ທາງການເຕືອນແຕ່ງດອງ ກັບຄົນຈີນ ໃຫ້ຮອບຄອບ

ຜແນກຕ້ານການຄ້າມະນຸດ ແຂວງຜົ້ງສາລີ ເຕືອນແມ່ຍິງລາວ ໃນທົ່ວແຂວງຂອງຕົນ ໃຫ້ລະວັງກ່ອນຈະແຕ່ງດອງກັບຄົນຈີນ, ໃຫ້ແລ່ນ ເອກກະສານຕາມຂັ້ນຕອນຢ່າງຖືກຕ້ອງຕາມຣະບຽບກົດໝາຍ ຍ້ອນຢ້ານຖືກຕົວະຍົວະຫຼອກລວງ ແລະຕົກເປັນ ເຫຍື່ອຂອງການຄ້າມະນຸດ -ຕາມຄໍາເວົ້າຂອງເຈົ້າໜ້າທີ່ ຕ້ານການຄ້າມະນຸດແຂວງ ທ່ານນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 15 ມົກກະຣາ ນີ້:

"ຄັນເຈົ້າຢາກຮັກຢາກມັກກັນແທ້ໜ່າ ແຕ່ວ່າບໍ່ປະຕິບັດຕາມຣະບຽບກົດໝາຍ ບາງເທື່ອເຈົ້າຈະເປັນການຖືກສວຍໃຊ້ບໍ, ຫຼືຖືກຫຼອກແນວໃດ ຫັ້ນນະ ອາດສິຕົກເປັນເຫຍື່ອ ການຄ້າມະນຸດນີ້ ເປັນໄປໄດ້ຄັນວ່າສິເອົາກັນແທ້ ຕ້ອງປະຕິບັດ ຕາມລະບຽບ ກົດໝາຍ ຕ້ອງປະກອບ ເອກກະສານ 13-14 ເອກກະສານ."

ທ່ານກ່າວຕື່ມວ່າ ຫາກແມ່ຍິງລາວ ແລ່ນເອກກະສານຕາມຂັ້ນຕອນຢ່າງຖືກຕ້ອງ ຈະເຮັດໃຫ້ເຈົ້າໜ້າທີ່ ລາວແລະຈີນ ມີຂໍ້ມູນຫລັກຖານ, ປະວັດ ແລະຮູບພາບ ທີ່ອໍານວຍຄວາມສະດວກ ໃຫ້ແກ່ການຕິດຕາມນໍາຫາ ຖ້າຫາກມີບັນຫາເກີດຂຶ້ນ ເປັນຕົ້ນ ເມື່ອແມ່ຍິງລາວ ຖືກ ຫາຍສາບສູນຢູ່ຈີນ.

ດັ່ງເມື່ອຕົ້ນປີທີ່ແລ້ວ ປະຊາຊົນບ້ານບຸນຍອງ ເມືອງບຸນໃຕ້ ແຂວງຜົ້ງສາລີ ເວົ້າວ່າ ພາຍໃນບ້ານນີ້ ມີຄົນຈີນມາສູ່ຂໍແຕ່ງດອງ ກັບແມ່ຍິງ ລາວຄົນນຶ່ງອາຍຸ 25 ປີ ໃຫ້ສິນສອດຄ່າດອງຕາມຮີດຄອງ ແລະປະຕິບັດຕາມຣະບຽບບ້ານ ແລ້ວຄົນຈີນຜູ້ນັ້ນ ກໍພານາງໄປເຮັດວຽກຢູ່ຈີນ.

ຫລັງຈາກນັ້ນ ນາງ ແລະຜົວຈີນ ໄດ້ໄປແລ່ນເອກກະສານ ເປັນຜົວເມັຍກັນ ຢູ່ສະຖານທູດ ສປປລາວ ປະຈໍາປະເທດຈີນ ໃຫ້ຖືກຕ້ອງຕາມ ຣະບຽບກົດໝາຍ. ນາງແລະຜູ້ເປັນຜົວ ກໍພາກັນທຽວໄປມາລາວຢູ່ເລື້ອຍ ມັນກໍບໍ່ມີບັນຫາຫຍັງ ດັ່ງທີ່ທ່ານກ່າວວ່າ:

"ກໍມີ ມີແຕ່ວ່າເຂົາເຮັດຖືກຕາມກົດໝາຍ ແຕ່ງດອງຢູ່ບ້ານເຮົາ ແລ້ວໄປເຮັດຢູ່ບ້ານເຂົາ ເຂົາຍັງເອົາແມ່ມາຈີນຮອດເຮືອນຢູ່ເດ້ ເຂົາກໍມາຢາມ ພໍ່ແມ່ຕລອດ ມີໆຜູ້ນຶ່ງ ແຕ່ວ່າເຂົາເຮັດຕາມກົດໝາຍ ເຂົາແລ່ນມາແຕ່ ສະຖານທູດເລີຍເດ້."

ແຕ່ກໍມີກໍຣະນີ ທີ່ແມ່ຍິງເດັກນ້ອຍລາວ ຖືກຄົນຈີນຕົວະຍົວະຫລອກລວງ ໄປເປັນເມັຍຢູ່ຈີນ ໂດຍບໍ່ໄດ້ປະຕິບັດ ຕາມຮີດຄອງປະເພນີ ແລະ ຕາມຣະບຽບ ກົດໝາຍບ້ານເມືອງ ແລະ ຖືກຜົວ ແລະແມ່ຍ່າ ຢູ່ຈີນ ໃຫ້ນາງຢູ່ແຕ່ເຮືອນ ລ້ຽງລູກ, ນາງທົນບໍ່ໄຫວ ຈຶ່ງລັກໜີໄປຂໍຄວາມ ຊ່ອຍເຫລືອ ຈາກ ເຈົ້າໜ້າທີ່ຈີນ ແລະໄດ້ກັບຄືນບ້ານ ຜ່ານທາງແຂວງຫລວງນໍ້າທາ.

ເມື່ອວັນທີ 18 ທັນວາ ປີກາຍກໍມີຂ່າວວ່າ ສະຫະພັນ ແມ່ຍິງແຂວງຜົ້ງສາລີ ໄດ້ໄປຫາສະຫາພັນແມ່ຍິງ ແຂວງຫຼວງນໍ້າທາ ເພື່ອໄປຮັບເອົາ ນາງ ພອນ ອາຍຸ 18 ປີ ແລະລູກຊາຍຂອງນາງ ອາຍຸ 2 ປີ ກັບຄືນບ້ານເກີດ ຄືບ້ານອາຍາ ເມືອງບຸນໃຕ້.