ທ້າວໂບ່ຍ ຊາວບ້ານຊຽງດາ ຖືກປ່ອຍ ແລ້ວ

ຈໍາປາທອງ
2021-06-03
Share
ທ້າວໂບ່ຍ ຊາວບ້ານຊຽງດາ ຖືກປ່ອຍ ແລ້ວ ເຫດການ ຂໍ້ຂັດແຍ່ງທີ່ດິນ ທີ່ເກີດຂຶ້ນໃນ ວັນທີ 16 ເດືອນ ມີນາ ປີ 2020 ຢູ່ບ້ານຊຽງດາ ເມືອງໄຊເສດຖາ ນະຄອນຫລວງວຽງຈັນ ທີ່ ທ້າວໂບ່ຍ ໄດ້ມີປາກສຽງ ຕໍ່ຜູ້ບຸກລຸກທີ່ດິນ ຂອງລາວ.
ຮູບ: ນັກຂ່າວພົລເມືອງ

ທ້າວໂບ່ຍ ຄົນບ້ານຊຽງດາ ເມືອງໄຊເສດຖາ ນະຄອນຫຼວງວຽງຈັນ ທີ່ຖືກຕໍາຣວດ ຈັບຂັງຄຸກໃນວັນທີ 17 ມິນາ 2020 ຍ້ອນໄດ້ ປົກປ້ອງ ແລະທວງເອົາຄ່າຊົດເຊີຍທີ່ດິນ ຈາກທາງ ໂຄງການກໍ່ສ້າງ ມະຫາວິທຍາລັຍ ວິທຍາສາດສຸຂພາບ ຢູ່ເຂດບ້ານນັ້ນ ໄດ້ຖືກ ປ່ອຍຕົວແລ້ວ ໃນຕົ້ນປີ 2021 ນີ້. ແຕ່ມີຂ່າວຈາກຊາວບ້ານດັ່ງກ່າວ ອອກໃຫ້ຮູ້ໃນມື້ວັນທີ 2 ມິຖຸນາ ນີ້.

ປັດຈຸບັນ ທ້າວໂບ່ຍ ຢູ່ກັບຄອບຄົວ ແລະໄດ້ເຮັດວຽກຕາມປົກກະຕິແລ້ວ ດັ່ງເຈົ້າໜ້າທີ່ອໍານາດການປົກຄອງບ້ານ ທ່ານນຶ່ງທີ່ຂໍສງວນ ຊື່ແລະຕໍາແໜ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 3 ມິຖຸນາ ນີ້ວ່າ:

“ປ່ອຍແລ້ວເດ໋ ປ່ອຍໄດ້ປະມານ 4 ເດືອນ ກັບມາແລ້ວ ເອີ ກະບໍ່ມີຫຍັງດອກ ມີແຕ່ວ່າເອົາໄປອົບຮົມແນວຄິດຊື່ໆ ກະເວົ້າເຣື່ອງ ດິນດອນຕອນຫຍ້ານັ້ນແຫຼະ.”

ເພື່ອຂໍຮູ້ຣາຍລະອຽດ ກ່ຽວກັບເຣື່ອງທີ່ວ່ານີ້ ວິທຍຸເອເຊັຍເສຣີ ໄດ້ຕິດຕໍ່ໄປຫາສະມາຊິກຄອບຄົວຂອງຜູ້ກ່ຽວ, ແຕ່ໄດ້ຮັບຄໍາຕອບ ພຽງແຕ່ວ່າ ທ້າວໂບ່ຍ ໄດ້ກັບມາຢູ່ນໍາຄອບຄົວແລ້ວ ແຕ່ບໍ່ສາມາດເວົ້າຫຼາຍໄປກວ່ານີ້ໄດ້ ເພື່ອຄວາມປອດພັຍຂອງຄອບຄົວ.

