ຕລາດໃໝ່ໜອງພະຍາຍັງ ບໍ່ເກີດ

ມະນີຈັນ
2016.08.18
F-Nongphaya ເຂດບໍຣິເວນ ວັດໜອງພະຍາ
RFA/SI

ປະຊາຊົນ ທີ່ອາສັຍ ຢູ່ບ້ານໜອງພະຍາ, ຊຶ່ງມີປະມານ 3,000 ຄອບຄົວ, ຍັງຄອງຄອຍ ຕລາດແຫ່ງໃໝ່ ທີ່ ເຈົ້າໜ້າທີ່ ທ້ອງຖິ່ນ ສັນຍາ ວ່າ ຈະປຸກໃຫ້ ພວກຂະເຈົ້າ ເກືອບ 10 ປີ ຜ່ານມາແລ້ວ, ພາຍຫລັງ ທີ່ ເຈົ້າໜ້າທີ່ ທ້ອງຖິ່ນ ໄດ້ຈັດສັນ ເອົາດິນຣັດ ໃນ ບໍຣິເວນ ວັດ ໜອງພະຍາ ມາເປັນ ສົມບັດ ສ່ວນຕົວ, ອີງຕາມ ການບອກເລົ່າ ຂອງຊາວບ້ານ ໜອງພະຍາ ຕໍ່ ວິທຍຸ ເອເຊັຽ ເສຣີ ເມື່ອສັປດາ ຜ່ານມາ. ຊາວບ້ານ ໜອງພະຍາ ທ່ານນຶ່ງ ທີ່ ບໍ່ປະສົງ ອອກຊື່ ແລະ ອອກສຽງ ກ່າວວ່າ:

“ກ່ອນຊິປັນດິນ ໃຫ້ ແຕ່ລະຄົນນີ້ ເພິ່ນວ່າ ປັນແລ້ວ ຊິສ້າງຕລາດ ໃຫ້ຊາວບ້ານ ໜອງພະຍາ, ແຕ່ຕັ້ງນັ້ນ ມາຮອດ ປັດຈຸບັນນີ້ ກະຍັງ ບໍ່ມີຫຍັງ ເກີດຂຶ້ນ ທີ່ເປັນຜົນດີ ອັນນີ້ແມ່ນ ເຕັກນິກ ການຕົວະ ແຂກລົງເຮືອນ ເພື່ອບໍ່ໃຫ້ ເຣື່ອງລາວ ວຸ້ນວາຍ ເກີນໄປ ຮອດຫູ ຜູ້ໃຫຍ່.”

ນອກຈາກນັ້ນ, ຊາວບ້ານ ກະຍັງມີ ຂໍ້ຂ້ອງໃຈ ທີ່ ເຈົ້າໜ້າທີ່ ທ້ອງຖິ່ນ ຊຶ່ງນໍາໂດຍ ອະດີດ ເຈົ້າເມືອງ ເມືອງໄຊທານີ ພ້ອມກັບ ທິມງານ ຂອງທ່ານ ໄດ້ແບ່ງປັນ ເອົາດິນ ໃນ ບໍຣິເວນ ວັດ ໜອງພະຍາ ມາເປັນຂອງ ໂຕເອງ ທັ້ງໆທີ່ ແຕ່ລະຄົນ ກະມີດິນ ແລະ ຊັພສິນ ຫຼາຍຢູ່ແລ້ວ:

“ຄັນແມ່ນວ່າ ຫາກ ສະມາຊິກບ້ານ ບໍ່ມີທີ່ຢູ່ ອາສັຍແທ້ໆ  ກໍແນວນຶ່ງ, ຊາວບ້ານ ກໍຄົງບໍ່ມີໃຜ ຂັດຂ້ອງດອກ ແຕ່ອັນນີ້ ໄດ້ດິນ ແລະ ໜັງສື ຖືກຕ້ອງແລ້ວ ຂະເຈົ້າ ກໍພາກັນ ຂາຍ ເພາະຄົນພວກນີ້ ບໍ່ແມ່ນວ່າ ເຂົາທຸກຍາກ ຫຍັງ ພຽງແຕ່ ຢາກຊອກຫາ ຜົລປໂຍດ ຊື່ໆ.”

