ຮອງເຈົ້າແຂວງເຊກອງ ຖືກຍ້າຍ ໜ້າທີ່

2013-11-19
ອີແມວລ໌
ຄໍາເຫັນ
Share
ພິມ
ຮອງເຈົ້າແຂວງເຊກອງ ຖືກຍ້າຍ ໜ້າທີ່
ຮອງເຈົ້າແຂວງເຊກອງ ຖືກຍ້າຍ ໜ້າທີ່
RFA

 

ທ່ານ ລ້ຽງ ຄຳພູນ ຮອງເຈົ້າແຂວງເຊກອງ ທີ່ຮັບຜິດຊອບ ວຽກງານເສຖກິຈ ຖືກຍ້າຍໄປຢູ່ຜແນກໂຍທາທິການແລະຂົນສົ່ງ ແຂວງຊົ່ວຄາວ.

ອີງຕາມແຫລ່ງຂ່າວ ຈາກແຂວງເຊກອງ ທີ່ຂໍສງວນຊື່ແຈ້ງວ່າ, ນຶ່ງໃນສາເຫດຫຼັກ ຂອງການຖືກຍ້າຍແມ່ນ ທ່ານ ລ້ຽງ ຄຳພູນ ມີສ່ວນຮູ້ເຫັນ ໃນການໃຫ້ສັມປະທານ ທີ່ດິນທີ່ບໍ່ໂປ່ງໄສ ແຕ່ເມື່ອມີຂໍ້ຂັດແຍ່ງເຣື້ອງ ທີ່ດິນເກີດຂຶ້ນ ພັດບໍ່ສາມາດແກ້ໄຂບັນຫາໄດ້. ແຫລ່ງຂ່າວແຈ້ງອີກວ່າ: “ທ່ານ ລ້ຽງ ຍ້າຍໄປເປັນຫົວໜ້າ ຢູ່ໂຍທາທິການແຂວງ ແຕ່ວ່າຜູ້ທີ່ຈະມາແທນທ່ານນັ້ນ ຍັງບໍ່ມີປະກາດ ອອກມາເທື່ອ.”

ບັນຫາທີ່ດິນ ໃນແຂວງເຊກອງ ເປັນບັນຫາທີ່ຮ້ອນ ໃນຊຸມປີຜ່ານມາ ເພາະວ່າທາງອໍານາດການປົກຄອງແຂວງ ໄດ້ໃຫ້ສັມປະທານ ແກ່ນັກ ລົງທຶນໄປແລ້ວຫລາຍ 10 ພັນເຮັກຕາຣ໌. ອີງຕາມຂໍ້ມູນຈາກກະຊວງ ຊັພຍາກອນທັມມະຊາດ. ໃນນັ້ນໜັກກວ່າໝູ່ແມ່ນ ກໍຣະນີ ຂໍ້ຂັດແຍ່ງ ທີ່ດິນ ຢູ່ບ້ານຢືບ ເມືອງທ່າແຕງ ແຂວງເຊກອງ ເນື້ອທີ່ດິນປະມານ 100 ເຮັກຕາ ຂອງຊາວບ້ານ ຖືກອຳນາດ ການປົກຄອງທ້ອງຖິ່ນຂາຍ ໃຫ້ບໍຣິສັດວຽດນາມ ແລະຊາວບ້ານໄດ້ຂຶ້ນໄປຍື່ນຄໍາຮ້ອງທຸກຢູ່ຫ້ອງວ່າການຣັຖບານ. ຫລັງຈາກນັ້ນເມື່ອເດືອນ ມິຖຸນາ ປີ 2012 ເຈົ້າໜ້າທີ່ ຕຳຫຣວດເມືອງທ່າແຕງ ໄດ້ຈັບຊາວບ້ານ 7 ຄົນ ໃນນັ້ນບາງຄົນ ຖືກເຈົ້າໜ້າທີ່ ທໍາຮ້າຍຮ່າງກາຍ ໃນເວລາສືບສວນ 15 ມື້ຕໍ່ມາຊາວບ້ານ ຈຶ່ງຖືກບ່ອຍຕົວ. ດັ່ງຊາວບ້ານຜູ່ທີ່ຖືກຈັບເວົ້າໃນຕອນນຶ່ງວ່າ:

"ກິນເຂົ້າ 8 ຄາບ ສິບຫ້າວັນ ນັ່ງຢູ່ໃນຄຸກຂີ້ຍ່ຽວຢູ່ຫັ້ນລະ ຂັ້ນຢາກກິນເຂົ້າຕ້ອງຍອມ ເຂົາວ່າ ໂອຍ ໝໍນັ້ນເຕະ ເຕະໂຕກັບໃສ່ມື".

ທີ່ຜ່ານມາ ເຈົ້າໜ້າທີ່ ຈາກສະພາແຫ່ງຊາດ ແລະຫ້ອງວ່າການຣັຖບານ ໄດ້ມີຄຳສັ່ງໃຫ້ແຂວງ ແກ້ໄຂຢ່າງຮີບດ່ວນ ແຕ່ເຈົ້າໜ້າທີ່ກ່ຽວຂ້ອງ ແຂວງກໍແກ້ໄຂພຽງແຕ່ ໄປບຸກເບີກທີ່ດິນໃຫ້ຊາວບ້ານປະມານ 40 ເຮັກຕາຣ໌ ຢູ່ເຂດບ້ານສະພື ທີ່ຫ່າງຈາກບ້ານຢຶບ ປະມານ 6 ກິໂລແມັດ ໂດຍ ບໍ່ມີຣະບົບນໍ້າຊົລປະທານ ແລະທີ່ດິນບໍ່ເໝາະສົມ ສໍາລັບການຜລິດ ແລະບໍ່ຈ່າຍຄ່າຊົດເຊີຍຫຍັງເລີຍແກ່ຊາວບ້ານ. ສະນັ້ນຊາວບ້ານ ຢຶບຈຳນວນ 50 ຄອບຄົວ ທີ່ໄດ້ຮັບຜົລກະທົບ ຈຶ່ງບໍ່ຍອມຮັບເອົາທີ່ດິນ ໃນເຂດດັ່ງກ່າວ.

