ພໍ່​ຄ້າ​ໄມ້ ຫັນ​ມາ​ສົ່ງ​​ອອກ ຜ່ານດ່ານວຽງຈັນ-ໜອງຄາຍ

ອຸ່ນແກ້ວ ສຸກສະຫວັນ
2019-03-01
Share
F-logs ໄມ້ທີ່ຈະສົ່ງໄປຈີນ ຮູບຖ່າຍເດືອນ ທັນວາ 2018
ຮູບພາບຈາກ: ນັກຂ່າວພົລເມືອງ

ພໍ່ຄ້າໄມ້ທ່ານນຶ່ງ ຜູ້ທີ່ບໍ່ປະສົງອອກຊື່ແລະສຽງ, ໄດ້ກ່າວຕໍ່ເອເຊັຽເສຣີວ່າ: ພວກຄ້າໄມ້ຈາກຫຼາຍແຂວງ ເອົາໄມ້ມາຜ່ານຂົວມິຕພາບ ວຽງຈັນ -ໜອງຄາຍ ຍ້ອນວ່າ ມັນງ່າຍໃນການແລ່ນເອກສານ ແລະ ລາຄາຖືກກວ່າ ຢູ່່ຕ່າງແຂວງ.

ພວກພໍ່ຄ້າ ຈາກແຂວງໄຊຍະບູລີ, ອັດຕະປື, ສະຫວັນນະເຂດ ແລະ ບໍລິຄຳໄຊ ຈະມາແລ່ນເອກສານເອົາໄມ້ອອກ ຢູ່ນະຄອນຫລວງວຽງຈັນ ເພື່ອສົ່ງໄມ້ອອກ ຜ່ານ ຂົວມິຕພາບວຽງຈັນ-ໜອງຄາຍ ແລະ ສົ່ງຕໍ່ໄປປະເທດຈີນ ໂດຍທາງເຮືອ.

ພໍ່ຄ້າໄມ້ເລີ້ມຫັນມາສົ່ງໄມ້ອອກທາງດ່ານຂົວມິຕພາບ ວຽງຈັນ-ໜອງຄາຍ ຫລັງຈາກທີ່ມີ ຄຳສັ່ງເລກທີ 15 ຂອງນາຍົກ ປີ 2016 ວ່າດ້ວຍ ການເພີ້ມທະວີຄວາມ ເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸຣະກິດໄມ້.

ພໍ່ຄ້າໄມ້ທ່ານນີ້ກ່າວວ່າ, ຢູ່ຕ່າງແຂວງ ໃນການແລ່ນເອກສານຕ້ອງໄດ້ຈ່າຍເງິນ ແຕ່ 27-33 ພັນ ໂດລາ ຕໍ່ຣົດບັນທຸກນຶ່ງຄັນ ທີ່ບັນຈຸໄມ້ ນ້ຳໜັກ 28 ຕັນ, ໃນຂນະທີ່ ຢູ່ນະຄອນຫລວງວຽງຈັນ ຈ່າຍຄ່າແລ່ນເອກສານພຽງແຕ່ 12 ພັນ ໂດລາ ຊຶ່ງເງິນຈຳນວນດັ່ງກ່າວແມ່ນ ຈ່າຍໃຫ້ ເຈົ້າໜ້າທີ່ຂະແໜງການພາສີ, ການຄ້າ, ປ່າໄມ້ ແລະ ຊັບສິນ ເພື່ອອຳນວຍຄວາມສະດວກ.

ລາຄາໄມ້ດູ່ ຢູ່ປະເທດລາວປະມານ 2,000 ໂດລາ ຕໍ່ຕັນ, ແຕ່ ຖ້າໄມ້ໄປເຖິງປາຍທາງ ປະເທດຈີນ ລາຄາໄມ້ຈະເພີ້ມຂຶ້ນເປັນ 5,000 ໂດລາ ຕໍ່ຕັນ ແລະ ໄມ້ ຈຳນວນ 28 ຕັນ ຢູ່ໃນຣົດບັນທຸກ 1 ຄັນ ຈະມີມູນຄ່າ 140,000 ໂດລາ, ອີງຕາມຂໍ້ມູນຈາກພໍ່ຄ້າໄມ້ ທ່ານນີ້.

