ເຊ່ເວັ້ນ-ອີ່ເລ່ເວັ້ນ ກັງວົນ ຜູ້ຄ້າຍ່ອຍ ທ້ອງຖິ່ນ

ພູວົງສ໌
2019-03-06
ອີແມວລ໌
ຄໍາເຫັນ
Share
ພິມ
ຮ້ານຄ້າຂາຍເຄື່ອງຍ່ອຍ ທີ່ເປັນເຈົ້າຂອງໂດຍ ປະຊາຊົນ ໃນທ້ອງຖິ່ນ
ຮ້ານຄ້າຂາຍເຄື່ອງຍ່ອຍ ທີ່ເປັນເຈົ້າຂອງໂດຍ ປະຊາຊົນ ໃນທ້ອງຖິ່ນ
RFA/LX

ຜູ້ປະກອບການຮ້ານຂາຍເຄື່ອງຍ່ອຍ ຕາມບ້ານເຮືອນ ແລະ ຮ້ານມິນິມາທ ຈຳນວນຫຼາຍ ຮູ້ສຶກເປັນກັງວົນໃຈ ຖ້າຫາກກຸ່ມ ບໍຣິສັດ CP-All ຈາກ ປະເທສໄທ ຈະເຂົ້າມາເປີດສາຂາ ຮ້ານສະດວກຊື້ ຫຼື ເຊ່ເວັ້ນ-ອີ່ເລ່ເວັ້ນ ໃນປະເທສລາວ, ເນື່ອງຈາກ ຜູ້ປະກອບການເຫັນວ່າ ຮ້ານສະດວກຊື້ ໃນລາວ ກໍນັບມື້ນັບມີຫຼາຍຂຶ້ນ ແລ້ວ ຢ້ານວ່າຈະມາຍາດ ລູກຄ້າທ້ອງຖິ່ນຂອງຕົນ ແລະ ຈະສູ້ກຸ່ມທຶນຈາກ ໄທ ບໍ່ໄຫວ ໃນທີ່ສຸດ. ດັ່ງເຈົ້າຂອງຮ້ານສະດວກຊື້ ຫຼືມິນິມາທ ໃນນະຄອນຫຼວງວຽງຈັນ ນາງນຶ່ງ ໄດ້ກ່າວຕໍ່ ຜູ້ສື່ຂ່າວເອເຊັຽເສຣີ ໃນມື້ວັນທີ 05 ມີນາ ນີ້ວ່າ:

“ເມື່ອມີຮ້ານເພີ້ມຂຶ້ນມັນກະຕ້ອງມີແດ່, ວ່າຊີ້ສາ ມັນຫຼາຍຮ້ານຂຶ້ນ, ແຕ່ປົກກະຕິຢູ່ໜີ້ມັນກະຫຼາຍຢູ່ແລ້ວເນາະບ້ານເຮົາ. ເຣື້ອງຍອດຂາຍຕົກ ມັນກະຕ້ອງຕົກແດ່ ລະກະຕ້ອງເອີ່ມັນກະຕ້ອງມີ ຜົລກະທົບ. ເພິ່ນມີຫຼາຍທາງເລືອກຂຶ້ນນ່າ ພວກລູກຄ້າ ເລືອກຊື້, ວ່າຊີ້ສາ. ເຮົາກະເບິ່ງ ຕາມສະພາບໂຕຈິງ. ບ້ານເມືອງເຮົານັບມື້ ຫາກິນຍາກ.”

ຍານາງກ່າວຕື່ມອີກວ່າ ສູ່ມື້ນີ້, ການຫາຢູ່ຫາກິນກໍພົບຄວາມຫຍຸ້ງຍາກຫຼາຍແລ້ວ ມີການແຂ່ງຂັນກັນສູງຣະຫວ່າງ ຜູ້ປະກອບການພາຍໃນ ແລະຕ້ອງມາແຂ່ງຂັນ ກັບກຸ່ມທຶນຈາກຕ່າງປະເທສ ກໍຍິ່ງຈະເປັນເຣື້ອງ ທີ່ໜັກໜາສາຫັດຂຶ້ນໄປອີກຕື່ມ, ນາງຈຶ່ງຢາກວິງວອນໃຫ້ພາກສ່ວນ ກ່ຽວຂ້ອງຄຳນຶງເຫັນຜົລປໂຍດ ຂອງຜູ້ປະກອບການທ້ອງຖິ່ນ ດີກວ່າຈະໃຫ້ກຸ່ມທຶນໃຫຍ່ ເຂົ້າມາສ້າງກຳລັຍ ໃຫ້ກັບເຂົາເອງຈົນຜູ້ປະກອບ ການທ້ອງຖິ່ນຢູ່ບໍ່ໄດ້.

