ປກສ ຕົ້ນເຜິ້ງ-ບໍ່ແກ້ວ ຍຶດຢາບ້າ 5 ລ້ານເມັດ

ກອງບັນຊາການຕຳຣວດປ້ອງກັນຄວາມສງົບ ເມືອງຕົ້ນເຜິ້ງ ສົມທົບກັບ ກຳລັງປ້ອງກັນຄວາມສງົບ ແຂວງບໍ່ແກ້ວ, ນຳກຳລັງ ຕຳຣວດເຂົ້າສະກັດຈັບກຸ່ມຄ້າຢາບ້າ ຣາຍໃຫຍ່ 4 ຄົນ ທີ່ກຳລັງຂົນຢາບ້າ ອອກຈາກພື້ນທີ່ເຂດບ້ານໃຫຍ່ ເມືອງຕົ້ນເຜິ້ງ ແຂວງ ບໍ່ແກ້ວ, ເມື່ອວັນທີ 15 ມົກຣາ 2021 ຜ່ານມາ. ໂດຍໄດ້ຂອງກາງເປັນຢາບ້າ ຈຳນວນ 55 ເປົາ ເທົ່າກັບ 5 ລ້ານປາຍເມັດ. ດັ່ງເຈົ້າໜ້າທີ່ກອງບັນຊາການ ປກສ ເມືອງຕົ້ນເຜິ້ງ ແຂວງບໍ່ແກ້ວໄດ້ກ່າວຕໍ່ເອເຊັຽເສຣີໃນວັນທີ 19 ມົກກະຣາ 2021 ວ່າ:

"ທາງແຂວງເປັນຜູ້ເອົາໄປດຳເນີນຕໍ່, ເພາະວ່າມີແຕ່ວ່າເຂົາເຈົ້າມາຮ່ວມ ແລ້ວເຮົາກໍພ້ອມກັນຈັບກຸມ, ແລ້ວກໍເຂົາເຈົ້າເອົາລົງແຂວງ ພຸ້ນໝົດເລີຍ."

ເຈົ້າໜ້າທີ່ໄດ້ກ່າວຕື່ມວ່າ, ຜູ້ຕ້ອງຫາທັງໝົດຖືກກັກໂຕຢູ່ຫ້ອງການຄັງເງິນຫຼັງເກົ່າປະຈຳແຂວງບໍ່ແກ້ວ, ເພື່ອຕິດຕາມອາການເຊື້ອ ພຍາດໂຄວິດ-19 ເປັນເວລາ 14 ວັນ ກ່ອນຈະນຳໂຕໄປ ສືບສວນ-ສອບສວນຕື່ມ.

ສຳລັບຜູ້ຕ້ອງຫາທັງ 4 ຄົນ ປະກອບມີ ທ້າວ ຕົງເຮີ ອາຍຸ 22 ປີ, ທ້າວ ຊົວວາ ອາຍຸ 24 ປີ, ທ້າວ ດົງເຮີ ອາຍຸ 19 ປີ, ທັງສາມຄົນຢູ່ ບ້ານຈຽງຕອງ ເມືອງປາກທາ ແຂວງບໍ່ແກ້ວ ແລະ ທ້າວ ໄຊທໍ ອາຍຸ 19 ປີ, ຢູ່ບ້ານອຸດົມ ເມືອງຫ້ວຍຊາຍ ແຂວງບໍ່ແກ້ວ. ໂດຍຂອງການທີ່ເຈົ້າໜ້າທີ່ ຍຶດໄວ້ນັ້ນກໍມີ ຢາບ້າ 5 ລ້ານປາຍເມັດ, ຣົດໃຫຍ່ 2 ຄັນ ,ໂທລະສັບ 8 ໜ່ວຍ, ປືນສັ້ນ 1 ກະບອກ ແລະ ສາຍຄໍຄຳ 1 ເສັ້ນ.

