ຊາວບ້ານ ຖືກຈັບ ຍ້ອນບໍ່ຍອມເຊັນ ມອບທີ່ດິນ

ມະ​ນີ​ຈັນ
2019-10-14
ອີແມວລ໌
ຄໍາເຫັນ
Share
ພິມ
ທິດໄພ ທໍາມະວົງ ຖືກຈັບ ຢູ່ກອງບັນຊາການ ປກສ ເມືອງປາກກະດິງ ຍ້ອນບໍ່​ຍອມ​ເຊັນ​ມອບ​ດິນ ໃຫ້​ໂຄງ​ການ​ສ້າງ​ສ​ຸ​ຂ​ສາ​ລາ ຂອງ​ບໍ​ຣິ​ສັດ ຢ່າງ​ພາ​ຣາ​ວຽດ​ນາມ.
ທິດໄພ ທໍາມະວົງ ຖືກຈັບ ຢູ່ກອງບັນຊາການ ປກສ ເມືອງປາກກະດິງ ຍ້ອນບໍ່​ຍອມ​ເຊັນ​ມອບ​ດິນ ໃຫ້​ໂຄງ​ການ​ສ້າງ​ສ​ຸ​ຂ​ສາ​ລາ ຂອງ​ບໍ​ຣິ​ສັດ ຢ່າງ​ພາ​ຣາ​ວຽດ​ນາມ.
ພາບ​ຈາກ: ປະ​ຊາ​ຊົນ ບ້ານ​ເລົ່າ​ໃນ ຫຼື ວຽງ​ຄໍ​າ

ເຈົ້າໜ້າທີ່ຕຳຣວດ ເມືອງປາກກະດິງ ແຂວງບໍລິຄຳໄຊ ໄດ້ຈັບຕົວ ທ່ານ ທິດໄພ ທຳມະວົງ ອາຍຸ, 69 ປີ, ປະຊາຊົນ ບ້ານວຽງຄຳ ຫຼື ບ້ານເລົ່າໃນ ໃນ​ວັນ​ທີ 16 ກັນ​ຍາ ຍ້ອນບໍ່ເຊັນມອບດິນ ຂອງຕົນ ໃຫ້ບໍຣິສັດ ຢາງພາຣາ ໂກເອໂກ ຈຳກັດຜູ້ດຽວ ຂອງວຽດນາມ, ອີງ​ຕາມ​ຄຳ​ເວົ້າ ຂອງ​ຍາດ​ພີ່​ນ້ອງ ຂອງ​ທ່ານ ທິດ​ໄພ.

ໃນເບື້ອງຕົ້ນ ເຈົ້າໜ້າທີ່ຕຳຣວດ ໄດ້ເຮັດໝາຍຮຽກໃຫ້ ທ່ານ ທິດໄພ ມາລົມກັນ ຢູ່ຫ້ອງການ ປກສ ເມືອງປາກກະດິງ, ແຕ່ ທ່ານທິດໄພ ບໍ່ຍອມເຊັນມອບ ຍ້ອນຮຽກຮ້ອງ ຄ່າຊົດເຊີຍ.

ເຈົ້າໜ້າທີ່ຕຳຣວດ ໄດ້ອອກໝາຍຮຽກໃຫ້ ທ່ານທິດໄພ ມາພົບອີກ ໃນວັນທີ 16 ກັນຍາ ແລ້ວ ເຈົ້າໜ້າທີ່ຕຳຣວດກໍຈັບ ທ່ານ, ດັ່ງຄົນ ໃນຄອບຄົວທິດໄພ ໄດ້ກ່າວຕໍ່ ວິ​ທ​ຍຸ ເອເຊັຽ ເສຣີ ໃນວັນທີ 12 ຕຸລາ ວ່າ:

“ຄັ້ງທີ 1 ເພິ່ນກະໄດ້ໄປ ປຶກສາຫາລື ລົມກັນຫັ້ນນ່າ ກ່ຽວກັບ ຕອນດິນຂອງຜູ້ກ່ຽວນີ້ ຫັ້ນນ່າ ເພິ່ນຢາກໃຫ້ ເຊັນມອບໃຫ້ ຫັ້ນນ່າ ໃນເມື່ອກ່ອນ ແລ້ວເພິ່ນກະສົ່ງ ພໍ່ກັບມາ, ເທື່ອທີ 2 ເພິ່ນກະເຮັດໝາຍຮຽກມາ ລະ [ພໍ່] ຂຶ້ນໄປ ເພິ່ນກະກັກຕົວໄວ້ເລີຍ ຫັ້ນນ່າ.”

