ຕຣຽມເປີດປະເທດ ສົ່ງເສີມ ການທ່ອງທ່ຽວ

ຣັຖບານລາວ ເຣີ່ມໃຫ້ສັນຍານວ່າ ຈະມີການເປີດປະເທດ ທ່າມກາງ ການຣະບາດ ຂອງໂຄວິດ-19 ທີ່ຍັງເພີ່ມຂຶ້ນ. ປີ 2020 ມີນັກທ່ອງທ່ຽວ ຕ່າງປະເທດ ເຂົ້າລາວ ຫຼຸດລົງເຖິງ 70% ແລະ ລາຍຮັບ ຫຼຸດລົງເຖິງ 80% ເພື່ອເປັນກະຕຸ້ນ ເສຖກິຈ ໃນຕໍ່ໜ້າ ລາວຈຳເປັນ ຕ້ອງເລືອກແນວທາງ ຟື້ນຟູ ການທ່ອງທ່ຽວ ໃຫ້ກັບມາໄດ້ໂດຍໄວ.

ໄມ​ຊູ​ລີ: ສະບາຍດີ ທ່ານຜູ້ຟັງ ທີ່ເຄົາຣົບ ຂໍຕ້ອນຮັບ ທ່ານເຂົ້າສູ່ ຣາຍການ “ມາຟັງນໍາກັນ”. ມື້ນີ້ ພວກເຮົາຈະນຳເອົາ ປະເດັນ ທີ່ໄດ້ຮັບ ຜົລກະທົບ ຈາກໂຄວິດ-19 ທີ່ຈິງ ກໍໄດ້ຮັບ ຜົລກະທົບ ທຸກຂແນງການ. ແຕ່ນຶ່ງ ໃນຂແນງ ທີ່ໄດ້ຮັບ ຜົລກະທົບໜັກ ກໍຄື ການທ່ອງທ່ຽວ. ໃນນັ້ນ ກໍມີຜູ້ ປະກອບການ, ແຮງງານ ຮວມໄປເຖິງ ຜົ​ລກະທົບເຖິງ ລາຍໄດ້ ແຫ່ງຊາດ. ໂດຍຫົວຂໍ້ແມ່ນ ສັນຍານ ການເປີດປະເທດ ຂແນງການທ່ອງທ່ຽວ ກຽມແຜນຮອງຮັບ. ທ່ານຜູ້ຟັງ ທີ່ຕິດຕາມ ຣາຍການ ພວກເຮົາ ຖ້າຕ້ອງການເຂົ້າຮ່ວມ ຫຼື ລົມກັນ ປະເດັນໃດ ກະຣຸນາ ສົ່ງເບີ ໂທຣະສັບຂອງ ທ່ານມາຍັງ ເພສ ອາຣເອຟ ເອ ແລ້ວພວກເຮົາ ຈະຕິດຕໍ່ຫາ. ສຳລັບມື້ນີ້ ດຳເນີນຣາຍການ ໂດຍ ໄມຊູລີ ແລະ ໄຊຍາ.

ໄຊ​ຍາ: ສະບາຍທີ່ທ່ານຜູ້ຟັງ. ທ່າມກາງ ການຣະບາດ ຂອງເຊື້ອພະຍາດ ໂຄວິດ-19 ນັບມື້ ນັບເພີ່ມຂຶ້ນ. ຜ່ານທາງ ພາກຣັຖບານ ກໍໄດ້ຣາຍງານ ອອກມາວ່າ ການຂຍາຍໂຕ ຂອງເສຖກິຈ ລາວຫຼຸດລົງ. ນອກຈາກນີ້ ຍັງມີ ຜົລກະທົບ ອີກຫຼາຍຢ່າງ ທັງອັດຕຣາ ເງິນເຟີ້ ເຊິ່ງມັນສົ່ງຜົລ ໃຫ້ສິນຄ້າ ອຸປະໂພກ ແລະ ບໍຣິໂພກ ຂຶ້ນຣາຄາ. ນອກຈາກນີ້ ຍັງອັດຕຣາ ການຫວ່າງງານສູງ ແລະ ທີ່ສຳຄັນ ແມ່ນທາງດ້ານການເງິນ ເຊັ່ນໜີ້ສິນ ຂອງປະເທດ ແລະ ຂແນງການທຸຣະກິຈ ຕ້ອງປະເຊີນ ກັບຂາດທຶນ ບາງກິຈການກໍຕ້ອງໄດ້ຢຸດ ໄປເລີຍ ເຊິ່ງມັນເປັນຜົລ ມາຈາກ ການຣະບາດ ຂອງໂຄວິດ-19.

ຂແນງການ ທີ່ໜັກກ່ອນໝູ່ ແມ່ນຂແນງ ການທ່ອງທ່ຽວ ຄຳວ່າ ທ່ອງທ່ຽວ ມັນຫຼາຍກິຈການ ປິ່ນອ້ອມ ເຊັ່ນ ຮ້ານອາຫານ, ໂຮງແຮມ, ຣົດໂດຍສານ ແລະ ອື່ນໆ ທີ່ປິດໂຕ ມາໄດ້ເກືອບ 2 ປີແລ້ວ. ໃນຂນະທີ່ການຣະບາດ ຍັງສູງ ສ່ວນຜູ້ປະກອບການ ກໍຕ້ອງໄດ້ຈ່າຍໜີ້ສິນ ທີ່ຢືມມາເຮັດ ທຸຣະກິຈ ເຊິ່ງໃນໄລຍະປິດກິ​ຈການນີ້ ຣັຖບານ ບໍ່ໄດ້ມີ ມາຕການ ຢຽວຢາ ແຕ່່ຢ່າງໃດ. ກໍມີພຽງແຕ່ ທະນາຄານ ປະກາດຜ່ອນຜັນ ການສຳລະໜີ້ ແລະ ໃຫ້ກູ້ມຢືມຕື່ມ ແຕ່ນັ້ນ ກໍຍັງແມ່ນໜີ້ ທີ່ຕ້ອງສົ່ງຄືນ. ໃນມື້ນີ້ ມາຕິດຕາມວ່າ ແຜນຟື້ນຟູ ການທ່ອງທ່ຽວ ມັນມີຄວາມສຳຄັນ ແນວໃດ ຕໍ່ກັບປະເທດລາວ.

…

(ເຊີນ​ທ່ານ ຟັງ​ຣາຍ​ລະ​ອຽດ ຈາກ​ສຽງ ທີ່​ໄດ້​ບັນ​ທຶກ​ໄວ້ ຂ້າງ​ເທິງ​ນັ້ນ)