ແຫລມເກົາຫລີ ອາຈເປັນຈຸດເດືອດ ຂອງສົງຄາມ

ແຫລມເກົາຫລີ ອາດເປັນ ຈຸດເດືອດຂອງ ສົງຄາມອີກໃຫມ່ ຫລັງຈາກ ເກົາຫລີເຫນືອ ຍິງເຮືອ ລາດຕະເວນ ເກົາຫລີໃຕ້ ຫລົ້ມ ແລະ ໃນເວລານີ້ ສອງເກົາຫລີ ກໍ່ຕັດຄວາມ ສັມພັນ ຣະຫວ່າງກັນ ຫມົດທຸກຢ່າງ ເກົາຫລີໃຕ້ ບອກວ່າ ຈະຕອບໂຕ້ ຖ້າເຫດການ ດັ່ງກ່າວ ເກີດຂື້ນອີກ.
ສິດນີ
2010-05-27
ອີແມວລ໌
ຄໍາເຫັນ
Share
ພິມ

ບັນຫາຄວາມ ເຄັ່ງຕຶງ ໃນແຫລມເກົາຫລີ ເປັນບັນຫາທີ່ ຊ້ຳເຮື້ອມາແຕ່ຊຸ່ມ ປີ 1945 ຫລັງຈາກ ທີ່ມີການຢຸດຍີງ ດ້ວຍສົນທິສັນຍາ Armistice ຣະຫວ່າງສອງຝ່າຍ ທີ່ມີອົງການ ສະຫະປະຊາຊາດ ເປັນຜູ້ຄ້ຳ ປະກັນສັນຍານັ້ນ ໂດຍເກົາຫລີທັງສອງ ຈະແບ່ງແຍກກັນ ຢູ່ຕາມເສັ້ນຂະຫນານ ເລກທີ 38th ເຫນືອ-ໃຕ້ ຈະມີເຂດປອດ ທະຫານຣະຫວ່າງ ກາງເປັນທີ່ກັ້ນ. ເກົາຫລີເຫນືອ ໃນເວລານັ້ນ ໄດ້ຮັບການ ສນັບສນູນ ຈາກສະຫະພາບ ໂຊວຽດ ຈີນແລະກຸ່ມ ວໍຊໍ Pact ຊຶ່ງໃນປັດຈຸບັນ ສລາຍຕົວໄປ ຫມົດແລ້ວຫລັງຈາກ ຄອມມຸນິດໂຊວຽດ ຫລົ້ມລະລາຍ. ສ່ວນເກົາຫລີໃຕ້ ກໍ່ໄດ້ຮັບການ ສນັບສນູນ ຈາກ ສະຫະຣັຖ ອະເມຣິກາ ແລະກຸ່ມປະເທດ ຕາເວັນຕົກ ທັງຫລາຍ ຮ່ວມດ້ວຍອົງການ SEATO ຊຶ່ງເປັນອົງກັນ ປ້ອງກັນເຂດ ເອເຊັຽຕາເວັນອອກ ສ່ຽງໃຕ້.

ບັນຫາຄວາມຂັດແຍ່ງ ຣະຫວ່າງ ສອງເກົາຫລີ ກໍ່ມີມາຕຣອດ ໂດຍສະເພາະ ແມ່ນເກົາຫລີເຫນືອ ທີ່ພຍາຍາມ ນາບຂູ່ເກົ່າຫລີໃຕ້ ດ້ວຍວິທີຕ່າງໆ ນາໆ ສີ່ງທີ່ປາກົດ ເຫັນໄດ້ຢ່າງຊັດເຈນ ຈາກການນາບຂູ່ ກໍ່ແມ່ນການສ້າງ ອາວຸດນີວເຄລັຽ ຂອງເກົາຫລີເຫນືອ ແລະການທົດລອງ ຈະຣວດຂ້າມທະວີບ ປະເພດຕ່າງໆ ເພື່ອເປັນການ ຂົ່ມຂູ່ເກົາຫລີໃຕ້ ແລະປະເທດ ພັນທະມິດ ດັ່ງຍີ່ປຸ່ນ ແລະກຸ່ມ Seato.

