ສາເຫດກຸ່ມຄົນລ້ຽງໝູ ເສັຽຫາຍ

ພູວົງສ໌
2019-02-07
ອີແມວລ໌
ຄໍາເຫັນ
Share
ພິມ
ຟາມລ້ຽງໝູ ຂອງກຸ່ມຄົນລ້ຽງໝູ ຮ່ວມກັບ ບໍຣິສັດຈະເຣີນໂຄກປະພັນ ຫຼື ບໍຣິສັດ CP ປະເທສໄທ
ຟາມລ້ຽງໝູ ຂອງກຸ່ມຄົນລ້ຽງໝູ ຮ່ວມກັບ ບໍຣິສັດຈະເຣີນໂຄກປະພັນ ຫຼື ບໍຣິສັດ CP ປະເທສໄທ
ຮູບພາບຈາກ: ນັກຂ່າວພົລເມືອງ

ກຸ່ມຄົນລ້ຽງໝູໃນ 3 ຕົວເມືອງເຂດນະຄອນຫຼວງວຽງຈັນ ຈຳນວນເກືອບ 100 ຄອບຄົວ ຈາກເມືອງໄຊທານີ, ປາກງື່ມ ແລະ ນາຊາຍທອງ ເສັຽຜົລປໂຍດຈາກການລ້ຽງໝູຮ່ວມກັບບໍຣິສັດຈະເຣີນໂຄກປະພັນ ຫຼື CP ປະເທສໄທຍ ທີ່ໄດ້ມາເປີດບໍຣິສັດ ສາຂາ ໃນລາວ ຍ້ອນບໍຣິສັດ CP ບໍ່ປະຕິບັດຕາມສັນຍາຫຼາຍຂໍ້ ເປັນຕົ້ນວ່າ ບໍ່ມາຮັບເອົາໝູຕາມກຳນົດເວລາ, ບໍ່ຈ່າຍເງິນຕຣົງເວລາ, ສນອງລູກໝູບໍ່ໄດ້ນ້ຳໜັກ ແລະ ບໍ່ຄົບຈຳນວນ ແລະ ອີກບັນຫາອື່ນໆ. ດັ່ງຄົນລ້ຽງໝູໃນເຂດເມືອງໄຊທານີ ທ່ານນຶ່ງ ໄດ້ກ່າວຕໍ່ຜູ້ສື່ຂ່າວເອເຊັຽເສຣີ ໃນວັນທີ 25 ມົກກະຣາ ທີ່ຜ່ານມາວ່າ:

“ບາງເທື່ອນີ້ ເງິນໂອນນີ້ ເຮົາແມ່ນຜູ້ລ້ຽງເນາະ, ເຮົາລ້ຽງມາ 6 ເດືອນ ຫຼືວ່າ 5 ເດືອນ, ເຮົາຢາກໄດ້ເງິນ ເຂົາກະພັດຄ້າງເປັນເດືອນ, ຍັງບໍ່ ໄດ້ເງິນຊ້ຳ ຫັ້ນນ່າອັນນີ້ນ່າ, ລະປະຊາຊົນຢາກຂັດຂ້ອງຫຼາຍ. ເອີ່ ຈ່າຍເງິນຊ້າ. ໝູອອກໄປເປັນເດືອນແລ້ວ, ເງິນຍັງບໍ່ທັນໄດ້, ຜູ້ລ້ຽງນີ້ ລ້ຽງມາ 6-7 ເດືອນ ນີ້, ມັນບໍ່ມີເງິນຈ່າຍເດ, ມັນກະຢາກໄດ້ເງິນມາຈ່າຍ, ຊີ້ນ່າ."

ຄົນລ້ຽງໝູໃນເຂດເມືອງປາກງື່ມ ທ່ານນຶ່ງ ໄດ້ກ່າວຢືນຢັນຕໍ່ຜູ້ສື່ຂ່າວເຮົາໃນມື້ດຽວກັນນັ້ນວ່າ, ເປັນເວລາ 2 ປີມາແລ້ວທີ່ບໍຣິສັດ CP ສນອງ ໝູທີ່ບໍ່ໄດ້ມາຕຖານຕາມສັນຍາ, ສ່ວນໃຫຍ່ເປັນໝູນ້ອຍ, ນ້ຳໜັກບໍ່ໄດ້ມາຕຖານ ແລະ ໝູມັກເປັນພຍາດ ຕາຍຢ່າງງ່າຍດາຍ ເຮັດໃຫ້ກຸ່ມຄົນ ລ້ຽງໝູຫຼຸບທຶນ ຈາກການລ້ຽງໝູໃນແຕ່ລະຊຸດ.

