ທາງການລາວຈັດອົບຮົມ ຕ້ານ ຄ້າມະນຸດ

ມະນີຈັນ
2018.05.11
F-Bokeo ເຮືອ ບໍຣິການ ນັກທ່ອງທ່ຽວ ຢູ່ແຂວງບໍ່ແກ້ວ
RFA

ທາງການລາວ ຈັດສັມມະນາວຽກງານ ສະກັດກັ້ນການຄ້າມະນຸດ ໃນຂແນງການທ່ອງທ່ຽວ ໃນມື້ວັນທີ 7 ແລະທີ 8 ພຶສພາ 2018 ຢູ່ ຫ້ອງວ່າການ ປົກຄອງແຂວງບໍ່ແກ້ວ, ຫລວງນໍ້າທາ, ອຸດົມໄຊ ແລະແຂວງ ຜົ້ງສາລີ ເພື່ອໃຫ້ຄວາມຮູ້ ແກ່ເຈົ້າໜ້າທີ່ ພາກສ່ວນກ່ຽວຂ້ອງ; ຕາມຄໍາເວົ້າຂອງເຈົ້າໜ້າທີ່ ຕ້ານການຄ້າມະນຸດ ນະຄອນຫລວງວຽງຈັນ ຕໍ່ RFA ໃນມື້ວັນທີ 10 ພຶສພານີ້:

"4 ແຂວງພາກເໜືອ ສິມີການໄປເນາະ ໄປເຮັດຈັດກອງປະຊຸມ ເຣື່ອງການເຄື່ອນຍ້າຍ ແຮງງານ ເຣື່ອງການຄ້າມະນຸດ ກິຈກັມຕ້ານການ ຄ້າມະນຸດ ຂອງກະຊວງແຮງງານ ກັບທາງທ່ອງທ່ຽວເນາະ ສິເຮັດຊຸດນີ້ ໄປໂຄສະນາເຜີຍແຜ່ຫັ້ນນະ ໄປເຜີຍແຜ່ ໂຄສະນາ ຄ້າມະນຸດ ຈະມີກິຈກັມ 4 ແຂວງພາກເໜືອເນາະ."

ທ່ານກ່າວຕໍ່ໄປວ່າ ການຈັດກິຈກັມດັ່ງກ່າວມີພາກສ່ວນ ກະຊວງແຮງງານ ແລະສວັດດີການສັງຄົມ ແລະກະຊວງຖແລງຂ່າວ ແລະວັທນະທັມ ການທ່ອງທ່ຽວເປັນຜູ້ຈັດ ເພື່ອໃຫ້ທິດທາງແກ່ເຈົ້າໜ້າທີ່ກ່ຽວຂ້ອງ ໃນການໂຄສະນາ ໃຫ້ຄວາມຮູ້ແກ່ປະຊາຊົນ ໃນການຕ້ານການຄ້າມະນຸດ ຮວມທັງຮູບການ ຕົວະຍົວະແບບໃໝ່ ຂອງນັກຄ້າມະນຸດຈີນ ທີ່ອາສັຍກຸ່ມ tour ທ່ອງທ່ຽວເປັນເຄື່ອງມື ຊຶ່ງເຄີຍເກີດຂຶ້ນກັບແມ່ຍິງ ເມືອງ ປາກລາຍມາແລ້ວ ເມື່ອເດືອນ ພຶສພາ ປີ 2017:

"ໄປທາງ group tour ນີ້ສິເປັນວິທີໃໝ່ ວິທີໃໝ່ທີ່ຣີສອດ ຈາກການຕິດຕາມຂອງຕໍາຣວດເນາະ ເພາະວ່າສ່ວນຫລາຍ ໄປຈີນນີ້ຂະເຈົ້າ ຈະບໍ່ໄດ້ໄປເປັນ group tour ຂະເຈົ້າຈະໄປແບບທັມມະດາ ປ້ອງກັນແບບ group tour ນີ້ຍັງໄດ້ມີຕົວ ສະກັດກັ້ນ ເທື່ອເນາະວ່າຈະໄປ ອອກໄປທາງນີ້ຫັ້ນນະ ຊຶ່ງວ່າມັນກໍອາຈເປັນເຣື່ອງໃໝ່ ເຣື່ອງໄປກັບກຸ່ມ tour ເນາະຫັ້ນນະ."

ໃນລະຍະ 2 ປີ ທີ່ຜ່ານມາຢູ່ແຂວງພາກເໜືອ ມີແມ່ຍິງລາວໄດ້ຕົກເປັນເຫຍື່ອ ຂອງການຄ້າມະນຸດ ໄປຈີນຫລາຍກໍຣະນີແລ້ວ. ໃນປີ 2016 ມີແມ່ຍິງໃນເມືອງ ແກ່ນທ້າວ ເຄີຍຖືກຕົວະ ແຕ່ງດອງແລ້ວພາໄປຂາຍຢູ່ຈີນ 2 ຄົນ ແຕ່ເຈົ້າໜ້າທີ່ໄດ້ຊ່ວຍ ກັບຄືນໄດ້.

ເມື່ອຕົ້ນປີ 2017 ກໍມີແມ່ຍິງເມືອງ ໄຊຍະບູຣີ ອາຍຸ 24 ປີທີ່ຫາກໍ່ຮຽນຈົບ ມະຫາວິທຍາລັຍ ກໍຖືກຄົນຈີນ ຕົວະໄປຈີນນານເຖິງ 8 ເດືອນ ຖືກເອົາໄປກັກຂັງ ຢູ່ໃນບ້ານ. ໂຊກດີທີ່ຕໍາຣວດ ຊ່ວຍກັບມາບ້ານໄດ້ເມື່ອທ້າຍປີດຽວກັນນັ້ນ.

ກໍຣະນີຫລ່າສຸດ, ວັນທີ 25 ມີນາ ທີ່ຜ່ານມາ ທາງການແຂວງຫລວງນໍ້າທາ ກໍສາມາດ ຊ່ວຍແມ່ຍິງອາຍຸ 22 ປີ ຢູ່ເມືອງນາແລ ທີ່ຖືກຕົວະ ໄປຈີນ ກັບມາໄດ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.