ຊາວບ້ານຫ້ວຍຫອຍ ຈະໄດ້ ໃບຕາດິນ ປຸກສ້າງ

ສຸພັດຕາ
2021-06-03
Share
ຊາວບ້ານຫ້ວຍຫອຍ ຈະໄດ້ ໃບຕາດິນ ປຸກສ້າງ ເຂດບ້ານຈັດສັນ ບ້ານຫ້ວຍຫອຍ ເມືອງ ວຽງທອງ ແຂວງບໍລິຄໍາໄຊ
ນັກຂ່າວພົລເມືອງ

ທາງການແຂວງບໍຣິຄໍາໄຊ ຕຽມອອກ ໃບຕາດິນຖາວອນ ປະເພດດິນປຸກສ້າງ ໃຫ້ກັບຊາວບ້ານ ເຂດຈັດສັນບ້ານຫ້ວຍຫອຍ ເມືອງ ວຽງທອງ ຈໍານວນ 624 ຄອບຄົວ ທີ່ໄດ້ຮັບ ຜົລກະທົບ ຖືກໂຍກຍ້າຍອອກຈາກ ບ້ານເດີມ ເພື່ອພັທນາໂຄງການ ເຂື່ອນໄຟຟ້າ ນໍ້າເທີນ 1 ໂດຍທາງການແຂວງ ຈະເຣີ່ມອອກໃບຕາດິນ ປຸກສ້າງ ໃຫ້ກັບຊາວບ້ານ ໃນສັປດາ ໜ້ານີ້, ດັ່ງເຈົ້າໜ້າທີ່ ຜແນກ ຊັພຍາກອນທັມຊາດ ແລະສິ່ງແວດລ້ອມ ແຂວງບໍຣິຄໍາໄຊ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນໃນມື້ວັນທີ 03 ມິຖຸນາ ນີ້ວ່າ:

“ຈຸເຮົາກະໄດ້ເປີດກອງປະຊຸມ ມື້ວານນີ້ເນາະ ກະຊິໄດ້ອອກໃບຕາດິນ ທິດໜ້ານີ້ກະຊິແມ່ນ ເລີ່ມລົງຈັດຕັ້ງປະຕິບັດເລີຍ, ໂອ້; ກະສິກັມ ກໍາລັງແທກ ກະເຣື່ອງຍາກ ກະສິຍາກແດ່ ໜ້ອຍນຶ່ງເນາະ ເພາະວ່າ ມັນກະນອນຢູ່ໃນຂອບເຂດ ປ່າປ້ອງກັນແຫ່ງຊາດ, ແຕ່ວ່າ ເພິ່ນກະໄດ້ມີການຫັນປ່ຽນ ຈາກ ສະພາແຫ່ງຊາດແລ້ວ ເພື່ອຈັດສັນທໍາການຜລິດ ໃຫ້ປະຊາຊົນ ທີ່ໂຍກຍ້າຍມາຫັ້ນ.”

ທ່ານກ່າວຕື່ມວ່າ ເນື່ອງຈາກເປັນພື້ນທີ່ຈັດສັນຂຶ້ນມາໃໝ່ ຈຶ່ງໄດ້ໄປໂອ້ລົມກັບຊາວບ້ານ ໃຫ້ເຂົ້າໃຈຢ່າງເລິກເຊິ່ງ ກ່ຽວກັບກົດໝາຍ ວ່າດ້ວຍທີ່ດິນ ເປັນຕົ້ນ ສ້າງຄວາມເຂົ້າໃຈເຣື່ອງ ການຫ້າມຈັບຈອງທີ່ດິນ, ການຂຶ້ນທະບຽນທີ່ດິນ, ສິດ ແລະ ພັນທະຂອງຜູ້ຊົມໃຊ້ ທີ່ດິນ ແລະການກໍານົດຂອບເຂດທາງຫຼວງ, ທາງຮ່ອມ ໂດຍຮວມແລ້ວ ຊາວບ້ານກໍເຂົ້າໃຈ ແລະ ໃຫ້ຄວາມຮ່ວມມືເປັນຢ່າງດີ.