“ໝູອັນເຮົາລ້ຽງນີ້ ມັນບໍ່ແມ່ນໝູທີ່ວ່າ ບໍ່ໃຫຍ່ແດ່, ລະກໍໝູແບບໝູມີພຍາດຫຼາຍນ່າ, ລະລູກໝູເຮົານີ້ ກັບລູກໝູຂອງນ້າບ່າວນີ້, ເຮົາເອົາມາ ລ້ຽງທຽບດຽວນີ້, ມັນແຕກຕ່າງດຽວຫຼາຍນ່າ, ໝູເພິ່ນຫັ້ນບໍ່ຕາຍຈັກໂຕ, ໝູເຮົາລະແມ່ນຕາຍແທ້ຕາຍວ່າ, ຊີ້ນ່າ."

ຜູ້ນຳກຸ່ມຄົນລ້ຽງໝູ ໄດ້ກ່າວຕໍ່ຜູ້ສື່ຂ່າວເອເຊັຽເສຣີ ໃນເວລາໄລ່ເລັ່ຽກັນນັ້ນວ່າ, ທີ່ຜ່ານມາ ເນື່ອງຈາກທົນບໍ່ໄຫວກັບພຶຕຕິກັມຂອງບໍຣິສັດ CP ປະຈຳປະເທສລາວ, ທີ່ບໍ່ປະຕິບັດຕາມສັນຍານັ້ນ, ແລະ ກຸ່ມຄົນລ້ຽງໝູນັບມື້ນັບທຸກຈົນລົງ ທາງກຸ່ມຈຶ່ງໄດ້ລວມ ໂຕກັນ, ເພື່ອເຈຣະຈາກັບ ບໍຣິສັດ CP ແລ້ວ, ແຕ່ພັດຖືກບໍຣິສັດຂົ່ມຂູ່ວ່າ ຈະບໍ່ສນອງໝູໃຫ້, ຖ້າຫາກກຸ່ມຄົນລ້ຽງໝູຈະສເນີບັນຫາດັ່ງກ່າວໃຫ້ພາກສ່ວນກ່ຽວຂ້ອງຮັບຮູ້, ຊາວບ້ານຈຶ່ງຈຳໃຈມິດງຽບໄປກ່ອນ.

“ຕາມສັນຍາກັບ CP ຫັ້ນ, ມັນສັນຍາມັນເຮັດຈັ່ງນຶ່ງ, ແຕ່ຫາກວ່າມັນໄປປະຕິບັດໂຕຈິງ, ມັນໄປປະຕິບັດແບບນຶ່ງ, ຫັ້ນນ່າ. ທັມມະດາແລ້ວ ເຮົາຕ້ອງໄດ້ໝູຕາມສັນຍາເນາະ, ລະບາດນີ້ຕາມສັນຍາໝູມາ, ມັນບໍ່ໄດ້ຕາມສັນຍາທີ່ວ່າບໍຣິສັດ CP ເຮັດກັບເຮົາ, ຫັ້ນນ່າ. ດຽວນີ້ເຮັດໃຫ້ ຄືເວົ້າຫັ້ນແຫຼະ ປະຊາຊົນເວົ້າຫຍັງບໍ່ໄດ້ນ່າ ມີແຕ່ມັນເຮັດເອງ. ບາດນີ້ໝວດເຮົາໄປລວມກັນແລ້ວ, ປະຊາຊົນສເນີໂຕນີ້ຂຶ້ນມາ, ມັນກະບອກ ວ່າໃຫ້ຢຸດ ບໍ່ໃຫ້ສເນີ, ວ່າຊັ້ນ. ມັນວ່າຖ້າວ່າສເນີມາແບບນີ້ ມັນຈະບໍ່ສົ່ງ ໝູໃຫ້ ມັນຂູ່ນ່າ."

ເຖິງຢ່າງໃດກໍຕາມ, ຜູ້ນຳກຸ່ມຄົນລ້ຽງໝູ ໄດ້ກ່າວຕື່ມວ່າ ໃນຊຸມ 2 ປີຜ່ານມາ, ທາງກຸ່ມກໍໄດ້ສເນີ ແລະ ຮຽກຮ້ອງໄປຫາພາກສ່ວນກ່ຽວຂ້ອງ ປະຈຳເມືອງ ແລະ ບໍຣິສັດ CP ໃຫ້ແກ້ໄຂບັນຫາດັ່ງກ່າວ, ແຕ່ມາເຖິງປະຈຸບັນ ກໍບໍ່ມີທ່າທີວ່າບັນຫາຈະຖືກແກ້ໄຂ ເລີຍ.

