ການຄ້າມະນຸສ ຢູ່ເຂດພິເສດ ສາມຫຼ່ຽມຄຳ

ມີ​ຂ່າວ​ກ່ຽວ​ກັບ​ການ​ຊ່ວຍ​ເຫຼືອ ຄົນ​ງານ​ທີ່​ຖືກ​ບັງ​ໃຊ້​ແຮງ​ງານ ຢູ່​ເຂດເສ​ຖ​ກິ​ຈພິ​ເສດ ​ສາມ​ຫຼ່ຽມຄຳ ​ເມືອງ​ຕົ້ນ​ເຜິ້ງ ແຂວງບໍ່​ແກ້ວ ເກີດ​ຂຶ້ນ​ເປັນ​ປະ​ຈຳ. ຄົນ​ງານທີ່​ຖືກ​ຕົວະ​ໄປເຮັດ​ວຽກ ຕອບ​ແຊັດ ບໍ່​ສະ​ເພາະ​ແຕ່​ຄົນ​ລາວ ທີ່ຕົກ​ເປັນ​ເຫຍື່ອ ພວກ​ພໍ່​ຄ້າ​ຄົນ​ຈີນ ແຕ່ຍັງ​ມີຄົນ​ມາ​ເລ​ເຊັຽ, ຄົນ​ປາ​ກີ​ສ​ຖານ, ຄົນ​ອິນ​ເດັຽ, ຄົນ​ໄທ​ຍ ນຳ​ອີກ​ດ້ວຍ.

ຊ່ຽວ​ຊານ ທີ່​ເຮັດ​ວຽກ​ຊ່ວຍ​ເຫຼືອ​ ຜູ້​ທີ່​ຕົກ​ເປັນ​ເຫຍື່ອ ​ການ​ຄ້າ​ມະ​ນຸ​ສ ໄດ້​ກ່າວ​ຕໍ່ວິທຍຸ ​ເອ​ເຊັຽ​ເສ​ຣີ ແບບ​ສັ້ນໆ ແລະ ມີ​ຄວາມ​ໝາຍ​ວ່າ: “ກໍ​ຣະ​ນີ​ດັ່ງ​ກ່າວ ເປັນ​ການ​ຄ້າ​ມະ​ນຸ​ສ.”

ໃນ​ເບື້ອງ​ຕົ້ນ ມີ​ຄົນ​ລາວ ທັງ​ແມ່​ຍິງ ແລະ ຜູ້​ຊາຍ ​ຮ້ອງ​ຂໍ​ຄວາມ​ຊ່ວຍ​ເຫຼືອ​ ຜ່ານສື່​ສັງ​ຄົມ​ອອນ​ລາຍນ໌​ ວ່າ ເຂົາ​ເຈົ້າ​ມາ​ເຮັດ​ວຽກ​ ຕອບ​ແຊັດ ໃນ​ຮູບ​ແບບ​ຕົວະ​ຄົນ​ ໃຫ້​ມາ​ລົງ​ທຶນ ແຕ່ຖ້າບໍ່​ໄດ້​ຕາມ​ເປົ້າ​ໝາຍ ນາຍ​ຈ້າງ​ຈີນ ກໍ​ຈະລົງ​ໂທດ ດ້ວຍ​ການຫັກ​ຄ່າ​ແຮງ​ງານ, ຖືກ​ຕີ, ຖືກ​ບັງ​ຄັບ​ ໃຫ້​ຂາຍ ​ບໍ​ຣິ​ການ​ທາງ​ເພດ ສຳ​ຮັບ​ພະ​ນັກ​ງານ​ຜູ້​ຍິງ.

