ໃນປີ 2026 ອາດຈະມີການປ່ຽນແປງ ຄະນະຜູ້ນຳລາວຄັ້ງໃຫຍ່

ໃນສອງສາມເດືອນຂ້າງໜ້າ, ຄະນະຜູ້ນຳພັກປະຊາຊົນປະຕິວັດລາວ ຈະຫາລືກັນກ່ຽວກັບອານາຄົດຂອງການນຳຂອງພັກ ກ່ອນຈະເຖິງກອງປະຊຸມໃຫຍ່ຂອງໃນປີ 2026. ຂ່າວຈາກວົງໃນແຈ້ງວ່າ ການນໍາຂັ້ນສູງສຸດສາມຕໍາແໜ່ງຂອງພັກແລະລັດຖະບານລາວ ອາດຈະມີການປ່ຽນແປງ.

ຂ່າວວົງໃນ ແຈ້ງລາຍລະອຽດວ່າ ທ່ານ ທອງລຸນ ສີສຸລິດ ເລຂາທິການໃຫຍ່ຂອງພັກແລະປະທານປະເທດລາວ ອາດຈະພົ້ນຕຳແໜ່ງໄປ. ຜູ້ນຳ ທີ່ຈະຂື້ນແທນ ອາດຈະແມ່ນ ທ່ານ ໄຊສົມພອນ ພົມວິຫານ ຊຶ່ງປັດຈຸບັນ ເປັນປະທານສະພາແຫ່ງຊາດ.

ຜູ້ນຳທີ່ຈະຂື້ນເປັນປະທານສະພາແຫ່ງຊາດແທນທ່ານ ໄຊສົມພອນ ພົມວິຫານ ຈະແມ່ນທ່ານ ສົມມາດ ພົນເສນາ ຊຶ່ງປັດຈຸບັນເປັນໜຶ່ງໃນຮອງປະທານສະພາແຫ່ງຊາດລາວ. ທ່ານ ສົມມາດ ພົນເສນາ ເປັນຄົນລາວເຊື້ອສາຍຈີນ ແລະກໍເປັນລູກຊາຍຂອງທ່ານ ກິນິມ ພົນເສນາ ທີ່ເຄີຍເປັນລັດຖະມົນຕີການຕ່າງປະເທດລາວໃນຊຸມປີ 1960.

ເລື່ອງທີ່ໜ້າສົນໃຈ ກໍຄື ທ່ານ ສົມມາດ ພົນເສນາ ໃນເວລາຍັງໜຸ່ມນ້ອຍ ເຄີຍເປັນໝູ່ເພື່ອນໃກ້ຊິດກັບປະທານ ຊີຈິນຝິງຂອງຈີນ. ທັງສອງເຄີຍຮຽນໜັງສືນຳກັນຢູ່ນະຄອນຫຼວງປາກກິ່ງເມື່ອຫຼາຍປີກ່ອນ.

ຜູ້ນຳທັງສອງ ມີຄວາມສຳພັນກັນຢ່າງໃກ້ຊິດຕະຫຼອດມາ ຊຶ່ງຄວາມສຳພັນນີ້ ຈະເປັນປະໂຫຍດຢ່າງຍິ່ງຕໍ່ພັກແລະລັດຖະບານລາວ.

ນັ້ນແມ່ນການຄາດຄະເນຂອງວົງໃນຂອງພັກປະຊາຊົນປະຕິວັດລາວ, ແຕ່ໃນພາກປະຕິບັດຕົວຈິງ ການສັບປ່ຽນໜ້າທີ່ຕຳແໜ່ງ ອາດຈະຍຸ້ງຍາກສັບສົນ; ທ່ານ ສອນໄຊ ສີພັນດອນ ກໍຍັງມີໂອກາດເປັນນາຍົກລັດຖະມົນຕີອີກສະໃໝໜຶ່ງ ຫຼືອາດຈະຂື້ນເປັນເລຂາທິການໃຫຍ່ຂອງພັກໃນປີ 2026.