ສ່ວນຊາວບ້ານອີກຜູ້ນຶ່ງ ທີ່ ບໍ່ປະສົງ ອອກຊື່ ກ່າວວ່າ:

“ທີ່ຈິງແລ້ວ ກະຢາກໃຫ້ ຜູ້ໃຫຍ່ໄມ້ສູງ ຂອງບ້ານ ຂອງເມືອງ ຫັ້ນລະ ມາແກ້ໄຂ ບັນຫາ ເຣື່ອງບັນຫາ ຂໍ້ຂັດແຍ່ງ ຜົລປໂຍດ ທາງທີ່ດິນ ມັນກໍມີ ມາດົນນານລະ, ບໍ່ແມ່ນ ຫາກໍມີມາ ມື້ນີ້ມື້ວານ ເພາະ ຫວ່າງນຶ່ງ ກະເຫັນ ເຂົາສເນີ ຂຶ້ນເມືອ ຮອດພຸ້ນ ຮອດສະພາ ແຫ່ງຊາດ ພຸ້ນ ສຸດທ້າຍ ກໍມະຫັນມະຫາຍ ລະບໍ່ມີຫຍັງ.”

ກ່ຽວກັບ ບັນຫາດັ່ງກ່າວ ວິທຍຸ ເອເຊັຽ ເສຣີ ໄດ້ ໂທຣະສັບ ໄປຖາມ ເຈົ້າໜ້າທີ່ ທ້ອງຖິ່ນ, ຊຶ່ງ ເຈົ້າໜ້າທີ່ ຫ້ອງການບ້ານ ກ່າວວ່າ:

“ຣັຖບານ ເພິ່ນຍັງ ສົ່ງມາໃຫ້ ນະຄອນຫຼວງ ແກ້ໄຂຢູ່, ນະຄອນຫຼວງ ຍັງບໍ່ທັນໄດ້ ໃຫ້ຄໍາຕອບ ເທື່ອ ເຮັດຈັ່ງໃດ ຊິສ້າງ ຕລາດໄດ້, ຍັງບໍ່ໄດ້ ແກ້ໄຂນ່າ. ກວດກາ ຣັຖບານ ເພິ່ນຕ້ອງ ກວດກາຢູ່ນະ, ເພິ່ນຍັງບໍ່ທັນ ໃຫ້ ຄໍາຕອບ ຫຍັງ ນີ່ນະ, ກວດກາ ເຣື່ອງທີ່ດິນ ເຣື້່ອງ ຄວາມຖືກຕ້ອງ ຫຍັງຕ່າງໆ. ຊິມອບໃຫ້ບ້ານ ຄືນເບາະ ຫືວ່າ ຊິມອບໃຫ້ ສ່ວນບຸກຄົນ ນໍາໃຊ້ເບາະ ນີ້ນ່າ, ໃຫ້ ພະນັກງານ ນີ້ແລ້ວ ຣັດເຮົາ ນີ້ແລ້ວ ນໍາໃຊ້ນະ.”

ເຖິງຢ່າງໃດ ກໍຕາມ, ຊາວບ້ານ ໜອງພະຍາ ຍັງຄອງຄອຍ ແລະ ມີຄວາມຫວັງ ໄວ້ວ່າ ຈະມີຜູ້ມາ ແກ້ໄຂ ຂໍ້ຂ້ອງໃຈ ເຣື່ອງການ ປຸກ ຕລາດໃໝ່ນີ້ ໃຫ້ ພວກຂະເຈົ້າ ແລະໃຫ້ຄວາມ ຖືກຕ້ອງ ແລະເປັນທັມ ໃນການນໍາເອົາ ດິນຂອງຣັດ ໄປເປັນຂອງ ສ່ວນໂຕ ໂດຍການໃຊ້ ສິດອໍານາດ ຂອງ ເຈົ້າໜ້າທີ່ ທ້ອງຖິ່ນ ຕາມລໍາພັງໃຈ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.