ກ່ຽວກັບເຣື້ອງນີ້, ຜູ້ສື່ຂ່າວເອເຊັຽເສຣີ ໄດ້ຕິດຕໍ່ສອບຖາມໄປຍັງຫ້ອງການກະສິກັມ ແລະປ່າໄມ້ ປະຈຳເມືອງໄຊທານີ ໃນມື້ດຽວກັນ, ເຊິ່ງ ເຈົ້າໜ້າທີ່ກ່ຽວຂ້ອງ ກໍໄດ້ອະທິບາຍວ່າ, ອຳນາດການປົກຄອງເມືອງ ກໍໄດ້ສົ່ງໂຕແທນລົງໄປເບິ່ງບັນຫານີ້ໃຫ້ແກ່ ປະຊາຊົນ ເປັນແຕ່ລະ ໄລຍະແລ້ວ, ເພື່ອແນະນຳໃຫ້ແຕ່ລະຝ່າຍປະຕິບັດຕາມສັນຍາຢ່າງເຂັ້ມງວດ.

“ໄດ້ໄປແລ້ວ ໄດ້ໄປເບິ່ງໄປເວົ້າໃຫ້ບໍຣິສັດ CP ແລ້ວ, ກ່ຽວແກ່ກັບເວົ້າເຣື້ອງໂຕນີ້, ໄທເຮົາຄຸ້ມຄອງເຂົາເຈົ້າ. ທັມມະດາບໍຣິສັດ CP ສົ່ງໝູ ໃຫ້ຟາມແຕ່ລະຟາມມັນຕ້ອງຈຳນວນຄົບຖ້ວນ, ສຸຂພາບແຂງແຮງ ບໍ່ແມ່ນໂຕທໍ່ແຄ່ງທໍ່ຂານີ້. ເຂົາກະຊິພຍາຍາມ, ຕ້ອງພຍາຍາມ, ຕ້ອງເຮັດ. ສະນັ້ນລະໂຕນີ້ ຂະເຈົ້າໄດ້ຮ້ອງຟ້ອງມາ, ລະກະໄດ້ລົງໄປແກ້ໃຫ້ຂະເຈົ້າຢູ່ແລ້ວ. ແຕ່ວ່າຂະເຈົ້າຊິເຂົ້າໃຈກັນແນວໃດ ກະຍັງບໍ່ທັນຮູ້ເນາະ."

ຜູ້ສື່ຂ່າວເອເຊັຽເສຣີ ໄດ້ພຍາຍາມຕິດຕໍ່ສອບຖາມໄປຍັງຫ້ອງການຜູ້ຕາງໜ້າ ບໍຣິສັດ CP ປະຈຳປະເທສລາວ ທີ່ບ້ານນາສາລາ, ເມືອງ ໄຊທານີ ນະຄອນຫຼວງວຽງຈັນ ໃນວັນທີ 25 ມົກກະຣາ ທີ່ຜ່ານມານັ້ນ, ແຕ່ເຈົ້າໜ້າທີ່ປະຈຳຫ້ອງການກ່າວສັ້ນໆວ່າ, ອາຈມີຄວາມຄາດ ເຄື່ອນ ດ້ານຂໍ້ມູນຈາກຊາວບ້ານ.

ນອກຈາກນີ້, ຜູ້ສື່ຂ່າວເອເຊັຽເສຣີ ໄດ້ພຍາຍາມຕິດຕໍ່ສອບຖາມໄປຍັງຫ້ອງການບໍຣິສັດ CP ທີ່ນະຄອນຫຼວງບາງກອກ, ປະເທສໄທຍ ໃນຕອນບ່າຍຂອງມື້ວັນທີ 04 ກຸມພາ, ເຊິ່ງເຈົ້າໜ້າທີ່ກ່ຽວຂ້ອງ ກໍໄດ້ກ່າວສັ້ນໆວ່າ ບໍ່ສາມາດໃຫ້ຂໍ້ມູນໃນບັນຫານີ້ໄດ້.

