ໂຍທາຈະກວດຄືນການກໍ່ສ້າງ ຫົນທາງ

ສຸພັດຕາ
2019-04-04
ອີແມວລ໌
ຄໍາເຫັນ
Share
ພິມ
ຖນົນຄຸ້ມບ້ານສີໃຄ (ຖນົນສຸພານຸວົງ)
ຖນົນຄຸ້ມບ້ານສີໃຄ (ຖນົນສຸພານຸວົງ)
RFA/LX

ກະຊວງໂຍທາທິການແລະຂົນສົ່ງ ຈະກວດສອບແລະປະເມີນຄືນສັນຍາ ການສ້າງຖນົນຫົນທາງ ກັບບໍຣິສັດຮັບເໝົາກໍ່ສ້າງ ໃນທົ່ວປະເທດ, ຫຼັງຈາກພົບເຫັນວ່າ ຖນົນຫຼາຍແຫ່ງໃນລາວ ມີມູນຄ່າການກໍ່ສ້າງສູງ, ແຕ່ຄຸນນະພາບ ບໍ່ໄດ້ມາຕຖານ ພ້ອມທັງ ຈະໂອລົມ ກັບບໍຣິສັດ ເອກກະຊົນ ທັງພາຍໃນແລະຕ່າງປະເທດ ທີ່ໃຊ້ຣົດບັນທຸກຂນາດໃຫຍ່, ຊຶ່ງເຮັດໃຫ້ຖນົນເປ່ເພ ຮ່ວມດ້ວຍການວາງມາຕການ ໃນການສ້າງ ທາງໃຫ້ເຂັ້ມງວດຂຶ້ນກວ່າເກົ່າ, ດັ່ງເຈົ້າໜ້າທີ່ ໂຍທາທິການ ແລະຂົນສົ່ງນະຄອນຫຼວງວຽງຈັນ ທ່ານນຶ່ງກ່າວຕໍ່ວິທຍຸເອເຊັຍເສຣີ ໃນວັນທີ 3 ເມສາ ນີ້ວ່າ:

“ເຮົາເຮັດທາງມາງາມກໍຕາມ ແຕ່ວ່າຂະເຈົ້າໃຊ້ໃນການຂົນແຮ່ຊາຍອິຫຍັງຫຼາຍ ເຮັດໃຫ້ທາງເພໄວ ເພແລ້ວກໍບໍ່ມີການສ້ອມແປງຊ່ວຍ, ທາງ ຫັ້ນເປັນຂຸມ ເພາະວ່າ ຣົດຂະເຈົ້າແລ່ນຕລອດ ແລ້ວກໍບໍ່ມີການອະນາມັຍ ດົນໄປມັນກໍຈະມີການເປ່ເພຄືເກົ່າ.”

ກ່ຽວກັບການກວດສອບ ແລະປະເມີນຄືນສັນຍາ ກັບບໍຣິສັດຮັບເໝົາກໍ່ສ້າງທາງນັ້ນ ໄດ້ມີການເວົ້າຢູ່ໃນກອງປະຊຸມໂຍທາທິການແລະຂົນສົ່ງ ທົ່ວປະເທດ ປະຈໍາປີ 2018, ຊຶ່ງຈັດຂຶ້ນ ໃນມື້ວັນທີ 28-29 ມີນາ ທີ່ຜ່ານມາ ທີ່ຫໍປະຊຸມແຫ່ງຊາດ ເພື່ອສລຸບ ວຽກງານການປະເມີນຜົນ ການຈັດຕັ້ງປະຕິບັດວຽກ ຂອງຜແນກໂຍທາທິການ ທົ່ວປະເທດ ໃນປີ 2017 ແລະ 2018 ໂດຍທ່ານ ບຸນຈັນ ສິນທະວົງ ຣັຖມົນຕຣີ ກະຊວງໂຍທາທິການ ແລະຂົນສົ່ງເປັນປະທານ.

ທ່ານກ່າວວ່າຈາກການກວດສອບ ທີ່ຜ່ານມາພົບວ່າ ຫຼາຍເສັ້ນທາງບໍ່ໄດ້ມາຕຖານໃນລາວ ເນື່ອງຈາກພາກສ່ວນບໍຣິສັດ ບໍ່ເຮັດຕາມມາຕຖານ ສັນຍາ, ຄວາມສາມາດຂອງບຸຄລາກອນ ໃນການອອກແບບບໍ່ສູງ ແລະບໍຣິສັດດຽວ ຮັບຫຼາຍໂຄງການ, ເຮັດໃຫ້ວຽກບໍ່ສໍາເຣັດ ຕາມກໍານົດ ແລະຂາດຄຸນນະພາບ, ບໍຣິສັດຮັບເໝົາກໍ່ສ້າງຍັງຂາດການເອົາໃຈໃສ່ ແລະຣະບົບກວດສອບເບື້ອງຣັຖເອງ ບໍ່ເຄັ່ງຄັດເທົ່າທີ່ຄວນ ຮວມເຖິງ ຣົດບັນທຸກ ທີ່ນໍ້າໜັກເກີນ ເຮັດໃຫ້ຖນົນເປ່ເພໄວ.

ສໍາລັບການກວດກາຄືນ ແລະການປະເມີນ ບັນດາບໍຣິສັດຕ່າງໆນີ້ ເຈົ້າໜ້າທີ່ບອກວ່າ ຈະເຣີ້ມພ້ອມໆກັນ ຫຼັງຣະຍະບຸນປີໃໝ່ລາວນີ້. ກະຊວງໂຍທາທິການ ແລະຂົນສົ່ງ ໄດ້ຣາຍງານ ໃນມື້ວັນທີ 22 ມີນາ ຜ່ານມານີ້ວ່າ ໃນປີ 2018 ກົມກວດກາຂອງກະຊວງ ໂຍທາທິການ ກວດພົບພະນັກງານຣັຖກອນ ພາຍໃນກະຊວງ ທີ່ສໍ້ຣາດບັງຫຼວງ 1,002 ຄົນ. ໃນນັ້ນ ປັດຈຸບັນໄດ້ຖືກລົງໂທດທາງວິນັຍ 849 ຄົນ ແລະ ຖືກສານຕັດສິນແລ້ວ 55 ຄົນ ສ່ວນທີ່ເຫຼືອຍັງສອບສວນຢູ່.

ເຕັມຫນ້າ