ຖ້າທ່ານ ສອນໄຊ ສີພັນດອນ ໄດ້ເປັນນາຍົກລັດຖະມົນຕີອີກສະໄໝໜຶ່ງ ແລະທ່ານ ໄຊສົມພອນ ພົມວິຫານ ໄດ້ເປັນເລຂາທິການໃຫຍ່ຂອງພັກຫຼືແລະປະທານປະເທດ ກໍແປວ່າ ສປປລາວ ຈະມີການແບ່ງປັນອຳນາດກັນຢ່າງກ້ຳເກິ່ງລະຫວ່າງຕະກຸນສີພັນດອນ ແລະພົມວິຫານ. ແຕ່ວົງໃນເຊື່ອວ່າ ທ່ານ ສອນໄຊ ສີພັນດອນ ອາດຈະພົ້ນຕຳແໜ່ງສູງໆນີ້ໄປທັງໝົດເລີຍ ໝາຍຄວາມວ່າ ຈະບໍ່ໄດ້ເປັນນາຍົກລັດຖະມົນຕີແລະປະທານປະເທດເລີຍ.

ຖ້າເປັນແບບນັ້ນ ກໍແປວ່າ ຫຼາຍຄົນພາຍໃນພັກ ຖິ້ມໂທດໃສ່ທ່ານ ສອນໄຊ ສີພັນດອນ  ທີ່ເຮັດໃຫ້ເສດຖະກິດຕົກຕ່ຳມາຢ່າງແຮງ ຈົນລາວກາຍເປັນປະເທດໜຶ່ງ ທີ່ມີອັດຕາເງິນເຟີ້ສູງທີ່ສຸດໃນໂລກ ແລະປັດຈຸບັນ ເງິນກີບຂອງລາວ ກໍຍັງອ່ອນຄ່າລົງໄປຢ່າງບໍ່ຢຸດຢັ້ງ.

ໃນດ້ານອື່ນໆ ເຊັ່ນດ້ານການສຶກສາ, ປະເທດລາວ ກໍຂາດເຂີນຄູ; ໂຮງຮຽນ ກໍບໍ່ມີຄູສອນ; ເດັກນ້ອຍຊາວໜຸ່ມໄວລຸ້ນ ກໍອອກຈາກໂຮງຮຽນ ເຮັດໃຫ້ໂຮງຮຽນນັບແຕ່ຊັ້ນປະຖົມຈົນເຖິງມະຫາວິທະຍາໄລ ເປົ່າວ່າງ ບໍ່ມີນັກຮຽນ ບໍ່ມີນັກສຶກສາ. ພາກທຸລະກິດເອກະຊົນ ກໍປະສົບກັບບັນຫາຂາດເຂີນຄົນງານ ເພາະຊາວລາວຫຼາຍຄົນ ພາກັນຫຼັ່ງໄຫຼໄປເຮັດວຽກຢູ່ຕ່າງປະເທດ ເປັນຕົ້ນປະເທດໄທແລະເກົາຫຼີໃຕ້, ບາງຄົນກໍອອກຈາກການ ມາເຮັດໄຮ່ເຮັດນາ ຄ້າຂາຍ ຫຼືເຮັດທຸລະກິດຄອບຄົວ.

ແມ້ແຕ່ກະຊວງກົມກອງຂອງລັດຖະບານ ກໍຂາດເຂີນພະນັກງານ; ບາງກະຊວງ ຂາດພະນັກງານຫຼາຍ ຈົນເຖິງຂັ້ນຈະເຮັດວຽກຕໍ່ໄປ ບໍ່ໄດ້ເລີຍ. ໃນດ້ານໜີ້ສິນຂອງປະເທດ ກໍເພິ້ມຂື້ນເປັນ 130 ສ່ວນຮ້ອຍຂອງຜົນຜະລິດລວມຍອດຫືຈີດີພີແລ້ວ.

ເຖິງຢ່າງໃດກໍຕາມ ແຫຼ່ງຂ່າວວົງໃນ ບອກອີກວ່າ ເສດຖະກິດລາວຕົກຕ່ຳ ກໍຄົງບໍ່ແມ່ນຄວາມຜິດຂອງທ່ານ ສອນໃຊ ສີພັນດອນ ພຽງຄົນດຽວ. ສາເຫດພາຍນອກ ອາດມີສ່ວນເຮັດໃຫ້ເສດຖະກິດລາວຝຶດເຄືອງ ເຊັ່ນການຂື້ນດອກເບັ້ຍຂອງທະນາຄານກາງຕ່າງປະ ເທດ ແລະການຕັດສິນໃຈຂອງຄະນະຜູ້ນຳລາວເມື່ອສິບກວ່າປີກ່ອນ.