ສະຫະຣັຖ ແລະ 6 ປະເທດ ຄູ່ເຈຣະນາ ພຍາຍາມຊັກຊວນ ໃຫ້ເກົາຫລີຫນືອ ຫັນມາເຈຣະຈາ ກ່ຽວກັບບັນຫາ ອາວຸດນີວເຄລັຽ ຂອງເກົາຫລີໃຫມ່ ແຕ່ບໍ່ໄດ້ຜົລ ທາງການສະຫະຣັຖ ແລະກຸ່ມປະເທດ ຕາເວັນຕົກ ຮ່ວມດ້ວຍອົງການ ສະຫະປະຊາຊາດ ກໍ່ລົງໂທດທາງ ດ້ານເສຖກິດ ຕໍ່ເກົາຫລີເຫນືອ ແຮງເຮັດໃຫ້ ເກົາຫລີເຫນືອ ມີຄວາມໂກດແຄ້ນ ຕໍ່ສະຫະຣັຖ ແລະເກົາຫລີໃຕ້ ຫລາຍຂື້ນ.

ຣະດັບການນາບຂູ່ ຈາກເກົາຫລີເຫນືອ ຕໍ່ເກົາຫລີໃຕ້ ກໍມີຄວາມຮຸນແຮງ ມາຕຣອດ ບໍ່ວ່າຈະເປັນ ການທົດລອງ ຈະຣວດຂ້າມທະວີບ ການທົດລອງ ອາວຸດນີວເຄລັຽ ຫລືການໂຈຣະກັມ ປະເພດຕ່າງໆ ແລະທີ່ຮ້າຍແຮງ ກໍ່ແມ່ນຫວ່າງລ້າສຸດ ຄືໃນວັນທີ 26 ມີນາ ປີ 2010 ເຮືອດຳນ້ຳ ເກົາຫລີເຫນືອ ຍີິງໂຕປີໂດ ໃສ່ເຮືອລາດຕະເວັນ ເກົາຫລີໃຕ້ຫລົ້ມ ເຮັດໃຫ້ທະຫານ ເຮືອເກົາຫລີໃຕ້ ເສັຽຊີວີດ 46 ຄົນ ເກົາຫລີເຫນືອ ກໍວາງເສີຍ ບໍ່ຮ້ອນບໍ່ຫນາວ ເລີຍແລະກໍ ປະຕິເສດວ່າ ບໍ່ໄດ້ກະທຳການ ດັ່ງກ່າວ. ທາງການ ສະຫະຣັຖ ແລະເກົາຫລີໃຕ້ ກໍ່ມີແຕ່ສະແດງ ຄວາມເສັຽໃຈ ຕໍ່ເຫດການ ແລະກໍ່ເຮັດຫຍັງ ບໍ່ໄດ້ຫລາຍ ຈຶ່ງໄປປຶກສາ ກັບຈີນ ຊື່ງເປັນຜູ້ ສນັບສນູນ ເກົາຫລີເຫນືອ ໃຫ້ຊ່ອຍແກ້ໄຂ ຈີນກໍ່ຮູ້ເຖີງ ອັນຕຣາຍທີ່ ຈະເກີດຂື້ນຈາກ ການກະທຳຂອງ ເກົາຫລີເຫນືອ ຈື່ງຊັກຊວນ ສະຫະຣັຖ ແລະເກົາຫລີໃຕ້ ໃຊ້ຄວາມອົດກັ້ນ. ມາດາມ ຮິນຣາລີ ຄລິນຕັນ ຣັຖມົນຕຣີຕ່າງ ປະເທດ ສະຫະຣັຖ ກ່າວກ່ຽວກັບເລື້ອງ ນີ້ວ່າ:

