ຢ່າງໜ້ອຍ ມີຜູ້ຮ່ວມຂະບວນການ ຄ້າມະນຸສ 27 ຄົນຖືກຈັບ

ໃນວັນທີ 15 ທັນວາ 2022 ທີ່ຜ່ານມານີ້ ທ່ານ ພົລຈັຕວາ ແກ່ນຈັນ ພົມມະຈັນ ຮອງຫົວໜ້າກົມໃຫຍ່ຕຳຣວດ ກະຊວງປ້ອງກັນຄວາມສງົບ ໄດ້ຣາຍງານໃນກອງປະຊຸມ ສລຸບວຽກງານປ້ອງ ກັນຄວາມສງົບປະຈຳປີ 2022 ແລະ ທິດທາງແຜນການວຽກງານ ຈຸດສຸມປີ 2023 ກ່ຽວກັບກັບວຽກງານການແກ້ໄຂບັນຫາ ການຄ້າມະນຸສ ແລະ ທິດທາງການຊ່ອຍເຫລືອ ຜູ້ຖືກເຄາະຮ້າຍຈາກການຄ້າ ມະນຸສວ່າ ນັບແຕ່ວັນທີ 01 ກັນຍາ ຫາ 12 ທັນວາ 2022 ກົມໃຫຍ່ຕຳຣວດ ກະຊວງປ້ອງກັນຄວາມສງົບ ຄະນະກັມການຕ້ານການຄ້າມະນຸສ ແຂວງບໍ່ແກ້ວ ແລະ ພາກສ່ວນທີ່ກ່ຽວຂ້ອງ ສາມາດດຳເນີນຄະດີ ການຄ້າມະນຸສຢູ່ເຂດເສຖກິຈ ພິເສດ ສາມຫລ່ຽມຄຳໄດ້ 12 ເຣື່ອງ, ກັກໂຕຜູ້ຖືກກ່າວຫາ ໄດ້ 27 ຄົນ, ຍິງ 3 ຄົນ, ຄົນຕ່າງປະເທດ 17 ຄົນ.

ຊຶ່ງຜູ້ຖືກກ່າວຫາ ທີ່ກັກໂຕໄດ້ນັ້ນ ເປັນຄົນສັນຊາຕມາເລເຊັຽ ແລະ ຈຳນວນເປັນພຽງໂຕການນ້ອຍ ທີ່ໃຫ້ສະຖານທີ່ພັກເຊົາ ແລະ ຂົນສົ່ງຄົນ ໄປຍັງເຂດເສຖກິຈ ພິເສດສາມຫລ່ຽມຄຳ ແຕ່ບໍ່ໄດ້ຖືກຂໍ້ຫາ ໂຕການໃຫຍ່ ທີ່ທຸບຕີ, ທໍຣະມານ.

ດັ່ງເຈົ້າໜ້າທີ່ ຄະນະກັມມະການ ຕ້ານການຄ້າມະນຸສ ແຂວງບໍ່ແກ້ວ ກ່າວຕໍ່ວິທຍຸ ເອເຊັຽ ເສຣີ ໃນວັນທີ 16 ທັນວານີ້ວ່າ:

“ມັນກໍມີມາເລແດ່ ສ່ວນຫລາຍລະແມ່ນໄທຍເຮົາ ຈັບບໍ່ໄດ້ເປັນຈຳນວນຫລາຍ ແຕ່ວ່າອັນຈັບໄດ້ ກໍເປັນໂຕຂົນສົ່ງ ເປັນຜູ້ເຂົ້າຮ່ວມ ໃນການຂົນສົ່ງ ໃນການເຄື່ອນຍ້າຍ ເພື່ອໃຫ້ສະຖານ ທີ່ພັກເຊົາແນວນັ້ນໄປສື່ໆ ຫັ້ນນ່າ ແຕ່ຜູ້ຈັບເປັນໂຕປະກັນຈີນນີ້ແຫລະ ຄົນຈີນຈັບຄົນຈີນ ເອົາໄປຮຽກຄ່າໄຖ່ບໍ່ ຫລືວ່າໄປທຸບຕີ ທໍຣະມານ ເຮົາຍັງບໍ່ສາມາດຈັບໄດ້ ໂຕການມັນທັງໝົດ.”