ສ່ວນການບຸກເບີກ ແລະຈັດສັນເນື້ອທີ່ທໍາການຜລິດ ຈໍານວນ 1,400 ເຮັກຕ້າ ນັ້ນ ປັດຈຸບັນ ຢູ່ຣະຫວ່າງການບຸກເບີກ ຍັງບໍ່ທັນ ສໍາເຣັດເທື່ອ ເນື່ອງຈາກພື້ນທີ່ສ່ວນໃຫຍ່ ເປັນເຂດ ພູສູງ ມີກ້ອນຫິນໃຫຍ່ ແລະ ຂ້ອນຂ້າງຫຍຸ້ງຍາກ ຫຼາຍສົມຄວນ ໃນການປັບ ໜ້າດິນ ໂດຍຄາດຄະເນວ່າ ພາຍໃນປີນີ້ ຈະບຸກເບີກໃຫ້ສໍາເຣັດ ເພື່ອຕຽມຈັດສັນ ໃຫ້ຊາວບ້ານໃນປີໜ້າ ກ່ອນຣະດູທໍາການຜລິດ.

ກ່ຽວກັບເຣື່ອງນີ້ ຊາວບ້ານຜູ້ນຶ່ງ ໃນເຂດຈັດສັນ ບ້ານຫ້ວຍຫອຍ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ຮູ້ສຶກດີໃຈ ທີ່ທາງການ ລາວ ຕຽມມອບໃບຕາດິນປຸກສ້າງ ໃຫ້ຊາວບ້ານ ໃນເນື້ອທີ່ 20x40 ຕາແມັດຕໍ່ຫຼັງ ເຖິງເນື້ອທີ່ຈະບໍ່ຫຼາຍ ແຕ່ກໍເປັນກັມສິດຂອງໂຕ ເອງ ສ່ວນທີ່ດິນທໍາການຜລິດນັ້ນ ຍັງບໍ່ທັນໄດ້ຮັບການຈັດສັນເທື່ອ, ແຕ່ໃນໄລຍະຜ່ານມາ ກໍໄດ້ໄປ ຂໍເຮັດນາກັບຍາດພີ່ນ້ອງໄປກ່ອນ ເຮັດພໍກຸ້ມຢູ່ກຸ້ມກິນ ສໍາລັບຄົນໃນຄອບຄົວ ພໍບໍ່ໄດ້ໄປຊື້ເຂົ້າກິນ:

“ແມ່ນແຫຼະ ຍັງໆ ຍັງບໍ່ທັນໄດ້ສໍາເຣັດ ກໍາລັງເຂົ້າເຮັດໃບຕາດິນ ດິນປຸກສ້າງ ກະສໍ່າກັບເພິ່ນອັນນັ້ນແຫຼະ (ຈັດສັນໃຫ້) 20 ຄູນ 40 (ແມັດຕໍ່ຫຼັງ) ເອີ່...ກະເຮັດຢູ່ເກາະ (ເຮັດນາ) ຖາງນໍາພີ່ນໍານ້ອງຮັກແພງກັນໄປ.”

ຊາວບ້ານຫ້ວຍຫອຍຜູ້ນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ດີໃຈກັບຊາວບ້ານທຸກຄອບຄົວ ທີ່ຈະໄດ້ຮັບໃບຕາດິນ ຖາວອນ ເຊິ່ງເປັນກັມສິດຂອງຊາວບ້ານ ອັນທີ່ທາງການ ແຂວງບອກວ່າຈະມອບໃບຕາດິນ ໃຫ້ຊາວບ້ານ ໃນສັປດາໜ້ານີ້ ສ່ວນດິນທໍາການ ຜລິດ ແມ່ນຍັງບໍ່ໄດ້ຮັບການຈັດສັນເທື່ອ:

“ອອກໃບຕາດິນຖາວອນ ບ້ານເຮົານີ້ລະແມ່ນ ໃຫ້ກັມສິດດິນປຸກສ້າງ ໃຫ້ພໍ່ແມ່ປະຊາຊົນນິ່ ບໍ່ແມ່ນດິນກະສິກັມ, ກະສິກັມນີ້ຄິດວ່າ ຈັກແມ່ນປີຊິມາພຸ້ນ ບໍ່ຈັກແຫຼະ.”