ແຕ່ເຖິງຢ່າງໃດກໍຕາມ ຊາວບ້ານທີ່ຢູ່ໃກ້ຄຽງ ນາງນຶ່ງກໍເວົ້າໃຫ້ຮູ້ວ່າ ທ້າວໂບ່ຍ ໄດ້ຖືກປ່ອຍຕົວອອກມາແລ້ວ ທັ້ງໆທີ່ກ່ອນໜ້ານີ້ ໄດ້ຍິນຂ່າວວ່າ ເຈົ້າໜ້າທີ່ຈະປ່ອຍຕົວຜູ້ກ່ຽວກໍຕໍ່ເມື່ອ ການກໍ່ສ້າງໂຄງການ ດັ່ງກ່າວສໍາເຣັດກ່ອນ ແລະວ່າ ການປ່ອຍຕົວຜູ້ກ່ຽວ ອອກມານັ້ນ ເຫັນວ່າເໝາະສົມແລ້ວ ຍ້ອນຜູ້ກ່ຽວບໍ່ໄດ້ເຮັດຜິດຫຍັງ ພຽງແຕ່ໄດ້ປົກປ້ອງ ທີ່ດິນຂອງຕົນ ທີ່ໄດ້ຮັບມາຈາກພໍ່ແມ່ ດັ່ງທີ່ນາງກ່າວວ່າ:

“ທໍາອິດ ວ່າແລ້ວໂຄງການກໍສິປ່ອຍ ຜູ້ຊາຍຫັ້ນນ່າ ຜູ້ຖືກຈັບກະຢູ່ນີ້ແຫຼະ ໄທບ້ານດຽວນີ້ແຫຼະ. ແຕ່ກີ້ດິນພໍ່ດິນແມ່ຂະເຈົ້າ ຖືກແລ້ວ ໄປເຄິ່ງນຶ່ງແລ້ວ ແລ້ວຂະເຈົ້າມາເອົາອີກບໍ່ຢາກໃຫ້ ຢາກດຸດເອົາໄປໝົດເລີຍ ມັນກະຈໍາເປັນ ມັນກະໄດ້ຂຶ້ນໄດ້ອັນນັ້ນ ຂະເຈົ້າກະ ປ່ອຍແລ້ວເດ໋.”

ໃນຂນະດຽວກັນ ຊາວບ້ານໃກ້ຄຽງ ອີກຜູ້ນຶ່ງກໍເວົ້າວ່າ ຕົນກໍຮູ້ຂ່າວ ທ້າວໂບ່ຍ ໄດ້ຮັບການປ່ອຍຕົວອອກມາແລ້ວ, ຜູ້ກ່ຽວຖືກຈັບເມື່ອ ປີກາຍ ຍ້ອນຖ່າຍວີດີໂອ ເອົາເຫດການ ເຈົ້າໜ້າທີ່ມາບຸກລຸກທີ່ດິນ ແລ້ວເອົາໄປເຜີຍແຜ່ ທາງສື່ສັງຄົມອອນລາຍ ເຮັດໃຫ້ເຈົ້າໜ້າທີ່ ບໍ່ພໍໃຈ ແລ້ວກໍຈັບຜູ້ກ່ຽວໄປ ດັ່ງທີ່ທ່ານກ່າວວ່າ:

“ປ່ອຍໝົດແລ້ວນ່າ ເພາະວ່າມັນດົນເຕີບແລ້ວເດ໋ ແຖວນັ້ນມັນດິນຊັບຊ້ອນນ່າ. ຖ່າຍວິດິໂອ ແລ້ວກະລົບລູ່ ເຈົ້າໜັ້າທີ່ແດ່ ເຣື່ອງຂອງ ມັນລະເປັນຈັ່ງຊັ້ນ ຄືບໍ່ຮູ້ລະອຽດແທ້ໂຕນີ້ນ່າ.”

ແລະຊາວບ້ານໃກ້ຄຽງອີກນາງນຶ່ງ ກໍເວົ້າຕໍ່ວິທຍຸເອເຊັຍເສຣີ ໃນມື້ວັນທີ 3 ມິຖຸນາ ນີ້ວ່າ ຕົນບໍ່ຮູ້ຄັກແນ່ວ່າ ທ້າວໂບ່ຍ ໄດ້ຖືກປ່ອຍ ຕົວອອກມາມື້ໃດກັນແທ້, ຮູ້ພຽງແຕ່ວ່າ ຜູ້ກ່ຽວໄດ້ ຖືກຈັບເມື່ອປີກາຍ ດັ່ງນັ້ນຈຶ່ງບໍ່ສາມາດ ເວົ້າໃຫ້ຮູ້ຫລາຍໄປກວ່ານີ້ໄດ້:

“ໂອ໋ ບໍ່ຮູ້ກໍໄດ້ຍິນຂ່າວຢູ່ ແຕ່ບໍ່ຮູ້ຈັກປານໃດ ບໍ່ໄດ້ໃກ້ຊິດ ບໍ່ຮູ້ຂະເຈົ້າ ຮູ້ວ່າເພິ່ນປ່ອຍໂຕຕິເນາະ.”

ເພື່ອຮູ້ຣາຍລະອຽດ ກ່ຽວກັບເຣື່ອງທີ່ວ່ານີ້ ວິທຍຸເອເຊັຍເສຣີ ໄດ້ຕິດຕໍ່ໄປຫາຫ້ອງການປ້ອງກັນ ຄວາມສງົບເມືອງໄຊເສດຖາ, ແຕ່ໄດ້ ຮັບຄໍາຕອບຈາກເຈົ້າໜ້າທີ່ ຜູ້ຂໍສງວນຊື່ ແລະ ສຽງທ່ານນຶ່ງພຽງແຕ່ວ່າ ໄດ້ປ່ອຍຕົວທ້າວໂບ່ຍ ໄປຕັ້ງແຕ່ດົນແລ້ວ ແຕ່ທ່ານບໍ່ສາມາດ ໃຫ້ຣາຍລະອຽດກ່ຽວກັບຄະດີ, ຄວາມຜິດ, ໂທດ ແລະການປັບໃໝ ຜູ້ກ່ຽວນັ້ນໄດ້.

ເຣື່ອງດິນຂອງປະຊາຊົນ ໃນເຂດທີ່ທາງໂຄງການກໍ່ສ້າງ ມະຫາວິທຍາລັຍ ວິທຍາສາດສຸຂພາບ ກວມເອົານັ້ນ ມາເຖິງປັດຈຸບັນ ກໍຍັງ ມີຊາວບ້ານຊຽງດາປະມານ 10 ປາຍຄອບຄົວ ທີ່ຍັງບໍ່ຍອມຍົກດິນ ໃຫ້ທາງໂຄງການນັ້ນ ເນື່ອງຈາກບໍ່ພໍໃຈນໍາຄ່າຊົດເຊີຍ ທີ່ທາງ ໂຄງການ ສເນີໃຫ້ໜ້ອຍ ຄືໃຫ້ພຽງແຕ່ປະມານ 3 ລ້ານກີບ ຊຶ່ງຢ່າງໜ້ອຍຄວນໃຫ້ 60 ລ້ານກີບຂຶ້ນ ໄປ.

ເມື່ອກ່ອນໜ້ານີ້ ທາງໂຄງການໄດ້ເຮັດຮົ້ວລ້ອມ ເຮືອນຊາວບ້ານ ທີ່ຍັງບໍ່ຍອມໂຍກຍ້າຍອອກ ແລະກໍານົດເວລາໃຫ້ໂຍກຍ້າຍອອກ ພາຍໃນມື້ວັນທີ 20 ເມສາ ທີ່ຜ່ານມາ, ບໍ່ດັ່ງນັ້ນ ຈະຖືກມ້າງເຮືອນ. ແຕ່ມາຮອດທຸກມື້ນີ້ ຊາວບ້ານທີ່ຍັງບໍ່ຍອມໂຍກຍ້າຍອອກ ໄປຈາກເຂດນັ້ນ ກໍຍັງຢູ່ຕາມປົກກະຕິ ໂດຍທີ່ເຈົ້າໜ້າທີ່ບໍ່ໄດ້ມາມ້າງເຮືອນ ຂອງພວກເຂົາເຈົ້າແຕ່ຢ່າງ ໃດ, ອີງຕາມຄໍາເວົ້າຂອງ ຊາວບ້ານທ່ານນຶ່ງ ທີ່ໄດ້ຮັບຜົລກະທົບ ຈາກໂຄງການນັ້ນ.