ນີ້ກໍເປັນສາເຫດນຶ່ງ ທີ່ເຮັດໃຫ້ ທ່ານ ລ້ຽງ ຄຳພູນ ຮອງເຈົ້າແຂວງເຊກອງຖືກຍ້າຍ. ທີ່ຜ່ານມາກໍເຄີຍມີ ທ່ານ ສົມບັດ ເຢັຍຮີເຮີ ອະດີດເຈົ້າ ຄອງນະຄອນຫລວງ ວຽງຈັນ ຖືກຍ້າຍ ແລະ ປົດຕຳແໜ່ງ ຍ້ອນກໍຣະນີ ໄປພົວພັນ ກັບເຣື່ອງສ້າງ ເສັ້ນທາງ 450 ປີ ທີ່ບໍ່ມີຄວາມໂປ່ງໄສ.

ຄໍາເຫັນ (4)
Share

toon

ຈາກ ຜົ້ງສາລີ

ບັນຫາທີ່ດີນຢູ່ລາວ ອຳນາດການປົກຄອງ ໄດ້ໃຊ້ອຳນາດ ຂົ່ມຂູ່ປະຊາຊົນ ທຳມະດາ ເພື່ອເອົາທີ່ດີນດີໆ ຂອງປະຊາຊົນນັ້ນ ຂາຍໃຫ້ບໍລີສັດ ຕ່າງປະເທດ, ຖ້າປະຊາຊົນບໍຍອມຂາຍ ໃນລາຄາ ທີເຂົາເຈົ້າກຳນົດ ກໍ່ຮ້າຍດ່າ ປະຊາຊົນ ວ່າບໍ່ນັບຖືເຈົ້າ ນັບຖືກນາຍ ປະເທດຕົນເອງ, ຈັ່ງແມ່ນຢາກຂ້າຖີ້ມແຮງແດ່ ນາຍແບບນັ້ນຫັນ, ເຫດການນີ້ ແມ່ນເກີດຂື້ນທີ່ ເມືອງເມີງ ແຂວງບໍ່ແກ້ວ ແລະ ເຊື່ອວ່າທົ່ວປະເທດ ກໍ່ຍັງມີບັນຫາຫນັກ ກ່ວານີ້ຢຼ່ ມື້ໃດວ່າຊິມີກົດຫມາຍ ຂ້າຖີ້ມ ຄົນພວກນີ້ເລີຍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Dec 04, 2013 03:14 PM

ຄົນຜ່ານມາ

ຈາກ ນະຄອນຫລວງ

ທ່ານສົມບັດ ເຢັຍຮີເຮີ ອະດີດເຈົ້າ ຄອງນະຄອນຫລວງ ວຽງຈັນ ຖືກຍ້າຍ ບໍ່ແມ່ນຍ້ອນເສັນທ່າງ 450 ປີ ແຕ່ເປັນເພາະ ມີເລຂາ ໜ້າຫ້ອງທັງໜຸ່ມ ທັງງາມຕ່າງຫາກ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 26, 2013 06:39 PM

ປະຊາຊົນ

ຈາກ ທ່າແຕງ

ດິນຢູ່ເມືອງທ່າແຕງ ແຂວງເຊກອງ ນັບວ່າເປັນດິນ ທີ່ມີຄຸນນະພາບສູງທີ່ສຸດ ໃນປະເທດລາວ ຖ້າຫາພັກລັດ ບໍ່ໃຫ້ບູລິມະສິດ ແກ່ປະຊາຊົນ ຂົງເຂດນັ້ນ ກໍ່ປຽບສະເໜືອນ ເອົາຊັບສົມບັດ ຂອງຊາດ ໃຫ້ຜູ້ອື່ນ ໄປບໍລິຫານ ໂດຍຜົນໄດ້ຮັບ ແມ່ນເຂົ້າຖົງບຸກຄົນ ເປັນສ່ວນໃຫຍ່ ສ່ວນການຍ້າຍຮອງເຈົ້າແຂວງ ໄປເປັນ ຫ/ໜ ພະແນກ ຍທຂ ຖືວ່າບໍສົມຄວນ ສົມຄວນຍ້າຍໄປປະຈຳຢູ່ຫ້ອງການ ໂຄສະນາ ອົບຮົມ ແຂວງ ເພາະພະແນກ ຍທຂ ກໍ່ຍັງເປັນພະແນກ ທີ່ຖືວ່າ ເປັນພາກເສດຖະກິດ ຂອງແຂວງອີກ ເທົ່າກັບວ່າ ຍ້າຍຈາກຂຸມເງິນບ່ອນນື່ງ ໄປຢູ່ອີກຂຸມເງິນ ບ່ອນອື່ນ ທ່ານເອີຍ...


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 25, 2013 03:50 PM

00

ຈາກ 000

Good job for everything, corruption is good for Laodeng.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 19, 2013 09:47 PM

ເຕັມຫນ້າ