ອີງ​ຕາມ​ຂໍ້​ມູນ​ ຈາກຜູ້​ທີ່​ຕົກ​ເປັນ​ເຫຍື່ອ​ ການ​ຄ້າ​ມະ​ນຸສ ຢູ່​ເຂດ​ເສ​ຖ​ກິ​ຈ​ພິ​ເສ​ດ ຄິງ​ສ໌​ໂຣ​ມັນ​ສ໌, ໃນ​ເບື້ອງ​ຕົ້ນ ນາຍ​ຈ້າງ​ຈີນ ຈະ​ບອກວ່າ ໃຫ້​ເງິນ​ເດືອນ​ດີ ຢ່າງ​ໜ້ອຍປະ​ມານ 7,000,000  ກີບ ຕໍ່​ເດືອນ, ແຕ່ ເມື່ອ​ໄປ​ແລ້ວ ນາຍ​ຈ້າງ​ຈີນ ກໍ​ບໍ່​ເຮັດ​ຕາມ​ສັນ​ຍາ ແລະ ຍິ່ງ​ໄປ​ກວ່າ​ນັ້ນ ນາຍ​ຈ້າງ​ຈີນ ມີ​ການ​ກັກ​ຂັງ​ຄົນ​ງານໄວ້​ໃນ​ຫ້ອງ ແລະ ຖ້າ​ຈະ​ກັບ​ບ້ານ ຄົນ​ງານ​ຈະ​ຕ້ອງ ຈ່າຍ​ເງິນ​ຄືນ​ໃຫ້​ນາຍ​ຈ້າງ​ຈີນ ໃນ​ມູນ​ຄ່າ​ຫຼາຍ​ລ້ານ​ກີບ ທັງໆ ​ທີ່ຢູ່​ໃນ​ສັນ​ຍາ ​ການ​ເຮັດ​ວຽກ​ ບໍ່​ໄດ້​ລະ​ບຸ​ໄວ້​ແບບ​ນັ້ນ ແຕ່​ເບື້ອງ​ຕົ້ນ.

ອີງ​ຕາມ​ຂໍ້​ມູນ​ ຈາກຄົນ​ງານ​ລາວ ຜູ້​ທີ່​ຕົ​ກ​ເປັນ​ເຫຍື່ອ ​ຢູ່​ເຂດ​ເສ​ຖ​ກິ​ຈ​ພິ​ເສດ ສາມ​ຫຼ່ຽມ​ຄຳ ຂອງ​ນັກ​ລົງ​ທຶນຈີນ, ມີ​ຄົນ​ງານ​ລາວຫຼາຍ 100 ຄົນ ທີ່​ຕົກ​ເປັນ​ເຫຍື່ອ ແລະ ຖືກ​ຕົວະ​ໄປ​ເຮັດ​ວຽກ ​ຕອບ​ແຊັດ ຢູ່​ໃນ​ເຂດ​ດັ່ງ​ກ່າວ.

ຄົນ​ລາວ ຜູ້​ທີ່​ຕົກ​ເຫຍື່ອ ໄດ້​ກ່າວ​ຕໍ່ວິທຍຸ ​ເອ​ເຊັຽ​ເສ​ຣີ ວ່າ:

“ເຮົາ​ໄປ​ແລ້ວ​ ປະ​ມານ​ທິດ​ແລກ​ ເຮົາ​ແຊັດ​ຫາ​ໃຜ ​ບໍ່​ໄດ້​ເລີຍ ເຮົາ​ແຊັດ​ຫາ​ກະ​ຄື​ວ່າ ບໍ​ຣິ​ສັດ​ທີ່​ຢູ່​ຊັງ​ຈຽງ ກະ​ຄື​ວ່າ ແຊັດ​ຫາ​ໄດ້​ແຕ່​ຜູ້​ດຽວ ລາວ​ກະ​ບອກວ່າ​ໃຫ້​ຢູ່ ຖ້າ​ຊິ​ອອກ​ມາ​ໃຫ້​ຈ່າຍ​ເງິນ.”

ໃນ​ເບື້ອງ​ຕົ້ນ ນາຍ​ຈ້າງ​ຈີນຈະ​ເວົ້າ​ຊັກ​ຈູງ​ ໃຫ້ຜູ້​ທີ່​ຈະ​ໄປ​ເຮັດ​ວຽກວ່າ ຈະ​ຮັບ​ປະ​ກັນ​ຄ່າ​ໃຊ້​ຈ່າຍ​ໝົດ ແລະ ບໍ​ຣິ​ສັດ ຈະ​ອອກ​ໃຫ້​ໝົດ.

