ຄະນະກັມມາທິການ ແມ່ນ້ຳມິສຊິສຊີບປີ້ ຫຼື Mississippi River Commission ປະເທດສະຫະຣັຖອາເມຣິກາ ເດີນທາງມາຢ້ຽມຢາມ ປະເທດລຸ່ມແມ່ນ້ຳຂອງ ຄື ລາວ ແລະ ກັມພູຊາ ລະຫວ່າງ ວັນທີ 10-16 ກໍຣະກະດາ 2022 ເພື່ອເສີມສ້າງຄວາມຮ່ວມມື ໃນການພັທນາ ແລະ ຈັດການຊັພຍາກອນນ້ຳ, ປະສິດທິພາບ ແລະ ການເປັນມິດຕໍ່ສິ່ງແວດລ້ອມ ຫຼາຍຂຶ້ນ.
ການຮ່ວມມືຄັ້ງນີ້ ຈະຊ່ວຍຍົກລະດັບການບໍຣິຫານ ຈັດການແມ່ນ້ຳຂ້າມພົມແດນ, ການຫຼຸດຄວາມສ່ຽງ ຈາກພັຍພິບັດ ແລະ ການພັທນາທີ່ຍືນຍົງ ເພື່ອສ້າງຄວາມໝັ້ນຄົງ ແລະ ຄວາມຈະເຣີນຮຸ່ງເຮືອງ.
ພົນຕຣີ Diana M. Holland ປະທານຄະນະກັມມາທິການແມ່ນ້ຳ ແມ່ນ້ຳມິສຊິສຊີບປີ້ ກ່າວຜ່ານທາງເຟສບຸກຄ໌ໄລວ໌ ຂອງສະຖານທູນອາເມຣິກາ ປະຈຳລາວ ໃນວັນທີ 12 ກໍຣະກະດາ ວ່າ:
" ເຮົາ ບໍ່ ໄດ້ ກັງ ວົນ ກັບ ເຣື່ອງ ອື່ນ ແຕ່ ເຮົາ ຄິດ ເຖິງ ສິ່ງ ສຳ ຄັນ ສຳ ລັບ ຊຸມ ຊົນ ທີ່ ເຮັດ ວຽກ ແລະ ອາ ໄສ ຢູ່ ຕາມ ແມ່ ນ້ຳ ຂອງ ເພື່ອ ຮັບ ປະ ກັນ ວ່າ ຈະ ຊ່ວຍ ປົກ ປັກ ຮັກ ສາ ຄວາມ ປອດ ພັຍ ຂອງແມ່ ນ້ຳ ໃຫ້ ກັບ ທຸກ ຄົນ ໃນ ໂລກ ໂດຍ ສະ ເພາະ ຢ່າງ ຍິ່ງ ປະ ເທດ ຂອງ ເຮົາ , ມັນ ເປັນ ໂອ ກາດ ດີ ທີ່ ພ ວກ ເຮົາ ຈະ ຮ່ວມ ມື ກັນ ແລະ ເພື່ອໃຫ້ ທຸກ ຄົນ ມີ ຄວາມ ເຂົ້າ ໃຈດີ ຂຶ້ນກວ່ານີ້ ."
ສຳລັບການເດີນທາງມາ ຢ້ຽມຢາມ ປະເທດລຸ່ມແມ່ນ້ຳຂອງ ຄື ສປປ ລາວ ຄະນະກັມມາທິການແມ່ນ້ຳ ແມ່ນ້ຳມິສຊິສຊີບປີ້ ໄດ້ປະຊຸມກັບ 3 ໜ່ວຍງານ ທີ່ມີຄວາມສຳຄັນ ແລະ ກ່ຽວຂ້ອງກັບການບໍຣິຫານນ້ຳຂອງ ເພື່ອແລກປ່ຽນບົດຮຽນຮ່ວມກັນ ເຊິ່ງສະຖານທູດຕອາເມຣິກາ ປະຈຳລາວ ໃຫ້ການຕ້ອນຮັບ ແລະ ສນັບສນູນຂໍ້ມູນຕ່າງໆ.