ອີງຕາມຮ່າງເອກສານ “ໜັງສືຮ້ອງທຸກຈາກປະຊາຊົນກຸ່ມຄົນລ້ຽງໝູເຖິງຣັຖບານ” ທີ່ທາງກຸ່ມໄດ້ສົ່ງໃຫ້ ຜູ້ສື່ຂ່າວເອເຊັຽເສຣີ ເມື່ອບໍ່ດົນ ຜ່ານມານີ້ແລ້ວແມ່ນວ່າ, ບໍຣິສັດ CP ປະຈຳປະເທສລາວ ບໍ່ປະຕິບັດສັນຍາ ຈຶ່ງເຮັດໃຫ້ກຸ່ມຄົນລ້ຽງໝູ ເກີດຄວາມ ຂັດຂ້ອງໝອງໃຈ 4 ຂໍ້ ດັ່ງນີ້:

1. ບໍຣິສັດ CP ສົ່ງລູກໝູບໍ່ເຕັມຈຳນວນຕາມສັນຍາ ຄືສົ່ງໃຫ້ພຽງ 600 ໂຕ ຈາກທີ່ສັນຍາຈະສນອງໃຫ້ 750 ໂຕຕໍ່ຊຸດ ເຮັດໃຫ້ບໍ່ພໍ ຄ່າໃຊ້ຈ່າຍໃນການລ້ຽງໝູແຕ່ລະຊຸດ.

2. ບໍຣິສັດ CP ບັງຄັບໃຫ້ກຸ່ມຄົນລ້ຽງໝູຊື້ອຸປກອນ ກັບບໍຣິສັດໃນຣາຄາທີ່ສູງເກີນຈິງ, ແຕ່ຖ້າບໍ່ຊື້ ກໍຈະບໍ່ສນອງລູກໝູໃຫ້ລ້ຽງ.

3. ບໍຣິສັດ CP ຈ່າຍເງິນຊ້າ ເມື່ອບໍຣິສັດມາຮັບເອົາໝູໃນແຕ່ລະຊຸດໄປແລ້ວ ແລະ ຜົລຕອບແທນກໍບໍ່ຍຸຕິທັມ ແລະ ບໍ່ເປັນໄປຕາມສັນຍາ ຈາກທີ່ສັນຍາຈະໃຫ້ໃນຣາຄາປະມານ 1,200 ຫາ 1,800 ກີບຕໍ່ກິໂລ, ແຕ່ກັບຈ່າຍໂຕຈິງໃຫ້ປະຊາຊົນພຽງ 500 ກີບຕໍ່ກິໂລ.

4. ເມື່ອກຸ່ມຄົນລ້ຽງໝູສເນີໃຫ້ແກ້ໄຂບັນຫາ ກໍພັດຖືກຂົ່ມຂູ່ຈາກບໍຣິສັດວ່າ ຈະບໍ່ສນອງໝູໃຫ້, ປະຊາຊົນກຸ່ມຄົນລ້ຽງໝູ ຈຶ່ງຕົກຢູ່ໃນທ່າທີ ຕໍ່ວ່າຫຍັງບໍ່ໄດ້.

ອັນນັ້ນ, ແມ່ນຂໍ້ຂັດຂ້ອງໝອງໃຈຂອງກຸ່ມຄົນລ້ຽງໝູ ທີ່ໄດ້ບັນທຶກລົງໃນຮ່າງເອກກະສານ “ໜັງສືຮ້ອງທຸກຈາກປະຊາຊົນກຸ່ມຄົນລ້ຽງໝູ ເຖິງຣັຖບານ”.

ຜູ້ນຳກຸ່ມຄົນລ້ຽງໝູ ຈາກກຸ່ມຄົນລ້ຽງໝູຈຳນວນເກືອບ 100 ຄອບຄົວ ໃນນະຄອນຫຼວງວຽງຈັນ ໄດ້ຢືນຢັນຕໍ່ຜູ້ສື່ຂ່າວເອເຊັຽເສຣີວ່າ ຖ້າຫາກ ບັນຫາດັ່ງກ່າວ ຍັງບໍ່ໄດ້ຮັບການແກ້ໄຂພາຍໃນ 2 ເດືອນຂ້າງໜ້ານີ້, ທາງກຸ່ມຈະຂຽນຄຳຮ້ອງທຸກໄປຫາຣັຖບານ ເພື່ອຮຽກຮ້ອງໃຫ້ຂັ້ນເທິງ ຊ່ອຍຫາທາງແກ້ໄຂບັນຫາ ໃຫ້ກັບພໍ່ແມ່ປະຊາຊົນ.

ເຕັມຫນ້າ