ຕົວຢ່າງ ເມື່ອປີ 2010, ຄະນະຜູ້ນຳລາວໃນສະໄໝນັ້ນ ໄດ້ຕັດສິນໃຈຢຶມເງິນມະຫາສານເພື່ອສ້າງເຂື່ອນໄຟຟ້າ ແທນທີ່ຈະສ້າງໂຄງຮ່າງພື້ນຖານ ຖະໜົນຫົນທາງ. ແນ່ນອນວ່າ ທ່ານ ສອນໃຊ ສີພັນດອນ ອາດບໍ່ໄດ້ເປັນຜູ້ນຳທີ່ມີສ່ວນຮ່ວມໃນການຕັດສິນໃຈຢືມເງິນອັນຫຼວງຫຼາຍນັ້ນ. ແຕ່ ທ່ານສອນໄຊ ກໍເປັນບຸກຄົນທີ່ສຳຄັນທາງດ້ານເສດຖະກິດຂອງພັກ.

ປະກົດວ່າ ຄະນະຜູ້ນຳພັກປະຊາຊົນປະຕິວັດລາວ ຫາທາງອອກ ໂດຍການປົດຜູ້ອຳນວຍການທະນາຄານແຫ່ງສປປລາວເມື່ອຕົ້ນປີ 2024. ຄວາມຈິງ ຫຼາຍຄົນກໍຮູ້ດີວ່າ ຜູ້ອຳນວຍການທະນາຄານແຫ່ງຊາດທ່ານນີ້ ແລະຜູ້ອຳນວຍການຄົນປັດຈຸບັນ ກໍບໍ່ສາມາດແກ້ບັນຫາເສດຖິດການເງິນໄດ້ດອກ.

ແພະຮັບບາບອີກຜູ້ໜຶ່ງ ກໍແມ່ນ ທ່ານ ພັນຄຳ ວິພາວັນ ທີ່ຂື້ນເປັນນາຍົກລັດຖະມົນຕີເມື່ອຕົ້ນປີ 2021 ໃນເວລາທີ່ປະເທດລາວກຳລັງມີວິດການທາງດ້ານເສດຖະກິດແລະການເງິນ; ແຕ່ດຳລົງຕຳແໜ່ງບໍ່ເຖິງສອງປີ ກໍລາອອກ. ທ່ານ ພັນຄຳ ວິພາວັນ ຖືວ່າ ເປັນນາຍົກລັດ ຖະມົນຕີໃນໄລຍະເວລາສັ້ນທີ່ສຸດໃນສປປລາວ.

ສາເຫດຫຼືເຫດຜົນຂອງການລາອອກຂອງທ່ານ ພັນຄຳ ວິພາວັນ ກໍໜ້າສົນໃຈ; ທາງການໃຫ້ເຫດຜົນວ່າ ເປັນຍ້ອນທ່ານມີບັນຫາສຸກຂະພາບ ແຕ່ວົງໃນເປີດເຜີຍວ່າ ເປັນຍ້ອນທ່ານບໍລິຫານເສດຖະກິດລົ້ມເຫລວ ແລະຍ້ອນມີບັນຫາສ່ວນຕົວ.

ເມື່ອທ່ານ ພັນຄຳ ວິພາວັນ ລາອອກ, ທ່ານ ສອນໄຊ ສີພັນດອນ ທີ່ເປັນຜູ້ນຳລາວ ກຳລັງມາແຮງ ກໍຂື້ນເປັນນາຍົກລັດຖະມົນຕີແທນ ໃນເດືອນທັນວາ ປີ 2022. ແຕ່ການຂື້ນກຳຕຳແໜ່ງຂອງທ່ານ ສອນໄຊ ສີພັນດອນ ອາດຈະໄວເກີນໄປ. ທ່ານ ຫາກໍຂື້ນເປັນສະມາຊິກກົມການເມືອງໃໝ່ໆ ແລະເປັນລະດັບທີ່ເກົ້າ. ຄວາມຈິງ ຄະນະຜູ້ນຳພັກປະຊາຊົນປະຕິວັດລາວ ມີແຜນຈະໃຫ້ທ່ານ ສອນໄຊ ສີພັນດອນ ຂື້ນເປັນນາຍົກລັດ ຖະມົນຕີໃນປີ 2030 ພຸ້ນ. ໃນເວລານັ້ນ ທ່ານ ສອນໄຊ ສີພັນດອນ ຈະມີອາຍຸ 60 ປາຍປີ ແລະພັກກໍເຊື່ອວ່າ ເປັນອາຍຸທີ່ເໝາະສົມທີ່ສຸດສຳລັບການເປັນຜູ້ນຳໃນສປປລາວ.