ເຈົ້າໜ້າທີ່ຕຳຣວດ ເມືອງປາກກະດິງ ໄດ້ອອກໝາຍຮຽກ ຄັ້ງທີ 1 ລົງວັນທີ 28 ສິງຫາ 2019 ເພື່ອໃຫ້ ທ່ານ ທິດໄພ ໄປພົບ ເຈົ້າໜ້າທີ່ຕຳຣວດ ໃນວັນທີ 2 ກັນຍາ 2019 ເວລາ 8:30 ຕອນເຊົ້າ.

ຕໍ່ມາ ເຈົ້າໜ້າທີີ່ຕຳຣວດ ເມືອງປາກກະດິງ ໄດ້ອອກໝາຍຮຽກຄັ້ງທີ 2 ລົງວັນທີ 12 ກັນຍາ 2019 ເພື່ອໃຫ້ ທ່ານ ທິດໄພ ໄປພົບ ເຈົ້າໜ້າທີ່ຕຳຣວດອີກ ໃນວັນທີ 16 ກັນຍາ 2019 ເວລາ 8:30 ຕອນເຊົ້າ ກ່ອນທີ່ ທ່ານ ທິດໄພ ຈະຖືກຈັບ ໃນມື້ດຽວກັນ. ແຕ່ ຄອບຄົວຂອງ ທິດໄພ ບໍ່ໄດ້ຂັດຂ້ອງຫຍັງ, ແຕ່ຮຽກຮ້ອງ ຄ່າຊົດເຊີຍ ທີ່ດິນທຳການຜລິດ ເທົ່ານັ້ນ, ດັ່ງສະມາຊິກຄອບຄົວ ທ່ານ ກ່າວຕື່ມອີກວ່າ ວ່າ:

“ສົມມຸດວ່າ ທາງພັກຣັຖ ຈະມີການພັທນາ ແຕ່ທາງຄອບຄົວ ຂອງໄທເຮົາ ບໍ່ມີ ການຂັດຂ້ອງໃດໆ ແຕ່ຂໍຄວາມຍຸຕິທັມ ແລະ ດິນຄ່າຊົດເຊີຍ ເພື່ອທຳການຜລິດ ຕໍ່ໄປຫັ້ນນ່າ ເພາະວ່າ ທາງຄອບຄົວ ຂອງເຮົາ ມັນກະມີແຕ່ ດິນຕອນດຽວນີ້ ທຳການຜລິດ.”

ນອກຈາກນີ້, ໃນວັນທີ 12 ຕຸລາ ທີ່ຜ່ນມາ ເຈົ້າໜ້າທີ່ຕຳຣວດ ເມືອງປາກກະດິງ ຍັງໄດ້ອອກໝາຍຮຽກ ໃຫ້ລູກຊາຍ ແລະ ເມັຽ ຂອງທ່ານທິດໄພ ມາພົບ ຢູ່ຫ້ອງການຕຳຣວດເມືອງປາກກະດິງ ໃນວັນທີ 14 ຕຸລາ ນີ້. ຢູ່ໃນໝາຍຮຽກ ຍັງເວົ້າວ່າ ຖ້າຫາກ ລູກ ແລະ ເມັຽ ຂອງທ່ານທິດໄພ ບໍ່ມາພົບ, ເຈົ້າໜ້າທີ່ຕຳຣວດ ຈະໃຊ້ມາຕການ ຕາມກົດໝາຍ ວ່າດ້ວຍ ການດຳເນີນຄະດີອາຍາ.

ເພື່ອຂໍຄວາມກະຈ່າງແຈ້ງ ໃນເຣື່ອງນີ້, ໃນວັນທີ 14 ຕຸລາ ວິ​ທຍຸ ເອເຊັຽ ເສຣີ ໄດ້ໂທຣະສັບຫາ ທ່ານ ພັນໂທ ວົງພະຈັນ ແກ້ວວິຊຽນ, ຫົວໜ້າກອງບັນຊາການ ປກສ ເມືອງປາກກະດິງ, ແຕ່ ທ່ານ ຕອບວ່າ:

“ໂຕນີ້ ໄທເຮົາ ໄດ້ປຶກສາຫາລືກັນແລ້ວ ແຕ່ໄທເຮົາ ຈະຍັງບໍ່ມີ ຄຳຕອບຫຍັງເນາະ ໂຕນີ້ ພວກເຮົາບໍ່ມີສິດໃຫ້ການສຳພາດເທື່ອ ເພາະວ່າໂຕນີ້ ມັນໄດ້ຮັບ ການຊີ້ນຳ ຈາກຂັ້ນເທິງເນາະ ທ່ານເນາະ.”