ຜູ້ປະກອບການຮ້ານຂາຍເຄື່ອງຍ່ອຍ ໃນນະຄອນຫຼວງວຽງຈັນອີກທ່ານນຶ່ງ ກໍໄດ້ກ່າວຕໍ່ຜູ້ສື່ຂ່າວເອເຊັຽເສຣີ ໃນທຳນອງດຽວກັນ ໃນມື້ດຽວ ກັນນີ້ວ່າ ຖ້າຫາກ ເຊ່ເວັ້ນ-ອີ່ເລ່ເວັ້ນ ຈະເຂົ້າມາເປີດສາຂາໃນລາວ ກໍຄົງເຮັດໃຫ້ ຜູ້ປະກອບການທ້ອງຖິ່ນ ຖືກຍາດ ລູກຄ້າໄປ ທັງໆທີ່ ປະຊາກອນລາວ ທີ່ເປັນລູກຄ້າທົ່ວໄປກໍມີ ຈຳນວນໜ້ອຍຢູ່ແລ້ວ.

“ເຊ່ເວັ້ນຊິເຂົ້າມາອີກນີ້ ກະບໍ່ຮູ້ວ່າຊິເຂົ້າມາ ເພື່ອຂາຍໃຫ້ໃຜອີກ ເພາະວ່າຄົນລາວເຮົາມັນໜ້ອຍ ມັນບໍ່ໄດ້ຫຼາຍພໍປານນັ້ນ, ຫັ້ນນ່າ. ຄືເຂົ້າມາເຮົາກະມາຍາດ ລູກຄ້າກັນລ້າໆ. ແນ່ນອນລະ, ຄືເຮົາຈັ່ງຊີ້ ໄທເຮົາເຈົ້າຂ້ອຍຂາຍເຄື່ອງສົ່ງ ຂາຍເຄື່ອງ ຕາມໜ້າບ້ານ ຈັ່ງຊີ້ ມັນຖືກຍາດລູກຄ້າໄປຢູ່ແລ້ວ ເພາະວ່າຕ້ອງເຂົ້າໃຈ ຄຳວ່າຮ້ານສະດວກຊື້ເນາະວ່າ ມັນມີທຸກຢ່າງ.”

ໃນຂນະດຽວກັນ, ຜູ້ປະກອບການຮ້ານມິນິມາທ ໃນແຂວງສະຫວັນນະເຂດ ນາງນຶ່ງ ກໍໄດ້ກ່າວຕໍ່ຜູ້ສື່ຂ່າວ ເອເຊັຽເສຣີ ໃນມື້ດຽວກັນນັ້ນວ່າ ນາງບໍ່ຮູ້ສຶກກັງວົນໃຈ ເລີຍ ເພາະເຊື່ອວ່ານິສັຍຄົນລາວ ມັກຊື້ເຄື່ອງໃຊ້ສອຍທີ່ຢູ່ໃກ້ເຮືອນຊານຂອງຕົນ ຫຼາຍກວ່າ ຈະໄປຊື້ຢູ່ຮ້ານໃດຮ້ານນຶ່ງ ແບບເຈາະຈົງ ແລະ ຮ້ານສະດວກຊື້ແບບ ເຊ່ເວັ້ນ-ອີ່ເລ່ເວັ້ນ ກໍມີຫຼາຍແລ້ວ.

