ຈີນ ປະທ້ວງ ການຢ້ຽມຢາມ ກຸງ Prague ຂອງ ອົງດາໄລລາມາ ແລະ ມາດາມ Kadeer

ທ່ານ Chen Jian Jun ໂຄສົກສຖານທູດຈີນ ທີ່ກຸງ Prague ກ່າວໃນວັນ ພຣະຫັດ ນີ້ວ່າ, ທາງການຈີນ ຂັດຄ້ານການເດີນທາງ ຂອງມາດາມ Kadeer ເພາະມີເປົ້າໝາຍ ສົ່ງເສີມທັສນະ ຢາກແຍກດິນແດນ ຂອງນາງ.

ມາດາມ ກາເດີຣ ແລະ ອົງດາໄລລາມາ ມີກໍານົດ ເຂົ້າຮ່ວມ ກອງປະຊຸມ ຊຶ່ງຈັດໂດຍ ມູນນິທິ Forum 2000 ທີ່ຕັ້ງຂຶ້ນໂດຍ ອະດີດ ປະທານາທິບໍດີ Czec –Vaclav Havel ໃນວັນສຸກນີ້.

ທາງການປັກກິ່ງ ກ່າວວ່າ ມາດາມກາເດີຣ ຜູ້ລີ້ໄພຢູ່ ສະຫະຣັດ ອະເມຣິກາ ເປັນຜູ້ຍຸຍົງໃຫ້ເກີດ ເຫດການວູ້ນວາຍ ຣະຫວ່າງຊົນເຜົ່າ ສ່ວນນ້ອຍວີເກີ ແລະ            ຊາວຈີນ-ຮັນ ທີ່ມີອິດທິພົລ ໃນແຂວງຊີນຈຽງ ຊຶ່ງມີຜູ້ເສັຽ ຊີວິດຍ້ອນ ຢ່າງໜ້ອຍ197ຄົນ ແລະບາດເຈັບອີກ ຫລາຍກວ່າ1700ຄົນ. ມາດາມກາເດີຣ ປະຕິເສດ ຂໍ້ກ່າວຫານັ້ນ.  

ສ່ວນອົງ ດາໄລລາມາ ທີ່ລີ້ໄພຢູ່ພາກເໜືອ ຂອງອິນເດັຽນັ້ນ, ທາງການປັກກິ່ງ ກໍກ່າວວ່າທ່ານ ຊອກຊ່ອງທາງ ເພື່ອໃຫ້ທິເບດ ແຍກຕົວອອກ ເປັນເອກກະຣາຊ ຈາກຈີນ, ຂນະທີ່ ອົງດາໄລລາມ ຢືນຢັນວ່າທ່ານ ຕ້ອງການໃຫ້ທິເບດ ເປັນເຂດປົກຄອງ ຕົນເອງ ຫລາຍຂຶ້ນເທົ່ານັ້ນ.

ທາງກະຊວງການ ຕ່າງປະເທດເຊັກ ບອກວ່າ, ການຢ້ຽມຢາມຂອງ ມາດາມ ກາເດີຣ ບໍ່ອາດ ຖືເປັນສັນຍານ ການສນັບສນູນ ແນວຄິດ ຢາກແຍກດິນແດນ ຂອງຊາວວີເກີໄດ້,  ແລະວ່າ ຫົວຂໍ້ກອງປະຊຸມ ກໍຄື ສິດທິມະນຸດ, ແລະປະຊາທິປະໄຕ ຊຶ່ງເປັນກົກເຫງົ້າ ນະໂຍບາຍ ຕ່າງປະເທດ ຂອງເຊັກ ກະທັງໃນການ ພົວພັນກັບຈີນ.