ໃນຂະນະທີ່ ເຈົ້າໜ້າທີ່ເມືອງປາກກະດິງ ໃຫ້ຄຳເຫັນວ່າ ທີ່ດິນຕອນດັ່ງກ່າວ ຢູ່ໃນເຂດສງວນ ຂອງຣັຖ, ດັ່ງ ທ່ານ ສົມພອນ ຈັນທະນາສຸກ, ເຈົ້າເມືອງປາກກະດິງ ໄດ້ກ່າວຕໍ່ ວິ​ທ​ຍຸ ເອເຊັຽ ເສຣີ ໃນວັນທີ 14 ຕຸລາ ວ່າ:

“ຕອນດິນດັ່ງກ່າວ ມັນເປັນດິນສງວນ ຂອງຣັຖ ມັນບໍ່ຖືກ ຄືກັນກັບລາວ [ຄອບຄົວທິດໄພ] ເວົ້າຫັ້ນ ຣັຖເຮົາ ໄດ້ສງວນ ເປັນເຂດເສຖກິດພັທນາ ແຕ່ປີ 2001 ພຸ້ນເປັນຕົ້ນມາ ແຕ່ເວລານັ້ນ ກໍບໍ່ໄດ້ມີໃຜ ເຂົ້າໄປທຳການຜລິດ ເຣີ່ມປີ 2009, 2010 ລະມີ ປະຊາຊົນ ຈຳນວນນຶ່ງ ເຂົ້າໄປບຸກລຸກ.”

ແຕ່ ເຈົ້າໜ້າທີ່ບ້ານ ຢັ້ງຢືນວ່າ ທີ່ດິນຕອນດັ່ງກ່າວ ໄດ້ສືບທອດມູລມໍຣະດົກ ມາຈາກພໍ່ ແລະ ແມ່ ຂອງທ່ານທິດໄພ, ດັ່ງເຈົ້າໜ້າທີ່ ອຳນາດການປົກຄອງ ບ້ານວຽງຄຳ ທ່ານນຶ່ງ ໄດ້ກ່າວຕໍ່ ວິ​ທ​ຍຸ ເອເຊັຽ ເສຣີ ໃນວັນທີ 12 ຕຸລາ ວ່າ:

“ເຣື່ອງດິນນີ້ ກະດິນ ແຕ່ພໍ່ແຕ່ແມ່ ຂອງພໍ່ເຖົ້າຊາຍ ແມ່ນເຖົ້າ​ໃສ ເພິ່ນປັນໃຫ້ລູກເພິ່ນ ແບ່ງປັນດິນ ແຕ່ມູລແຕ່ມັງ ແຕ່ດຶກດຳບັນພຸ້ນແຫລະ ແຕ່ຍັງບໍ່ໄດ້ອອກ ໃບແຈ້ງດິນ ພຸ້ນແຫລະ ແລະ ເພິ່ນຫາກໍມາອອກ ໃບແຈ້ງດິນ 2012 ນີ້ ໃບນຳໃຊ້ ທີ່ດິນຫັ້ນນ່າ.”

ດິນຕອນ ດັ່ງກ່າວ ມີເນື້ອທີ່ 1.5 ເຮັກຕ້າຣ໌ ເປັນກຳມະສິດ ຂອງພໍ່ເຖົ້າໄສປ້າຍ ແລະ ແມ່ເຖົ້າໄສ ທີ່ໄດ້ນຳໃຊ້ ມາຕັ້ງປີ 1965 ແລະ ປີ 1985 ໄດ້ມອບໃຫ້ ທ່ານ ທິດໄພ ຜູ້ເປັນລູກຊາຍ ສືບທອດ ມູລມໍຣະດົກ.

ມາຮອດປີ 2012, ທ່ານ ທິດໄພ ໄດ້ໄປເຮັດ ໃບແຈ້ງທີ່ດິນ ແລະ ໄດ້ເສັຽພາສີ ທີ່ດິນ ໂດຍ ຫ້ອງການ ຊັພຍາກອນທັມມະຊາດ ແລະ ສິ່ງແວດລ້ອມ ເມືອງປາກກະດິງ ເປັນຜູ້ອອກໃຫ້ ໃນວັນທີ 20 ມີນາ 2012.

ທ່ານ ທິດໄພ ໄດ້ເສັຽພາສີ ທີ່ດິນ ນັບແຕ່ປີ 2012 ຈົນຮອດປີ 2017 ຈຶ່ງມີໜັງສື ແຈ້ງການ ຈາກເຈົ້າໜ້າທີ່ ເມືອງປາກກະດິງວ່າ ດິນເຂດດັ່ງກ່າວ ລວມທັງທີ່ດິນຂອງ ທິດໄພ ຖືກໂຄງການປູຢາງພາຣາ ຂອງ ບໍຣິສັດ ຢາງພາຣາ ໂກເອໂກ ຈຳກັດຜູ້ດຽວ ຂອງວຽດນາມ.