ຊາວບ້ານ ເຂດຈັດສັນບ້ານຫ້ວຍຫອຍ ອີກຜູ້ນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ໃນໄລຍະທີ່ຍັງບໍ່ໄດ້ຮັບເນື້ອທີ່ດິນ ຈັດສັນ ກໍໄດ້ຮັບເງິນອຸດໜູນ ຈາກໂຄງການເຂື່ອນ ໄຟຟ້າປະມານ 7 ແສນ ຫາ 1 ລ້ານກີບ ຕໍ່ຄອບຄົວ, ແຕ່ວ່າການໃຊ້ຊີວິດ ຢູ່ເຂດຈັດສັນ ຂອງໂຄງການ ກໍຂ້ອນຂ້າງລໍາບາກ ເນື່ອງຈາກ ເປັນພື້ນທີ່ບ້ານໂຄກ ບໍ່ມີແຫຼ່ງນໍ້າ ຄືບ້ານເກົ່າ ແລະອອກໄປຫາຢູ່ຫາກິນ ກໍຍາກຂຶ້ນ:

“ຈັ່ງວ່າເດີ້ ຫຍຸ້ງຍາກຢູ່ ເພາະວ່າມັນແຫ້ງ ພື້ນທີ່ໄທເຮົາ ບໍ່ແມ່ນພື້ນທີ່ຮາບພຽງ ມີແຕ່ພູ ມັນຍັງຍາກຢູ່, ແຕ່ວ່າເຣື່ອງອັດຕຣາກິນ ກະຍັງຄືເກົ່າຫັ້ນແຫຼະເນາະ.”

ຊາວບ້ານຜູ້ນີ້ ກ່າວຕື່ມວ່າ ຂໍຮຽກຮ້ອງໃຫ້ທາງການແຂວງ ແລະ ພາກສ່ວນທີ່ກ່ຽວຂ້ອງ ເລັ່ງດໍາເນີນການບຸກເບີກເນື້ອທີ່ທໍາການ ຜລິດ ແລະຈັດສັນໃຫ້ຊາວບ້ານໄວທີ່ສຸດ ເທົ່າທີ່ ຈະໄວໄດ້ ເນື່ອງຈາກ ນັບແຕ່ຖືກໂຍກຍ້າຍ ມາຢູ່ເຂດຈັດສັນ ບ້ານຫ້ວຍຫອຍນີ້ ຊາວບ້ານສ່ວນໃຫຍ່ ກໍບໍ່ມີວຽກເຮັດງານທໍາ ແລະ ຄິດຮອດການເຮັດໄຮ່ເຮັດສວນ ແລະລ້ຽງສັດ.

ໃນຂນະທີ່ ຊາວບ້ານ ບ້ານເມືອງມ່ວນ ເມືອງວຽງທອງ ຈໍານວນ 88 ຄອບຄົວ ເຊິ່ງໄດ້ຮັບຜົລກະທົບ ຈາກການຕັນນໍ້າ ຂອງ ໂຄງການ ແລະຈະຖືກຍັບຍ້າຍອອກຈາກພື້ນທີ່ ປັດຈຸບັນ ຢູ່ຣະຫວ່າງການກໍ່ສ້າງ ເຮືອນຈັດສັນ ຍັງບໍ່ທັນແລ້ວເທື່ອ ເຊິ່ງກ່ອນໜ້ານີ້ ທາງການແຂວງບອກວ່າ ຈະສ້າງເຮືອນໃຫ້ສໍາເຣັດກ່ອນ ເດືອນມິຖຸນາ ປີນີ້, ແຕ່ໃນໂຕຈິງ ກໍຍັງບໍ່ທັນ ສໍາເຣັດຕາມແຜນເທື່ອ, ດັ່ງຊາວບ້ານຜູ້ນຶ່ງ ເວົ້າວ່າ:

“ແມ່ນແຫຼະສ້າງບໍ່ທັນແລ້ວ ເອີ່; ບໍ່ໄດ້ຍ້າຍດອກ ນໍ້າກະຍັງບໍ່ທັນມີຊໍ້າ ເຮືອນກະຍັງບໍ່ທັນແລ້ວ ໃກ້ແລ້ວໆແຕ່ວ່ານໍ້າກະຍັງບໍ່ທັນມີ.”