ນອກຈາກເຫດການຈັບຢາບ້າໄດ້ 5 ລ້ານປາຍເມັດ, ເມື່ອວັນທີ 14 ມົກກະຣາ 2021, ຜ່ານມາ ເຈົ້າໜ້າທີ່ຕຳຣວດປ້ອງກັນ ຄວາມສງົບ ແຂວງບໍ່ແກ້ວກໍຢຶດຢາບ້ານໄດ້ ຢູ່ເມືອງ ປາກທາ 700 ມັດ ປະມານ 1 ລ້ານປາຍເມັດ. ດັ່ງເຈົ້າໜ້າທີ່ຕຳຣວດ ປກສ ກ່າວວ່າ:

"ມັນຢາບ້ານີ້ຊິມີ 2 ຄັ້ງແລ້ວ ຢາໄອສ ຫັ້ນວັນທີ 14 ແລ້ວ ຢາບ້າ ຄັ້ງນຶ່ງນັ້ນ ວັນທີ 15 ແລ້ວ ຕໍ່ກ່ອນໜ້ານັ້ນ ກໍເປັນຢາບ້າ ຢູ່ປາກທາງໂຕປາກທາ ຄືວ່າມີຢູ່ 700 ປາຍມັດ."

ຕໍ່ກັບການຈັບຢາເສບຕິດ ຂອງຕຳຣວດປ້ອງກັນຄວາມສງົບແຂວງບໍ່ແກ້ວ, ປະຊາຊົນຕ່າງກໍຮູ້ສຶກດີໃຈ ທີ່ທາງເຈົ້າໜ້າທີ່ແກ້ໄຂ ບັນຫາທີ່ເປັນພັຍຢ່າງຮ້າຍແຮງຕໍ່ສັງຄົມ. ດັ່ງຊາວບ້ານອຸດົມ ເມືອງຫ້ວຍຊາຍ ແຂວງບໍ່ແກ້ວ ໄດ້ກ່າວວ່າ:

"ປະມານ 10 ປາຍນີ້ບໍ່, ທີ່ວ່າຍັງອັນນັ້ນຢູ່ນີ້ແບບວ່າເຂົາເຈົ້າແບບພໍ່ແມ່ ຂາດເຂີນເນາະ, ມັນບໍ່ມີເນາະການໃຊ້ຈ່າຍສ່ວນຫຼາຍກໍ ຄອບຄົວທຸກຍາກນີ້ນາ, ບັນຫານີ້ຄົນເຂົາແກ້ໄຂກໍ ປົກປ້ອງບໍ່ໃຫ້ລູກຫຼານ ເຮົາເກີດປະກົດການຫຍໍ້ທໍ້ ຕິດອັນສິ່ງເສບຕິດຫຼາຍແຫຼະ ຄັນເຂົາສະກັດກັ້ນໄດ້."

ການຈັບກຸ່ມຜູ້ຄ້າຢາເສບຕິດໃນຄັ້ງນີ້, ປະຊາຊົນກໍສະແດງຄວາມຍ້ອງຍໍຕໍ່ຕຳຣວດ, ທີ່ເອົາຜູ້ ທີ່ເຮັດຜິດກົດໝາຽມາດຳເນີນຄະດີ. ເພາະຜ່ານມາຊາວບ້ານ ເຄີຍແຈ້ງໃຫ້ຕຳຣວດມາຈັບ ຜູ້ຄ້າຣາຍຍ່ອຍແຕ່ກໍບໍ່ມີໃຜມາ ດຳເນີນຄະດີ. ດັ່ງຊາວບ້ານ ຫ້ວຍສວຍ ເມືອງຫ້ວຍຊາຍ ໄດ້ກ່າວວ່າ:

"ຫ້ວຍສວຍເຂດມົ້ວສຸມນີ້, ຣາຍນ້ອຍລະສເນີລະບໍ່ມີໃຜສົນໃຈປ່ອຍໃຫ້ ເຂົາເຈົ້າມົ້ວສຸມຂາຍຍ່ອຍ, ຣາຍຍ່ອຍນີ້ເອົາກໍເຮັດໃຫ້ເຂົາ ໄດ້ໃຈແມ່ນບໍ່ ສົມມຸດວ່າຄົນວຽງຈັນມາບໍ່ແກ້ວເນາະ ມານໍ້າເກິ່ງກໍກິນເຂົ້າຊອຍນໍ້າເກິ່ງ, ມາບ້ານສີບຸນເຮືອງກໍກິນເຂົ້າປຸ້ນຫົວໂລ້ງ, ບ້ານເອື້ອຍນີ້ຜລິດຢາບ້າໃຫ້ພາກັນເຮັດໝົດບ້ານ ເພາະໃຜຕໍ່ໃຜກໍເຮັດ."

