ພໍ່ຄ້າ ຢາເສບຕິດລາວ ຣາຍໃຫຍ່ ຖືກຈັບ

ມະ​ນີ​ຈັນ
2017-01-20
Share
F-police-Thai ພິທີຖແລງຂ່າວ ຈັບພໍ່ຄ້າ ຢາເສບຕິດ ຣາຍໃຫຍ່ ຂອງລາວ ທີ່ບາງກອກ
RFA/TP

ໃນວັນທີ 20 ມົກຣາ 2017 ເວລາ 11 ໂມງຕອນເຊົ້າ, ເຈົ້າໜ້າທີ່ ຕໍາຣວດ ປ້ອງກັນ ແລະ ປາບປາມ ຢາເສບຕິດ ຫລື ປປສ ຂອງໄທ ຈັດພິທີ ຖແລງຂ່າວ ການຈັບ ທ້າວ ໄຊຊະນະ ແກ້ວພິມພາ, ອາຍຸ 41 ປີ, ຫົວໂປ່ ຄ້າຢາເສບຕິດ ຊາວລາວ ຣາຍໃຫຍ່ ຣະດັບ ພູມີພາກ ອາຊຽນ, ຊຶ່ງ ເຈົ້າໜ້າທີ່ ຕໍາຣວດໄທ ຈັບຕົວໄດ້ ເມື່ອວັນທີ 19 ມົກຣາ 2017 ທີ່ສນາມບິນ ສຸວັນນະພູມ ຢູ່ຕຶກອາຄານ ຜູ້ໂດຍສານ ຂາເຂົ້າ, ພາຍຫລັງ ທີ່ໄດ້ສືບ ການເຄື່ອນໄຫວ ຂອງເຂົາ ຮ່ວມກັບ ທາງການລາວ ມາໄດ້ 5 ປີປາຍ, ໂດຍຂຍາຍຜົລ ມາຈາກ ການຮ່ວມມື ປະຕິບັດ ການ ປິດລ້ອມ 3 ຫລ່ຽມຄໍາ. ພົລຕໍາຣວດໂທ ສົມໝາຍ ກອງວິໃສສຸກ, ຜູ້ບັນຊາການ ປາບປາມ ຢາເສບຕິດ ໄທ, ກ່າວໃນເວລາ ຖແລງຂ່າວວ່າ:

“ຈະເຮັດໃຫ້ ກຸ່ມພວກນີ້ ທຸກກວ່າ ຂໍທານ ໃຫ້ໄດ້ ເພາະເຂົາ ທໍາລາຍ ລູກຫຼານເຮົາ ມາຫຼາຍແລ້ວ. ເຮົາໃຫ້ເວລາ ເຂົາມາ 5-6 ປີ, ມື້ນີ້ ຈຶ່ງເຮັດໄດ້ ສໍາເຣັດ ແລະມື້ນີ້ ທີ່ສໍາເຣັດ ບໍ່ເຄີຍມີ ມາກ່ອນກໍຄື ເຮົາເຮັດວຽກ ຂ້າມປະເທດໄປແລ້ວ ເຮົາເຮັດ, ເຈົ້າໜ້າທີ່ ຣັຖບານລາວ ເຮັດດ້ວຍ ເພາະເຮົາໄດ້ ໂອ້ລົມກັນ.”

ໃນເວລາ ທີ່ຖແລງຂ່າວ, ພົລຕໍາຣວດເອກ ສເລີມກຽດ ສີວໍຣະຂານ, ຮອງຜູ້ບັນຊາການ ຕໍາຣວດ ແຫ່ງຊາດ ແລະ ຄນະ ເລຂານຸການ ປປສ ຂອງໄທ ເປີດເຜີຍວ່າ ທ້າວ ໄຊຊະນະ ເປັນຫົວໂປ່ ຄ້າ ຢາເສບຕິດ ຊາວລາວ ທີ່ລໍາລຽງ ຢາບ້າ ສົ່ງໄປຈໍາໜ່າຍ ໃຫ້ກັບ ປະເທດ ຕ່າງໆ ໃນພາກພື້ນ ອາຊຽນ ຢ່າງຕໍ່ເນື່ອງ.

ສະເພາະ ປີ 2016 ທາງການໄທ ຈັບກຸມເຄືອຂ່າຍ ຂອງເຂົາໄດ້ 4 ຄະດີ, ຊຶ່ງມີຢາບ້າ 5 ລ້ານ ປາຍເມັດ ເປັນຂອງກາງ. ໃນການຈັບນັ້ນ ໄດ້ມີການ ສືບສວນສອບສວນ ຂຍາຍຜົລໄປຈັບ ຜູ້ຕ້ອງຫາ ທ້າວ ໄຊຊະນະ ພ້ອມພັກພວກ ຄົນລາວ ອີກ 3 ຄົນ ໃນວັນທີ 19 ມົກຣາ ຜ່ານມາ ຫລັງຈາກ ພວກກ່ຽວ ເດີນທາງ ກັບຈາກ ພູເກັດ ແລະ ຈະແວ່ທ່ຽວ ບາງກອກ ເປັນເວລາ 2 ມື້.