ເຣື່ອງຊາວບ້ານຊຽງດາ 2 ຄົນຄື ທ້າວໂບ່ຍ ແລະນາງແກ້ວຖືກຈັບນັ້ນ ແມ່ນເປັນຍ້ອນໄດ້ປົກປ້ອງທີ່ດິນ ແລະທວງເອົາຄ່າຊົດເຊີຍ ທີ່ດິນ ຊຶ່ງເຫັນວ່າ ບໍ່ເປັນທໍັມ ຈາກເຈົ້າໜ້າທີ່ ທີ່ໄປບຸກລຸກທີ່ດິນ ຂອງພວກເຂົາເຈົ້າ, ໄດ້ຖຽງກັບເຈົ້າໜ້າທີ່ ແລະໄດ້ຖ່າຍຄລິບວີດີໂອ ເຫດການ ທີ່ເກີດຂຶ້ນໃນມື້ດັ່ງກ່າວ ໄປເຜີຍແຜ່ ທາງສື່ສັງຄົມອອນລາຍ ແລະຕໍ່ມາກໍໄດ້ຖືກ ເຈົ້າໜ້າທີ່ຈັບຕົວໄປ ໂດຍບໍ່ແຈ້ງສາເຫດ ໃຫ້ຮູ້ຄັກແນ່.

ມາເຖິງເດືອນພຶສພາ 2020 ນາງແກ້ວ ໄດ້ຖືກປ່ອຍຕົວ ພາຍຫຼັງທີ່ທາງຄອບຄົວຂອງນາງ ໄດ້ຕັດສິນໃຈຍົກດິນໃຫ້ທາງໂຄງການ ແລະຍອມຮັບເອົາຄ່າຊົດເຊີຍ ເປັນດິນ ປະມານ 500 ຕາແມັດ ແລະເງິນ 73 ລ້ານກີບ. ສ່ວນ ທ້າວໂບ່ຍ ຍັງຖືກຂັງຄຸກຢູ່ຕໍ່ໄປ ຈົນເຖິງຕົ້ນປີ 2021 ນີ້ ຈຶ່ງຖືກປ່ອຍອອກຈາກຄຸກຄຸມຂັງ.

ສໍາລັບດິນສ່ວນນຶ່ງ ໃນເຂດບ້ານຊຽງດາ ເມື່ອກ່ອນ ແຕ່ປີ 1979-1980 ເປັນດິນຂອງສະຫະກອນ ເມືອງໄຊເສດຖາ, ຫລັງຈາກ ສະຫະກອນນີ້ຖືກຍຸບໄປ ຊາວບ້ານຈຶ່ງພາກັນ ແບ່ງກັນ ຄຸ້ມຄອງກັນເອງ ໂດຍທີ່ເຈົ້າໜ້າທີ່ ບໍ່ໄດ້ອອກໃບຕາດິນ ຂອບຄໍາໃຫ້, ອອກໃຫ້ແຕ່ໃບນໍາໃຊ້ທີ່ດິນ ແລະ ໃຫ້ເສັຍພາສີທີ່ດິນ ໃຫ້ຣັຖທຸກປີ.

ຕົກມາຮອດປີ 2012 ບໍຣິສັດຈີນ ໄດ້ເຂົ້າມາກໍ່ສ້າງທາງ ຈາກເສັ້ນທາງ 450 ປີ ມາຫາບ້ານຊຽງດາ ຍາວປະມານ 9 ກິໂລແມັດ ແລະ ມີການ ພັທນາໃນພື້ນທີ່ນັ້ນໃຫ້ເປັນ ເຂດພັທນາ ໃໝ່ ຊຶ່ງປັດຈຸບັນ ຢູ່ໃນຣະຫວ່າງການກໍ່ສ້າງ ຫຼາຍໂຄງການ ເປັນຕົ້ນ ມະຫາວິທຍາລັຍ ຊູໂຈວ, ມະຫາວິທຍາລັຍ ວິທຍາສາດສຸຂພາບ, ໂຮງໝໍ, ສູນການຄ້າ ຄົບວົງຈອນ ແລະ ບໍຣິສັດ ຫ້າງຮ້ານຕ່າງ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