“ເພາະວ່າຮ້ານຄ້າແບບທີ່ເຣີ້ມເປັນລັກສນະ ມິນິມາທ ຄ້າຍໆເຊເວັນ ນີ້ກະຫຼາຍຢູ່ແລ້ວ ມີຫຼາຍຢູ່ແລ້ວ, ຫັ້ນນ່າ. ເພາະວ່າສ່ວນຫຼາຍຄົນລາວ ກະຢູ່ໃສໃກ້ບ້ານ ເຂົາກະຊື້ຢູ່ໃນຫັ້ນໂລດ ເຂົາບໍ່ໄດ້ແບ່ງແຍກວ່າ ຕ້ອງຮ້ານໃດ ຕ້ອງນຳໄປຊື້ຢູ່ຫັ້ນ, ຫັ້ນນ່າ. ເພາະວ່າມັນມີຫຼາຍຢູ່ແລ້ວ.”

ຍານາງກ່າວເພີ້ມວ່າ ໃນນາມສ່ວນໂຕແລ້ວ ເຖິງວ່າຈະບໍ່ຮູ້ສຶກກັງວົນ, ແຕ່ການເຂົ້າມາຂອງ ເຊ່ເວັ້ນ-ອີ່ເລ່ເວັ້ນ ອາຈເຮັດໃຫ້ກຸ່ມຊາວໜຸ່ມລາວ ທີ່ເປັນປະຊາກອນ ສ່ວນໃຫຍ່ ຂອງປະເທສ ຫັນໄປໃຊ້ບໍຣິການຫຼາຍຂຶ້ນ ເພາະສ່ວນຫຼາຍແລ້ວ ຊາວໜຸ່ມລາວ ມັກຄວາມທັນສມັຍ ແລະ ສະດວກສະບາຍ ຊື້ງ່າຍ-ກິນງ່າຍ. ແນ່ນອນ, ຜູ້ປະກອບການທ້ອງຖິ່ນ ອາຈເສັຽກຸ່ມລູກຄ້າ ທີ່ເປັນຊາວໜຸ່ມໃຫ້ກັບ ເຊ່ເວັ້ນ-ອີ່ເລ່ເວັ້ນ ໃນທີ່ສຸດ.

ກ່ຽວກັບເຣື້ອງນີ້, ນັກວິຊາການດ້ານເສຖກິຈໃນລາວ ໄດ້ໃຫ້ທັສນະ ຕໍ່ຜູ້ສື່ຂ່າວເອເຊັຽເສຣີວ່າ ແຜນການຈະເຂົ້າມາເປີດສາຂາ ຮ້ານສະດວກຊື້ ເຊ່ເວັ້ນ-ອີ່ເລ່ເວັ້ນ ຂອງກຸ່ມທຶນຈາກໄທ ຈະເຮັດໃຫ້ລາວ ຕົກເປັນພຽງຕລາດຈຳໜ່າຍສິນຄ້າ ຂອງກຸ່ມ ບໍຣິສັດ ໄທ ເພາະລາວບໍ່ມີພື້ນຖານ ການຜລິຕ ທີ່ດີພໍຈະປ້ອນເຂົ້າຣະບົບ ຮ້ານສະດວກຊື້ກຸ່ມນີ້ ແລະ ຈະເຮັດໃຫ້ກຳລັຍຕົກໄປໃສ່ກຸ່ມທຶນໃຫຍ່ ຫຼາຍກວ່າຈະຕົກໃສ່ ຜູ້ປະກອບການທ້ອງຖິ່ນທີ່ມີຢູ່.

“ມັນສະດວກ ມັນສະດວກຢູ່ວິທີເຮົາຂາຍ, ແຕ່ວ່າ ທຸຣະກິຈການຄ້າຂາຍ ມັນຊິໄປຕົກຢູ່ໃນມືເຂົາຜູ້ດຽວຫັ້ນ. ມັນກະທົບຫັ້ນແຫຼະ ເຂົາເຂົ້າມາເຄື່ອງເຂົາ ຣາຄາຖືກກ່ອນ, ຣາຄາມັນກະບໍ່ຖືກກ່ອນກັນຫຼາຍ ຖືກກ່ອນໜ້ອຍດຽວ. ແຕ່ວ່າເຂົາຫັ້ນນ່າ ຈະມາແຊກແຊງ ເສຖກິຈຂອງເຈົ້າໂດຍກົງເລີຍ. ການຄ້າການຂາຍເງິນເຂົາຕ້ອງເອົາອອກໄປ ເຂົາເອົາເຂົ້າມາ, ເຈົ້າກະເປັນຕລາດໃນໂຕໃຫ້ເຂົາ ເຈົ້າບໍ່ໄດ້ມີຖານການຜລິຕ. ມີແຕ່ຊື້ຶ້ກິນ ຊື້ກິນ ຊື້ຂອງເຂົາກິນ, ເຈົ້າຊິໄດ້ຫຍັງບາດນີ້ນ່າ.”

