ພະນັກງານກູ້ຣະເບີດ ບໍ່ໄດ້ຮັບ ເງິນເດືອນ

ໄຊຍາ
2019-06-26
ອີແມວລ໌
ຄໍາເຫັນ
Share
ພິມ
ຊາກເສດເຫຼືອ ຂອງກະສອບຣະເບີດ ທີ່ມີຫຼວງຫຼາຍກ່າຍກອງ ປະຊາຊົນກໍນໍາມາໝຸນໃຊ້ ໃຫ້ເປັນປໂຍດ
ຊາກເສດເຫຼືອ ຂອງກະສອບຣະເບີດ ທີ່ມີຫຼວງຫຼາຍກ່າຍກອງ ປະຊາຊົນກໍນໍາມາໝຸນໃຊ້ ໃຫ້ເປັນປໂຍດ
RFA/PX

ພະນັກງານເກັບກູ້ຣະເບີດ ແຂວງຈຳປາສັກ ແລະ ແຂວງອັດຕະປື ບໍ່ໄດ້ຮັບເງິນເດືອນ ມາຕັ້ງແຕ່ຕົ້ນປີນີ້ ເຖິງແມ່ນວ່າ ເງິນເດືອນ ສະເພາະ ວຽກດັ່ງກ່າວ ທາງສາກົລຜູ້ໃຫ້ທຶນ ການຊ່ອຍເຫຼືອ ໄດ້ໃຫ້ມາແລ້ວ ແຕ່ຍັງຄາຂອດ ບໍຣິຫານ ການນຳເງິນເດືອນ ມາເບີກຈ່າຍ ຕ້ອງຜ່ານຫຼາຍ ຂັ້ນຕອນ, ດັ່ງເຈົ້າໜ້າທີ່ ແຂວງຈຳປາສັກ ກ່າວຜູ້ສື່ຂ່າວ ອາ​ຣ ແອັ​ຟ ເອ (RFA) ເມື່ອວັນ​ທີ 26 ມິຖຸນາວ່າ:

"ໂຕເງິນເດືອນນີ້ ມັນຂັດຂ້ອງເພາະວ່າ ເງິນເດືອນໂຕນີ້ທາງສາກົລເຂົາ ກໍໃຫ້ມາແລ້ວ ແຕ່ວ່າ ບັດສຸດທ້າຍ ກໍເຮົານີ້ຈະເອົາເງິນເຂົາ ຈະຈ່າຍ ເງິນເດືອນນີ້ ມັນຕ້ອງຜ່ານຫຼາຍຂັ້ນຕອນ ກະຊວງການເງິນ ອີ່ຫຍັງຫັ້ນນ່າ ມັນກໍຢາກຊັກຊ້າ ທິມນຶ່ງ ກໍ 7-8 ຄົນ ເກັບກູ້ຣະເບີດ ມັນກໍມີຢູ່ 5 ທິມ 50 ກວ່າຄົນ ຄືເວົ້າ ພະນັກງານ ພາກສນາມ ບໍ່ມີເງິນ ມັນກໍຍາກເນາະ.”

ໃນຂນະດຽວ​ກັນ ເຈົ້າໜ້າທີ່ແຂວງອັດຕະປື ກໍໄດ້ກ່າວວ່າ ພະນັກງານ ບໍ່ທັນໄດ້ເງິນເດືອນ ມາ 6 ເດືອນແລ້ວ ຕ້ອງລໍຖ້າໄປອີກ ບໍ່ຮູ້ວ່າມື້ໃດຈະໄດ້:

“ພະນັກງານ ຢູ​ເອັກ​ສ໌​ໂອ (UXO) ທັງໝົດແມ່ນ 150 ປາຍຄົນ ຈົ່ມວ່າເງິນເດືອນ ບໍ່ທັນໄດ້ 6 ເດືອນແລ້ວເດ້ ບາດນີ້ ຫົວໜ້າວ່າ ລໍໄປອີກຈັກສິໄດ້ ຫຼືບໍ່, ຢູ່ຈຳປາສັກ ຍັງຄືກັນ ຍັງບໍ່ທັນໄດ້ຄືກັນ ສາຍດຽວກັນ ກໍຍັງບໍ່ທັນໄດ້ ຄືກັນ ໄລ່ແຕ່ ເປັນຫົວຄົນ ຄົນນຶ່ງນີ້ ຄົນລະ 2 ລ້ານສະເງິນ ເງີນເດືອນ ຕໍ່ຄົນ ເພາະມັນມີຄົນລະ ລ້ານເຈັດ ລ້ານແປດ ຄົນລະລ້ານສອງ ລ້ານສາມ ເພາະອີງຕາມ ຜູ້ເຂົ້າໃໝ່ ເຂົ້າເກົ່າ.”