ກ່ຽວກັບຄວາມຫຼ້າຊ້າ ໃນການກໍ່ສ້າງເຮືອນຈັດສັນ ເທື່ອນີ້ ວິທຍຸເອເຊັຽເສຣີ ໄດ້ພຍາຍາມຕິດຕໍ່ໄປຫາ ບໍຣິສັດນໍ້າເທີນ 1 ແລ້ວ ເພື່ອຖາມເຖິງຣາຍລະອຽດ ຕ່າງໆ ແຕ່ເຈົ້າໜ້າທີ່ ຕອບພຽງສັ້ນໆວ່າ ຕິດບັນຫາການຣະບາດ ຂອງໂຄວິດ-19.

ສໍາລັບໂຄງການເຂື່ອນໄຟຟ້ານໍ້າເທີນ 1 ຕາມຣາຍງານ ການປະເມີນຜົລກະທົບ ສິ່ງແວດລ້ອມ ແລະສັງຄົມ ມີຊາວບ້ານທີ່ໄດ້ຮັບ ຜົລກະທົບ ຮອບທໍາອິດ ທັງໝົດ 7 ບ້ານ ມີຈໍານວນ 624 ຄອບຄົວ, ຜົລກະທົບຊຸດ ທໍາອິດ ປະກອບມີ ບ້ານທ່າເດື່ອ 139 ຄອບຄົວ, ບ້ານພຽງຕົ້ນ 69 ຄອບຄົວ, ບ້ານສົມບັດ 35 ຄອບຄົວ, ບ້ານກົກຕົ້ນ 59 ຄອບຄົວ, ບ້ານວັງມາກ 118 ຄອບຄົວ, ບ້ານນໍ້າມືດ 79 ຄອບຄົວ ແລະບ້ານໂພນໂຮມ 125 ຄອບຄົວ ແລະ ຜົລກະທົບຮອບທີ່ 2 ຄື ບ້ານເມືອງມ່ວນ ມີ 88 ຄອບຄົວ.

ສ່ວນຄວາມຄືບໜ້າ ເຣື່ອງການກໍ່ສ້າງເຂື່ອນໄຟຟ້ານໍ້າເທີນ 1 ນັ້ນ ປັນຈຸບັນ ການກໍ່ສ້າງ ມີຄວາມຄືບໜ້າຫຼາຍກວ່າ 90% ແລ້ວ ແລະ ຈະສ້າງສໍາເຣັດ ໃນປີ 2021 ນີ້ ເພື່ອຜລິດໄຟຟ້າ ຂາຍໃຫ້ໄທຍ ຕາມກໍານົດ ໃນວັນທີ 22 ພຶສພາ 2022.

ໂຄງການເຂື່ອນໄຟຟ້ານໍ້າເທີນ 1 ຂນາດ 650 ເມກາວັດ ມູລຄ່າການລົງທຶນ ປະມານ 1,3 ຕື້ໂດລາສະຫະຣັດ ເຣີ່ມກໍ່ສ້າງມາແຕ່ປີ 2016 ໂດຍເປັນການຮ່ວມທຶນ ຣະຫວ່າງປະເທດ ຄື: ບໍຣິສັດ ພອນສັກ ກຣຸ໊ບ 60%, ບໍຣິສັດ ເອັກໂກ ກຣຸ໊ບ ຂອງໄທຍ 25% ແລະ ບໍຣິສັດຜລິດໄຟຟ້າລາວ 15%.

ອີງຕາມສັນຍາຊື້-ຂາຍໄຟຟ້າ ທີ່ຜລິດຈາກເຂື່ອນໄຟຟ້ານໍ້າເທີນ 1 ແມ່ນຈະຂາຍໃຫ້ໄທຍ 520 ເມກາວັດ ຄິດເປັນ 80% ແລະ ຣັຖວິສາຫະກິຈໄຟຟ້າລາວ 130 ເມກາວັດ ຄິດເປັນ 20% ໄລຍະສັມປະທານ 27 ປີ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