ຜູ້​ທີ່​ຕົກ​ເປັ​ນ​ເຫຍື່ອ​ຄົນ​ນີ້ ໄດ້​ກ່າວ​ວ່າ:

“ຂະ​ເຈົ້າ​ເປັນ​ຄົນ​ເວົ້າ​ວ່າ ຟ​ຣີ​ໝົດ​ທຸກ​ຢ່າງ ເຮົາ​ກະ​ຖາມ​ຢ້ຳ​ຄືນ​ອີກ​ບ່ອນ​ວ່າ ແມ່ນ​ເຮົາ​ບໍ່​ໄດ້​ເຮັດ​ວຽກ​ໃຊ້​ໜີ້​ແມ່ນບໍ່. ຂະ​ເຈົ້າ​ກະ​ວ່າ ບໍ່​ທຸກ​ຢ່າງ​ຄື​ບໍ​ຣິ​ສັດ ອອ​ກ​ໃຫ້​ຟ​ຣີ​ໝົດ. ເບື້ອງ​ຕົ້ນ​ນີ້​ເຂົາ​ເວົ້າ​ວ່າ ເຮັດ​ວຽກ 12 ຊົ່ວ​ໂມງ, ເງິນ​ເດືອນ 4,000 ຢວນ ເນາະ, ປະ​ມານ 7,000,000 – 7,200,000 ກີບ ນີ້​ລະ.”

ແຕ່​ ໃນ​ເວ​ລາ​ໄປ​ເຮັດ​ວຽກ​ແລ້ວ ຄົນ​ງານຊິ​ກັບ​ບ້ານ ນາຍ​ຈ້າງ​ຈີນ ຢູ່​ເຂດ​ເສ​ຖ​ກິ​ຈ​ ສາມ​ຫຼ່ຽມ​ຄຳ ພັດ​ບໍ່​ໃຫ້​ກັບ​ບ້ານ ແລະ ໄລ່​ເງິນ​ນຳ​ລູກ​ຈ້າງ​ໝົດ​ທຸກ​ຢ່າງ.

ຜູ້​ທີ່​ຕົກ​ເປັ​ນ​ເຫຍື່ອ​ຄົນ​ນີ້ ໄດ້​ກ່າວ​ວ່າ:

“ທຸກ​ຢ່າງ​ເລີຍ​ອ້າຍ ຕັ້ງ​ແຕ່​ຄ່າ​ນ້ຳ​, ຄ່າ​ໄຟ ​ຫຍັງ. ເຂົາ​ໄລ່​ໝົດ​ເລີຍ ທີ່​ເປັນ​ຂອງ​ເຂົາ. ເຂົາ​ໄລ່​ໝົດ​ເລີຍ. ເຮົາ​ໄປ​ກິນ​ເຂົ້າ, ເຂົາ​ກະ​ເອົາ. ເຮົາ​ໃຊ້​ຫຍັງ ​ເຂົາ​ກະ​ເອົາ. ເຮົາ​ໄດ້​ຂໍ​ລາ​ຍ​ລະ​ອຽດ ນຳ​ຜູ້​ທີ່​ເກັບ​ເງິນ​ນຳ​ເຮົາ ແບບ​ລາວ​ວ່າ ຄ້າຍ​ແບບ​ວ່າ ລາວ​ເວົ້າ​ອອກ​ມາ​ຊື່ໆ ຫັ້ນ​ນະ ແຕ່​ວ່າ ເຮົາ​ຂໍ​ລາຍ​ລະ​ອຽດ​ວ່າ​ ເອີ ຄ່ານີ້​ທໍ່ໃດ ເຮັດ​ເປັນ​ບິນ​ຫັ້ນ​ນ່າ ອ້າຍ ລ​າຍ​ລັກ​ອັກ​ສອນ​ຫັ້ນ​ນ່າ ເຂົາ​ກະ​ບໍ່​ເຮັດ​ໃຫ້​ເຮົາ.”