ຜູ້ຮັບແລ່ນເອກສານສາມາດແລ່ນເອກສານໄດ້ຕລອດເວລາ, ທີ່ພໍ່ຄ້າໄມ້ຕ້ອງການ ໂດຍບໍ່ໄດ້ອີງໃສ່ຈຳນວນໄມ້ ວ່າຈະຫລາຍຫລືໜ້ອຍ, ພໍ່ຄ້າໄມ້ຄົນນີ້ກ່າວອີກວ່າ; ປະເພດໄມ້ທີ່ສົ່ງອອກນັ້ນ, ສ່ວນຫຼາຍຈະເປັນໄມ້ດູ່ ທີ່ຈະຖືກດັດແປງໃຫ້ຄ້າຍຄືກັບໄມ້ທີ່ຖືກແປຮູບເປັນສິນຄ້າ, ແຕ່ໃນນັ້ນ ຈະມີໄມ້ທີ່ບໍ່ໄດ້ແປຮູບ ປົນຢູ່ນຳ ແລະໄມ້ດັ່ງກ່າວ ຈະບໍ່ມີໂຄຕາ ແລະບໍ່ມີທີ່ໄປທີ່ມາ.

ກ່ຽວກັບເລື່ອງນີ້ ທ່ານ ທອງພັດ ວົງມະນີ ຮອງຣັຖມົນຕຼີ ກະຊວງກະສິກັມ ແລະປ່າໄມ້ ກໍປະຕິເສດວ່າ ມັນເປັນຂ່າວລື ທີ່ພວກຄ້າໄມ້ ຂັດແຍ່ງກັນ ແລະ ໂຈມຕີກັນ, ດັ່ງທ່ານ ໄດ້ກ່າວຕໍ່ເອເຊັຽເສຣີ ວ່າ:

"ພໍ່ຄ້າໄມ້ມີການໂຈມຕີກັນ, ພໍ່ຄ້າໄມ້ມີການໃສ່ຮ້າຍປ້າຍສີກັນ, ລະຫ່ວາງເຂົາເຈົ້າເອງຫັ້ນນ່າ, ບາງເທື່ອເຂົາກະຟ້ອງມາຫາພວກເຮົາ, ເມື່ອ ໄປກວດເບິ່ງຕົວຈິງ ພັດບໍ່ມີ ຊັ້ນນ່າ, ສ້າງເລື່ອງສ້າງລາວ ໃສ່ເຂົາເອງກະມີນ່າ, ບາງຄົນກະເຊື່ອຖືໄດ້ ບາງຄົນກະເຊື່ອຖືບໍ່ໄດ້, ອັນນີ້ກະ ຢ່າຊູຖືອັນນັ້ນ ເປັນຂໍ້ມູນສຳຄັນຫລາຍ."

ທ່ານ ທອງພັດ ກ່າວຕື່ມອີວ່າ, ໄມ້ທີ່ສົ່ງໄປຈາກປະເທດລາວ: ກໍຈະມີການຂຶ້ນທະບຽນຢູ່ປະເທດໄທ; ຄັນເວົ້າເລື່ອງຂໍ້ມູນ ມັນຕ້ອງກວດກາ ຮ່ວມກັນ ລະຫວ່າງ ຂໍ້ມູນຂອງ ປະເທດລາວ ກັບຂໍ້ມູນຂອງປະເທດໄທ ບາງເທື່ອຢູ່ລາວບໍ່ມີການບັນທຶກໄວ້, ແຕ່ຢູ່ເບື້ອງໄທ ອາດຈະມີ ຖ້າເປັນກໍຣະນີນັ້ນ, ກໍອາດຈະແມ່ນເຈົ້າໜ້າທີ່ ລາວ ສົມຮູ້ຮ່ວມຄິດສົ່ງໄມ້ໄປ.

ເຖິງຢ່າງໃດກໍຕາມ, ມີຣາຍງານຈາກທາງການລາວວ່າ, ໃນປີ 2014 ຕົວເລກໄມ້ຈາກປະເທດລາວ ສົ່ງໄປປະເທດວຽດນາມ ມີປະມານ 300 ພັນແມັດກ້ອນ, ແຕ່ ຂໍ້ມູນຈາກດ້ານພາສີວຽດນາມ ໄດ້ລະບຸວ່າ, ໄມ້ຈາກປະເທດລາວສົ່ງໄປວຽດນາມ ຫລາຍກ່ວາ 1 ລ້ານ ແມັດກ້ອນ ຊຶ່ງຈະບໍ່ກົງກັບຂໍ້ມູນຈາກ ດ້ານພາສີຂອງລາວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