ທາງການໄທ ຊ່ອຍແມ່ຍິງລາວ ຈາກ ນາຍຈ້າງໂຫດ

ຈໍາປາທອງ
2020-03-02
ອີແມວລ໌
ຄໍາເຫັນ
Share
ພິມ
ແມ່ຍິງລາວ ອາຍຸ 22 ປີ ທີ່ຖືກຕົວະຍົວະ ມາເຮັດວຽກ ຢູ່ປະເທດໄທ ຕັ້ງແຕ່ອາຍຸ 13 ປີ ແລະ ຖືກນາຍຈ້າງໄທ ກັກຂັງ, ທໍາຮ້າຍຮ່າງກາຍ ຢ່າງທາລຸນ
ແມ່ຍິງລາວ ອາຍຸ 22 ປີ ທີ່ຖືກຕົວະຍົວະ ມາເຮັດວຽກ ຢູ່ປະເທດໄທ ຕັ້ງແຕ່ອາຍຸ 13 ປີ ແລະ ຖືກນາຍຈ້າງໄທ ກັກຂັງ, ທໍາຮ້າຍຮ່າງກາຍ ຢ່າງທາລຸນ
Photo by: RFA/TP

ຕໍາຣວດປາບປາມ ການຄ້າມະນຸດຂອງໄທ ຊ່ອຍເຫລືອແມ່ຍິງລາວ ອາຍຸ 22 ປີ ທີ່ຖືກຕົວະຍົວະ ມາເຮັດວຽກຢູ່ປະເທດໄທ ຕັ້ງແຕ່ອາຍຸ 13 ປີ ແລະຖືກນາຍຈ້າງໄທ ກັກຂັງ, ທໍາຮ້າຍຮ່າງກາຍ ຢ່າງທາລຸນ ແລະບໍ່ໃຫ້ຄ່າແຮງງານ ເປັນເວລາ 9 ປີ.

ຕໍາຣວດໄທໄດ້ເຂົ້າກວດຄົ້ນ ແລະຊ່ອຍແມ່ຍິງລາວ ຜູ້ເຄາະຮ້າຍໄດ້ ຢູ່ຮ້ານຂາຍ ອຸປກອນຣົດໃຫຍ່ ທີ່ເມືອງກະທຸມແບນ ແຂວງສະໝຸດ ສາຄອນ ເວລາ 8 ໂມງແລງ ຂອງວັນທີ 27 ກຸມພາ 2020 ນີ້ ພາຍຫລັງທີ່ມີພົລເມືອງດີ ໄປແຈ້ງຂ່າວໃຫ້ ຕໍາຣວດຮູ້.

ພັນຕໍາຣວດໂທ ພົງພິທັກ ບຸນບໍາຣຸງ ຫົວໜ້າ ຊຸດປະຕິບັດການ ກອງບັງຄັບການປາບປາມ ການຄ້າມະນຸດ ພາກ 5 ຂອງໄທ ທີ່ໄດ້ຊ່ອຍ ເຫລືອແມ່ຍິງລາວໃນມື້ນັ້ນ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 29 ກຸມພາທີ່ ຜ່ານມາວ່າ:

”ມັນເປັນເຣຶ່ອງຂອງເດັກນ້ອຍ ຊຶ່ງເຂົາຖືກສົ່ງມາໄວ້ ທີ່ຮ້ານຂາຍອຸປກອນຣົດໃຫຍ່ ຕອນທີ່ນາງມີອາຍຸ 13 ປີ, ຫລັງຈາກນັ້ນ ນາງກໍໄດ້ ຖືກກັກ ບໍຣິເວນຢູ່ໃນຮ້ານ ມາຈົນຮອດອາຍຸໄດ້ 22 ປີ. ເຊັ່ນວ່າ ໃນໄລຍະບຸນປີໃໝ່ ເວລານາຍຈ້າງໄປທ່ຽວຕ່າງ ປະເທດ ນາຍຈ້າງກໍໃສ່ ກຸນແຈເຮືອນໄວ້ໝົດ ບໍ່ໃຫ້ນາງອອກໄປໃສ. ເມື່ອບຸນປີໃໝ່ແລ້ວ ກໍມີດີເຈຜູ້ນຶ່ງມາແຈ້ງໃຫ້ຮູ້.”

ຕໍາຣວດໄທ ໄດ້ຈັບນາຍຈ້າງ ແລະ ຕັ້ງຂໍ້ຫາ 3 ຂໍ້ ຄື 1. ຮັບຄົນຕ່າງດ້າວ ທີ່ບໍ່ມີໃບອະນຸຍາດ ເຂົ້າເຮັດວຽກ. 2. ກັກຂັງ ຫລືເຮັດໃຫ້ຜູ້ອື່ນ ບໍ່ມີສິດ ເສຣີພາບ ແລະ 3. ຂໍ້ຫາຄ້າມະນຸດ.

ຕໍາຣວດໄທໄດ້ສົ່ງ ນາງ ຜູ້ເຄາະຮ້າຍ ໄປຟື້ນຟູສະພາບຈິດໃຈ ທີ່ສູນຄຸ້ມຄອງເດັກນ້ອຍ ແລະສະຕຣີ ທີ່ຕົກເປັນເຫຍື່ອຂອງການ ຄ້າມະນຸດ ຂອງກະຊວງພັທນາ ສັງຄົມ ແລະຄວາມໝັ້ນຄົງ ຂອງມະນຸດໄທ ແລະຈະໄດ້ຮຽກຄ່າຊົດເຊີຍ ຄວາມເສັຍຫາຍ ຈາກນາຍຈ້າງໃຫ້ນາງ.