ນອກຈາກແຂວງບໍ່ແກ້ວ ທີ່ຈັບກຸ່ມຄ້າຢາບ້າໃຫຍ່ແລ້ວ, ສື່ທ້ອງຖິ່ນຣາຍງານເມື່ອວັນທີ 28 ທັນວາ 2020 ວ່າ, ເຈົ້າໜ້າທີ່ຕຳຣວດ ຜແນກສະກັດກັ້ນ ແລະ ຕ້ານຢາເສບຕິດ ກອງບັນຊາການປ້ອງກັນ ຄວາມສງົບແຂວງອັດຕະປື ຮ່ວມກັບທະຫານກອງຮ້ອຍ ຊາຍແດນ 543, ເຈົ້າໜ້າທີ່ດ່ານເຊປຽນ ແລະການປົກຄອງເມືອງສນາມໄຊ ໄດ້ຈັບກຸ່ມຄ້າ ຢາເສບຕິດ 4 ຄົນ ເປັນຊາຍ 2 ຄົນ ຍິງ 2 ຄົນ.

ໃນນີ້ມີ ທ້າວ ສົມວິດ ອາຍຸ 45 ປີ ຢູ່ບ້ານອີ່ໄລໃຕ້ ເມືອງນາຊາຍທອງ ນະຄອນຫຼວງວຽງຈັນ, ທ້າວ ຂັນທອງ ອາຍຸ 24 ປີ ຢູ່ບ້ານຂັນໝາກ ເມືອງວັງວຽງ ແຂວງວຽງຈັນ, ນາງແກ້ວວິໄລ ອາຍຸ 30 ປີ ຢູ່ບ້ານໂພນໄຊ ນະຄອນປາກເຊ ແຂວງຈຳປາສັກ ແລະ ນາງ ແປັບຊີ ອາຍຸ 24 ປີ ຢູ່ບ້ານນໍ້າພາວ ເມືອງວັງວຽງແຂວງວຽງຈັນ ພ້ອມຂອງກາງເປັນຢາໄອສ 43 ກິໂລ, ຜົງຂາວ ເຮໂຣອີນ 1 ຖົງ.

ການສອບສວນເບື້ອງຕົ້ນກຸ່ມຄ້າຢາເສບຕິດ ສາຣະພາບວ່າຢາເສບຕິດຈຳນວນດັ່ງກ່າວ, ແມ່ນເປັນຂອງພວກກ່ຽວແທ້ເຊິ່ງໄດ້ຕິດຕໍ່ ພົວພັນຫາ, ທ້າວ ບຸນ ຢູ່ນະຄອນຫຼວງວຽງຈັນ ກ່ຽວກັບການຂົນສົ່ງ ຢາເສບຕິດ ໃຫ້ເຖົ້າແກ່ຄົນກັມພູຊາ ຢູ່ເຂດ ດ່ານເຊປຽນ. ພາຍຫຼັງລົງມາເບິ່ງ ເສັ້ນທາງຂົນສົ່ງ ຢາເສບຕິດ ແລະ ພົບກັບທີມງານຂົນສົ່ງ ກັມພູຊາ ແລ້ວກໍໄດ້ ພາກັນມາ ເມືອງ ສນາມໄຊ ແຂວງອັດຕະປື ເພື່ອຂົນສົ່ງຢາເສບຕິດ ໃນວັນທີ 24 ທັນວາ 2020, ຈຶ່ງຖືກເຈົ້າໜ້າທີ່ທະຫານ ຊາຍແດນ ແລະ ກຸ່ມ ປກສ ບ້ານກັກໂຕ.

ປັຈຈຸບັນຄະດີນີ້ກຳລັງດຳເນີນ ການສືບສວນ-ສອບສວນ, ເພື່ອຂຍາຍຜົລ ແລະ ເອົາຜູ້ກະທໍາຜິດມາລົງໂທດຕາມກົດໝາຍ.