ພ​ຍາດ ຮອງ​ລອງ​ບິນ ແຜ່ຜາຍ ຢູ່ສວນ ໝາກກ້ຽງ

ໄມຊູລີ
2019-02-07
ອີແມວລ໌
ຄໍາເຫັນ
Share
ພິມ
ສວນໝາກກ້ຽງ ຢູ່ກາສີ ເມືອງວັງວຽງ ແຂວງວຽງຈັນ.
ສວນໝາກກ້ຽງ ຢູ່ກາສີ ເມືອງວັງວຽງ ແຂວງວຽງຈັນ.
ຮູບພາບອຸປຖັມໂດຍ: ນັກຂ່າວພົລເມືອງ

ຊາວ​ສວນ​ປູກ​ໝາກ​ກ້ຽງ​ຢູ່​ເມືອງວັງ​ວຽງ ແຂວງວຽງ​ຈັນ, ປະ​ສົ​ບ​ກັບ​ບັນ​ຫາ​ພຍາດ​ຮອງ​ລອງ​ບິນ, ເຊິ່ງ​ເຮັດ​ໃຫ້​ຕົ້ນ​ໝາກ​ກ້ຽງ​ແຫ່ວ, ກູດ ແລະ ລົ້ມ​ຕາຍ​ກໍ​ມີ. ນອກ​ຈາກນີ້, ຍັງ​ມີ​ແມງ​ແຄງ ແລະ ໂຕດ້​ວງ ກັດ​ກິນ​ຕົ້ນ​ໝາກ​ກ້ຽງ​ນຳ​ດ້ວຍ, ເຊິ່ງ​ຕ້ອງ​ໃຊ້​ຢາ ປາບສັດຕຣູ​ພືດ ​ກຳ​ຈັດ, ຕາມ​ຄວາມ​ເວົ້າ​ຂອງ​ເຈົ້າ​ໜ້າ​ທີ່ກຳ​ສິ​ກັມ ແລະປ່າ​ໄມ້ ​ເມືອງວັງ​ວຽງ ໃນ​ມື້​ວັນ​ທີ 5 ມົກກະຣາ ນີ້​ວ່າ:

ສ່ວນຫຼາຍຍາດຮອງລອງບິນ, ມັນຕາຍມາແຕ່ທາງປາຍເນາະ, ມັນແຫ່ວລະໃບກູດ, ເປັນແຊກສີເຫຼືອງ ແຫ່ວອອກມາລະຕາຍລົງ. ບ້ານສົມສະຫວາດ ແລະ ບ້ານຢ້າວນີ້ແຫຼະ ດັງກ່ອນໝູ່, ດຽວນີ້ຕາຍໝົດແຫຼະ. 95 ເຮັກຕ້າພຸ້ນແຫຼະ, ຂາດທຶນເລີຍ ລະແມງແຄງພວກດ້ວງເຈາະລຳ.

ທ່ານ​ກ່າວ​ຕື່ມ​ວ່າ, ຜູ້​ຊ່ຽວ​ຊານ​ຈາກ​ເກົາຫຼີ​ໃຕ້ ແລະ ຈາກ​ສູນ​ປ້ອງ​ກັນ​ພືດ​ລາວ ໄດ້​ລົງ​ກວດ​ກາ, ແລະເອົາ​ໂຕ​ຢ່າງ​ເຊື້ອ​ພ​ຍາດ​ດັ່ງ​ກ່າວ​ໄປ​ວິ​ຈັຍ, ເຊິ່ງ​ການ​ແກ້​ໄຂ​ພ​ຍາດນີ້​, ໃນ​ເບື້ອງ​ຕົ້ນຕ້ອງ​ໃຊ້​ວິ​ທີ​ການ​ປ່ຽນ​ແນວ​ພັ​ນ​ໃໝ່, ຍ້ອນ​ຖ້າ​ຕອນ ຫຼື​ຕັດ​ກິ່ງ​ໄປ​ເພາະ​ປູກ ເຊື້ອ​ພຍາດ​ກໍ​ຈະ​ແຜ່​ຂ​ຍາຍ​ ອອກ​ໄປ​ໃນ​ວົງ​ກວ້າງ.