ແຕ່ວັນທີ 01 ກັນຍາ ຫາ 12 ທັນວາ 2022 ກົມໃຫຍ່ຕຳຣວດ ກະຊວງປ້ອງກັນຄວາມສງົບ, ຄະນະກັມການ ຕ້ານການຄ້າມະນຸສ ແຂວງບໍ່ແກ້ວ ແລະ ພາກສ່ວນທີ່ກ່ຽວຂ້ອງອື່ນໆ ຍັງຊ່ອຍຜູ້ຖືກເຄາະຮ້າຍ ຈາກການຄ້າມະນຸສ ຢູ່ເຂດເສຖກິຈພິເສດ ສາມຫລ່ຽມຄຳ ທີ່ມີອາຍຸຕໍ່າ ກ່ວາ 18 ປີ ແລະ ກາຍ 18 ປີ ໄດ້ທັງໝົດ 21 ຄົນ ໃນນັ້ນເປັນຄົນຕ່າງປະເທດ 14 ຄົນ ຊຶ່ງມີແມ່ຍິງຈີນ ນຳດ້ວຍ.

ທາງເຈົ້າໜ້າທີ່ ຕຳຣວດ ໄດ້ສົ່ງຜູ້ຖືກເຄາະຮ້າຍ ຈຳນວນດັ່ງກ່າວ ໄປສູນກາງ ສະຫະພັນແມ່ຍິງລາວ ແລະ ສະຫະພັນແມ່ຍິງ ແຂວງຫລວງນໍ້າທາ ເພື່ອດຳເນີນການເບິ່ງແຍງ ສະພາບຮ່າງກາຍ ຈິຕໃຈ ເພື່ອໃຫ້ຄຳປຶກສາ ແລະ ສຶກສາອົບຮົມ ກ່ອນສົ່ງຄືນສູ່ຄອບຄົວ ແລະ ປະເທດຂອງເຂົາເຈົ້າ.

ດັ່ງເຈົ້າໜ້າທີ່ຄະນະກັມມະການ ຕ້ານການຄ້າມະນຸສ ແຂວງບໍ່ແກ້ວ ຜູ້ດຽວກັນນີ້ກ່າວວ່າ:

“ເຣື່ອງການກັກຂັງ ໜ່ວງໜ່ຽວນີ້ ແລ້ວບໍ່ໃຫ້ອອກຈາກຫ້ອງ ໂດຍສິດທິເສຣີພາບ ຂອງສິດທິມະນຸສຫັ້ນເດ້ ຖ້າວ່າເປັນແມ່ຍິງ ແລະເດັກນ້ອຍ ອາຍຸບໍ່ເຖິງ 18 ປີ ບໍ່ ຫລືວ່າແມ່ຍິງຖືກກັກຂັງ ໜ່ວງໜ່ຽວບໍ່ ເຮົາຊິສົ່ງໄປໃຫ້ສະຫະພັນ ແມ່ຍິງ ເພື່ອໃຫ້ສົ່ງເຂົາເຈົ້າ ກັບໄປຫາຄອບຄົວ ແລະຈຳນວນນຶ່ງ ກໍສົ່ງເຂົ້າສູນ ແລ້ວສູນກໍສົ່ງເຂົ້າໄປ ປະເທດທີ່ເຂົາເຈົ້າ ຕ້ອງການທີ່ຈະໄປນັ້ນ.”

ວັນທີ 01 ກັນຍາ ຫາ 12 ທັນວາ 2022 ກົມຕຳຣວດ ສະກັດກັ້ນ ແລະ ຕ້ານການຄ້າມະນຸສ ໄດ້ສົມທົບກັບ ຕຳຣວດຕ້ານການຄ້າມະນຸສ ແຂວງບໍ່ແກ້ວ ໃຫ້ຄວາມຊ່ອຍເຫລືອ ຜູ້ທີ່ໄປເຮັດວຽກ ທີ່ຈັດຢູ່ໃນກຸ່ມສ່ຽງ ແລະ ຜູ້ຖືກເຄາະຮ້າຍ ຈາກການຄ້າມະນຸສ ທັງໝົດ 1,686 ຄົນ, ຍິງ 634 ຄົນ ລວມມີ 20 ສັນຊາຕ ເຊັ່ນສັນຊາຕຈີນ, ອີນເດັຽ, ປາກິສຖານ ແລະ ອື່ນໆ ພາຍຫລັງສະຖານທູຕ ຂອງແຕ່ລະປະເທດ ສົ່ງໜັງສື ໃຫ້ທາງການລາວ ຊ່ອຍເຫລືອພົລເມືອງ ຂອງເຂົາເຈົ້າ.