ເຈົ້າໜ້າທີ່ກະຊວງພັທນາສັງຄົມ ແລະຄວາມໝັ້ນຄົງຂອງມະນຸດໄທ ຜູ້ຂໍສງວນຊື່ ທີ່ເບິ່ງແຍງ ສະພາບຈິດໃຈ ຂອງແມ່ຍິງລາວຄົນ ດັ່ງກ່າວ ໄດ້ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 29 ກຸມພາ ທີ່ຜ່ານມາວ່າ ປັດຈຸບັນ ກໍາລັງກວດສະພາບ ຮ່າງກາຍນາງ:

"ຕອນນີ້ ມັນກໍເປັນສະຖານທີ່ທໍາອິດ ທີ່ໄດ້ຮັບຜູ້ເສັຍຫາຍ ຈາກການຄ້າມະນຸດ ເຮົາຈະຕ້ອງມີການກວດຮ່າງກາຍ ຂອງແມ່ຍິງ ຜູ້ເຄາະຮ້າຍ ໃຫ້ລະອຽດກ່ອນ ຊຶ່ງເບື້ອງຕົ້ນແມ່ນກວດ 5 ພຍາດ, ກວດເຊື້ອ HIV, ກວດສະພາວະຄວາມຄຽດ ແລະກວດກະດູກນໍາດ້ວຍ. ໃນວັນຈັນ ຈະຕ້ອງໄດ້ພາໄປກວດອີກເທື່ອນຶ່ງ. ມີເຈົ້າໜ້າທີ່ບ້ານພັກເດັກນ້ອຍ ແລະ ນັກຈິດຕະວິທຍາ ມາບໍາບັດ ແລະດູແລນາງໄປກ່ອນ ຍ້ອນນາງ ຄຽດ ແລະຢ້ານກົວ.”

ທ່ານເວົ້າວ່າ ແມ່ຍິງລາວ ຜູ້ເຄາະຮ້າຍຄົນນີ້ ບໍ່ໄດ້ຕິດຕໍ່ໄປຫາຄອບຄົວ ຂອງນາງ ມາໄດ້ 9 ປີແລ້ວ ແລະ ນາງກໍຈື່ບໍ່ໄດ້ວ່າ ບ້ານ ແລະ ເມືອງຂອງນາງຊື່ວ່າແນວໃດ ຮູ້ແຕ່ວ່າ ຢູ່ແຂວງສາຣະວັນ.

ກ່ຽວກັບບັນຫາດັ່ງກ່າວ ທາງການໄທ ຍັງບໍ່ທັນໄດ້ປະສານ ໄປຫາທາງການລາວເທື່ອ ຍ້ອນຕ້ອງໄດ້ລໍຖ້າກວດພຍາດ ແລະ ຟື້ນຟູຈິດໃຈ ຂອງນາງກ່ອນ.

ເວົ້າເຖິງປະຊາຊົນລາວ ທີ່ລັກໄປເຮັດວຽກຢູ່ປະເທດໄທ ແລະມີຄວາມສ່ຽງຕໍ່ການ ທີ່ຈະຕົກເປັນເຫຍື່ອຂອງການຄ້າມະນຸດ ຕໍາຣວດແຂວງ ຈໍາປາສັກ ເວົ້າວ່າສໍາລັບແຂວງຈໍາປາສັກແຂວງດຽວ ກໍມີເຖິງ 29,919 ຄົນ. ປີກາຍມີທັງໝົດ 34,474 ຄົນ. ໃນນັ້ນໄປແບບຖືກຕ້ອງ ຕາມກົດໝາຍ ພຽງ 4,555 ຄົນ.

ແລະຂ່າວ Sanook.com ເວົ້າວ່າ ເຈົ້າໜ້າທີ່ຊຸດສືບສວນ ກວດຄົນເຂົ້າເມືອງ ແຂວງເພັດສະບູນຂອງໄທ ໄດ້ຈັບແມ່ຍິງລາວ 7 ຄົນ ອາຍຸເກີນ 18 ປີ, ມີໜັງສືເດີນທາງ ແລະໄດ້ຮັບອະນຸຍາດໃຫ້ເຂົ້າໄທ ເພື່ອຈຸດປະສົງທ່ອງທ່ຽວ ແຕ່ພວກເຂົາໄປເຊົ່າ ຫ້ອງພັກຢູ່ ຣີສອດ ໃນໝູ່ 13 ຕາແສງ ນໍ້າຊຸນ ເມືອງຫລົ່ມສັກ ແຂວງເພັດສະບູນ ຫາລູກຄ້າ ເພື່ອການຄ້າປະເວນີ ໂດຍຄິດຄ່າບໍຣິການ ແຕ່ 1,000 ບາດຫາ 2,000 ບາດຕໍ່ຄັ້ງ. ພວກກ່ຽວໄດ້ຖືກນໍາໂຕສົ່ງໃຫ້ ພະນັກງານສອບສວນ ເພື່ອດໍາເນີນຄະດີ ຕາມກົດໝາຍໄທ ຕໍ່ໄປ.

ເຕັມຫນ້າ