃນ ເປັນຕົ້ນ ສິນຄ້າອຸປະໂພກ-ບໍຣິໂພກ, ອາຫານ-ເຄື່ອງດື່ມ ແລະ ສິນຄ້າຫັດຖະກັມ ນຶ່ງເມືອງ-ນຶ່ງຜລິຕພັນ ຫລື ສິນຄ້າ ໂອດ໋ອບ (ODOP) ເພື່ອຫລຸດຜ່ອນ ການນໍາເຂົ້າສິນຄ້າ ຈາກຕ່າງປະເທດ.

ເຖິງຢ່າງໃດກໍຕາມ, ພໍ່ຄ້າ-ແມ່ຄ້າ ຢູ່ຫລາຍເມືອງ ໃນແຂວງບໍ່ແກ້ວ ຍັງຈໍາເປັນ ຕ້ອງໄດ້ນໍາເຂົ້າສິນຄ້າ ອຸປະໂພກ-ບໍຣິໂພກ ເປັນປະຈໍາທຸກມື້, ຍ້ອນສິນຄ້າຫລາຍປະເພດ ເປັນສິນຄ້າທີ່ບໍ່ສາມາດຜລິດພາຍໃນໄດ້.

ໃນເດືອນທັນວາ ປີ 2023 ທາງການແຂວງໄຊຍະບູຣີ ໄດ້ອອກແຈ້ງການໃຫ້ທຸກພາກສ່ວນ ທົ່ວແຂວງ ບໍ່ໃຫ້ນໍາສິນຄ້າ ທີ່ບໍ່ຈໍາເປັນ ຈາກຕ່າງປະເທດ ເຂົ້າມາທັງໝົດຈໍານວນ 137 ຣາຍການ, ເພື່ອສົ່ງເສີມການຜລິດຢູ່ພາຍໃນປະເທດ, ຫລຸດຜ່ອນການນໍາເຂົ້າ ແລະ ເງິນຕຣາບໍ່ໄຫລອອກນອກປະເທດ ໃນຈໍານວນສິນຄ້າ ທີ່ຫ້າມນໍາເຂົ້າມາ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.