ຊາວອະເມຣິກັນ 3 ຄົນ ໄປໄທ ແລ້ວ

ຈໍາປາທອງ
2019-04-19
ອີແມວລ໌
ຄໍາເຫັນ
Share
ພິມ
ທ່າເຮືອທີ່ເມືອງຕົ້ນເຜິ້ງ ແຂວງບໍ່ແກ້ວ ທີ່ນັກທ່ອງທ່ຽວ ຈາກຕ່າງປະເທດ ໃຊ້ເປັນປະຈໍາ
ທ່າເຮືອທີ່ເມືອງຕົ້ນເຜິ້ງ ແຂວງບໍ່ແກ້ວ ທີ່ນັກທ່ອງທ່ຽວ ຈາກຕ່າງປະເທດ ໃຊ້ເປັນປະຈໍາ
RFA

ເພີ່ມ​ຂໍ້​ມູນ​ຫລ້າ​ສຸດ: ຕອນ​ບ່າຍ 12:55 ວັນ​ທີ 20 ເດືອນ​ເມ​ສາ 2019 (ຕາມ​ເວ​ລາ ສະ​ຫະ​ຣັ​ຖ ອະ​ເມ​ຣິ​ກາ)

ເຈົ້າໜ້າທີ່ຜແນການຕ່າງປະເທສ ແຂວງຫລວງນ້ຳທາ ຢືນຢັນ ຕໍ່ວິທຍຸເອເຊັຽເສຣີ ໃນມື້ວັນທີ 19 ເມສາ ວ່າຊາວຄຣິສຕຽນ ອະເມຣິກັນ 3 ຄົນ ທີ່ຖືກກັກໂຕຢູ່ເມືອງສິງ ເມື່ອວັນທີ 8 ເມສາ ນັ້ນໄດ້ຖືກສົ່ງໄປແຂວງບໍ່ແກ້ວ ແລ້ວໃນມື້ວັທີ 18 ເມສາ ແລະ ສົ່ງຕໍ່ໄປແຂວງຊຽງຮາຍ ຂອງໄທ ເພື່ອໃຫ້ເດີນທາງ ກັບໄປ ສະຫະຣັຖ ອະເມຣິກາ ດັ່ງທີ່ທ່ານກ່າວວ່າ:

"ຈຸ ຕໍາຣວດ ເຂົາປ່ອຍໄປມື້ວານນີ້ແລ້ວ ສົ່ງໄປມື້ວານແດ່ ສົ່ງໄປບໍ່ແກ້ວ ເຂົາເອີ້ນໄປອະເມຣິກາ ພຸ້ນຕິ ເຈົ້າໜ້າທີ່ຕໍາຣວດ ຣາຍງານສົ່ງໄປ ແລ້ວ."

ທ່ານກ່າວຕື່ມວ່າ ຊາວຄຣິສຕຽນ ອະເມຣິກັນ ທັງ 3 ຄົນນັ້ນຖືກ ເຈົ້າໜ້າທີ່ກັກໂຕໄວ້ຊື່ໆ ຍ້ອນພວກເຂົາເຈົ້າ ໄປເຜີຍແຜ່ສາສນາ ຢູ່ເຂດ ຫ່າງໄກສອກຫລີກ ແລະໄດ້ແຈກຢາຍເອກກະສານສາສນາຄຣິສຕຽນ ໃຫ້ຊາວບ້ານທີ່ເປັນການຂັດຕໍ່ກົດໝາຍ ຂອງລາວ, ແຕ່ກໍບໍ່ໄດ້ຖືກ ດໍາເນີນຄະດີ ຫລື ສັ່ງຟ້ອງຂຶ້ນສານ ແລະບໍ່ໄດ້ລົງໂທດແຕ່ຢ່າງໃດ ທັງຢືນຢັນວ່າ ເຈົ້າໜ້າທີ່ບໍ່ໄດ້ໃຊ້ ຄວາມຮຸນແຮງໃດໆຕໍ່ພວກກ່ຽວ.

