ໄຊຊະນະ ຈະຂໍອຸທອນ

ຈໍາປາທອງ
2020-01-10
ອີແມວລ໌
ຄໍາເຫັນ
Share
ພິມ
ສານອາຍາ ຂອງໄທ ຕັດສິນລົງໂທດ ທ້າວໄຊຊະນະ ແກ້ວພີມພາ ພໍ່ຄ້າຢາເສບຕິດ ຣາຍໃຫຍ່ ຂອງລາວ ໃນຂໍ້ຫາ ທີ 2 ຂອງຄະດີ ຄ້າຢາເສພຕິດ ໃຫ້ຈໍາຄຸກ ຕລອດຊີວິດ
ສານອາຍາ ຂອງໄທ ຕັດສິນລົງໂທດ ທ້າວໄຊຊະນະ ແກ້ວພີມພາ ພໍ່ຄ້າຢາເສບຕິດ ຣາຍໃຫຍ່ ຂອງລາວ ໃນຂໍ້ຫາ ທີ 2 ຂອງຄະດີ ຄ້າຢາເສພຕິດ ໃຫ້ຈໍາຄຸກ ຕລອດຊີວິດ
AFP

ທ່ານ ວິທູນ ທະນາຍຄວາມ ຂອງ ທ້າວ ໄຊຊະນະ ແກ້ວພິມພາ ນັກຄ້າຢາເສບຕິດລາວ ເວົ້າວ່າ ລູກຄວາມຂອງຕົນ ຖືກສານອຸທອນ ພິພາກສາ ໃຫ້ຈໍາຄຸກຕລອດຊີວີວິດ ເມື່ອວັນທີ 19 ທັນວາ 2019 ທີ່ຜ່ານມາ ໃນຄວາມຜິດຖານມີຢາເສບຕິດໄວ້ໃນ ຄອບຄອງ 1 ລ້ານ 2 ແສນເມັດ.

ແລະວ່າ ເມື່ອບໍ່ດົນມານີ້ ທ້າວ ໄຊຊະນະ ໄດ້ເອີ້ນທ່ານເຂົ້າໄປເວົ້າເຖິງ ຈຸດປະສົງ ທີ່ຈະຂໍສູ້ຄະດີຕາມຣະບຽບກົດໝາຍ ໂດຍການອຸທອນ ຄໍາຕັດສິນຂອງສານອຸທອນ ຕໍ່ສານດີກາ ທີ່ເປັນສານສູງສຸດຂອງໄທ, ດັ່ງທີ່ທ່ານກ່າວຕໍ່ ວິທຍຸເອເຊັຍເສຣີໃນມື້ວັນທີ 7 ມົກກະຣາ ນີ້ວ່າ:

"ທ່ານກ່າວວ່າ ທ້າວ ໄຊຊະນະ ຕິດຕໍ່ເຂົ້າມາແລ້ວ. ເຂົາມີຄວາມປະສົງ ຂໍຍື່ນດີກາຕໍ່ ຄືກົດໝາຍກໍານົດວ່າ ຕ້ອງຍື່ນພາຍໃນ 30 ມື້. ຫາກຍື່ນບໍ່ທັນ ກໍເຍີ້ນອອກໄປໄດ້ອີກທຸກໆ 30 ມື້ໄປ. ເຂົາຂໍສູ້ປະເດັນດຽວ ຄືບໍ່ໄດ້ມີຄວາມຜິດ ຕາມຄໍາກ່າວຟ້ອງຂອງ ອັຍການ."

