ປັ້ມນໍ້າມັນ ຫຼາຍແຫ່ງ ຍັງຂາດມາຕຖານ

ໄມຊູລີ
2018-05-16
ອີແມວລ໌
ຄໍາເຫັນ
Share
ພິມ
ປັ້ມນໍ້າມັນເຊື້ອເພີງ ໃນ ສປປລາວ
ປັ້ມນໍ້າມັນເຊື້ອເພີງ ໃນ ສປປລາວ
RFA

ເຈົ້າໜ້າທີ່ ທາງການລາວ ໄດ້ລົງກວດກາ ປັ້ມນໍ້າມັນ ຫຼາຍກ່ວາ 1,700 ແຫ່ງ ໃນທົ່ວປະເທດ ພົບວ່າ ສ່ວນຫຼາຍ ບໍ່ໄດ້ມາຕຖານ ແລະ ບໍ່ມີຄຸນນະພາບ ເຊັ່ນນໍ້າມັນ ມີ ເມທານອນ (methanol) ປະສົມຫຼາຍເກີນໄປ ແລະ ປັ້ມນໍ້າມັນ ຕັ້ງໃກ້ກັບເຂດຊຸມຊົນເກີນໄປ, ດັ່ງ ເຈົ້າໜ້າທີ່ ກວດກາ ຄຸນນະພາບ ນໍ້າມັນ ກະຊວງວິທຍາສາດ ແລະ ເທັກ​ໂນ​ໂລ​ຈີ ກ່າວຕໍ່ ວິທຍຸ ເອເຊັຽ ເສຣີ ວ່າ:

“ປະເທດລາວເນາະ ທີ່ວ່າ ຫ້າມ ເມທານ່ອນ ສ່ວນຫລາຍ ແມ່ນໂຕນີ້ ຫລັກໆແລ້ວ ບໍ່ໃຫ້ນໍາເຂົ້າເນາະ ລູກຄ້າໄປໃສ່ບໍ່ໄດ້ ປາຣິມານເຕັມ ຕົວນີ້ ກໍມີ ພວກເຮົາ ກໍ ກວດກາຢູ່ ແລະ ກໍວັດປາຣິມານ ຄືນໃໝ່ໝົດ ປັຈຈຸບັນ ກໍລົງ 2-3 ແຂວງ ກໍາລັງລົງກວດ.”

ທ່ານວ່າ ປັ້ມນໍ້າມັນ ໃນລາວ ຂາຍນໍ້າມັນ ທີ່ບໍ່ມີຄຸນນະພາບ ຍ້ອນແຕ່ລະຊນິດ ຂອງນໍ້າມັນ ມີ ເມທານ່ອນ ປະສົມ ຫລາຍເກີນ 5% ເຮັດໃຫ້ຈັກຣົດຕາຍໄວ ແລະ ປັ້ມນໍ້າມັນ ເກືອບທັງໝົດທົ່ວປະເທດ ຍັງບໍ່ໄດ້ມາຕຖານສາກົລ  ບໍ່ມີຖັງດັບໄຟຕິດຕັ້ງ ບາງແຫ່ງ ຈ່າຍນໍ້າມັນ ບໍ່ເຕັມອັດຕຣາ ເຊັ່ນຕົວຢ່າງ ເຈົ້າຂອງຣົຖ ໃສ່ນໍ້າມັນ 10 ລິດ ຈ່າຍຄ່ານໍ້າມັນ 10 ລິດ ແຕ່ຄວາມຈິງ ໄດ້ນໍ້າມັນ ແຕ່ 9 ລິດເທົ່ານັ້ນ. ສ່ວນ ປັ້ມນໍ້າມັນ ທີ່ໄດ້ມາຕຖານ ຄືປັ້ມນໍ້າມັນ ປຕທ ຂອງໄທ ເນື່ອງຈາກ ມີການນໍາໃຊ້ ເຕັກນິກ ເຄື່ອງແທກປະຣິມານນໍ້າມັນ ທີ່ມີມາຕຖານ ສູງ.

ປັດຈຸບັນຢູ່ລາວ ມີປັ້ມນໍ້າມັນ ທັງໝົດ 1,758 ແຫ່ງ ໃນທົ່ວປະເທດ ທີ່ຈົດທະບຽນການຄ້າ ຢ່າງຖືກຕ້ອງ ແລະ ຈະຖືກກວດ ເຣື້ອງຄຸນນະພາບ ຂອງ ປັ້ມນໍ້າມັນ ແລະ ຄຸນນະພາບ ຂອງນໍ້າມັນ ໃນທຸກໆ 3 ເດືອນ ຖ້າຜ່ານ ທາງເຈົ້າໜ້າທີ່ ຜູ້ກວດກາ ກໍຈະຕິດ sticker ຮັບປະກັນ ຄຸນນະພາບ ສະແດງຢ່າງຈະແຈ້ງ ແຕ່ຖ້າບໍ່ຜ່ານ ຫຼື ບໍ່ໄດ້ ມາຕຖານ ເຈົ້າຂອງປັ້ມນໍ້າມັນ ຈະຖືກປັບໃໝ ແລະ ໃຫ້ປັບປຸງແກ້ໄຂ ໂດຍໄວ.

ປັດຈຸບັນ ສປປລາວ ນໍານໍ້າມັນ ເຂົ້າຈາກປະ​ເທດໄທ ຫຼາຍກ່ວາ 80% ອີກ 20% ນໍາເຂົ້າ ຈາກມາເລເຊັຽ ແລະ ວຽດນາມ ມາຕຖານ ຂອງການ ນໍາເຂົ້ານໍ້າມັນ ທາງການລາວ ກໍນົດໄວ້ວ່າ ຫ້າມ ບໍ່ໃຫ້ມີ ອອກເທນ (Octane) ແລະ (Methanol) ເຈືອປົນ ກັບນໍ້າມັນ ຢ່າງເດັດຂາດ.

ເຕັມຫນ້າ