ຄໍາເຫັນ (2)
Share

ຜູ້ອ່ານທີ່ບໍ່ອອກຊື່

ອັນນີ້ມັນສະແດງໄຫ້ເຫັນແລ້ວວ່າປະຊາຊົນລາວທຸກທົ່ວໜ້າທີ່ຢູ່ໃນປະເທດລາວຄວນຈະສໍານຶກໄດ້ແລ້ວແລະຄວນອອກມາປົກປ້ອງແລະຊ່ວຍເຫຼືອພໍ່ຕູ້ຜູ້ນີ້ໄດ້ແລ້ວເຖີງແມ່ນວ່າລາວຈະຜິດຫຼືຈະຖືກກໍຕາມພວກເຮົາຕ້ອງນັບຖືສິດທິຂອງພໍ່ຕູ້ຜູ້ນີ້ໂດຍລວມເພາະມັນເປັນສິດຂອງລາວເຈົ້າໜ້າທີ່ເຮັດແບບນີ້ແມ່ນບໍ່ຖືກຕ້ອງແລະບໍ່ປະຕິບັດຕາມກົດຂອງສິດທິມະນຸດເລີຍ,ສະນັ້ນພວກເຮົາປະຊາຊົນໄຫ້ພາກັນອອກມາຄັດຄັານ,ຕໍານິແລະຂັດຂວາງການກະທໍາແບບນີ້ບໍ່ໄຫ້ມເກີດຂື້ນອີກຕໍ່ໄປ,ຫຼືວ່າພວກພໍ່ແມ່ພີ່ນ້ອງບໍ່ສົງສານຄົນລາວຄືກັນແລະສາຍເລືອດລາວຄືກັນເລີຍບໍ,ຫຼືວ່າພວກທ່ານຫຼົງໄຫຼແລະໄຝ່ຫາແຕ່ເຈັກແຕ່ແກວກັນໄປໝົດແລ້ວຊັ້ນບໍ,ຄິດດີໆແລ້ວພາກັນອອກມາໂລດແລະອອກມາດ້ວຍຄວາມເຕັມໃຈຂອງພວກພໍ່ແມ່ພີ່ນ້ອງລາວເຮົາ,ຂໍຈົບເທົ່ານີ້ກ່ອນຈັກໜ່ອຍຫາວ່າປັ່ນປ່ວນແລະເຮັດໄຫ້ພາກລັດອ່ອນເພັຽເປັ້ຽລ່ອຍຕື່ມອີກ.

Oct 16, 2019 06:35 PM

ຜູ້ອ່ານທີ່ບໍ່ອອກຊື່

ຖືກຈັບຍ້ອນບໍ່ເຊັນໃບຕາດິນໄຫ້ລັດໝາຍຄວາມວ່າແນວໃດ?ອັນນີ້ກໍແມ່ນການລະເມີດສິດທິມະນຸດຊົນຫຼືສິດທິຜື້ນຖານຂອງປະຊາຊົນຢ່າງແທ້ຈິງຂອງຜູ້ທີ່ບໍ່ເຂົ້າໃຈແລະບໍ່ຮັບຮູ້ຂອງເລື້ອງສິດທິມະນຸດນັ້ນເອັງ,ເຖີງແມ່ນວ່າຜູ້ຖືກກ່າວຫາມັນຈະຜິດຫຼືຖືກ,ຈະເຂົ້າໃຈຫຼືບໍ່ເຂົ້າໃຈຂອງໃບເຊື້ອເຊີນຂອງທາງການລັດກໍຕາມບໍ່ຄວນໃສ່ກັບມືລາວເລີຍນໍ້,ເບິ່ງແລ້ວຄືວ່າໂຮດຮ້າຍທີ່ສຸດ,ບາດຄົນອື່ນທີ່ເຮັດສິ່ງບໍດີແລະຮ້າຍແຮງກ່ວາພໍ່ລຸງໄພນີ້ຄືມິດໄປເລີຍບໍ່ເຫັນມີຂ່າວຄືບໜ້າຫັຽງເອົາຕົວຢ່າງນັກຄ້າຢາລາຍໄຫ່ຽຄືສີສຸກດາວເຮືອງນັ້ນບໍ່ຮູ້ວ່າມັນໄປຈົບຢູ່ໃສແລະລະຄອນເລື້ອງນີ້ໄດ້ຢຸດຕິການສະແດງໄປແລ້ວຕີ?ແລະບໍ່ມີໄຜຮູ້ເລີຍ.

Oct 15, 2019 04:52 PM

ເຕັມຫນ້າ