ສະພາບຄວາມ ແຕກຕ່າງຣະຫວ່າງ ການເປັນຢູ່ແລະ ເສຖກິດ ຂອງປະຊາຊົນ ໃນສອງປະເທດ ເກົາຫລີ ກໍ່ມີຄວາມເຫີນຫ່າງ ກັນຫລາຍ. ເກົາຫລີໃຕ້ເປັນ ປະເທດ ອັນດັບ 7 ທາງດ້ານ ເສຖກິດ ໃນໂລກແລະ ກໍ່ເປັນນຶ່ງໃນ ຈຳນວນປະເທດ ທີ່ມີຄວາມກ້າວຫນ້າ ທາງດ້ານເທກໂນໂລຈີ ແລະ ຄວາມມັ້ງຄັ້ງ, ປະຊາຊົນ ເກົາຫລີໃຕ້ ໄດ້ຮັບການ ບໍຣິການ ຈາກຣັຖບານ ເປັນຢ່າງດີ ບໍ່ວ່າທາງ ດ້ານການສືກສາ ສາທາຣະນະສຸຂ ແລະສາທາຣະນຸໂພກ ປະເພດອື່ນໆ ຊຶ່ງແຕກຕ່າງກັບ ປະຊາຊົນ  ເກົາຫລີເຫນືອ ທີ່ມີຄວາມອືດຍາກ ແລະເສັຽຊີວີດ ຫລາຍລ້ານຄົນ ຈາກຄວາມອຶດຫີວ ໃນແຕ່ລະປີ ເພາະຣັຖບານ ຄອມມຸນິດ ບໍ່ເອົາຫົວຊາ ໃນການຍົກຣະດັບ ຄວາມເປັນຢູ່ຂອງ ປະຊາຊົນ ມີແຕ່ ເອົາງົບປະມານ ໄປໃຊ້ທາງດ້ານ ທະຫານຫລາຍກວ່າ.

ປະຊາຊົນ ເກົາຫລີເຫນືອ ຫລາຍພັນຄົນ ໃນແຕ່ລະປີ ໂຕນຫນີຈາກ ປະເທດ ຈຸດປະສົງ ກໍ່ແມ່ນຢາກໄປ ຢູ່ເກົາຫລີໃຕ້ ເຮັດໃຫ້ ເກົາຫລີເຫນືອ ມີຄວາມຢ້ານກົວ ທີ່ວ່າ ອຳນາດການປົກຄອງ ຂອງຕົນ ອາດຈະສລາຍຕົວ ແບບສະຫະພາບ ໂຊວຽດ ຖ້າບໍ່ສ້າງບັນຫາ ກັບເກົາຫລີໃຕ້ ແລະສະຫະຣັຖ ເພື່ອປິດບັງຄວາມຜິດ ຂອງຕົນ ແລະ ຫັນເຫຄວາມສົນໃຈ ໄປທາງອຶ່ນ. ທ່ານ ລີມັງບັກ ປະທານາທິບໍດີ ເກົາຫລີໃຕ້ ກ່າວວ່າ:

ເຫດການອັນຮ້າຍແຮງ ແມ່ນເກີດຂື້ນ ໃນວັນທີ 26 ມີນາ ປີນີ້ ດ້ວຍການຈົມເຮືອຣົບ ຂອງເກົາຫລີໃຕ້ ຈາກເຮືອດຳນ້ຳ ເກົາຫລີເຫນືອ  ທີ່ເຮັດໃຫ້ລູກເຮືອ ເກົາຫລີໃຕ້ ເສັຽຊິວີດ 46 ຄົນ ທາງການ ສະຫະຣັຖ ກໍພຽງແຕ່ຊັກຊວນ ໃຫ້ເກົາຫລີໃຕ້ ໃຊ້ຄວາມອົດກັ້ນ ໃນການແກ້ໄຂ ບັນຫາ ເກົາຫລີໃຕ້ ຈຶ່ງປະກາດ ຕັດສາຍສຳພັນທຸກດ້ານ ທີ່ມີຢູ່ກັບ ເກົາຫລີເຫນືອ ບໍ່ວ່າຈະເປັນ ສາຍສຳພັນ ທາງດ້ານການຄ້າ ການຊ່ອຍເຫລືອ ເກົາຫລີເຫນືອ ປະເພດຕ່າງໆ ແລະ ການແລກປ່ຽນ ຫລືການໂອ້ລົມ ກັນຣະຫວ່າງ ເຈົ້າຫນ້າທີ່ ຣະດັບສູງຝ່າຍ ທະຫານທັງສອງຝ່າຍ ຮ່ວມດ້ວຍ ການນາບຂູ່ວ່າ ຈະຕອບໂຕ້ ຢ່າງເດັດຂາດຖ້າ ເກົາຫລີເຫນືອ ຫາກເຮັດເຊັ່ນ ນັ້ນອີກໃຫມ່ ໃນອານາຄົດ ເພືອ່ປົກປ້ອງອະທິປະຕັຍຂອງຕົນ ຈາກການຍຸຍົງຂອງເກົາຫລີເຫນືອ. ທາງການສຫະຮັຖ ບອກວ່າ ໂລກຕ້ອງຕອບໂຕ້ ການໂຈມຕີ ເຮືອລົບຂອງ ເກົາຫລີໃຕ້ ຈາກເກົາຫລີເຫນືອ ເທື່ອນີ້.

