ຄ່າເຊົ່າຕລາດໜອງຈັນ ແພງຂຶ້ນ

ອຸ່ນແກ້ວ ສຸກສະຫວັນ
2016-10-14
ອີແມວລ໌
ຄໍາເຫັນ
Share
ພິມ
ຊາວຄ້າຂາຍ ຢູ່ຕະຫລາດໜອງຈັນ
ຊາວຄ້າຂາຍ ຢູ່ຕະຫລາດໜອງຈັນ
RFA/NY

ຊາວຄ້າຂາຍ ຢູ່ຕະຫລາດ ໜອງຈັນ 100 ກວ່າຄົນ ບໍ່ພໍໃຈ ທີ່ ຜູ້ບໍຣິຫານ ຕະຫລາດ ໜອງຈັນ ຈະຂຶ້ນ ຄ່າເຊົ່າຮ້ານ ແລະ ຄ່າທຳນຽມ ຣາຍວັນ. ອີງຕາມຂໍ້ມູນ ຈາກ ຊາວຄ້າຂາຍ ໄດ້ຮູ້ວ່າ ຄ່າເຊົ່າຮ້ານ ຢູ່ຕະຫລາດ ໜອງຈັນ ຈະຂຶ້ນຈາກ 70 ພັນກີບ ມາເປັນ 200 ພັນກີບ ຕໍ່ມື້, ແລະ ຄ່າທໍານຽມ ຣາຍວັນ ຈະຂຶ້ນຈາກ 9 ພັນກີບ ມາເປັນ 20 ພັນກີບ ຕໍ່ມື້. ດັ່ງ ຊາວຄ້າຂາຍ ຄົນນຶ່ງ ໄດ້ກ່າວຕໍ່ ເອເຊັຽເສຣີ ໃນ ວັນທີ 10 ຕຸລາ ວ່າ:

“ເອີ ເພິ່ນປະກາດ ອອກມາແລ້ວ ເພິ່ນເຮັດແຈ້ງການ ອອກມາໃຫ້ແລ້ວ ລະເພິ່ນຫັ້ນ ເລີ້ມຈາກວັນທີ 20 ນີ້ແຫຼະ ເພິ່ນຊິເກັບ ເພິ່ນເກັບຄ່າ ເພິ່ນເກັບ ເປັນມື້ ເພິ່ນຊິຂຶ້ນ 20 ພັນກີບ ຈາກ 9 ພັນກີບ ເປັນ 20 ພັນກີບ.”

ນອກຈາກນີ້ ຊາວຄ້າຂາຍ ຍັງກ່າວວ່າ ຜູ້ບໍຣິຫານ ຕະຫລາດ ໃຫ້ເຫດຜົນວ່າ ຂັ້ນຖ້າວ່າ ຂາຍບໍ່ໄດ້ລະ ໃຫ້ອອກ. ດັ່ງ ຊາວຄ້າຂາຍ ຄົນນີ້ ກ່າວອີກວ່າ:

"ກະພາກັນເວົ້າ ຢູ່ນີ້ແຫລະ ກະຈັກຊິເຮັດ ຈັ່ງໃດ ເພິ່ນວ່າ ຂັ້ນຂາຍບໍ່ໄດ້ ລະກະອອກ".

ໃນທ້າຍ ເດືອນ ກັນຍາ ທີ່ຜ່ານມາ ຊາວຄ້າຂາຍ ປະມານ 100 ຄົນ ພາກັນໄປ ເຈຣະຈາ ກັບ ເຈົ້າຂອງ ຕະຫລາດ ເລື້ອງ ຄ່າທຳນຽມ ຣາຍວັນ ແລະ ເຈົ້າຂອງ ຕະຫລາດ ຢືນຍັນວ່າ ຈະບໍ່ຂຶ້ນຄ່າ ທຳນຽມ ດັ່ງກ່າວ ຍັງຈະຢູ່ 9 ພັນກີບ ຄືເກົ່າ, ແຕ່ຕໍ່ມາ ເຈົ້າຂອງຕະຫລາດ ກໍມີແຈ້ງການ ອອກມາວ່າ ເກັບຣາຍວັນ ມາເປັນ 20 ພັນກີບ. ອີງຕາມ ການບອກເລົ່າ ຂອງ ຊາວຄ້າຂາຍ.

ແຕ່ໃນເວລາດຽວກັນ ເຈົ້າໜ້າທີ່ ຈັດສັນ ຕະຫລາດ ໜອງຈັນ ໄດ້ຊີ້ແຈງ ກັບ ເອເຊັຽເສຣີ ໃນວັນທີ 12 ຕຸລາ ວ່າສຳລັບ ຄ່າທຳນຽມ ປະຈຳວັນ ແມ່ນຂຶ້ນຈາກ 9 ພັນກີບ ມາເປັນ 20 ພັນກີບ ແລະ ຈະມີຜົນ ບັງຄັບໃຊ້ ໃນວັນທີ 20 ຕຸລາ ນີ້ ເປັນຕົ້ນໄປ, ສ່ວນວ່າ ຄ່າເຊົ່າຮ້ານ ນັ້ນ ຜູ້ບໍຣິຫານ ບໍ່ໄດ້ຂຶ້ນ ຣາຄາ ພຽງແຕ່ວ່າ ເພິ່ນຕັ້ງ ຣາຄາໃໝ່ ຍ້ອນວ່າ ເພິ່ນສ້າງ ຕຶກໃໝ່ ຫາກໍ່ສຳເລັດ ແລ້ວໃຫ້ ພວກຊາວຄ້າຂາຍ ໄປຢູ່ຕຶກໃໝ່.

ຕະຫລາດໜອງຈັນ ຢູ່ໃຈກາງ ນະຄອນຫຼວງ ວຽງຈັນ ໄດ້ຖືກສ້າງຂຶ້ນ ປະມານ 10 ປີຜ່ານມາ ຊຶ່ງຕິດກັບ ຕະຫລາດ ຂົວດິນ.

ເຕັມຫນ້າ