ເຈົ້າໜ້າທີ່ສຖານທູດອາເມຣິກາ ປະຈຳລາວ ທ່ານນຶ່ງ ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 14 ກໍຣິກະດາ ວ່າ:
"ທາງ ຄະ ນະ ຜູ້ແທນ ເພິ່ນ ກະ ມາ ຢ້ຽມ ຢາມ 3 ບ່ອນ ຫັ້ນ ນ່າ ເຈົ້າ ໄປ ພົບ ຄະ ນະ ກັມ ມາ ທິ ການ ແມ່ນນ້ຳຂອງ ສາ ກົ ນ , ກະ ຊວງ ຊັ ພ ຍາ ກອນ ທັມ ມະຊາຕ ແລະ ສິ່ງ ແວດ ລ້ອມ, ແລ້ວ ກະ ຊວງ ພ ລັງ ງານ ແລະ ບໍ່ ແຮ່ ເນາະ. ສ ຖານ ທູຕ ພວກ ເຮົາ ກະ ເປັນ ນຶ່ງ ໃນ ນັ້ນ ທີ່ ໄດ້ ຮັບ ຮອງ ແລ້ວ ກໍ ສ ນັບ ສ ນູນ ເຮື່ອງ Media ສື່ ຕ່າງໆ ."
ຄະນະກັມມາທິການ ແມ່ນ້ຳມິສຊິສຊີບປີ້ ຍັງໄດ້ເຊັນບົດບັນທຶກຄວາມເຂົ້າໃຈ ຮ່ວມກັນ ກັບຄະນະກັມມາທິການແມ່ນ້ຳຂອງສາກົນ ໂດຍ ມີເປົ້າໝາຍ 11 ດ້ານ ປະກອບມີ ການປັບໂຕ ຕໍ່ການປ່ຽນແປງຂອງ ສະພາບດິນຟ້າອາກາດ, ການຈັດການຊັພຍາກອນນ້ຳ ແບບບູຣະນາການ, ການຈັດການພັຍແລ້ງ, ການພະຍາກອນ ອຸທຸກພັຍ, ການພັທນາໄຟຟ້າ ພລັງງານນ້ຳ ແລະ ການປະເມີນຜົລກະທົບ, ຄວາມຕ້ອງການ ແລະ ໃຊ້ການກະເສຕ ແລະ ຄວາມໝັ້ນຄົງ ດ້ານສະບຽງອາຫານ, ປັບປຸງການຳທາງ, ທາງຜາຜ່ານ, ຄຸນນະພາບນ້ຳ ແລະ ພື້ນທີ່ລຸ່ມນ້ຳ.
ແຕ່ລະຂົງເຂດ ມີຄວາມກ່ຽວຂ້ອງ ແລະ ຮີບດ່າວນສຳລັບແມ່ນ້ຳຂອງ ຍ້ອນວ່າ ຫຼາຍປີຜ່ານມາ ມີການໃຊ້ນ້ຳເພື່ອຜລິດໄຟຟ້າ, ພັຍນ້ຳຖ້ວມ ແລະ ພັຍແຫ້ງແລ້ງ ທີ່ຕິດພັນກັບການປ່ຽນແປງ ຂອງສະພາບດິນຟ້າອາກາດ ສົ່ງຜົລກະທົບຕໍ່ລະດັບນ້ຳຂອງ, ການໄຫຼຂອງຕະກອນ ຫຼື ຝຸ່ນຕົມ, ການອົບພະຍົບຂອງປາ, ຄວາມເຄັມທີ່ເພີ່ມຂຶ້ນ ທີ່ສົ່ງຜົລຕໍ່ການດຳລົງຊີວິຕ ແລະ ຄວາມໝັ້ນຄົງ ດ້ານສະບຽງອາຫານ ຂອງຄອບຄົວຊາວປະມົງ ແລະ ຊາວກະເສຕກອນ ຫຼາຍລ້ານຄອບຄົວ ໃນພື້ນທີ່ຕອນລຸ່ມແມ່ນ້ຳຂອງ.
ໃນຄວາມຄິດເຫັນ ຂອງຊາວບ້ານແລ້ວ, ການຮ່ວມມີແບບນີ້ ກໍເປັນສິ່ງທີ່ມີປໂຍດ ເພື່ອຈະໄດ້ມາໃຊ້ໃຫ້ເກີດຜົລ.
