ທາງຣົດໄຟລາວວຽດນາມຍັງ ລ່ອງລອຍ

ມະນີຈັນ
2014.06.06
f-default ທາງຣົດໄຟລາວວຽດນາມຍັງ ລ່ອງລອຍ
RFA

 

ບໍຣິສັດ Giant Consolidated ຍັງບໍ່ ເປີດເຜີຍ ຄັກແນ່ ວ່າ ຈະເລີ້ມ ລົງມື ກໍ່ສ້າງ ທາງຣົດໄຟ ຄວາມໄວສູງ ລາວ-ວຽດນາມ ຢູ່ແຂວງ ສວັນນະເຂດ ນັ້ນ ເມື່ອໃດ ກັນແທ້ ເຖິງແມ່ນວ່າ ທາງ ບໍຣິສັດ ໄດ້ໃຫ້ ສັມພາດ ສື່ມວນຊົນ ລາວວ່າ ໂຄງການ ນັ້ນ ຍັງຢູ່ໃນ ແຜນການຢູ່ ແລະ ທາງ ບໍຣິສັດ ໄດ້ປັກແລວ ທາງ ບ່ອນທີ່ ຈະສ້າງ ທາງລົດໄຟ ນັ້ນ ສໍາເຣັດແລ້ວ ກໍຕາມ. ຕາມຄໍາເວົ້າ ຂອງ ເຈົ້າໜ້າທີ່ ກ່ຽວຂ້ອງ ຢູ່ ນະຄອນ ຫລວງ ວຽງຈັນ ໃນວັນທີ 5 ມີຖຸນາ 2014:

"ເຂົາກໍຢືນຢັນ ຕລອດວ່າ ເຂົາສິເຮັດ ຫັ້ນແລ້ວ ຫັ້ນນະ ແຕ່ວ່າ ສ່ວນວ່າ ອັນ ລາຍລະອຽດ ຄືບໜ້າ ແທ້ໆ ມື້ໃດແທ້ ສິເຮັດແທ້ ມັນກໍບໍ່ທັນ ຮູ້ ກໍານົດ ໝົດແລ້ວ ໃດ໋ ແລວ ທາງ ແລວຫຍັງ ຫັ້ນນະ".

ທ່ານກ່າວ ຕໍ່ ໄປວ່າ ສໍາລັບ ຣາຍຣະອຽດ ຂອງ ແຜນການ ສ້າງທາງ ຣົດໄຟ ນັ້ນ ທາງ ບໍຣິສັດ ຍັງບໍ່ທັນ ໄດ້ເປີດເຜີຍ ໃຫ້ຮູ້ ຢ່າງແຈ່ມແຈ້ງ ເທື່ອ, ເວົ້າ ພຽງແຕ່ວ່າ ສ່ວນ ໃຫຍ່ ທາງຣົດໄຟ ນັ້ນ ຈະຕັດຜ່ານ ທົ່ງນາ ຂອງ ປະຊາຊົນ ແຂວງ ສວັນນະເຂດ. ແຕ່ ຍັງບໍ່ຮູ້ວ່າ ຈະຜ່ານ ຫລາຍ ໜ້ອຍ ຊໍ່າໃດ. ແລະວ່າ ທາງ ຣັຖບານ ລາວ ແລະ ທາງ ບໍຣິສັດ ຈະຮ່ວມກັນ ກຽມແຜນ ການ ຊົດເຊີຍ ຄວາມ ເສັຽຫາຍ ໃຫ້ແກ່ ປະຊາຊົນ ທີ່ຈະໄດ້ ຮັບ ຜົລກະທົບ ນັ້ນ.

ສ່ວນເຣື່ອງ ອຸປກອນ ກໍ່ສ້າງ ທີ່ ຈໍາເປັນ ສໍາລັບ ໂຄງການ ສ້າງ ທາງຣົດໄຟ ເປັນຕົ້ນ ເຫລັກ ຫີນ ໄມ້ ນັ້ນ ທາງ ບໍຣິສັດ Giant Consolidated ຍັງບໍ່ໄດ້ ເວົ້າວ່າຈະ ເອົາມາຈາກ ໃສ. ສໍາລັບ ແຮງງານ ທີ່ຈະໃຊ້ ໃນການ ກໍ່ສ້າງ ກໍບໍ່ໄດ້ ເວົ້າເຖິງ ເທື່ອ ແຕ່ທ່ານ ຄາດວ່າ ທາງ ໂຄງການ ຄົງ ຕຣຽມແຜນ ໄວ້ແລ້ວ.

ເປັນທີ່ຮູ້ກັນ ໂດຍທົ່ວໄປ ວ່າ ໂຄງການ ທາງຣົດໄຟ ຄວາມໄວສູງ ທີ່ ມີຄວາມຍາວ 220 ກິໂລແມັຕ ແລະ ມູລຄ່າ ໃນການ ກໍ່ສ້າງ 5 ຕື້ ໂດລາ ສະຫະຣັດ ນັ້ນ ຍັງຢູ່ ໃນແຜນການ ທີ່ຈະສ້າງ ຢູ່ ເພາະໄດ້ ມີພິທີ ວາງສີລາເຣິກ ໄປແລ້ວ ເມື່ອ ປີກາຍ.

ຜ່ານມາ ນັກຊ່ຽວຊານ ໃນລາວ ເຄີຍຕັ້ງ ຄໍາຖາມວ່າ ເປັນໄປໄດ້ ຫລືບໍ່ ທີ່ ຈະເລີ້ມ ສ້າງທາງຣົດໄຟ ພາຍໃນ ປີນີ້ ເພາະ ຂະນະນີ້ ກໍເລີ້ມ ເຂົ້າສູ່ ຣະດູຝົນ ແລ້ວ ແຕ່ກໍ ຍັງ ບໍ່ເຫັນມີ ຄວາມຄືບໜ້າ ຫຍັງພໍ ເທົ່າໃດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.