ປະ​ຈຸ​ບັນ, ແມ່ນໄລ​ຍະ​ການ​ເກັບ​ກ່ຽວ​ໝາກ​ກ້ຽງ ນອກ​ຈາກ​ເຊື້ອ​ພຍາດ​ແລ້ວ ຊາວ​ສວນ​ໝາກ​ກ້ຽງ, ຍັງ​ປະ​ສົ​ບກັບ​ບັນ​ຫາ​ຣາ​ຄາ​ຕົກ​ຕ່ຳ, ໂດຍ​ສະ​ເພາະ ​ໃນ​ປະ​ຈຸ​ບັນ​ນີ້ ເປັນ​ໄລ​ຍະ​ເກັບ​ກ່ຽວ​ໝາກ​ກ້ຽງ ​ທີ່​ຊາວ​ສວນ​ປູກ​ໝາກ​ກ້ຽງ ​ເກັບ​ກ່ຽວ​ຜົ​ລ​ຜ​ລິ​ດພ້ອມ​ກັນ ເຮັດ​ໃຫ້​ໝາກ​ກ້ຽງ​ລົ້ນຕ​ລາດ, ບໍ່​ມີ​ການ​ສົ່ງ​ອອກ​ໄປ​ຕ່າງ​ປະ​ເທ​ສ, ມີ​ແຕ່​ຂາຍ​ຢູ່​ພາຍ​ໃນ​ລາວ​ເທົ່າ​ນັ້ນ. ໃນ​ຣາ​ຄາ 7 ພັນ​ກີບຕໍ່ກິໂລ ຈາກ​ທີ່​ເຄີຍ​ຂາຍ​ໄດ້​ຣາ​ຄາ 10 ພັນ​ກີບ​ຕໍ່​ກິ​ໂລ.

ສ່ວນຫຼາຍ ຊ້ວງລິຕບໍ່ໄດ້ເຮັດນອກຣະດູຄືໄທ, ຊ້ວງເກັບຜົລິເດືອນ 11, 12 ເດືອນ 01 ນີ້ແຫຼະ, ຣາຄາມັນກະອ່າວຕົກໜ້ອຍນຶ່ງ, ຂາຍປົກກະຕິໂລນຶ່ງ 10 ພັນ, ຢ່າງຫຼຸດກະໂລນຶ່ງປະມານ 7 ພັນ. ຮັກສາໄວ້ດົນກະບໍ່ໄດ້ ບໍ່ມີໂຮງງານຄືຢູ່ໄທຫັ້ນນ່າ.

ໝາກ​ກ້ຽງ​ຢູ່​ວັງ​ວຽງ ສ່ວນຫຼາຍ​ເປັນ​ປະ​ຊ​າ​ຊົນ​ ປູກແລະຂາຍ ​ກັນ​ເອງ​ພໍ​ໃຜ​ພໍ​ລາວ, ບໍ່​ໄດ້ຈັດ​ຕັ້ງ​ເປັນ​ກຸ່ມ, ໃນ​ເນື້ອ​ທີ່​ທັງ​ໝົດ​ປະ​ມານ 200 ປາຍ​ເຮັກ​ຕ້າ, ເປັນ​ໝາກ​ກ້ຽງ​ທີ່​ແຊບ ປູກ​ຕາມ​ທັມ​ມະ​ຊາດ ໃນ​ສ​ະພາບ​ອາ​ກາດ​ທີ່​ເຢັນ​ດີ​ຕ​ລອດ​ປີ. ຍ້ອນ​ແນວນັ້ນ, ໝາກ​ກ້ຽງ​ວັງ​ວຽງ ຈຶ່ງຂຶ້ນ​ຊື່​ວ່າ​ມີ​ຣົດ​ຊາດ​ແຊບ ​ຢ່າງ​ເປັນ​ເອ​ກ​ລັກ​ສ​ະ​ເພາະ.

ເຕັມຫນ້າ