ໃນຂະນະດຽວກັນ ເກົາຫລີເຫນືອ ກໍ່ປະກາດການ ຕັດສາຍສຳພັນ ກັບເກົາຫລີໃຕ້ ເຫມືອນກັນ ແລະກໍ່ບໍ່ອະນຸຍາດ ໃຫ້ເກົາຫລີໃຕ້ ມາດຳເນີນ ທຸຣະກິດ ໃນເຂດ ອຸດສາຫະກັມ ເກຊອງຂອງ ເກົາຫລີເຫນືອ ອີກຕໍ່ໄປ. ຈາກຜົລສຳຣວດ ຫລັກຖານ ຂອງທິມງານ ນັກວີຊາການ ນານາຊາດ ທີ່ສລູບການ ພິສູດ ຫວ່າງອາທີດກ່ອນ ພົບວ່າ ແມ່ນເຮືອດຳນ້ຳ ເກົາຫລີເຫນືອ ເປັນຜູ້ຍິງ ລູກໂຕປີໂດ ໃສ່ເຮືອລາດຕະເວັນ ເກົາຫລີໃຕ້ຫລົ້ມ ໃນວັນທີ 26 ມີນາ ປີນີ້ ທີ່ເຮັດໃຫ້ລູກເຮືອ ເກົາຫລີໃຕ້ເສັຽ ຊີວີດ 46 ຄົນແທ້.

ການພົບເຫັນຫລັກຖານ ດັ່ງກ່າວ ເຮັດໃຫ້ຫລາຍ ປະເທດປະນາມ ຄອມມຸນີດ ເກົາຫລີເຫນືອ ຍົກເວັ້ນຈີນ ທີ່ເປັນ ພັນທະມິດ ເກົາຫລີເຫນືອ ບໍ່ມີການປະນາມ ປະເທດ ດັ່ງກ່າວ ໃນເຫດການນີ້ເລີຍ. ໂຄສົກກະຊວງ ທ້ອນໂຮມຊາດ ຂອງເກົາຫລີໃຕ້ ທ່ານ ຈຸງຫາຊັງ ກ່າວວ່າ ເກົາຫລີເຫນືອຕ້ອງ ຂໍໂທດ ຕໍ່ເກົາຫລີໃຕ້ ໃນການ ກະທຳ ດັ່ງກ່າວ ບໍ່ດ່ັງນັ້ນ ເກົາຫລີໃຕ້ ຈະຊຸກຍູ້ໃຫ້ ສະພາຄວາມຫມັ້ນຄົງ ອົງການ ສະຫະປະຊາຊາດ ເພີ້ມໂທດ ເກົາຫລີເຫນືອ ອີກໃຫມ່ ແລະເກົາຫລີເຫນືອ ຕ້ອງລົງໂທດ ຜູ້ທີ່ກະທຳຜິດ ໃນການໂຈມຕີ ເຮືອຣົບເກົາຫລີໃຕ້ ຢ່າງເດັດຂາດ. ໃນການຢ້ຽມຢາມ ກຸງໂຊ໊ນ ປະເທດເກົາຫລີໃຕ້ ໃນອາທີດນີ້ ມາດາ Hillary Clinton ໃຫ້ການຢືນຢັນ ຕໍ່ເກົາຫລີໃຕ້ ວ່າສະຫະຣັຖ ຈະຢູ່ຄຽງຂ້າງ ໃນການປົກປ້ອງ ຄວາມປອດພັຍຂອງ ເກົາຫລີໃຕ້ ຜູ້ຊຶ່ງເປັນ ພັນທະມິດ ກັນມາ ເປັນເວລາຫລາຍ ທົສວັດ ຈະຮວ່ມມືກັບຈີນ ໃນການແກ້ໄຂ ບັນຫາ ນາງກ່າວເພີ້ມອີກວ່າ:

