ອົງການໃນໄທຕໍ່ຕ້ານເຂື່ອນ ດອນ ສະໂຮງ

ໃນວັນທີ 18 ພຶສຈິກາ 2013 ທີ່ບາງກອກປະເທສໄທ ເຄື່ອຂ່າຍອົງການປົກປ້ອງ ສິ່ງແວດລ້ອມ ແລະພາກປະຊາຊົນໄທຮວມທັງໝົດ 103 ກຸ່ມ ໄດ້ຈັດການຖແລງຂ່າວແລະຍື່ນໜັງສືຕໍ່ຣັຖບາລໄທ ໃນຖານະ ສະມາຊິກກໍາມາທິການແມ່ນໍ້າຂອງ ເພື່ອໃຫ້ຍັບຍັ້ງ ໂຄງການສ້າງເຂື່ອນ ດອນສະໂຮງ ຢູ່ປະເທສລາວ ຍ້ອນເຊື່ອວ່າ ເຂື່ອນແຫ່ງນີ້ ຈະສ້າງຜົລກະທົບຕໍ່ທັມຊາດ ແລະ ຄວາມໝັ້ນຄົງຂອງອາຫານສໍາລັບຫລາຍ ປະ ເທດລຸ່ມແມ່ນໍ້າຂອງ. ທ່ານ ມົນຕີ ຈັນທະວົງ ຈາກໂຄງການຟື້ນຟູນິເວດໃນເຂດແມ່ນໍ້າຂອງ(TERRA)ຊຶ່ງເປັນຕົວແທນເຄືອຂ່າຍເວົ້າວ່າ:

`ທ່ານວ່າ ເຂື່ອນດອນສະໂຮງ ຕັ້ງຢູ່ໃນແມ່ນໍ້າຂອງ ຊຶ່ງເປັນແມ່ນໍ້າສາຍຫລັກຜ່ານ ຫລາຍປະເທສ ດັ່ງນັ້ນຈຶ່ງຢາກໃຫ້ ທາງການໄທຮຽກຮ້ອງ ຕໍ່ ກໍາມາທິການແມ່ນໍ້າຂອງ ຫຼື MRC ເພື່ອໃຫ້ມີການປຶກສາຫາລືກັນຕື່ມ ກ່ອນຈະສ້າງຕາມຂໍ້ຕົກລົງແມ່ນໍ້າຂອງປີ 1995 ບໍ່ແມ່ນພຽງແຕ່ ຈະແຈ້ງໃຫ້ຮູ້".

ເຄືອຂ່າຍໄດ້ສເນີ 2 ເຫດຜົລໃຫຍ່ທີ່ເຮັດໃຫ້ມີການຄັດຄ້ານ ແລະຢາກໃຫ້ມີການກວດສອບຄື: 1.ຜົລກະທົບຈາກເຂື່ອນນີ້ຈະມີຫລາຍ ຂະນະ ທີ່ປະໂຍຊນ໌ທີ່ຈະໄດ້ຮັບມີໜ້ອຍຈະຜລິດໄຟຟ້າໄດ້ພຽງ 260 MW. ແຕ່ເຂື່ອນນີ້ຈະຕັນທາງປາຂຶ້ນລ່ອງ ຮວມທັງການໄປວາງໄຂ່ ໃນແມ່ນໍ້າ ຂອງຈະສ້າງຄວາມເສັຍຫາຍຕໍ່ການຂຍາຍພັນປາຢ່າງຫລວງຫລາຍແລະ 2.ມີການບິດເບືອນແລະລະເມີດຂໍ້ຕົກລົງແມ່ນໍ້າຂອງປີ 1995.

ດ້ວຍເຫດຜົລດັ່ງກ່າວ ເຄືອຂ່າຍອົງການປົກປ້ອງສິ່ງແວດລ້ອມ ແລະພາກປະຊາຊົນໄທຈໍານວນ 103 ກຸ່ມທີ່ວ່າມານັ້ນ ຈຶ່ງໄດ້ຍື່ນໜັງສືຕໍ່ກະ ຊວງຊັພຍາກອນທັມຊາດແລະສິ່ງແວດລ້ອມຂອງໄທ ເພື່ອໃຫ້ຣັຖບາລໄທ ຍັບຍັ້ງ ບໍ່ໃຫ້ ສປປລາວ ສ້າງເຂື່ອນນັ້ນ.