ແມ່ຍິງຖືກຜົວຈີນຕົວະ ຍັງຖ້າໃຫ້ ຊ່ອຍເຫຼືອ

ໄຊຍາ
2020-01-13
ອີແມວລ໌
ຄໍາເຫັນ
Share
ພິມ
ສວນປູກກ້ວຍ ຂອງນັກລົງທຶນຈີນ ຢູ່ເມືອງຮຸນ ແຂວງອຸດົມໄຊ ຊຶ່ງເປັນບ່ອນທີ່ ແມ່ຍິງລາວຫຼາຍຄົນ ເຂົ້າໄປເຮັດວຽກນໍາ ແລະ ໄດ້ພົບພໍ້ກັບ ຜູ້ຊາຍຄົນຈີນ ແລ້ວຖືກຕົວະຍົວະ ເອົາໄປຂາຍຢູ່ ຈີນ.
ສວນປູກກ້ວຍ ຂອງນັກລົງທຶນຈີນ ຢູ່ເມືອງຮຸນ ແຂວງອຸດົມໄຊ ຊຶ່ງເປັນບ່ອນທີ່ ແມ່ຍິງລາວຫຼາຍຄົນ ເຂົ້າໄປເຮັດວຽກນໍາ ແລະ ໄດ້ພົບພໍ້ກັບ ຜູ້ຊາຍຄົນຈີນ ແລ້ວຖືກຕົວະຍົວະ ເອົາໄປຂາຍຢູ່ ຈີນ.
ຮູບພາບຈາກ : ນັກຂ່າວພົລເມືອງ

ແມ່ຍິງລາວ ອາຍຸ 25 ປີ ຢູ່ເມືອງຮຸນ ແຂວງອຸດົມໄຊ ທີ່ຖືກຜົວຈີນຕົວະຍົວະໄປຂາຍ ຕາມສະຖານບັນເທີງ ຢູ່ເມືອງເລິຊິ່ງ ແຂວງຈື່ຈັ່ງ ຂອງຈີນ ເມື່ອປະມານປີ 2015 ແລະ ຖືກຕໍາຣວດຈີນ ຈັບຂັງຄຸກເກືອບ 2 ປີ ໃນຂໍ້ຫາເຂົ້າເມືອງຜິດກົດໝາຍ ບໍ່ມີເອກກະສານ ໄດ້ພົ້ນ ໂທດ ຕໍາຣວດຈີນໄດ້ປ່ອຍໂຕນາງແລ້ວ. ປັດຈຸບັນຍັງລໍຖ້າ ທາງການລາວຊ່ອຍເຫຼືອ ກັບຄືນປະເທດ, ດັ່ງຊາວບ້ານທີ່ຢູ່ບ້ານດຽວກັນກັບ ນາງ ໄດ້ກ່າວຕໍ່ນັກຂ່າວເອເຊັຽເສຣີ ໃນວັນທີ 10 ມົກກະຣາ:

"ລາວຫັ້ນເອົາຜົວຈີນ ແລ້ວກໍຜົວລາວລັກໄປ ຂະເຈົ້າມາເຫັນກັນຢູ່ສວນກ້ວຍຊີ້ນະ ຂະເຈົ້າເອົາໄປຕອນແລກ 2 ປີ ໄປນໍາຜົວຫັ້ນແຫລະ ແຕ່ວ່າຜົວລາວຂາຍໃຫ້ຜູ້ນັ້ນ, ຜູ້ນີ້ກໍຂາຍຕໍ່ໃຫ້ກັບຜູ້ອື່ນໄປອີກ ໂດຍທີ່ວ່າລາວກໍບໍ່ຮູ້ວ່າ ລາວເອງຖືກຂາຍຫັ້ນນະ ແລ້ວກໍມີຕໍາຣວດຈີນ ແນ່ຈັບວ່າແມ່ນລາວ ຫັ້ນຢູ່ປະເທດຂະເຈົ້າ ແບບບໍ່ມີບັດ ບໍ່ມີໃບປະມານນີ້ແຫລະ ຖືກຈັບຂັງໄວ້ ປີປາຍນໍ."

