ມ.ກະລຶມ ຂາດຢາ ປົວພຍາດ

ສຸພັດຕາ
2018-08-22
ອີແມວລ໌
ຄໍາເຫັນ
Share
ພິມ
ສະພາບບ້ານເຮືອນທີ່ເພພັງ ຊຶ່ງທາງເມືອງກະລຶມ ໄດ້ຈັດສັນເຄື່ອນຍ້າຍ ບ້ານ ທີ່ຖືກນ້ຳຖ້ວມ ໄປຢູ່ເຂດປອດພັຍແລ້ວ
ສະພາບບ້ານເຮືອນທີ່ເພພັງ ຊຶ່ງທາງເມືອງກະລຶມ ໄດ້ຈັດສັນເຄື່ອນຍ້າຍ ບ້ານ ທີ່ຖືກນ້ຳຖ້ວມ ໄປຢູ່ເຂດປອດພັຍແລ້ວ
Screen captured : https://tinyurl.com/y95nyzf4

ປັດຈຸບັນ ປະຊາຊົນເມືອງກະລຶມ ແຂວງເຊກອງ ທີ່ອາສັຍຢູ່ ສູນບັນເທົາພັຍນໍ້າຖ້ວມ ບ້ານຫາດພານ ເລີ້ມເຈັບປ່ວຍ ເປັນພຍາດໄຂ້ຍຸງ, ໄຂ້ຫວັດ ແລະ ຖອກທ້ອງແລ້ວ ພາຍຫຼັງທີ່ມາຢູ່ໃນສູນໄດ້ 3 ສັປດາ. ຊຶ່ງ ນາຍແພດແລະໝໍ ປະຈຳສູນດັ່ງກ່າວ ເວົ້າວ່າຢາປົວພຍາດ ຊນິດນີ້ມີໜ້ອຍ ຈຶ່ງຮຽກຮ້ອງໃຫ້ທາງການ ແຂວງເຊກອງ ຫຼືທາງສູນກາງ ຊ່ວຍແຈກຢາຊນິດນີ້ໃຫ້ຕື່ມ.

ກ່ຽວກັບເຣື້ອງນີ້ ເຈົ້າໜ້າທີ່ສາທາຣະນະສຸຂ ເມືອງກະລຶມ ຢູ່ສູນບັນເທົາພັຍພິບັດ ບ້ານປາກຄາດ ກ່າວຕໍ່ວິທຍຸເອເຊັຍເສຣີ ໃນວັນທີ 20 ສິງຫາ ນີ້ວ່າ:

"ສ່ວນໃຫຍ່ 1; ແມ່ນມັນເກີດກະທົບຈາກພັຍພິບັດນີ້ ມັນ 1, ແມ່ນເປັນໄຂ້ຫວັດ, 2 ແມ່ນເຈັບທ້ອງ, 3 ແມ່ນມີບາງຄົນກໍໄຂ້ຍຸງລາຍ ເກີດຂຶ້ນບໍ່ທັນໄດ້ ລະບາດແຕ່ເກີດຂຶ້ນ 62 ຄົນ ສະນັ້ນປັດຈຸບັນ ຢູ່ເມືອງກະລຶມ ກໍ່ຄືຢູ່ຫາດພານນີ້ ປັນຫາໂຕນີ້ເກີດຂຶ້ນ ຕ້ອງການຢາປົວ ໄຂ້ຍຸງ ແລ້ວກໍ່ຢາປົວໄຂ້ຫວັດ ແມ່ນທີ່ຕ້ອງການ.”

ທ່ານກ່າວວ່າ ປະຊາຊົນທີ່ກຳລັງເຈັບປ່ວຍຢູ່ຕອນນີ້ ແມ່ນປະຊາຊົນບ້ານວາດເໜືອ, ບ້ານວາດໃຕ້, ບ້ານເກງກຸ໋ຍ, ເກງກຽນແລະບ້ານນາຫັງ ທີ່ເຮືອນຂອງພວກເຂົາເຈົ້າ ຖືກນ້ໍາຖ້ວມສູງ ຈົນທາງການຕ້ອງໄດ້ອົພຍົບ ມາຢູ່ສູນເມື່ອທ້າຍເດືອນ ກໍຣະກະດາ ທີ່ຜ່ານມາ ແຕ່ຫລັງຈາກມາ ຢູ່ສູນໄດ້ບໍ່ດົນ ປະຊາຊົນກໍເຣີ້ມເຈັບປ່ວຍ ເປັນໄຂ້ຍຸງ,ໄຂ້ຫວັດ ແລະຖອກທ້ອງ.