ນອກຈາກນັ້ນ ພັກ ຍັງມີການຊີງດີຊີງເດັ່ນກັນລະຫວ່າງສອງນາມສະກຸນ ທ່ານ ສອນໄຊ ສີພັນດອນ ເປັນລູກກົກຂອງທ່ານ ຄຳໄຕ ສີພັນດອນ ເລຂາທິການໃຫຍ່ຂອງພັກແຕ່ປີ 1992 ເຖິງປີ 2006 ປັດຈຸບັນ ອາຍຸໜຶ່ງຮ້ອຍປີແລ້ວ ແຕ່ກໍຍັງມີອິດທິພົນຢູ່ເບື້ອງຫຼັງຫຼາຍຢູ່ໃນການເມືອງລາວ.

ທ່ານ ຄຳໄຕ ສີພັນດອນ ຊຸກຍູ້ສົ່ງເສີມໃຫ້ລູກຊາຍຂອງເຂົາຄື ທ່ານ ສອນໄຊ ສີພັນດອນ ໄດ້ເປັນຜູ້ນຳຂອງພັກຕະຫຼອດມາ; ແຕ່ໃນຂະນະດຽວກັນ ທ່ານ ໄຊສົມພອນ ພົມວິຫານ ລູກຊາຍຂອງ ທ່ານ ໄກສອນ ພົມວິຫານ ກໍຢາກເປັນຜູ້ນຳສູງສຸດຄືກັນ.

ໃນເວລາທີ່ສອງຄອບຄົວນີ້ແຂ່ງຂັນກັນ ແຫຼ່ງຂ່າວວົງໃນຄາດວ່າ ທ່ານ ສະເຫຼີມໄຊ ກົມມະສິດ ປັດຈຸບັນເປັນຮອງນາຍົກລັດຖະມົນຕີແລະລັດຖະມົນຕີການຕ່າງປະເທດ ອາດຈະມີໂອກາດ ຂື້ນເປັນນາຍົກລັດຖະມົນຕີ.

ທ່ານ ສະເຫຼີມໄຊ ກົມມະສິດ ກໍຄືກັບທ່ານ ທອງລຸນ ສີສຸລິດ ເປັນຜູ້ນຳມາຈາກແຂວງຫົວພັນ ຊຶ່ງເປັນທີ່ໝັ້ນຂອງການປະຕິວັດລາວ. ພໍ່ຂອງທ່ານ ສະເຫຼີມໄຊ ກົມມະສິດ ແມ່ນນາຍພົນທອງໄຫຼ ກົມມະສິດ ເປັນຜູ້ສະໜິດສະໜົມກັບທ່ານ ຈູມມະລີ ໄຊຍະສອນ. ທ່ານ ມະໄລທອງ ກົມມະສິດ ເປັນນ້ອງຊາຍຂອງທ່ານ ສະເຫຼີມໄຊ ກົມມະສິດ ແລະກໍເປັນລູກເຂີຍຂອງທ່ານ ຄຳໄຕ ສີພັນດອນ.

ປັດຈຸບັນ ທ່ານ ສະເຫຼີມໄຊ ກົມມະສິດ ຍັງບໍ່ມີອິດທິພົນຫຼາຍປານໃດພາຍໃນພັກ; ທ່ານ ໄດ້ຮັບຕຳແໜ່ງສູງໆ ກໍຍ້ອນມີເສັ້ນມີສາຍ.

ຄອບຄົວກົມມະສິດ ມີຄວາມສຳພັນໃກ້ຊິດກັບຄອບຄົວໄຊຍະສອນແລະສີພັນດອນ ແລະໃກ້ຊິດກັບທ່ານ ທອງລຸນ ສີສຸລິດ.

ວົງໃນເຊື່ອວ່າ ທ່ານ ສະເຫຼີມໄຊ ກົມມະສິດ ເປັນນັກບໍລິຫານທີ່ດີ ມີຄວາມສາມາດ ເປັນບຸກຄົນໜຶ່ງໃນການນຳ ທີ່ໄດ້ຮັບການສຶກສາຈາກປະເທດຕາວັນຕົກ ແລະເປັນນັກການທູດທີ່ດີ; ທ່ານຮູ້ດີວ່າ ປະເທດລາວຂື້ນກັບຈີນແລະວຽດນາມ ແຕ່ກໍພະຍາຍາມຊອກຫາການຊ່ວຍເຫຼືອຈາກປະເທດຕາວັນຕົກ ໂດຍສະເພາະການຊ່ວຍເຫຼືອເພື່ອຫຼຸດຜ່ອນຄວາມທຸກຍາກ.