ຣັຖມົນຕຣີຕ່າງ ປະເທດ ສະຫະຣັຖ ຍັງໄດ້ຕັກເຕືອນ ເກົາຫລີເຫນືອ ໃຫ້ຍຸດຕິການ ຍຸຍົງປະເພດ ຕ່າງໆ ນາໆ ຕໍ່ເກົາຫລີໃຕ້ ທີ່ຈະພາໃຫ້ ເກີດການປະທະ ກັນຂື້ນ ນາງເຫັນພ້ອມກັບ ຜູ້ນຳເກົາຫລີໃຕ້ ໃນການເອົາເລື້ອງນີ້ ໄປສູ່ສະພາ ຄວາມຫມັ້ນຄົງອົງການ ສະຫະປະຊາຊາດ ເພື່ອໃຫ້ ປະຊາຄົມໂລກ ຕອບໂຕ້ ກ່ຽວກັບການ ໂຈມຕີ ຂອງເກົາຫລີເຫນືອ. ນາງວ່າ ສະຫະຣັຖ ໄດ້ວາງກຳລັງ ທະຫານກວ່າ 28 ພັນຄົນ ເພື່ອປອ້ງກັນ ອະທິປະຕັຍ ເຂດນ້ຳແດນດີນ ຂອງເກົາຫລີໃຕ້ ຈາກການ ໂຈມຕີຂອງ ເກົາຫລີເຫນືອ ແລະ ກໍ່ຈະເພີ້ມມາຕການ ຫລາຍຢ່າງ ໃນອະນາຄົດ.

ໃນຂະນະດຽວກັນ ເກົາຫລີເຫນືອ ກໍ່ຕູ່ຫາວ່າ ເກົາຫລີໃຕ້ ໃຊ້ເຫດການເຮືອ ຫລົ້ມເພື່ອສ້າງບັນຫາ ແລະ ເຮັດສົງຄາມກັບ ເກົາຫລີເຫນືອ ດັ່ງນັ້ນ ຄວາມສຳພັນຕ່າງໆ ກັບເກົາຫລີໃຕ້ ຕ້ອງຖືກຕັດຂາດ ໄປຫມົດ ຕາບໃດທີ່ພັກ ຫົວຊາດນີຍົມ ແນວທາງເດີມຂອງ ທ່ານ ລີມັງບັກ ຍັງກຳອຳນາດຢູ່. ເທົ່າເຖີງ ປັດຈຸບັນ ສະພາບການຄວາມ ເຄັ່ງຕຶງ ຣະຫວ່າງສອງເກົາຫລີ ຍັງຢູ່ໃນ ຣະດັບສູງຢູ່ ບໍ່ຮູ້ວ່າ ໃນອະນາຄົດ ຈະມີເຫດການ ແນວໃດເກີດຂື້ນ ມາອີກ. ນັກວີຊາການ ຫລາຍທ່ານ ບອກວ່າ ຖ້າບໍ່ມີການ ແກ້ໄຂ ບັນຫາອາດຈະ ລາມປາຍ ແລະກໍ່ອາດຈະ ເກີດສົງຄາມ ຂື້ນໄດ້.

ປັດຈຸບັນ ສະພາບຄວາມ ເຄັ່ງຕືງສຸງສຸດ ແມ່ນຢູ່ຕາມເຂດ ປອດທະຫານ ຣະຫວ່າງສອງ ປະເທດ ທີ່ມີກຳລັງ ທະຫານສະຫະຣັຖ ກວ່າ 28 ພັນຄົນ, ກອງທັບ ເກົາຫລີໃຕ້ ມີກຳລັງ ທະຫານກວ່າ ນື່ງລ້ານຄົນ ແລະເກົາຫລີເຫນືອ ມີກຳລັງທະຫານ ເກືອບສອງລ້ານຄົນ ສ່ວນໃຫຍ່ແມ່ນຢູ່ ໃນບໍຣິເວນ ເຂດປອດທະຫານ ຖ້າມີສົງຄາມ ເກີດຂື້ນ ບໍ່ຮູ້ວ່າຜົລ ສະທ້ອນຈະເປັນ ຢ່າງໃດ, ນັກວີຊາການ ທາງດ້ານທະຫານ ສະຫະຣັຖ ທ່ານນື່ງ ກ່າວໃນທີ່ສຸດ.

ເຕັມຫນ້າ