ທ້າວ ໄຊຊະນະ ຍັງຢືນຢັນວ່າ ຕົນເອງບໍ່ມີຄວາມຜິດ ຕາມທີ່ໂຈດ ກໍຄືອັຍການ ທີ່ເປັນຜູ້ຍື່ນຟ້ອງເຂົາ ໃນຂໍ້ຫາສົມຄົບກັນຕັ້ງແຕ່ 2 ຄົນ ຂຶ້ນໄປ ແລະມີຢາບ້າໄວ້ໃນຄອບຄອງ ເພື່ອຈໍາໜ່າຍ ໂດຍບໍ່ໄດ້ຮັບອະນຸຍາດ ແລະ ສົມຄົບກັນວາງແຜນ ເປັນຂະບວນ ການລັກລອບນໍາ ຢາເສບຕິດ ຈໍານວນ 1 ລ້ານ 2 ແສນເມັດ ເຂົ້າມາປະເທດໄທ ເພື່ອລໍາລຽງໄປໃຫ້ເຄືອຂ່າຍ ຢູ່ພາກໃຕ້ຂອງໄທ ແລະ ຢູ່ປະເທດມາເລເຊັຽ ມູນຄ່າ 144 ລ້ານບາດ.

ທ່ານ ວິທູນ ເວົ້າຕື່ມອີກວ່າ ທ້າວ ໄຊຊະນະ ທີ່ເປັນລູກຄວາມຂອງຕົນ ຈະຕ້ອງກຽມຫລັກຖານທຸກຢ່າງ ທີ່ຢືນຢັນວ່າຕົນເອງ ບໍ່ມີຄວາມ ຜິດຕາມ ທີ່ໂຈດຍື່ນຟ້ອງ ພາຍໃນ 30 ມື້ ນັບຕັ້ງແຕ່ມື້ສານອຸທອນ ໄດ້ຕັດສິນໄປ. ຫາກຫາບໍ່ທັນ ຕາມກໍານົດເວລານັ້ນ ກະສາມາດຂໍຍືດ ເວລາອອກໄປຕື່ມອີກທຸກໆ 30 ມື້, ແຕ່ ກໍຂຶ້ນຢູ່ກັບດຸນພິນິດຂອງສານ.

ທ້າວ ໄຊຊະນະ ຖືກສານອາຍາຂອງໄທ ຕັດສິນລົງໂທດປະຫານຊີວິດ ເມື່ອວັນທີ 20 ມິນາ 2018.ແຕ່ສານພິຈາຣະນາລົດໂທດໃຫ້ ຈໍາຄຸກຕລອດຊີວິດ ເນື່ອງຈາກວ່າຜູ້ກ່ຽວ ສາລະພາບ ຄວາມຜິດບາງຢ່າງຕໍ່ສານ. ຕໍ່ມາເຂົາໄດ້ ຂໍຍື່ນອຸທອນ ແລະ ສານອຸທອນ ກໍ ພິພາກສາ ໃຫ້ຈໍາຄຸກຕລອດຊີວິດ ຕາມທີ່ສານອາຍາ ໄດ້ລົດໂທດໃຫ້ ຍ້ອນເອກກະສານ ຫລັກຖານຕ່າງໆ ທີ່ນໍາມາຂໍຍື່ນ ອຸທອນນັ້ນ ບໍ່ມີນໍ້າໜັກພຽງພໍ ທີ່ຈະເຮັດໃຫ້ຫລຸດຜ່ອນ ໂທດລົງຫລາຍກວ່ານັ້ນໄດ້.

ທ້າວ ໄຊຊະນະ ແກ້ວພິມພາ ພ້ອມກັບພັກພວກ ອີກ 2 ຄົນ ຄື ທ້າວ ຊຸມພອນ ພະນົມໄພ ແລະ ທ້າວ ລັດສະພົນ ລັດສະພົນພະກອນ ຖືກເຈົ້າໜ້າທີ່ຕໍາຣວດໄທ ຈັບຢູ່ສນາມບິນສູວັນນະພູມ ບາງກອກ ເມື່ອເດືອນມົກກະຣາ  2017 ແລະຖືກດໍາເນີນຄດີ ໃນຂໍ້ຫາສົມຄົບກັນ ມີຢາບ້າ ຈໍານວນ 1 ລ້ານ 2 ແສນເມັດ ໄວ້ໃນຄອບຄອງ ເພື່ອຈໍາໜ່າຍ.

ເຕັມຫນ້າ