ຊາວນະຄອນປາກເຊ ແຂວງຈຳປາສັກ ໄດ້ກ່າວຕໍ່ເອເຊັຽເສຣີ ໃນວັນທີ 14 ກໍຣະກະດາ ວ່າ:
"ແມ່ນ ແລ້ວ ເປັນ ເຣື່ອງ ທີ່ ດີ ທີ່ ສຸດ ເພິ່ນ ຊ່ວຍ ທຶນ ຊ່ວຍ ຮອນ ຊ່ວຍ ຄວາມ ຮູ້ ບົດ ຮຽນ ປະ ສົບ ການ ຂອງ ເພິ່ນ ກະ ດີ ລະ ບໍ່ ຊ່ວຍ ກັນ ເຮົາ ກະ ເອົາ ຄວາມ ຮູ້ ນຳ ເພິ່ນ ຄັນ ແມ່ນບໍ່ ເໝາະ ສົມ ກັບ ບ້ານ ເຮົາ ກະ ພະ ຍາ ຍາມ ດັດ ແປງ ມັນ ."
ການສ້າງເຂື່ອນ ມີຜົລຕໍ່ລະບົບນິເວດ ແຕ່ ຊາວບ້ານຢູ່ປະເທດລາວ ກໍຄັດຄ້ານເຣື່ອງເຂື່ອນບໍ່ໄດ້.
ຊາວປະມົງ ຢູ່ນະຄອນຫຼວງວຽງຈັນ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 14 ກໍຣະກະດາ ວ່າ:
"ອ້າຍ ກະ ເປັນ ປະ ມົງ ນີ້ ແຫຼະ ຢູ່ ນ້ຳ ຂອງ ຄື ກັນ ຫາ ປາ ຄື ກັນ ມີ ຜົ ລ ກະ ທົບ ເຣື່ອງ ລະ ບົບ ນິ ເວດ ເຂື່ອນນີ້ ສຳ ຄັນ ທີ່ ສຸດ ເຮົາ ກະ ເວົ້າບໍ່ ໄດ້ ເນາະ ເຮົາ ເວົ້າ ງ່າຍໆ ຄື ສ່ຽງ ໜ້ອຍໆ ."
ແຕ່ອົງການຈັດຕັ້ງ ພາກປະຊາສັງຄົມກໍເຫັນວ່າ ຄະນະກັມມາທິການ ແມ່ນ້ຳມິສຊິສຊີບປີ້ ຄວນສົ່ງເສີມພາກປະຊາສັງຄົມ ໃຫ້ມີການແລກປ່ຽນຄຳຄິດ, ຄຳເຫັນ ໃນລະດັບອົງການພາກປະຊາສັງຄົມ ໃນປະເທດລຸ່ມແມ່ນ້ຳຂອງ ໃຫ້ມີບົດບາດ ໃນການບໍຣິຫານຊັພຍາກອນນ້ຳ.
ທ່ານ ຫານນະລົງ ເຍົາວະເລີດ ປະທານມູນນິທິ ຈັດການນ້ຳແບບບູຣະນາການ ປະເທດໄທຍ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 14 ກໍຣະກະດາ ວ່າ:
"ຂ້ອຍ ຄິດ ວ່າ ມັນ ໜ້າ ຈະ ເປັນ ການ ແລ ກ ປ່ຽນ ຂອງ ພາກ ປະ ຊາ ຊົນ ຕໍ່ ການ ຈັດ ການ ແມ່ ນ້ຳ ຂອງ ເພື່ອ ໃຫ້ ຮູ້ ທັນ ກັບ ການກໍ່ ສ້າງ ທີ່ ມັນ ເກີດ ຂຶ້ນ ຕ ລອດ ເວ ລາ ໃນ ແມ່ ນ້ຳ ຂອງ ບໍ່ ວ່າ ຈະ ເປັນ ເຣື່ອງ ເຂື່ອນ , ເຣື່ອງ ກັນ ເຈື່ອ ນ ຖ້າ ເປັນ ການ ແລ ກ ປ່ຽນ ໃນ ປະ ເດັນ ແບບນີ້ ຂ້ອຍ ຄິດ ວ່າ ໜ້າ ຈະ ເປັນ ປ ໂຍດ ກັບ ການ ຈັດ ການ ແມ່ ນ້ຳ ຂອງ , ກໍ ລະ ນີ MRC ໃນ ເຣື່ອງ ຂອງ ທາງ ເລືອກ ແລ້ວ ກະ ການ ຈັດ ການ ນ້ຳ ຄວນ ຈະ ດຶງ ເອົາ ພາກ ປະ ຊາ ສັງ ຄົມ ເຂົ້າ ມາ ມີ ສ່ວ ນ ຮ່ວມ ນຳ ດ້ວຍ ."
