ຄວາມລໍາບາກຢູ່ບ້ານຈັດສັນ ນໍ້າເທີນ 2

ຈໍາປາທອງ
2019-04-05
ອີແມວລ໌
ຄໍາເຫັນ
Share
ພິມ
ບ້ານເຮືອນ ທີ່ມີການກໍ່ສ້າງ ໃຫ້ ຊາວບ້ານ ທີ່ໂຍກຍ້າຍ ຈາກເຂດ ສ້າງເຂື່ອນ ນໍ້າເທີນ 2 ໃນປີ 2007.
ບ້ານເຮືອນ ທີ່ມີການກໍ່ສ້າງ ໃຫ້ ຊາວບ້ານ ທີ່ໂຍກຍ້າຍ ຈາກເຂດ ສ້າງເຂື່ອນ ນໍ້າເທີນ 2 ໃນປີ 2007.
AFP

ເຈົ້າໜ້າທີ່ທະນາຄານໂລກທ່ານນຶ່ງ ໃຫ້ຄໍາເຫັນສ່ວນໂຕຕໍ່ວິທຍຸອເຊັຍເສຣີ ໃນມື້ວັນທີ 5 ເມສາ ນີ້ວ່າ ປະຊາຊົນຈໍານວນນຶ່ງ ທີ່ໄດ້ໂຍກຍ້າຍ ໄປຢູ່ບ້ານຈັດສັນ ຂອງເຂື່ອນນໍ້າເທີນ 2 ເມືອງນາກາຍ ແຂວງຄໍາມ່ວນ ນັ້ນຍັງຕ້ອງການຄວາມຊ່ອຍເຫຼືອ ໃນບາງດ້ານຢູ່ແລະຍັງຮຽກຮ້ອງ ໃຫ້ພາກສ່ວນທີ່ກ່ຽວຂ້ອງຊ່ອຍເຫຼືອ ຢູ່ເລື້ອຍໆ ດັ່ງທີ່ທ່ານກ່າວວ່າ:

"ຄວາມຄິດເຫັນສ່ວນໂຕນີ້ນໍ ໂຕນີ້ເຣຶ່ອງຄວາມຕ້ອງການຄວາມຊ່ວຍເຫລືອນີ້ ມັນຈະມີມາແບບບໍ່ຂາດສາຍຢູ່ແລ້ວ ມັນປັນປົກກະຕິຂອງ ຊາວບ້ານເຂດນັ້ນ ບາງພາກສ່ວນຂອງເຂດນັ້ນ ຢູ່ແລ້ວຫັ້ນນະ ໃນເມື່ອເຫັນບຸກຄົນ ພາຍນອກເຂົ້າໄປ ຂະເຈົ້າກໍຈະຮ້ອງຂໍ ຮ້ອງຂໍ ຮ້ອງຂໍຢ່າງບໍ່ມີວັນສິ້ນສຸດ."

ພາຍຫລັງທຶນຊ່ອຍເຫລືອ ຂອງທະນາຄານໂລກ ໝົດໄປຕາມສັນຍາແລ້ວ ກໍເປັນພາລະຂອງບໍຣິສັດນໍ້າເທີນ 2 ຊຶ່ງເປັນພາກສ່ວນທີ່ຈະ ຊ່ອຍເຫຼືອດູແລຊາວບ້ານ ທີ່ໄດ້ໃຫ້ໂຍກຍ້າຍ ໄປຢູ່ບ້ານຈັດສັນ ນັ້ນ ເຈົ້າໜ້າທີ່ບໍຣິສັດນໍ້າເທີນ 2 ກ່າວຕໍ່ວິທຍຸເອເຊັຍເສຣີວ່າ ປັດຈຸບັນ ບໍຣິສັດນໍ້າເທີນ 2 ມີທຶນທີ່ຍັງຈະຊ່ອຍເຫລືອ ພວກເຂົາເຈົ້າຢູ່, ຍັງເຮັດວຽກຢູ່ໃນເຂດຈັດສັນ ແລະກໍມີແຜນທີ່ຈະຊ່ອຍຊາວບ້ານ ພາກສ່ວນ ທີ່ຍັງລໍາບາກ ຢູ່ນັ້ນຕໍ່ໄປ ແຕ່ກໍຕ້ອງໄດ້ປຶກສາຫາລືກັນ ແລະເບິ່ງສະພາບຕົວຈິງໄປກ່ອນ ວ່າຈະຊ່ອຍແນວໃດ ດັ່ງທີ່ທ່ານກ່າວວ່າ:

"ຍັງເຮັດວຽກຢູ່ໃນເຂດຢູ່ນໍ ເຮົາມີກອງທຶນຊ່ວຍຊາວບ້ານ ຢູ່ ແຕ່ວ່າທາງເຮົາກໍຕ້ອງເຮັດວຽກ ກັບທຸກຝ່າຍແຫລະນໍ ກໍຕ້ອງເອົາຕາມຄວາມຈິງ ກໍຕ້ອງເບິ່ງວ່າເປັນກ່ຽວກັບ ເຣຶ່ອງຫຍັງແດ່ຈັ່ງໃດ ມີລັກສນະຈັ່ງໃດ ກໍຕ້ອງມີການປຶກສາຫາລືກັນກ່ອນວ່າ ຈະເຮັດແນວໃດຕໍ່ໄປນໍ."

ໂຄງການເຂື່ອນນໍ້າເທີນ 2 ໄດ້ປະກາດໃນມື້ວັນທີ 29 ມິນາທີ່ຜ່ານມາວ່າ ໄດ້ສໍາເຣັດວຽກງານການໂຍກຍ້າຍຊາວບ້ານ ທີ່ໄດ້ຮັບຜົລກະທົບ ຈາກເຂື່ອນ ໄປຢູ່ບ້ານຈັດສັນນັ້ນແລ້ວ ແລະຊາວບ້ານ ກໍໄດ້ເວົ້າຕໍ່ວິທຍຸອເຊັຍເສຣີວ່າ ຫລັງຈາກໄດ້ໂຍກຍ້າຍໄປຢູ່ບ້ານຈັດສັນນັ້ນແລ້ວ ການເປັນຢູ່ກໍມີຄວາມສະດວກຂຶ້ນ, ມີນໍ້າ ມີໄຟຟ້າໃຊ້, ມີເຮືອນຢູ່ ແລະໂຄງຮ່າງພື້ນຖານດີຂຶ້ນ ແຕ່ວ່າເຣຶ່ອງການ ຫາຢູ່ຫາກິນ ທັງການປະມົງ, ການກະສິກັມ ຖືວ່າຍັງລໍາບາກຢູ່.

ເຕັມຫນ້າ