“ຄື ຂອງກາງນີ້ ເຮົາໄດ້ ມີການຈັບກຸມ ມາຕລອດ, ທີ່ຜ່ານມາ 4 ເທື່ອນີ້ນ່າ ຢາເສບຕິດ ຢາບ້າ ລະ 5 ລ້ານເມັດ. ເຮົາກໍຂຍາຍ ເຄືອຂ່າຍວ່າ ຕົວການ ຫລື ຜູ້ໃຫ້ການ ສເນີ ຫລື ຂາຍ ມີໃຜແດ່.”

ທ່ານກ່າວ ຕໍ່ໄປວ່າ ຜູ້ຕ້ອງຫາ ມີເຄືອຂ່າຍ ຄ້າຢາບ້າ ສະເພາະໃນໄທ ຊຶ່ງເປັນລູກນ້ອງ ເປັນຄົນໄທ 100 ປາຍຄົນ ກະຈາຍຕົວຢູ່ 36 ຈຸດ ຫຼາຍແຂວງ ທົ່ວປະເທດ ໄທ. ແລະ ໃນທັງໝົດນັ້ນ ໃນ ວັນທີ 19 ຫາທີ 20 ມົກຣາ ເຈົ້າໜ້າທີ່ ປປສ ໄທ ກໍໄດ້ຂຍາຍຜົລ ຈັບຜູ້ຢູ່ໃນ ເຄືອຂ່າຍ ຂອງ ຜູ້ຕ້ອງຫາ ໄດ້ແລ້ວ 11 ຈຸດ ນັບແຕ່ ບາງກອກ, ອຸດອນ, ນົນທະບູຣີ ປະທຸມທານີ, ຊຽງໃໝ່, ນະຄອນ ພະນົມ, ສະກົລນະຄອນ ແລະ ຂອນແກ່ນ, ພ້ອມຍຶດ ຂອງກາງ ເປັນຣົດຂົນສົ່ງ 10 ລໍ້ ແລະ ຣົດກະບະ ຮວມຢູ່ດ້ວຍ.

ໃນການຖແລງຂ່າວນີ້, ເຈົ້າໜ້າທີ່ ປປສ. ແຂວງຕ່າງໆ ກໍໄດ້ຖ່າຍທອດສົດ ການລົງພື້ນທີ່ ຈັບກຸມລູກນ້ອງ ໃນເຄືອຂ່າຍ ຂອງທ້າວ ໄຊຊະນະ ແກ້ວພິມພາ ແລະ ໄດ້ຍຶດຊັບສິນ ທັງໝົດ ຊຶ່ງຮວມກັນ ແລ້ວ ສະເພາະ ໃນໄທ ມູນຄ່າ 100 ລ້ານ ປາຍບາດ ແລະ ໃນລາວ ອາດຈະເຖິງ 1 ພັນ ລ້ານບາດ.

“ຂ້າພະເຈົ້າ ເຊື່ອວ່າ ໂຮງເລື່ອຍ, ໂຮງແຮມ ແລະ ອີກຫຼາຍໆຢ່າງ ຮວມແລ້ວ ຂ້າພະເຈົ້າ ວ່າ ຫຼາຍຮ້ອຍ ລ້ານບາດ ຫລື ເກືອບ 500 ລ້ານບາດ ໃນຝັ່ງໂນ້ນ [ປະເທດລາວ] ນະ".

ໃນຣະຫວ່າງ ຖແລງຂ່າວ ເຈົ້າໜ້າທີ່ ປກສ ລາວ ກໍໄດ້ຣາຍງານສົດ ຈາກ ນະຄອນຫຼວງ ວຽງຈັນ ກ່ຽວກັບ ການ ປະຕິບັດການ ເຂົ້າກວດຄົ້ນ ບ້ານຂອງ ທ້າວ ໄຊຊະນະ ແກ້ວພິມພາ ທີ່ປະເທດລາວ ມາໃຫ້ເຫັນ ນໍາດ້ວຍ.

“ປກສ ທີ່ລາວ ໄດ້ມີການ ປະສາງານ ກັບໜ່ວຍງານ ໃນພື້ນທີ່ ທັງຕໍາຣວດ ປກສ ລາວ ແລະ ຕໍ່ຕ້ານ ຢາເສບຕິດ ຂອງລາວ ໄດ້ມີການ ແລກປ່ຽນ ຂໍ້ມູນຂ່າວສານ ຮ່ວມກັນ ໃນຄະດີນີ້. ມື້ນີ້ ທາງ ຕໍາຣວດ ຂອງລາວ ຈະເຂົ້າໄປ ກວດຄົ້ນ ໃນຫຼາຍຈຸດ ຄືກັນ, ໂດຍສະເພາະ, ຈຸດທີ່ ມີຊັພສິນ ຂ້ອນຂ້າງຫຼາຍ ໃນພື້ນທີ່ ແຂວງຄໍາມ່ວນ.”