ຊາວອາເມຣິກັນ 3 ຄົນທີ່ວ່ານັ້ນຄື: ທ້າວ Wayne, ນາງ Autumn ແລະ ທ້າວ Joseph ຖືກເຈົ້າໜ້າທີ່ຕໍາຣວດ ເມືອງສິງ ກັກໂຕໃນມື້ ວັນທີ 8 ເມສາ. ຫລັງຈາກນັ້ນ ຄນະກັມມາທິການການ ສະຫະຣັຖ ອະເມຣິກາ ເພື່ອສິດເສຣີພາບ ໃນການເຊື່ອຖືສາສນາ ກໍຮຽກຮ້ອງໃຫ້ ຣັຖບາລ ສປປລາວ ສົ່ງໜັງສືຜ່ານແດນຄືນໃຫ້ຊາວອະເມຣິກັນ ທັງ 3 ຄົນເພື່ອໃຫ້ພວກເຂົາເຈົ້າ ສາມາດເດີນທາງອອກຈາກ ສປປລາວ ໄດ້.

ກ່ຽວກັບເຣຶ່ອງນີ້ ທ່ານ ທັດ ເນັດເທີທັນ ໂຄສົກ ອົງການຄຣິສຕຽນ ສຽງຂອງຜູ້ເສັຽສຣະ ຢູ່ສະຫະຣັດ ອະເມຣິກາ ກໍໄດ້ຮຽກຮ້ອງ ແລະ ຊີ້ແຈງ ໃນມື້ວັນທີ 18 ເມສາ ນີ້ວ່າຣັຖບານລາວ ຍັງຄວບຄຸມການເຜີຍແຜ່ ເອກກະສານ ສາສນາຄຣິສຕຽນຢູ່.

ພຣະຄໍາພີ ບໍ່ມີຂາຍໃນຮ້ານຂາຍປຶ້ມ ແລະກໍບໍ່ມີໃຫ້ເຫັນ ໃນສາທາຣະນະ. ປະຊາຊົນລາວ ສາມາດໄດ້ຮັບ ພຣະຄໍາພີ ຈາກໂບດ ທີ່ຢູ່ ພາຍໃຕ້ ການຄຸ້ມຄອງຂອງ ຣັຖບານເທົ່ານັ້ນ. ສະນັ້ນ ການທີ່ຊາວອະເມຣິກັນ ໄປແຈກຢາຍເອກກະສານ ຄຣິສຕຽນ ແບບນັ້ນ ເຈົ້າໜ້າທີ່ ທາງການລາວ ຕ້ອງຕິດຕາມເບິ່ງຢ່າງໃກ້ຊິດ.

ຂໍ້​ມູນ​ເພີ່ມ​ຕື່ມຫລ້າ​ສຸດ:

ຊາວ​ຄ​ຣິ​ສ​ຕຽນ ອະ​ເມ​ຣິ​ກັນ 3 ຄົນ, ທີ່​ຖືກ​ປ່ອຍ​ໂຕ ແລະ ເນ​ຣະ​ເທດ ອອກ​ໄປ​ຍັງ​ປະ​ເທດ​ໄທຍ ພາຍ​ຫລັງ ທີ່​ຖືກ​ກັກ​ໂຕ ເປັນ​ເວ​ລາ​ອາ​ທິດ​ປາຍ​ນັ້ນ, ກຳ​ນົດ​ອອກ​ເດີນ​ທາງ ອອກ​ຈາກ ສ​ນາມ​ບິນ ຮົງ ກົງ ໃນ​ວັນ​ທີ 20 ເດືອນ​ເມ​ສາ​ ມາ​ຍັງ ສະ​ຫະ​ຣັ​ຖ ອະ​ເມ​ຣິ​ກາ ເພື່ອ​ສ​ລອງວັນ ອິ​ສ​ເຕີ ​ກັບ​ຄອບ​ຄົວ ຂອງ​ຂະ​ເຈົ້າ.

ເຕັມຫນ້າ