ນອກ​ຈາກນີ້ ສະ​ຖານ​ທູຕ ​ອິນ​ເດັຽ ​ປະ​ຈຳ​ລາວ ໄດ້​ຊ່ວຍ​ເຫຼືອ ຄົນ​ອິນ​ເດັຽ 11 ຄົນ ທີ່​ຖືກ​ກັກ​ໂຕ​ຢູ່ ເຂດ​ ເສ​ຖ​ກິ​ຈ ພິ​ເສດສາມ​ຫຼ່ຽມ​ຄຳ ແລ້ວ ສົ່ງ​ເຂົາ​ເຈົ້າ​ກັບ​ຄືນ ​ປະ​ເທດອິນ​ເດັຽ ໂດຍ​ຜ່ານ​ບາງກອກ​ ປະ​ເທດ​ໄທ​ຍ.

ເວບ​ໄຊຕ໌​ຂ່າວ ທີ່​ຊື່​ວ່າ www.indianarrative.com ໄດ້​ຣາຍ​ງານ​ວ່າ ຄົນ​ງານ​ອິນ​ເດັຽດັ່ງ​ກາວ ຕ້ອງ​ທົນ​ຢູ່​ໃນ​ເຂດ​ເສ​ຖ​ກິ​ຈ​ ພິ​ເສດ​ ສາມ​ຫຼ່ຽມ​ຄຳ ດ້ວຍ​ຄວາມ​ຢ້ານ​ກົວ ແລະ ຄວາມ​ລຳ​ບາກ ເປັນ​ເວ​ລາ​ຫຼາຍກວ່າ 1 ເດືອນ ກ່ອນ​ທີ່ ເຂົາ​ເຈົ້າ​ຈະ​ຖືກຊ່ວຍ​ເຫຼືອ​ອອກ​ໄປ.

ໃນ​ເດືອນ​ກັນ​ຍາ ທີ່​ຜ່ານ​ມາ, ຣັ​ຖ​ບານ​ອິນ​ເດັຽ ໄດ້​ອອກ​ແຈ້ງ​ເດືອນ ໃຫ້ຊາວ​ໜຸ່ມ​ອິນ​ເດັຽ ທີ່​ມີ​ຄວາມ​ຮູ້​ດ້າ​ນ ​ໄອ​ທີ (IT) ບໍ່​ໃຫ້​ໄປ​ຫຼົງ​ເຊື່ອ ການ​ປະ​ກາດຮັບ​ສ​ມັກ​ວຽກ ທີ່​ຫລອກ​ລວງ ຢູ່​ຕາມ​ຊື່​ສັງ​ຄົມ​ອອນ​ລາຍນ໌.

ເນື້ອ​ໃນ​ແຈ້ງ​ເຕືອນ​ ຂອງ​ທາງ​ການ​ອິນ​ເດັຽ ໄດ້​ລະ​ບຸ​ວ່າ: “ຄົນ​ອິນ​ເດັຽ ທີ່​​ຕົກເປັນ​ເຫຍື່ອ ​ອີກທັງ ​ຖືກພາ​ໂຕ ລັກ​ຂ້າມ​ໄປ​ເຮັດ​ວຽກ ຜ່ານ​ຊາຍ​ແດນ ​ປະ​ເທດ​ພະ​ມ້າ ແລ້ວ​ມາ​ຖືກ​ກັກ​ໂຕ ແລະ ບັງ​ຄັບ​ໃຫ້​ເຮັດ​ວຽກ  ພາຍ​ໃຕ້​ເງື່ອນ​ໄຂ​ທີ່ບໍ່​ດີ”.

ຄົນ​ສັນ​ຊາຕ ​ປາ​ກີ​ສ​ຖານ 44 ຄົນ ກໍ​ຖືກ​ຕົວະ​ໄປ​ເຮັດ​ວຽກຢູ່ ເຂດ​ເສ​ຖ​ກິ​ຈ​ພິ​ເສດ ສາມ​ຫຼ່ຽມ​ຄຳ.

ໃນວັນທີ 20 ຕຸລາທີ່ຜ່ານມາ ທ່ານ ອິກບັລ ຮຸສຊ່ຽນ ຄ່ານ (Iqbal Hussain Khan) ຣັຖມັນຕຣີກະຊວງພາຍໃນ ຂອງປາກິສຖານ ໃຫ້ສັມພາດຕໍ່ສື່ມວນຊົນວ່າ ທາງການປາກີສຖານ ສາມາດຊ່ອຍເຫລືອ ຄົນງານເພດຊາຍ ທີ່ຖືກຕົວະ ໄປເຮັດວຽກ ເປັນສແກມເມີ້ຣ໌ ຢູ່ພາຍໃນເຂດ ເສຖກິຈພິເສດ ສາມຫລ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ໄດ້ 44 ຄົນ ໃນໄລຍະຕົ້ນເດືອນຕຸລາ ທີ່ຜ່ານມາ.

