ຈີນລົງທຶນຂຸດຄົ້ນຄໍາ ຢູ່ປາກອູ 50 ປີ

ສຸພັດຕາ
2019-04-11
ອີແມວລ໌
ຄໍາເຫັນ
Share
ພິມ
ເຂດສໍາປະທານ ຂຸດຄໍາ ເມືອງກາສີ ແຂວງຫລວງພຣະບາງ
ເຂດສໍາປະທານ ຂຸດຄໍາ ເມືອງກາສີ ແຂວງຫລວງພຣະບາງ
RFA/NY

ບໍຣິສັດທຽນຈິນ ຮົວຄານ ຈາກ ປະເທດຈີນ ເຂົ້າມາສັມປະທານຂຸດຄົ້ນຄໍາ ຢູ່ບໍຣິເວນຖໍ້າບ້ານຜາປົ່ນ, ເມືອງປາກອູ, ແຂວງຫຼວງພຣະບາງ ໂດຍໄດ້ສັມປະທານ ຂຸດຄົ້ນເປັນເວລາ 50 ປີ, ຊຶ່ງໄດ້ເຣີ້ມ ຂຸດຄົ້ນຄໍາ ຕັ້ງແຕ່ປີ 2018 ມາຈົນຮອດປັດຈຸບັນ ເພື່ອສົ່ງຄໍາໄປຂາຍ ຢູ່ທີ່ ປະເທດຈີນ, ດັ່ງເຈົ້າໜ້າທີ່ເມືອງປາກອູ ທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນວັນທີ 11 ເມສາ ນີ້ວ່າ:

“ເພິ່ນມາສໍາຣວດຕັ້ງແຕ່ປີ 2009 ຮອດ 2015, ແລ້ວແມ່ນປີ 2017 ນີ້ ແລ້ວມັນມີຂໍ້ຕົກລົງຂອງຣັຖບານ ໃຫ້ຈີນຂຸດຄົ້ນ ຈີນກໍເຣີ້ມເສັຽ ພັນທະອາກອນ ໃນການຂຸດຄົ້ນ ສັມປະທານ 50 ປີ.”

ທ່ານວ່າ ສໍາລັບຄົນງານທີ່ຂຸດຄົ້ນຄໍາ ຢູ່ເຂດດັ່ງກ່າວ ສ່ວນໃຫຍ່ແມ່ນຄົນງານລາວ ຊາວເມືອງປາກອູ ແລະເມືອງອື່ນໆ ໃນແຂວງຫຼວງ ພຣະບາງ ມີທັງຄົນງານທີ່ມີສັນຍາ ເຮັດວຽກເປັນຣາຍເດືອນ ແລະ ຄົນງານແບບລູກຈ້າງເປັນມື້, ແຕ່ບໍ່ຮູ້ຈໍານວນຣະອຽດ ວ່າມີຈັກຄົນແທ້ ແລະໄດ້ເງິນຄ່າຈ້າງ ຫຼາຍໜ້ອຍຊໍ່າໃດ, ສ່ວນຄໍາທັງໝົດທີ່ໄດ້ຈາກການຂຸດຄົ້ນ ແລະ ຣະເບີດຫິນນັ້ນ ຈະຖືກສົ່ງໄປຂາຍ ທີ່ປະເທດຈີນ, ຊຶ່ງບໍ່ຮູ້ຂໍ້ມູນຣະອຽດວ່າ ສົ່ງອອກປີລະຈັກຕັນ.

ທ່່ານກ່າວຕື່ມວ່າ ຢ່າງໃດກໍຕາມ ເຖິງແມ່ນວ່າບໍຣິສັດດັ່ງກ່າວ ໄດ້ມາລົງທຶນຢ່າງຖືກຕ້ອງ, ແຕ່ກໍມີປະຊາຊົນໃນພື້ນທີ່ ຈໍານວນນຶ່ງທີ່ຍັງ ພາກັນລັກເຂົ້າໄປ ໃນເຂດຖໍ້າດັ່ງກ່າວ ເພື່ອຂຸດຄໍາໄປຂາຍ ເຮັດໃຫ້ເຈົ້າໜ້າທີ່ຕໍາຣວດ ແລະທະຫານ ໄດ້ຈັດກໍາລັງເຝົ້າເວນຍາມ ສະກັດກັ້ນບໍ່ໃຫ້ຊາວບ້ານລັກເຂົ້າໄປ, ແຕ່ກໍມີຜູ້ຝ່າຝືນຢູ່ເລື້ອຍໆ.

ກ່ຽວກັບເຣື້ອງດ່ັງກ່າວນີ້ ວິທຍຸເອເຊັຍເສຣີ ໄດ້ພຍາຍາມຕິດຕໍ່ໄປຍັງ ຫ້ອງການພລັງງານແລະບໍ່ແຮ່ ເມືອງປາກອູ ເພື່ອສອບຖາມຂໍ້ມູນ ເພີ້ມຕື່ມ, ແຕ່ບໍ່ມີເຈົ້າໜ້າທີ່ ຮັບໂທຣະສັບ. ແລະເມື່ອວັນທີ 7 ເມສາ ຜ່ານມານີ້ ມີກຸ່ມຊາວບ້ານ ທີ່ລັກໄປຂຸດຄົ້ນຄໍາ ຢູ່ຖໍ້າດັ່ງກ່າວ ແລ້ວຖືກຫິນຖໍ້າຖລົ່ມທັບ ຈົນເສັຽຊີວິດ 3 ຄົນ ແລະໄດ້ຮັບບາດເຈັບສາຫັດ 9 ເນື່ອງຈາກຖືກຫິນທັບ ຍ້ອນກ່ອນໜ້າທີ່ຊາວບ້ານ ຈໍານວນດັ່ງກ່າວຈະເຂົ້າ ໄປລັກຂຸດຄໍາໃນຖໍ້ານັ້ນ ທາງບໍຣິສັດໄດ້ມີການ ຣະເບີດຫິນໃນຕອນເຊົ້າ ເຮັດໃຫ້ຫິນພາຍໃນຖໍ້າບໍ່ແຂງແຮງ ຈຶ່ງເຈື່ອນທັບໃສ່ຜູ້ເຄາະຮ້າຍ ກຸ່ມດັ່ງກ່າວນັ້ນ.

ເຕັມຫນ້າ