ຕໍ່ບັນຫານີ້, ເມື່ອຕົ້ນເດືອນ ມິຖຸນາຜ່ານມາ ເຈົ້າໜ້າທີ່ ທັງແຂວງຈຳປາສັກ ແລະ ແຂວງອັດຕະປື ກໍໄດ້ເຂົ້າຮ່ວມປຶກສາຫາລື ເພື່ອແກ້ໄຂ ບັນຫາເງິນເດືອນ ຂອງພະນັກງານອອກຊ້າ ກັບໜ່ວຍງານ ເກັບກູ້ຣະເບີດ ຂອງຣັຖບານ ຫຼື ສູນກາງ ທີ່ແຂວງວຽງຈັນ ນັ້ນກໍຍັງບໍ່ໄດ້ ຂໍ້ສລຸບວ່າ ພະນັກງານ ຈະໄດ້ຮັບເງິນ ເມື່ອໃດ, ດັ່ງເຈົ້າໜ້າທີ່ແຂວງຈຳປາສັກ ກ່າວວ່າ:

“ວາຣະກອງປະຊຸມ ຂອງ ກະຊວງເດ້ ແຕ່ເດືອນຫຍັງເດ້ ມີກອງປະຊຸມ ຂອງແຂວງ ທີ່ວ່າ ຈະເອົາເຂົ້າ ຣາຍງານຂັ້ນເທິງ ຖັດຂຶ້ນໄປ ໃຫ້ເພິ່ນ ຮັບຊາບນຳ ພະນັກງານ ພາກສນາມ ມັນບໍ່ໄດ້ເງິນເດືອນ ມັນກໍຍາກແຫຼະ ມັນກໍຜິດຣະບຽບ ຂອງແຮງງານັ້ນແຫຼະ.”

ສ່ວນ ເຈົ້າໜ້າທີ່ ແຂວງອັດຕະປື ໄດ້ກ່າວວ່າ ເພິ່ນຊິຄົ້ນຄວ້າ ໃຫ້ເລີຍ ກໍຍັງບໍ່ທັນຮູ້ວ່າ ສິໄດ້ບໍ່ ຫຼືວ່າຈັ່ງໃດ:

“ມີແຕ່ວ່າ ກອງປະຊຸມ ເມື່ອວັນທີ 4-5 ຂອງເດືອນ 6 ຢູ່ວັງວຽງ ແມ່ນໄດ້ເຂົ້າຮ່ວມ ກັບປະທານ ແລະ ໄດ້ສເນີໃຫ້ເພິ່ນ ເພິ່ນວ່າ ສິຄົ້ນຄວ້າໃຫ້ ກໍເລີຍ ຍັງບໍ່ທັນຮູ້ ວ່າສິໄດ້ບໍ່ຫຼືວ່າຈັ່ງໃດ.”

ອີງຕາມການຣາຍງານ ຂອງໜັງສືພິມວຽງຈັນໃໝ່ ເມື່ອ 25 ມິຖຸນາ ຜ່ານມາ, ໄດ້ມີພິທີເຊັນສັນຍາ ຊ່ອຍເຫຼືອງົບປະມານ ເກັບກູ້ຣະເບີດ ບໍ່ທັນແຕກ ຣະຫວ່າງ ກະຊວງແຮງງານ ແລະ ສວັດດີການສັງຄົມ ກັບ ອົງການ ຮາໂລທຣາສ ທີ່ໄດ້ຮັບທຶນ ຈາກຣັຖບານ ສະຫະຣັຖ ອະເມຣິກາ 17 ລ້ານປາຍ ໂດລາສະຫະຣັຖ ແລະ ຣັຖບານອັງກິດ 3.7 ລ້ານໂດລາສະຫະຣັຖ.