ທ່ານກ່າວຕື່ມວ່າ ມາຮອດປັດຈຸບັນ ມີປະຊາຊົນທີ່ເປັນ 3 ພຍາດນີ້ແລ້ວ 62 ຄົນ ແລະຄາດວ່າຈະມີຄົນເຈັບປ່ວຍ ຕື່ມອີກເລື້ອຍໆ ຖ້າຫາກວ່າທາງ ສາທາຣະນະສຸຂເມືອງ ຍັງບໍ່ໄດ້ຮັບຢາປົວພຍາດ ຕາມທີ່ຮ້ອງຮຽນໄປ.

ນອກຈາກບັນຫານີ້ແລ້ວ ເຈົ້າໜ້າທີ່ບອກອີກວ່າ ປັດຈຸບັນຢູ່ເມືອງກະລຶມ ຍັງມີປະຊາຊົນຈຳນວນນຶ່ງໃນອີກ 4 ບ້ານ ຄືບ້ານສ້າງ, ບ້ານຮານອງ, ບ້ານບົວວິງ ແລະບ້ານວັງປະຫງໍ ທີ່ບ້ານເຮືອນຖືກນໍ້າຖ້ວມ ແຕ່ທາງການຍັງບໍ່ສາມາດ ເຂົ້າໄປຊ່ອຍເຫຼືອເຂົາເຈົ້າ ໃຫ້ມາຢູ່ສູນໄດ້ເທື່ອ ເນື່ອງຈາກ ຂົວ ແລະເສັ້ນທາງຫຼາຍຈຸດຖືກຕັດຂາດ ຕັ້ງແຕ່ມື້ວັນທີ 13 ສິງຫານີ້ເປັນຕົ້ນມາ:

“ຖືກກະທົບຈາກພັຍນໍ້າຖ້ວມນີ້ ໄດ້ພ້ອມກັນກູ້ພັຍ ຫຼືວ່າໂຍກຍ້າຍປະຊາຊົນໄປບ່່ອນປອດພັຍ ດຽວນີ້ 100 ສ່ວນ 100 ແຕ່ວ່າ ວັນທີ 15 ກະທົບຕື່ມອີກ ຈາກ 5 ແລ້ວມາຫາ 9 ໝູ່ບ້ານ 9 ວ່າບາງບ້ານນັ້ນ ມັນກາ່ກະທົບສະເພາະຄອບຄົວ ຄອບຄົວໃດນຶ່ງ ປະຊາຊົນທີ່ຖືກ ກະທົບນີ້ ປັດຈຸບັນ ພວກເຮົານີ້ ປັດຈຸບັນ ພວກເຮົາບໍ່ສາມາດຂ້າມໄປ ບໍ່ມີຂົວ ເພາະວ່າ ທາງຖືກຕັດຂາດ ຂົວຖືກຕັດຂາດ.”

ສຳລັບເມືອງກະລຶມ ປັດຈຸບັນ ຖືກນໍ້າຖ້ວມ ເປັນເທື່ອທີ່ສອງແລ້ວ ເທື່ອທຳອິດແມ່ນຖ້ວມວັນທີ 23 ກໍຣະດາ ມີປະຊາຊົນໄດ້ຮັບ ຜົນກະທົບ 5 ບ້ານ ເທື່ອທີ່ 2 ແມ່ນຖ້ວມໃນມື້ວັນທີ 15 ສິງຫາຜ່ານມານີ້ ແລະມີປະຊາຊົນໄດ້ຮັບຜົນກະທົບ 4 ບ້ານ ແຕ່ວ່າ ນໍ້າຖ້ວມເທື່ອທີ່ສອງນີ້ ທາງການບໍ່ສາມາດເຂົ້າໄປຊ່ອຍເຫຼືອ ປະຊາຊົນໄດ້ເທື່ອ ເນື່ອງຈາກທາງໄປຫາບ້ານເລົ່ານັ້ນ ດິນເຈື່ອນຖົມທາງ ແລະຂົວຂ້າມນໍ້າ ທີ່ ຊາວບ້ານຫາກໍ່ສ້ອມແປງແລ້ວ ກໍຖືກນໍ້າພັດຂາດ ຈຶ່ງບໍ່ສາມາດໄປຊ່ອຍເຫຼືອໄດ້ເທື່ອ.

ເຕັມຫນ້າ