ດັ່ງເຈົ້າໜ້າທີ່ ປກສ ແຂວງບໍ່ແກ້ວ ກ່າວໃນມື້ດຽວກັນນີ້ວ່າ:

“ໂຕນີ້ ເປັນພວກອອກແຮງງານ ທີ່ໄດ້ຮັບການມີໜັງສື ຂໍ້ຄວາມຊ່ອຍເຫລືອ ຈາກສະຖານທູຕ ແຕ່ລະປະເທດໄທຍ ເຮົາຊ່ອຍຊ່ອຍແລ້ວ ກໍສົ່ງເຂົ້າສູນ ຢູ່ບໍ່ເຕັນ ແຂວງຫລວງນໍ້າທາ ຈຳນວນນຶ່ງກໍສົ່ງໄປເຂົ້າສູນ ຢູ່ນະຄອນຫລວງວຽງຈັນ ມັນມີຫລາຍເງື່ອນໄຂ ໃນການຊ່ອຍເຫລືອ ບາງຄົນກໍມາເປັນສາວ ບໍຣິການບໍ່ ຫລືວ່າມາອອກແຮງງານ ທາງດ້ານໃນ ການຕອບແຊັດ ອີ່ສັງ ແລ້ວແຕ່ ອັນການຂໍຄວາມຊ່ອຍເຫລືອ ຂອງສະຖານທູຕ ຈຳນວນນຶ່ງ ກໍຖືກຕົວະມາ ຈຳນວນນຶ່ງ ກໍມາດ້ວຍຄວາມສະມັກໃຈ.”

ເມື່ອສັປດາທີ່ຜ່ານມາ ຄົນງານຕອບແຊັດ ຜູ້ນຶ່ງຢູ່ເຂດເສຖກິຈພິເສດ ສາມຫລ່ຽມຄຳ ໄດ້ໜີອອກຈາກວຽກດັ່ງກ່າວ ພາຍຫລັງເຮັດວຽກໄດ້ 15 ມື້ ເນື່ອງຈາກມີຄວາມກົດດັນ ບໍ່ສາມາດຫລອກໃຫ້ຄົນ ໂອນເງິນເຂົ້າມາໄດ້ ແລະ ກໍຮູ້ສຶກວ່າ ເປັນວຽກທີ່ໂກງຄົນອື່ນ ຈຶ່ງໜີອອກມາ ແລະ ໂຕເອງບໍ່ຢາກໃຫ້ຜູ້ອື່ນ ເຂົ້າມາເຮັດວຽກຕອບແຊັດ ແລະຢາກໃຫ້ພາກສ່ວນທີ່ກ່ຽວຂ້ອງ ແກ້ໄຂບັນຫາການວ່າງງານ ຂອງປະຊາຊົນຢ່າງຈິງຈັງ ເພື່ອບໍ່ໃຫ້ປະຊາຊົນລາວ ໄປເຮັດວຽກແນວບໍ່ດີນີ້ ຍ້ອນປັດຈຸບັນຍັງມີຄົນ ເຮັດວຽກຕອບແຊັດຫລາຍຢູ່.

ດັ່ງອະດີຕ ຄົນງານຕອບແຊັດ ຢູ່ເຂດເສຖກິຈພິເສດ ສາມຫລ່ຽມຄຳ ກ່າວໃນມື້ດຽວກັນນີ້ວ່າ:

“ສ່ວນຫລາຍ ໃນສາມຫລ່ຽມຄຳ ຄືຊິມີແຕ່ຕອບແຊັດຫັ້ນແຫລະ ຕິດອັນດັບນຶ່ງອັນດັບຕົ້ນໆ ນ່າມີຄົນລາວ ຄົນຈີນ, ຄົນອີນເດັຽ, ຄົນວຽດ. ມັນເປັນວຽກຄົນໂກງຫັ້ນນ່າ ຕົວະໃຫ້ເຂົາເຈົ້າຮັກເຮົາ ແລ້ວກໍຊວນເຂົາມາລົງທຶນ ເຂົາລົງທຶນເຂົາກໍຈະເສັຽເລີຍ, ທາງທີ່ດີບໍ່ຕ້ອງໄປຫັ້ນແຫລະ ບໍ່ຕ້ອງໄປເຮັດວຽກ ໃຫ້ເຂົາຕາມຄວາມເປັນຈິງ ມັນກໍປັດສະຈາກບໍ່ໄດ້ເພາະວ່າ ຢູ່ບ້ານເຮົາມັນບໍ່ມີບ່ອນຫາເງິນເດ້ ຖ້າມີບ່ອນຫາເງິນຄືຊິດີ.”

ໃນສະພາບ ທີ່ຫລາຍລະປະເທດ ຍັງຜະເຊີນກັບຄວາມທຸກຍາກ ບໍ່ມີວຽກເຮັດງານທັມ ບໍ່ມີເງິນເພື່ອລ້ຽງຊີພ ແລະ ບໍ່ໄດ້ຮຽນໜັງສື ໃນລະດັບສູງ ບັນຫາການຄ້າມະນຸສ ກໍຈະຍັງເກີດຂຶ້ນທຸກປະເທດ ໂດຍສະເພາະປະເທດລາວ ທີ່ປະຊາຊົນຍັງມີຄວາມທຸກຍາກຫລາຍຢູ່.

ດັ່ງນັກວິຊາການ ຢູ່ສະຫະພັນແມ່ຍິງ ແຂວງບໍ່ແກ້ວ ກ່າວໃນມື້ດຽວກັນນີ້ວ່າ:

“ເພາະວ່າການຄ້າມະນຸສ ມັນກໍມີຢູ່ທົ່ວໄປຫັ້ນນ່າ ມັນກໍບໍ່ໄດ້ສະເພາະເຈາະຈົງ ໄປຢູ່ເຂດເສຖກິຈພິເສດນີ້ ມັນກໍມີຫລາຍເຂດເນາະ ທັງອອກເມືອຈີນ ທັງອອກໄປໄທຍ ມີຫຍັງຫັ້ນນ່າໄປກັມພູຊາບໍ່ ໄປຫຍັງກໍມີເພາະວ່າ ສ່ວນຫລາຍເຂດທີ່ຖືກຕົວະຍົວະ ຈະເປັນເຂດທຸກຍາກ ເພິ່ນກໍດ້ານເສຖກິຈ ເພິ່ນບໍ່ມີເງິນ ບໍ່ມີຄຳ ບໍ່ຮູ້ເຣື່ອງບໍ່ ຄົນກໍບໍ່ເຂົ້າໃຈ ຮູ້ບໍ່ເທົ່າເຖິງການແດ່.”

ທ່ານ ພົລຈັຕວາ ແກ່ນຈັນ ພົມມະຈັນ ຍັງແຈ້ງໃຫ້ຮູ້ອີກວ່າ ຄະດີທີ່ພົ້ນເດັ່ນ ແມ່ນໄດ້ສະສາງ ຄະດີຄ້າມະນຸສ ກຸ່ມຄົນຈີນທີ່ສົ່ງຄົນໄປຂາຍ ຢູ່ປະເທດພະມ້າ, ກຸ່ມຄົນມາເລເຊັຽ, ກຸ່ມຄົນອີນເດັຽ ແລະ ຫລ້າສຸດ ໄດ້ສະສາງ ກຸ່ມຄົນວຽດນາມ ທີ່ແອບອ້າງເປັນໂຕແທນ ກົງສຸນ ວຽດນາມ ປະຈຳແຂວງບໍ່ແກ້ວ ແຕ່ໃນຄວາມເປັນຈິງແລ້ວ ຜ່ານການປະສານງານ ກັບພາກສ່ວນທີ່ກ່ຽວຂ້ອງ ແມ່ນບໍ່ມີມູນຄວາມຈິງ ຊຶ່ງປັດຈຸບັນຄະດີນີ້ ກຳລັງດຳເນີນການສືບສວນ ແລະສາມາດຈັບໂຕ ຜູ້ມີສ່ວນຮ່ວມໄດ້ແລ້ວ ຈຳນວນ 10 ຄົນ.