ທ່ານເວົ້າວ່າ ຄົນຈີນທີ່ເຮັດວຽກເປັນກັມມະກອນ ຢູ່ສວນກ້ວຍຈີນ ໃນເມືອງຮຸນ ພານາງລັກໜີໄປຢູ່ຈີນ ປະມານເມື່ອປີ 2015. ຫລັງຈາກ ຢູ່ນໍາກັນໄດ້ 2-3 ປີ ຜູ້ເປັນຜົວກໍຂາຍນາງ ເຂົ້າຮ້ານບັນເທີງ ຕໍ່ໆມາຈົນຮອດປີ 2018 ຕໍາຣວດຈີນຈຶ່ງກວດພົບ ແລະ ຈັບນາງແຕ່ໄດ້ ປ່ອຍໂຕ ປະມານເມື່ອທ້າຍປີກາຍ. ນາງໄປໃສບໍ່ໄດ້ຍ້ອນບໍ່ຮູ້ພາສາຈີນ ເຮັດໃຫ້ຕໍາຣວດກັກນາງໄວ້ ແລ້ວອອກຂ່າວ ຫາຍາດພີ່ນ້ອງມາ ຮັບເອົານາງ ທາງສື່ສັງຄົມອອນລາຍ. ນາງ ຍັງມີແຕ່ແມ່ ແລະເອື້ອຍ ທີ່ທຸກຍາກ.

ຕໍ່ກັບຂ່າວດັ່ງກ່າວ ເຈົ້າໜ້າທີ່ ກ່ຽວຂ້ອງກ່ຽວກັບແມ່ຍິງ ເມືອງຮຸນ ແຂວງອຸດົມໄຊ ໄດ້ກ່າວຕໍ່ນັກຂ່າວເອເຊັຽເສຣີ  ໃນວັນທີ 10 ມົກກະຣາ ວ່າ. ຍັງບໍ່ທັນຮູ້ເຣື່ອງດັ່ງກ່າວ ຍ້ອນບໍ່ມີໃຜແຈ້ງ:

"ໂຕນີ້ຍັງບໍ່ທັນອັນນີ້ເທື່ອ ບໍ່ທັນມີຂໍ້ມູນເທື່ອນໍ ມີແຕ່ວ່າຈະໄປປຶກສາກັບ ຫົວໜ້າເບິ່ງວ່າສິໃຫ້ທາງ ສະຫະພັນແມ່ຍິງ ເມືຶອງເຮົານີ້ ຂຶ້ນແຜນ ເອົານາງນີ້ ກັບຈັ່ງໃດຫັ້ນນະ ຈະໄປປຶກສາກັບຫົວໜ້າ ເບິ່ງວ່າສິໃຫ້ປະສານ ຫາກັບອໍານາດການປົກຄອງ ບ້ານ ເອົາພໍ່ແມ່ໄປຫັ້ນ ໄປຮັບ ເອົານາງນີ້ຫັ້ນ ກັບມາບ້ານຈັ່ງໃດຫັ້ນນະ."

ແຕ່ເຈົ້າໜ້າທີ່ ປກສ. ເມືອງຮຸນກໍເວົ້າ ໃນມື້ດຽວກັນນີ້ວ່າ ເຣຶ່ອງແມ່ຍິງລາວ ຖືກຕົວະໄປຈີນນັ້ນ ທາງການກໍບໍ່ໄດ້ນິ້ງນອນໃຈ ພຍາຍາມ ແກ້ໄຂ ທັງໄດ້ໂຄສະນາ ມາຕລອດ ດັ່ງທີ່ທ່ານກ່າວວ່າ:

"ປກສ ກໍໄດ້ເວົ້າ ໄດ້ໂຄສະນາໃຫ້ຂະເຈົ້າຮູ້ແລ້ວ ແຕ່ຄືເວົ້າຫັ້ນແຫລະ ຄວາມຈິງ ນີ້ກໍປາສຈາກບໍ່ໄດ້ນໍ ຍົກຕົວຢ່າງສົມມຸດວ່າ ຂະເຈົ້າຢູ່ ບ້ານນໍ ກໍແມ່ນແຕ່ຄົນທີ່ວ່າງງານ ບໍ່ມີວຽກເຮັດງານທໍາ ຫັ້ນນະ ເລີຍບໍ່ມີແນວທາງ ທີ່ວ່່າຈະອອກຊອກເງິນຊອກຄໍານໍ ຍິງໂສດເຂົາ ກໍ ເອົາຜົວຈີນ ປະມານມົ້ງສິບປີ ເຖິງຊາວປີນີ້ແຫລະ."

ສະເພາະຢູ່ເມືອງຮຸນ ຕໍາຣວດເວົ້າວ່າ ນັບແຕ່ກາງປີ 2018 ຫາທ້າຍປີ 2019ມີແມ່ຍິງລາວ ຫລາຍກວ່າ 30 ກໍຣະນີທີ່ຖືກຕົວະໄປຈີນ ແລະ ເຈົ້າໜ້າທີ່ ກໍພຍາຍາມຊ່ອຍໃຫ້ກັບຄືນມາບ້ານ ໄດ້ຈໍານວນນຶ່ງ, ຈໍານວນນຶ່ງກໍຫາຍສາບສູນໄປ ຈົນຮອດດຽວນີ້.

ເຕັມຫນ້າ