ສານຕັດສິນ ລົງ​ໂທ​ສນາງ ​ໝວຍ ຈຳຄຸກ 5 ປີ

ໄຊຍາ
2019-11-25
Share
F-Mouay ສານຕັດສິນ ລົງ​ໂທ​ສນາງ ​ໝວຍ ຈຳຄຸກ 5 ປີ
ນັກຂ່າວພົລເມືອງ

ເມື່ອວັນທີ 22 ພຶ​ສຈິກາ ຜ່ານມາ ສານຊັ້ນຕົ້ນແຂວງຈຳປາສັກ ຕັດສິນລົງໂທສຈຳຄຸກ ນາງ ຮວາຍເຮືອງ ໄຊຍະບູລີ ຫຼື ນາງໝວຍ ເປັນເວລາ 5 ປີ ພ້ອມທັງປັບໄໝເງິນ 20 ລ້ານກີບ ໃນຄວາມຜິດຖານຂໍ້ຫາ ຕໍ່ຕ້ານ ສປປ ລາວ ແລະ ການໂຄສະນາໃສ່ຮ້າຍປ້າຍສີ ຣັຖບານລາວ. ດັ່ງເຈົ້າໜ້າທີ່ສານ​ທ່ານ​ນຶ່ງ ໄດ້ໃຫ້ສັມພາດ ຕໍ່ນັກຂ່າວເອເຊັຽເສຣີ ໃນວັນທີ 25 ພຶ​ສຈິກາ ວ່າ:

“ຕາມປະມວນກົດໝາຍອາຍາ ກາວ່າຜິດຫັ້ນແຫຼະ ການໂຄສະນາໃສ່ຮ້າຍປ້າຍສີ ມີລັກສະນະໂຄ່ນລົ້ມໂຈມຕີພັກ-ຣັຖ. ຣັຖບານເຂົາກາລົງຄຳຕັດສິນລັກສະນະຈັ່ງຊັ້ນແຫຼະ, ແຕ່ວ່າຄົນນີ້ ຈັກເຂົາຍ້າຍໄປ​ໄວ້ໃສນີ້ ເຂົາບໍ່ບອກ ເພາະວ່າເຮົາ​ກະ​ບໍ່ໄດ້ຂໍ້ມູນ ບໍ່ຊັດເຈນ, ຈັກເຂົາເອົາໄວ້ວຽງ, ຈັກ​ເຂົາເອົາໄວ້ປາກເຊ.”

ເຈົ້າໜ້າທີ່ໄດ້ໃຫ້ຄຳເຫັນຕື່ມວ່າ ສານແຂວງຈຳປາສັກ ໄດ້ເປີດໂອກາດໃຫ້ນາງໝວຍ ແລະ ຄອບຄົວມີສິທຫາທະນາຍ ມາອຸທອນຄຳຕັດສິນ ໄປຮອດສານພາກໃຕ້ ແລະ ສານສູງສຸດພາຍໃນ 20 ວັນ ນັບຈາກມື້ສານໄດ້ຕັດສິນ. ໃນຂະນະທີ່ການຕັດສິນໃນຄັ້ງນີ້, ໄດ້ມີອ້າຍຂອງນາງໝວຍ ໄດ້ໄປຮ່ວມຮັບຟັງການຕັດສິນ, ອີງ​ຕາມ​ຄວາມ​ເວົ້າ​ຂອງ​ເຈົ້າ​ໜ້າ​ທີ່​ທ້ອງ​ຖິ່ນ​ ເມືອງ​ໂພນ​ທອງ.

“ເພິ່ນເຮັດໃບແຈ້ງການ ໃບໝາຍຮຽກຜູ້ປົກຄອງ. ມີແຕ່ວ່າອ້າຍລາວໄປ ຟັງຄຳຕັດສິນ ກະໄດ້ຍີນຢູ່ດອກວ່າ ຕ້ອງຈຳເງິນ ແລະ ກາຈຳຄຸກ 5 ປີ ຈຳເງິນ 20 ລ້ານກີບ.”

ຕໍ່ກັບການຕັດສິນດັ່ງກ່າວ ທ່ານ Adrea Giorgetta, ຜູ້ອຳນວຍການອົງການສະຫະພັນສາກົລ ເພື່ອສິດທິມະນຸດ ໄດ້ໃຫ້ສຳພາດຕໍ່ນັກຂ່າວເອເຊັຽເສຣີວ່າ:

“ພວກເຮົາຄິດວ່າ ຄົງເປັນໄປຕາມນັ້ນ ທີ່ນາງໝວຍຖືກຕັດສິນລົງໂທສ ຢ່າງໜັກ ເພາະວ່າເຮົາເຫັນຄົນອື່ນໆໃນລາວ ກໍຖືກຕັດສິນຂັງຄຸກ ເປັນເວລາຫຼາຍປີ, ພຽງແຕ່ເຂົາສະແດງອອກເຖິງສິທທິໃນການເວົ້າ ແລະ ຄຳເຫັນເທົ່ານັ້ນ.”

ນາງໝວຍຖືກເຈົ້າໜ້າທີ່ຕຳຣວດ ແຂວງຈຳປາສັກ ຈັບເມື່ອວັນທີ 12 ກັນຍາ ປີ 2019 ໃນຂໍ້ຫາໂຄສະນາ ຕໍ່ຕ້ານຣັຖບານ ສປປ ລາວ ຜ່ານທາງສື່ອອນລາຍເຟສບຸກ.

ຜ່ານມາ, ເຖິງແມ່ນວ່າ ທາງຄອບຄົວ ພະຍາຍາມຍື່ນຂໍ້ສເນີ ຂໍປະກັນໂຕນາງໝວຍ, ແຕ່ບໍ່ສາມາດປະກັນອອກມາໄດ້. ຈົນມາເຖິງວັນທີ 22 ພຶ​ສຈິກາ ສານຊັ້ນຕົ້ນ ຂອງແຂວງຈຳປາສັກ ໄດ້ຕັດສິນລົງໂທສຈຳຄຸກ ເປັນ​ເວ​ລາ 5 ປີ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.