ປະຈຸບັນ, ກຸ່ມທຶນຮ້ານສະດວກຊື້ ຫຼືມິນິມາທ ພວມເຂົ້າມາເປີດ ແລະ ຂຍາຍສາຂາໃນລາວ ຢ່າງຫຼວງຫຼາຍ ເປັນຕົ້ນວ່າ ຮ້ານສະດວກຊື້ Jiffy ທີ່ມີຢູ່ຕາມປ້ຳນ້ຳມັນ ປຕທ ທຸກແຫ່ງໃນທົ່ວປະເທສລາວ. ເມື່ອທ້າຍປີ 2018 ທີ່ຜ່ານມາ, ກຸ່ມທຶນຂອງບໍຣິສັດ ເບີ່ລີ້-ຢຸກເກີ້ ຫຼື BJC ທີ່ເປັນເຈົ້າຂອງຮ້ານຄ້າ ຂນາດໃຫຍ່ໃນໄທ ຫຼື Big-C ໄດ້ປະກາດຮ່ວມທຶນ ກັບບໍຣິສັດຮ້ານສະດວກຊື້ ຂອງລາວ ຫຼື M-Point Mart ທີ່ມີສາຂາ 45 ແຫ່ງຢູ່ແລ້ວນັ້ນ, ກໍພວມທະຍອຍປ່ຽນຮ້ານ ໃຫ້ກາຍມາເປັນ Mini Big-C ໃນລາວ.

ຈົນມາເຖິງກໍຣະນີຫຼ້າສຸດ, ຄືເມື່ອທ້າຍເດືອນມົກກະຣາທີ່ຜ່ານມານີ້, ຄນະບໍຣິຫານງານຂອງກຸ່ມບໍຣິສັດ CP-All ຈາກປະເທສໄທ ໄດ້ມີມະຕິຕົກລົງ ໃຫ້ມີການ ເຈຣະຈາ ເພື່ອຈະເຂົ້າມາເປີດສາຂາ ຮ້ານສະດວກຊື້ ຫຼື ເຊ່ເວັ້ນ-ອີ່ເລ່ເວັ້ນ ໃນປະເທສລາວ ແລະ ກຳພູຊາ, ເຊິ່ງທາງບໍຣິສັດໄດ້ເລັງເຫັນວ່າ ຖ້າຫາກສາມາດ ເຂົ້າໄປ ເປີດສາຂາ ເຊ່ເວັ້ນ-ອີ່ເລ່ເວັ້ນ ໃນ 2 ປະເທສນີ້, ກໍໝາຍເຖິງກຳລັຍ ອັນມຫາສານໃນອະນາຄົດຂອງບໍຣິສັດ.

ທີ່ໄດ້ກ່າວມາຂ້າງເທິງນັ້ນ ລ້ວນແຕ່ແມ່ນສຽງສະທ້ອນຂອງຜູ້ປະກອບການທ້ອງຖິ່ນ ແລະ ປະຊາຊົນລາວ ທີ່ມີຄວາມກັງວົນ ຕໍ່ການຈະກ້າວເຂົ້າມາ ຂອງກຸ່ມທຶນ ຈາກຕ່າງປະເທສ ທີ່ຫຼາຍຄົນເຊື່ອວ່າ ມັນຈະສ້າງຜົລປໂຍດໃຫ້ແກ່ກຸ່ມທຶນ, ແຕ່ພັດສ້າງບັນຫາ ໃຫ້ກັບອະນາຄົດຂອງຜູ້ປະກອບການ ທ້ອງຖິ່ນທີ່ມີຢູ່.

ເຕັມຫນ້າ