ຍັງບໍ່ມີວີ່ແວວແມ່ຍິງ ເຜົ່າມົ້ງ ສອງຄົນ

ຈໍາປາທອງ
2020-01-09
ອີແມວລ໌
ຄໍາເຫັນ
Share
ພິມ
ເມືອງຫົງສາ ແຂວງໄຊຍະບູຣີ
ເມືອງຫົງສາ ແຂວງໄຊຍະບູຣີ
ຮູບພາບຈາກ : ນັກຂ່າວພົລເມືອງ

ເດັກນ້ອຍແມ່ຍິງເຜົ່າມົ້ງສອງຄົນ ອາຍຸຣະຫວ່າງ 16-17 ປີ, ຜູ້ນຶ່ງຢູ່ບ້ານກົກແອດ ແລະອີກຜູ້ນຶ່ງຢູ່ບ້ານພູດອກໄມ້ ເມືອງຫົງສາ ແຂວງ ໄຊຍະບູລີ ທີ່ພໍ່ແມ່ຕົກລົງເຫັນດີນໍານັ້ນ ໄດ້ຈາກໄປກັບຄົນຊາຍຈີນ ເມື່ອຕົ້ນປີກາຍ ໂດຍທີ່ບໍ່ໄດ້ແຈ້ງໃຫ້ອໍານາດ ການປົກຄອງບ້ານເມືອງ ຮູ້ນໍາ, ມາເຖິງປັດຈຸບັນກໍຍັງບໍ່ທັນກັບຄືນບ້ານ ແລະຂາດການຕິດຕໍ່ກັບຄອບຄົວ ຕາມຄໍາເວົ້າຂອງເຈົ້າໜ້າທີ່ປົກຄອງບ້ານກົກແອດທ່ານນຶ່ງ ຕໍ່ວິທຍຸເອເຊັຍເສຣີ ໃນມື້ວັນທີ 8 ມົກກະຣາ ນີ້:

"ເຂົາວ່າ ເຂົາເອົາກັນ ໄປແລ້ວກໍແລ້ວເລີຍ ຈັກເອົາແທ້ ຫລືຕົວະ ໄປນໍາຄົນຈີນ ປີກາຍນີ້ໜ່າ ບໍ່ແມ່ນແຕ່ງດອງແລ້ວ ລັກກັນໄປຊື່ໆ ບໍ່ຜ່ານ ເລີຍແຫລະ ບໍ່ເຫັນມາເທື່ອ."

ທ່ານກ່າວຕື່ມວ່າ ກ່ອນທີ່ເດັກນ້ອຍແມ່ຍິງ ບ້ານພູດອກໄມ້ ຈະລັກໜີໄປກັບຄົນຈີນນັ້ນ ນາງ ແລະຄອບຄົວໄດ້ໄປຫາຍາດພີ່ນ້ອງ ຢູ່ເມືອງ ນໍ້າບາກ ແຂວງຫລວງພະບາງ ທີ່ແນະນໍາຄົນຈີນໃຫ້ນາງຮູ້ ແລະເອົາເງິນນໍາຄົນຈີນຈໍານວນ 30-40 ລ້ານກີບກ່ອນ. ຫລັງຈາກນັ້ນ ພໍ່ແມ່ ຂອງນາງຈຶ່ງໃຫ້ນາງໜີໄປກັບຄົນຈີນ ໂດຍບໍ່ໄດ້ ຜ່ານອໍານາດການປົກຄອງບ້ານ.

ແລະ ເດັກນ້ອຍແມ່ຍິງບ້ານກົກແອດ ທີ່ໄດ້ລັກໜີໄປກັບຄົນຈີນໃນລັກສນະດຽວກັນນັ້ນ ແມ່ນຄົນຈີນເອົາເງິນມາໃຫ້ພໍ່ແມ່ຂອງນາງ ຢູ່ເຮືອນ ຈໍານວນ 10 ປາຍລ້ານກີບ ດັ່ງທີ່ທ່ານກ່າວວ່າ:

"ເຂົາ ທາງພໍ່ແມ່ເຂົາຕັ້ງເຫັນດີ ເຂົາເຫັນດີແລ້ວ ເຂົາກໍບໍ່ແຈ້ງ ລັກສນະ ເຂົາມາເອົາກັນຊື່ໆ ເຂົາລັກໄປກໍແລ້ວຊື່ໆໜ່າ."

ທ່ານເວົ້າວ່າຊາວເຜົ່າມົ້ງຢູ່ບ້ານກົກແອດ ແລະບ້ານພູດອກໄມ້ ສ່ວນໃຫຍ່ທຸກຍາກບໍ່ໄດ້ຮຽນໜັງສື ເພາະຢູ່ເຂດຫ່າງໄກ ດັ່ງນັ້ນຈຶ່ງມີຊ່ອງວ່າງ ເຮັດໃຫ້ພວກ ລູກໆຂອງພວກເຂົາເຈົ້າ ຖືກຕົວະຍົວະຈາກຄົນແປກໜ້າໄດ້ງ່າຍ.

ກ່ຽວກັບເຣຶ່ອງທີ່ວ່ານີ້ ນາຍບ້ານບ້ານກົກແອດ ແລະບ້ານພູດອກໄມ້ ແນະນໍາໃຫ້ພໍ່ແມ່ ຂອງພວກນາງໄປແຈ້ງຄວາມກັບຕໍາຣວດ ປ້ອງກັນ ຄວາມສງົບ ເມືອງຫົງສາ ແຂວງໄຊຍະບູລີ ແຕ່ພວກເຂົາເຈົ້າບໍ່ໄປແຈ້ງ ຍ້ອນເຫັນດີໃຫ້ລູກໄປນໍາຄົນຈີນ.

ເຕັມຫນ້າ