ຄົນ​ງານ​ເຫຼົ່າ​ນັ້ນ ໄດ້ຮ້ອງຂໍຄວາມຊ່ວຍເຫລືອ ຜ່ານຊ່ອງທາງ ອອນລາຍນ໌ ໄປຍັງທາງການ ປາກີສຖານ ໃນເດືອນສິງຫາ ທີ່ຜ່ານມາ.

ກ່ຽວກັບເຣຶ່ອງນີ້, ກະຊວງພາຍໃນ ແລະກະຊວງ ການຕ່າງປະເທດ ຂອງປາກີສຖານ ໄດ້ປະສານຄວາມຮ່ວມມື ໄປຫາສະຖານທູຕ ປາກີສຖານ ປະຈຳປະເທດວຽດນາມ ໃນຖານະ ປະເທດເພື່ອນບ້ານ ຂອງລາວ ລວມເຖິງປະສານງານ ໄປຫາທາງການຈີນ ແລະ ທາງການໄທຍ ໃຫ້ຊ່ອຍ ດຳເນີນການ ແກ້ໄຂບັນຫາ ດັ່ງກ່າວນີ້ຕື່ມ ພ້ອມແຈ້ງເຕືອນ ຜູ້ທີ່ຕ້ອງການ ໄປເຮັດວຽກ ຢູ່ຕ່າງປະເທດ ໃຫ້ລະວັງ ບໍ່ໃຫ້ຕົກເປັນເຫຍື່ອ ຂອງກຸ່ມນັກຕົ້ມຕຸນ.

ອີງຕາມຣາຍງານ ຂອງ ທ່ານ ອິກບັລ ຮຸສຊ່ຽນ ຄ່ານ (Iqbal Hussain Khan), ນາຍໜ້າໄດ້ຕົວະຄົນງານ ປາກີສຖານ ທີ່ສົນໃຈໄປເຮັດວຽກ ຢູ່ຕ່າງປະເທດວ່າ ພວກເຂົາເຈົ້າຈະມີວຽກເຮັດ ທີ່ມີລາຍໄດ້ດີ ແຕ່ເມື່ອເດີນທາງ ໄປຮອດປະເທດລາວ ຄົນງານກຸ່ມດັ່ງກ່າວນີ້ ພັດຖືກນາຍຈ້າງ ແລະ ນາຍໜ້າຍຶດໜັງສືເດີນທາງ, ບັງຄັບໃຫ້ສ້າງບັນຊີອອນລາຍນ໌.

ຄົນ​ມາ​ເລ​ເຊັຽ 7 ຄົນ ກໍ​ຖືກ​ຕົວະ​ໄປ​ເຮັດວຽກ ​ຢູ່​ເຂດ​ເສ​ຖ​ກິ​ຈ​ພິ​ເສດ ສາມ​ຫຼ່ຽມ​ຄຳ ແລະ ຖືກ​ຊ່ວຍ​ເຫຼືອ​ອອກ​ມາ​ໄດ້.

ໃນວັນທີ 6 ຕຸລາທີ່ຜ່ານມາ ກະຊວງ ການຕ່າງປະເທດ ຂອງມາເລເຊັຽ ອອກຖແຫລງການວ່າ ໄດ້ດຳເນີນການ ຜ່ານສະຖານທູຕມາເລເຊັຽ ປະຈຳປະເທດລາວ ໃນການຊ່ອຍເຫລືອ ຄົນງານມາເລເຊັຽ ທີ່ຖືກຕົວະ ໄປເຮັດວຽກສແກມເມີ້ຣ໌ ໄດ້ຈຳນວນ 7 ຄົນ.

