ອະເມຣິກາ ຊ່ວຍຕ້ານເຊື້ອໂຣຄ HIV/AIDSໃນວຽດນາມ

ນາງ Do Thi Phung ຊາວວຽດນາມ ເຜີຍວ່າເມື່ອສາມີຂອງນາງ ເປັນເອດສໄປໂຮງໝໍ ພວກໝໍກໍບອກໃຫ້ລາວ ກັບບ້ານໄປລໍຖ້າ ຕາຍ ເພາະຢ້ານຈະຕິດ ເຊື້ອໂຣຄຈາກລາວ. ແລະເມື່ອ ນາງເອງຮູ້ວ່າ ຕົນເປັນເອດສເຊັ່ນກັນນັ້ນ ນາງກໍບໍ່ໄປຫາໝໍ ເພາະຢ້ານ ພວກທ່ານໝໍ ຈະລັງກຽດນາງ ຄືກັນກັບຜູ້ ເປັນສາມີ ກໍເລີຍນອນຖ້າຄວາມຕາຍ ຢູ່ເຮືອນ. ຕໍ່ມາ ເມື່ອໄດ້ຍີນຂ່າວ ກ່ຽວກັບໂຮງໝໍ ໂຣກເອດສ ໃນເຂດປາກແບ່ງ ແມ່ນໍ້າຂອງຊຶ່ງ ສະຫະຣັຖອະເມຣິກາ ເປັນຜູ້ຊ່ວຍໃຫ້ຢາ ຕ້ານເອດສແກ່ຜູ້ປ່ວຍ ນາງຈຶ່ງມີຄວາມຫວັງ ຂຶ້ນມາທັນທີ. ຕາມຣາຍງານຂ່າວ ຈາກເມືອງ Tin Bien.
ມະນີຈັນ
2009-11-30
Share

ໂຮງໝໍທີ່ເມືອງ Tinh Binh ເປັນນຶ່ງໃນຈໍານວນ clinic 55ແຫ່ງໃນທົ່ວວຽດນາມ ທີ່ໄດ້ຮັບການຊ່ວຍເຫລືອ ຈາກໂຄງການແຜນສຸກເສີນ ເພື່ອບັນເທົາດ້ານໂຣກເອດສ ຫລື PEPFAR ຊຶ່ງເປັນຂໍ້ລິເລີ່ມ ຂອງທ່ານ George W Bush ປະທານາທິບໍດີ ສະຫະຣັຖ ຄົນກ່ອນ .

Clinic ໃນເຂດເມືອງ Tinh Binh ກໍາລັງປີ່ນປົວ ຊາວວຽດນາມທີ່ຕິດເຊື້ອ HIV ຈໍານວນ340ຄົນ. ສະຫະຣັຖ ໄດ້ໄຊ້ງົບປະມານ ຫລາຍກວ່າ 300ລ້ານໂດລາ ໃນການຕ້ານໂຣກເອດສ ຢູ່ວຽດນາມ ແລະເວລານີ້ ສະຫະຣັຖ ກໍກໍາລັງຊ່ວຍເລື້ອງ ການໃຫ້ຢາຕ້ານໂຣກເອດສ ແກ່ຊາວວຽດນາມ  ຫລາຍກວ່າ2ສ່ວນ3 ໃນຈໍານວນທັງໝົດ 32ພັນຄົນ. 

ເວົ້າສະເພາະປີນີ້ປີດຽວ ສະຫະຣັຖ ກໍຈ່າຍ85ລ້ານໂດລ້າ ຄືເທົ່າກັບ 80ສ່ວນຮ້ອຍ ຂອງງົບປະມານຣາຍຈ່າຍ ດ້ານມະນຸສທັມ ຂອງສະຫະຣັຖ ໃນວຽດນາມ ຮວມທັງເລື່ອງການປີ່ນປົວ ສນັບສນູນຄອບຄົວ ຂອງຜູ້ປ່ວຍ ໂຄງການສະກັດກັ້ນ ແລະກໍາຈັດການ ຈໍາແນກຄົນຕິດເຊື້ອ HIV/AIDS ໃນວຽດນາມ.

ຢູ່ວຽດນາມການລັງກຽດ ຄົນຕິດເຊື້ອ HIV/AIDS ມີແນວໂນ້ມ ຮ້າຍແຮງຂຶ້ນ. ອາສາສມັກ ຢູ່ສູນຕ້ານເອດສ ຂອງວຽດນາມແຫ່ງນຶ່ງ ເວົ້າວ່າ ກ່ອນໜ້າສະຫະຣັຖ ເລີ່ມໃຫ້ການຊ່ວຍ ເຫລືອຢາຕ້ານເອດສ ໃນວຽດນາມ ທາງສູນຂອງລາວ ໄດ້ມ້ຽນສົບຄົນຕາຍ 1ຫລື2ຄົນ ໃນແຕ່ລະມື້. ມາດຽວນີ້ເດືອນນຶ່ງ ກໍມີແຕ່ຄົນດຽວທີ່ຕາຍ.

ໂຄງການ PEPFAR ຂອງສະຫະຣັຖ ສ່ວນໃຫຍ່ແມ່ນຢູ່ ບັນດາປະເທດ Africa. ວຽດນາມ ເປັນພຽງປະເທດດຽວ ທີ່ມີໂຄງການ PEPFAR ບັນເທົາຄົນເປັນເອດສ. 
ເມືອງ Tinb Bien ໃນແຂວງ An Giang ເປັນເຂດທີ່ທຸກຍາກ ເຂດນຶ່ງຂອງວຽດນາມ  ຊຶ່ງຜູ້ຍີງ ຈໍານວນບໍ່ໜ້ອຍ ໄປເປັນໂສເພນີ ຕາມໂຮງກາຊີໂນ ແລະ ໂຮງໂສເພນີ ໃນແຂວງຊາຍແດນ ກັມພູຊາ ເພື່ອຫາຣາຍໄດ້ເພີ້ມ ໃຫ້ແກ່ຄອບຄົວຂອງຕົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