ສ່ວນວ່າ ດຣ. ອານຸລັກ ກິດຕິຄຸນ ຫົວໜ້າກອງເລຂາ ຄະນະກັມມາທິການ ແມ່ນ້ຳຂອງສາກົລ ກ່າວໃນວັນທີ 13 ກໍຣະກະດາ ວ່າ ຄວາມຮ່ວມມືແບບນີ້ ມີຄ່າສຳລັບເຮົາ ເມື່ອພິຈາຣະນາ ເຖິງຄວາມທ້າທາຍທີ່ເຮົາປະເຊີນ ໃນປັດຈຸບັນ, ພວກເຂົາເຈົ້າມີປະສົບການຫຼາຍດ້ານ ກ່ຽວກັບການຈັດການແມ່ນ້ຳ ແລະ ຊັພຍາກອນນ້ຳ ໂດຍສະເພາະຢ່າງຍິງ ວຽກງານຂອງການສ້າງເຂື່ອນ ແລະ ການອອບແບບທີ່ປັບປ່ຽນໄດ້ ເຊິ່ງປະເທດລຸ່ມແມ່ນໍ້ຂອງ ແລະ ປະຊາຊົນ ຈະໄດ້ຜົລປໂຍດ ຢ່າງແນ່ນອນ ຈາກການແລກປ່ຽນບົດຮຽນ ທີ່ໄດ້ຮັບຜ່ານການເຊັນບົດບັນທຶກ ຄວາມເຂົ້າໃຈ.
ກ່ອນໜ້ານີ້ ໃນປີ 2009, ຣັຖມົນຕຣີ ກະຊວງການຕ່າງປະເທດ ສະຫະຣັຖອາເມຣິກາ ແລະ ຣັຖມົນຕຣີ ກະຊວງການຕ່າງປະເທດລາວ, ໄທຍ, ກັມພູຊາ ແລະ ວຽດນາມ ໄດ້ລິເຣີ່ມໂຄງການ Mekong-U.S Partnership ໂດຍໂຄງການດັ່ງກ່າວ ເນັ້ນການສົ່ງເສີມຄວາມໝັ້ນຄົງ, ສັນຕິພາບ, ຄວາມຈະເຣີນຮຸ່ງເຮື່ອງ ແລະ ການພັທນາແບບຍືນຍົງ ຂອງອະນຸພາກພື້ນ ແມ່ນ້ຳຂອງ ໂດຍຜ່ານການຮ່ວມມື ລະຫວ່າງ ບັດນດາປະເທດ ໃນພາກພື້ນແມ່ນ້ຳຂອງ ຫຼາຍຝ່າຍ ເຊັ່ນ ສະຫະຣັຖອາເມຣິກາ, ລາວ, ໄທຍ, ກັມພູຊາ, ພະມ້າ ແລະ ວຽດນາມ.
ໃນຖານະທີ່ເປັນສ່ວນນຶ່ງ ຂອງໂຄງການ Mekong-U.S Partnership ກະຊວງ ການຕ່າງປະເທດ ສະຫະຣັຖອາເມຣິກາ ໄດ້ສນອງທຶນຈຳນວນນຶ່ງ ໃຫ້ແກ່ການຮ່ວມມື ລະຫວ່າງ ຄະນະກັມມາທິການ ແມ່ນ້ຳຂອງສາກົນ ແລະ ຄະນະກັມມາທິການ ແມ່ນ້ຳມິສຊິສຊີບປີ້.