ທ່ານ ດາໂຕະ ຮິຊາມຸ໋ດດິ໋ນ ຮາຮິມ (Dato Hishamuddin Hahim) ເລຂາທິການ ອົງການເພື່ອມະນຸສທັມ ລະຫວ່າງປະເທດ ຂອງມາເລເຊັຽ ຫລື Malaysia International Humanitarian Organization (MHO) ກໍໄດ້ກ່າວຕໍ່ວິທຍຸ ເອເຊັຽເສຣີ ໃນວັນທີ 10 ຕຸລາທີ່ຜ່າມານີ້ວ່າ ຍັງມີຄົນງານມາເລເຊັຽ ທີ່ຖືກຕົວະໄປເຮັດວຽກ ເປັນສແກມເມີ້ຣ໌, ເຮັດ​ວຽກຕອບ​ແຊັດ ຢູ່ພາຍໃນປະເທດລາວ ເທົ່າທີ່ມີຂໍ້ມູນ ແມ່ນມີປະມານ 50-100 ຄົນ ທີ່ບໍ່ສາມາດຊ່ອຍເຫລືອ ອອກມາໄດ້ເທື່ອ.

ໃນ​ການຊ່ອຍເຫລືອ ຄົນງານມາເລເຊັຽ ທີ່ຖືກຕົວະໄປເຮັດວຽກ, ກະຊວງການຕ່າງປະເທດ ຂອງມາເລເຊັຽ ​ໄດ້ດໍາເນີນການ ຜ່ານສະຖານທູຕ ມາເລເຊັຽ ປະຈໍາລາວ, ​ກັມພູຊາ, ພະມ້າ ແລະໄທຍ. ພ້ອມດຽວກັນນັ້ນ ກໍແນະນໍາໃຫ້ ຜູ້ທີ່ຮູ້ຂໍ້ມູນ ກ່ຽວກັບຂະບວນການ ຕົວະຄົນງານມາເລເຊັຽ ໄປເຮັດວຽກເປັນ ສແກມເມີຣ໌ ແຈ້ງໄປໃຫ້ເຈົ້າໜ້າທີ່ ຕໍາຣວດຮູ້ນໍາ ແລະຫລີກເວັ້ນ ການໃຫ້ຂໍ້ມູນ ທີ່ເຮັດໃຫ້ຄອບຄົວ ຂອງຜູ້ເຄາະຮ້າຍກັງວົນໃຈ.

ນອກ​ຈາກນີ້ ໃນ​ຕົ້ນ​ປີ 2022 ທີ່​ຜ່ານມາ, ກໍ​ມີ​ຄົນ​ໄທ​ຍ ​ຫຼາຍ 10 ຄົນ ຖື​ກ​ຕົວະ​ໄປ​ເຮັດ​ວຽກ​ຢູ່ ຢູ່​ເຂດ​ເສ​ຖ​ກິ​ຈ​ ພິ​ເສດ ​ສາມ​ຫຼ່ຽມ​ຄຳ ແລະ ຖືກ​ບັງ​ຄັບ​ໃຫ້​ເຮັດ​ວຽກ​ ຫຼາຍ​ຊົ່ວ​ໂມງ​.

ທາງການລາວ ໄດ້ຮັບແຈ້ງຣາຍຊື່ ຄົນງານໄທຍ 37 ຄົນ ທີ່ຖືກຕົວະໄປເຮັດວຽກ ຢູ່ໃນເຂດດັ່ງກ່າວ. ໃນນັ້ນ 16 ຄົນ ສາມາດຕິດຕໍ່ໄດ້ ແລະຢູ່ໃນລະຫວ່າງ ການປະສານງານ ສົ່ງກັບປະເທດ ຈາກເມືອງຫ້ວຍຊາຍ ໄປຫາເມືອງຊຽງຂອງ ຂອງໄທຍ. ສ່ວນທີ່ເຫລືອອີກ 21 ຄົນ ຢູ່ໃນລະຫວ່າງ ການຕິດຕາມຫາຕົວຢູ່.