ໃນການຈັບກຸມ ຄັ້ງນີ້ ພົລຕໍາຣວດໂທ ສົມໝາຍ ກອງວິໃສສຸກ ໃຫ້ສັມພາດ ວ່າຜ່ານມາ ໄທແລະລາວ ກໍພຍາຍາມ ທີ່ຈະຈັບຕົວເຂົາ ແຕ່ກໍຕ້ອງໄດ້ ລໍຖ້າໄປກ່ອນ ຍ້ອນບໍ່ມີ ຫລັກຖານມັດຕົວ ເຂົາບໍ່ໄດ້ ເປັນ ຜູ້ຂາຍເອງ ຫາກໃຫ້ລູກນ້ອງ ເປັນຜູ້ຂາຍ.

ປັດຈຸບັນ ທ້າວໄຊຊະນະ ແກ້ວພິມພາ ຖືກສົ່ງຕົວໄປ ທີ່ ກອງບັນຊາການ ຕໍາຣວດ ປ້ອງກັນ ແລະ ປາບປາມ ຢາເສບຕິດ ເຂດຫລັກ 4 ບາງກອກ ເພື່ອ ສອບສວນຕື່ມ ກ່ອນຈະຮວບຮວມ ຄໍາໃຫ້ການ ແລະ ສົ່ງຕົວ ໃຫ້ສານ ດໍາເນີນຄະດີ ຕໍ່ໄປ ໃນປະເທດໄທ.

ທ້າວ ໄຊຊະນະ ແກ້ວພິມພາ ຜູ້ລັກລອບ ຈໍາໜ່າຍ ຢາບ້າ ທັງຢູ່ພາຍໃນລາວນັ້ນ, ຕອນ ຕໍາຣວດຈັບໄດ້ ແລະ ສອບປາກຄໍາ ເຂົາກໍຍອມຮັບ ສາຣະພາບວ່າ ຄ້າຂາຍ ຢາເສບຕິດ ແຕ່ຂໍບໍ່ໃຫ້ ອອກເປັນຂ່າວ ແຕ່ຕອນ ຖແລງຂ່າວ ກໍມີນັກຂ່າວ ຈາກ ສໍານັກງານ ຕ່າງໆ ມາຮ່ວມ ຢ່າງຄົບໜ້າ.

ຂນະທີ່ ຈັດພິທີ ຖແລງຂ່າວ ທີ່ບາງກອກ ໃນວັນທີ 20 ມົກຣາ 2017 ນີ້ ເວລາ 10 ໂມງເຊົ້າ ຢູ່ທາງ ປະເທດລາວ ຕໍາຣວດ ກໍໄດ້ ວີດີໂອສົດ ຈາກ ນະຄອນຫຼວງ ວຽງຈັນ ຣາຍງານ ການ ປະຕິບັດການ ເຂົ້າກວດຄົ້ນ ແລະ ຍຶດຊັພສິນ ທັງໝົດ ຂອງ ທ້າວ ໄຊຊະນະ ແກ້ວພິມພາ ຂນະທີ່ ຢູ່ແຂວງຕ່າງໆ ຂອງໄທ ເປັນຕົ້ນ ແຂວງ ອຸດອນ ກໍມີການ ເຂົ້າກວດຄົ້ນ.

ຫລັງຈາກ ການປະຊຸມ ຜ່ານວີດີໂອ ກັບທາງໄທແລ້ວ, ທາງການລາວ ຈະເຂົ້າ ປະຕິບັດ ການກວດຄົ້ນອີກ ຫຼາຍຈຸດ ເພື່ອຕິດຕາມ ກວດຍຶດ ຊັພສິນ ຂອງພໍ່ຄ້າ ຢາເສບຕິດ ຣາຍໃຫຍ່ ຄົນນີ້, ຊຶ່ງຄາດວ່າ ຖືກເກັບ ຊຸກເຊື່ອງໄວ້ ຢູ່ແຂວງຄໍາມ່ວນ ແຕ່ຢູ່ບ່ອນໃດ ແທ້ນັ້ນ ຍັງບໍ່ມີ ການເປີດເຜີຍ.

ທ້າວ ໄຊຊະນະ ແລະ ພັກພວກ ມີຄວາມສຸກ ມັ້ງຄັ້ງຮັ່ງມີ. ແລະ ການປະຕິບັດ ການຈັບກຸມ ຄັ້ງນີ້ ທາງ ຕໍາຣວດໄທ ຖືເປັນ ຜົລສໍາເຣັດ ເຖິງຈະຍັງອີກ ຫຼາຍຈຸດ ກໍຕາມ ເພາະ ຈັບພໍ່ຄ້າ ຢາເສບຕິດ ຣາຍໃຫຍ່ ຫລື ທີ່ເປັນຫົວໂປ່ ຫົວໂຈກນັ້ນ ໄດ້ແລ້ວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