ທຶນດັ່ງກ່າວ ຈະນຳໃຊ້ ເຂົ້າໃນການສຳຣວດກວດກູ້ ແລະ ໂຄສະນາ ສຶກສາຄວາມສ່ຽງ ຈາກຣະເບີດບໍ່ທັນແຕກ ຢູ່ແຂວງສວັນນະເຂດ ປີ 2019-2022 ແລະ ນຳໃຊ້ເຂົ້າໃນການສຳຣວດ ແລະ ກວດກູ້ຣະເບີດບໍ່ທັນແຕກ ຢູ່ແຂວງສາລະວັນ, ຈຳປາສັກ, ເຊກອງ ແລະ ອັດຕະປື ໃນປີ 2019-2020.

ຄໍາເຫັນ (1)
Share

ຫ​ນູ​ກອນ

ຈາກ ​ແດນ​ໃຕ້

​ເປັນ​ເລື້ອງ​ທີ່​ສະ​ເທືອນ​ໃຈ​ຫລາຍ ທີ່​ເຫັນ​ພະ​ນັກ​ງານ ເກັບ​ກູ້​ລະ​ເບີດ ສ່ຽງ​ໄພ​ອັນ​ຕະ​ລາຍ ເອົາ​ຊີ​ວິດ​ຕົນ​ເອງໄປ​ສ່ຽງ​ໄພ ເພື່ອ​ໃຫ້​ປະ​ຊາ​ຊົນ​ມີ​ຄວາມ​ປອດ​ໄພ ມີ​ທີ່​ດິນ​ທຳ​ມາ​ຫາ​ກິນ ແຕ່​ພັດ​ບໍ່​ໄດ້​ຮັບ​ເງິນ​ເດືອນ​ເປັນ​ເວ​ລາ 6 ເດືອນ. ເປັນ​ຕາ​ອິ​ຕົນ​ຂະ​ເຈົ້າ​ຫລາຍ ແລະ ຫ​ນ້າ​ສັງ​ເວດ ເຈົ້າ​ຫ​ນ້າ​ທີ່ ຜູ້​ທີ່ ກັກ​ເງິນ​ໄວ້ ແລະ ເອົາ​ເງິນ​ໄປ​ໃຊ້​ທາງ​ອື່ນ. ພວກ​ທ່ານ ກະ​ມີ​ສະ​ຫມອງ​ຄິດ​ຢູ່​ບໍ ວ່າ ພວກ​ຂະ​ເຈົ້າ​ສ່ຽງ​ໄພ ຍັງ​ບໍ່​ແລ້ວ ຍັງ​ບໍ່​ໄດ້​ຮັບ​ສິ່ງ​ຕອບ​ແທນ ລະ​ບົບ ການ​ປົກ​ຄອງ​ເຮົາ ມັນ​ມີ​ຫ​ຍັງ​ຜິດ​ປົກ​ກະ​ຕິ ທ່ານ ນາ​ຍົກ ທອງ​ລຸນ, ນ​າຍ​ົກ ຂວັນ​ໃຈ ພະ​ນັກ​ງານ ສໍ້​ລາ​ດ​ບັງ​ຫລວງ ຂວັນ​ໃຈ ພວກ​ພ້ອງ ກົມ​ການ​ເມືອງ. ກອງ​ປະ​ຊຸມ​ສະ​ພາ ກະ​ປິດ​ແລ້ວ ພາ​ກັນ ໂຫ້​ໄປ​ແກ້​ໃຫ້​ແດ່ ເຖິງ​ແມ່ນ​ວ່າ ບໍ່​ແກ້​ໄຂ ເພື່ອ​ພວກ​ທ່ານ ແຕ່​ເປັນ​ການ​ແກ້​ໄຂ ໃຫ້​ປະ​ຊາ​ຊົນ ຈະ​ໄດ້​ປອດ​ໄພ ຈາກ​ລະ​ເບີດ ຫັ້ນ​ນ່າ. ຂອບ​ໃຈ

Jun 26, 2019 10:41 PM

ເຕັມຫນ້າ