ເມື່ອວັນທີ 25 ເມສາທີ່ຜ່ານມາ ກົມກົງສຸນ ກະຊວງການຕ່າງປະເທດ ຂອງໄທຍ ໄດ້ອອກແຈ້ງເຕືອນຄົນໄທຍ ໃຫ້ລະວັງການໂຄສະນາ ຫລອກລວງ ຜ່ານສື່ສັງຄົມອອນລາຍນ໌ ຫລື ຖືກຊັກຊວນ ຈາກນາຍໜ້າຄົນໄທຍ ໄປເຮັດວຽກຢູ່ ກາສິໂນ ຄິງສ໌ໂຣມັນສ໌ ທີ່ເມືອງຕົ້ນເຜິ້ງ ແຂວງບໍ່ແກ້ວ ວ່າຈະໄດ້ຄ່າຈ້າງສູງ, ສວັດດິການດີ ແລະມີທີ່ພັກ-ອາຫານພ້ອມ ຍ້ອນຢ້ານວ່າ ຈະຖືກບັງຄັບໃຫ້ເຮັດວຽກ ທີ່ບໍ່ຖືກຕ້ອງຕາມກົດໝາຍເປັນຕົ້ນ ຖືກໃຫ້ເຮັດວຽກເປັນສະແກມເມີ້ຣ໌, ຕົວະເອົາເງິນຄົນ ຫລື ຖືກບັງຄັບໃຫ້ຄ້າປະເວນີ.

ສ່ວນ​ວ່າ ຄະນະຄຸ້ມຄອງ ເຂດເສຖກິຈ ພິເສດ ແຂວງບໍ່ແກ້ວ ໄດ້ອອກແຈ້ງການໃນມື້ວັນທີ 19 ກໍຣະກະດາ 2022 ໃຫ້ກຸ່ມບໍຣິສັດສັດ ດອກງິ້ວຄໍາຈໍາກັດ, ສະພາບໍຣິຫານ ເຂດເສຖກິຈ ພິເສດສາມຫລ່ຽມຄໍາ, ບັນດາບໍຣິສັດ, ຫົວໜ່ວຍທຸຣະກິຈ, ຜູ້ປະກອບການຣາຍຍ່ອຍ ທີ່ເຄື່ອນໄຫວໃນເຂດເສຖກິຈນີ້ ໂຈະການນໍາຄົນງານ ເຂົ້າມາເຮັດວຽກ ຕອບແຊັດຢູ່ບັນດາ ບໍຣິສັດອອນລາຍນ໌ ຊົ່ວຄາວ ໂດຍເວົ້າວ່າ ເພື່ອເຮັດໃຫ້ ການນໍາໃຊ້ແຮງງານ ໄດ້ຮັບການຄຸ້ມຄອງ ຢ່າງມີປະສິທທິພາບ, ຜູ້ໃຊ້ແຮງງານ ແລະຜູ້ອອກ ແຮງງານ ໄດ້ຮັບການປົກປ້ອງສິທ ແລະຜົລປໂຍດ ອັນຊອບທັມ ຕາມກົດໝາຍ ແລະລະບຽບການ.

ເຈົ້າໜ້າທີ່ ຄະນະຄຸ້ມຄອງ ເຂດເສຖກິຈ ພິເສດ ແຂວງບໍ່ແກ້ວ ເວົ້າກ່ຽວກັບເຣື່ອງນີ້ວ່າ ຄະນະຄຸ້ມຄອງເຂດເສຖກິຈນີ້ ຈະຂໍຄວາມຮ່ວມມື ນໍາບໍຣິສັດດອກງິ້ວຄໍາ ເຈົ້າ​ຂອງ​ເຂດ​ ເສ​ຖ​ກິ​ຈ ​ພິ​ເສດ ສາມ​ຫຼ່ຽມ​ຄຳ ໃນການກວດກາ ບັນດາບໍຣິສັດອອນລາຍນ໌ ທີ່ນໍາໃຊ້ຄົນງານລາວ ຕອບແຊັດ ແລະຈະ ສຶກສາອົບຮົມ ທັງຄົນງານລາວ ແລະ ທັງບໍຣິສັດ ບໍ່ໃຫ້ໃຊ້ຄວາມຮຸນແຮງ ຮວມທັງການທໍາຮ້າຍຮ່າງກາຍ ຍ້ອນເຮັດວຽກຕອບແຊັດບໍ່ໄດ້.