ນາງໝວຍ ປັ່ນປ່ວນ ສັງຄົມ: ທາງການ

ສຸພັດຕາ
2019-11-26
Share
F-Mouay ນາງ ຮວ່າຍເຮືອງ ໄຊຍະບູລີ ຫລື ນາງ ໝວຍ ທີ່ຖືກຈັບ ໃນວັນທີ 12 ກັນຍາ ໃນຂໍ້ຫາ ໂຄສະນາ ໃສ່ຮ້າຍ ສປປ ລາວ
ນັກຂ່າວພົລເມືອງ

ເຈົ້າໜ້າທີ່ຣະດັບສູງຂອງຣັຖບານລາວ ທ່ານນຶ່ງ ກ່າວກ່ຽວກັບຄະດີ ນາງຮວາຍເຮືອງ ໄຊຍະບູລີ ຫຼື ນາງໝວຍ ຢູ່ເມືອງໂພນທອງ ແຂວງ ຈໍາປາສັກ ທີ່ຖືກສານຊັ້ນຕົ້ນ ແຂວງຈໍາປາສັກ ຕັດສິນຂັງຄຸກເປັນເວລາ 5 ປີ ທັງປັບໃໝ 20 ລ້ານກີບ ໃນຄວາມຜິດ ຖານຕໍ່ຕ້ານ ສປປ ລາວ ນັ້ນກ່າວວ່າ: ສິ່ງທີ່ນາງໝວຍ ເວົ້າຜ່ານສື່ເຟສບຸກຄ໌ ມີຂໍ້ຄວາມຂັດແຍ້ງກັບສະພາບຄວາມເປັນຈິງ ແລະເປັນການເວົ້າແບບເກີນເຫດ ເກີນຜົນ ຊຶ່ງສ້າງຄວາມແຕກຕື່ນ ໃຫ້ຄົນໃນສັງຄົມ, ດັ່ງທ່ານກ່າວ ຕໍ່ວິທຍຸເອເຊັຽເສຣີ ໃນວັນທີ 26 ພຶສຈິກາ ນີ້ວ່າ:

“ຖືວ່າ ມັນເປັນລັກສນະ ທີ່ວ່າມີຂໍ້ຄວາມຂັດແຍ້ງຫຼາຍອັນນະ ສ້າງຄວາມແຕກຕື່ນພາຍໃນສັງຄົມນິ່ນາ ສັງຄົມເຮົານີ່ບໍ່ສງົບ ບາງອັນມັນກໍບໍ່ ເປັນຄວາມຈິງດອກ ເກີນເຫດເກີນຜົນແດ່ນະ ທາງການພວກເຮົາກະຕອບໂຕ້ຄືນ.”

ທ່ານກ່າວຕື່ມວ່າ ຢາກໃຫ້ປະຊາຊົນທີ່ສະແດງຄວາມຄິດເຫັນ ຜ່ານສື່ສັງຄົມອອນລາຍ ມີສະຕິຫຼາຍຂຶ້ນ ດີທີ່ສຸດ ຕ້ອງໄດ້ຣະວັງຄໍາເວົ້າ ຂອງ ຕົນເອງ ໂດຍສະເພາະ ການວິຈານ ເຈົ້າໜ້າທີ່ ພັກ-ຣັຖ ດ້ວຍຄໍາເວົ້າທີ່ເສັຽຫາຍ, ແຕ່ຖ້າສະແດງຄວາມຄິດເຫັນ ໃນລັກສນະສ້າງສັນ ຫຼື ສເນີແນະ ໃຫ້ຣັຖບານແກ້ໄຂບັນຫາ ກໍຖືວ່າບໍ່ມີຄວາມຜິດ.

ກ່ອນໜ້ານີ້ ເຈົ້າໜ້າທີ່ທ້ອງຖິ່ນໃນລາວ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ກ່ຽວກັບ ກໍຣະນີ ຜູ້ທີ່ຖືກຈັບໃນຂໍ້ຫາໂຈມຕີ ພັກ-ຣັດ ວ່າ ຜູ້ທີ່ສະແດງຄວາມຄິດເຫັນບໍ່ດີຕໍ່ ພັກ-ຣັຖ ຜ່ານສື່ສັງຄົມອອນລາຍ ແບບບໍ່ມີຂໍ້ມູນຄວາມຈິງ ສ່ວນໃຫຍ່ຮູ້ດີຢູ່ແລ້ວວ່າ ທາງການລາວ ໄດ້ຫ້າມບໍ່ໃຫ້ເວົ້າ ແຕ່ຫຼາຍຄົນ ຍັງຝ່າຝືນຂໍ້ຫ້າມນັ້ນຢູ່ ຈຶ່ງເຮັດໃຫ້ມີຄົນຖືກຈັບເລື້ອຍໆ:

“ກໍແນ່ນອນ ເຂົາກະຫ້າມ ເວົ້າແນວທີ່ມີຄວາມຈິງນິ່ເຂົາຫ້າມ ມີຄວາມຈິງກະບໍ່ເປັນຫຍັງ ຢູ່ໃນເຟສບຸກຄ໌ ເປັນຂ່າວ ທີ່ບໍ່ໄດ້ກັ່ນກອງ ເວົ້າດ້ວຍອັທຍາໃສ ຂອງຕົນເອງ ກະບໍ່ມີຄວາມຈິງ ຫາເຣື້ອງ.”   

ປະຊາຊົນຫຼາຍຄົນ ໄດ້ສະແດງຄວາມຄິດເຫັນ ໃນສື່ເຟສບຸຸກຄ໌ ກ່ຽວກັບຄະດີ ນາງໝວຍ ວ່າ ນາງໝວຍ ບໍ່ໄດ້ມີຄວາມຜິດຮ້າຍແຮງ ແລະບໍ່ໄດ້ໂຈມຕີ ພັກ-ຣັຖ ຢ່າງໜັກໜ່ວງ ຍ້ອນລາວເວົ້າເຣື້ອງທີ່ເກີດຂຶ້ນ ເປັນຄວາມຈິງ ໃນຂນະທີ່ ຫຼາຍອົງກອນຈັດຕັ້ງ ສາກົນ ກໍບໍ່ເຫັນດ້ວຍ ທີ່ນາງໝວຍ ຕິດຄຸກ 5 ປີ.

ກ່ອນໜ້າຄະດີນາງໝວຍ ເຄີຍມີຄົນຖືກຈັບຢູ່ລາວ ໃນຂໍ້ຫາຕໍ່ຕ້ານ ພັກ-ຣັຖ ຫຼາຍກໍຣະນີ ເປັນຕົ້ນ ທ່ານ ບຸນທັນ ທັມມະວົງ ຊາວລາວ ສັນຊາດໂປແລນ ທີ່ຖືກຈັບໃນຂໍ້ຫາ ບິດເບືອນ ພັກ-ຣັຖ ແລະ ກຸ່ມຄົນງານລາວເຮັດວຽກໃນໄທ 3 ຄົນ ຖືກຈັບໃນຂໍ້ຫາ ດຽວກັນ ປະກອບດ້ວຍ ທ້າວ ສຸກັນ ໃຈທັດ, ນາງ ຫຼອດຄໍາ ທັມມະວົງ ແລະ ທ້າວ ສົມພອນ ພິມມະສອນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.