ຈີນ ປ້ອງກັນ ຊາວປະມົງ

ໜັງສືພິມ ຊິນ​ຫົວ ຂອງ​ທາງ​ການ​ຈີນ ​ເປີດ​ເຜີຍ ມື້​ວັນ​ທີ 1 ກໍຣະກະດາ ວ່າເຈົ້າ​ໜ້າ​ທີ່ ທາງ​ການ ຈີນ ​ໄດ້​ຮຽກຮ້ອງ​ ​ໃຫ້​ເຂັ້ມ​ງວດ​ ໃນ​ການລາດຕະ​ເວນ ທະ​ເລ​ຈີນ ຕອນ​ໃຕ້ ​ເພື່ອ​ປ້ອງ​ກັນ ພວກ​ຊາວ​ປະ​ມົງ ຈາກ​ເຮືອ​ ຂອງ​ຊາວ​ຕ່າງ​ດ້າວ ​ແລະ ຈາກ​ພວກ​ໂຈນ​ສະ​ລັດ ທີ່​ເຂົ້າ​ມາ​ໃນ ​ນ່ານນ້ຳ ​ເຂດ​ຫາ​ປາ ​ຂອງ​ຈີນ ຢ່າງ​ຜິດ​ກົດໝາຍ.

ທ່ານ ວູຊວງ ຜູ້ອຳນວຍການ ອົງການ​ຊາວ​ປະ​ມົງ ​ແລະ ຮັບຜິດຊອບ​ ແຄມ​ທະ​ເລຈີນ ​ຕອນ​ໃຕ້ ກ່າວ​ໃນ​ພິທີ ຊ້ອມ​ເຮືອ ​ໃນ​ເຂດ ​ແຊນ​ນີຍາ ທາງ​ພາກ​ໃຕ້ ​ແຂວງ ​ຮ່າຍໜານ ​ຂອງ​ຈີນ ​ເພື່ອ​ສລອງ ​ມື້​ຄົບຮອບ 5 ປີ ຂອງ​ການ​​ເຊັນ​ສັນຍາ ແບ່ງ​ແຍກ ອ່າວ ​ໄບບູ ລະຫວ່າງ ຈີນ ກັບ ວຽດນາມ.

ທ່ານ ວູ ​ເວົ້າ​ອີກ​ວ່າ ການ​ຊ້ອມ​ການ​ເດີນ​ເຮືອ ສ​ແດງ​ ໃຫ້​ເຫັນ​ວ່າ ຈີນ ຕັ້ງ​ໝັ້ນ​ ໃນ​ການ ທີ່​ຈະ​ປົກ​ປ້ອງ ​ເຂດ​ນ້ຳ​ແດນ​ດິນ ​ຂອງ​ຕົນ, ປົກ​ປັກ​ຮັກສາ ຊັພຍາກອນ ​ທັມມະ​ຊາດ ​ຂອງ​ຕົນ ​ແລະ ຮັກສາ​ຄວາມ​ປອດ​ພັຍ​ ໃຫ້​ເຮືອ​ ຊາວ​ປະ​ມົງ ​ຂອງຕົນ.

ທ່ານ​​ ເວົ້າ​ຕື່ມ​ ອີກ​ວ່າ ຊາວ​ປະ​ມົງ​ຈີນ ປະ​ເຊີນ​ກັບ ບັນຫາ​ທ້າ​ທາຍ ຫລາຍ​ຢ່າງ ພວກ​ຂະ​ເຈົ້າ ​ຕ້ອງ​ສ່ຽງ​ທີ່​ຈະ​ຖືກ​ຈັບ ​ໂດຍ​ບໍ່​ຖືກຕ້ອງ​ ຕາມ​ກົດໝາຍ ​ໂດຍ​ຝ່າຍ ຣັຖບານ​ອື່ນ, ສ່ຽງ​ຕໍ່​ ການຈະ​ຖືກ ປຸ້ນ​ໂຈມ​ຕີ ຈາກ​ພວກ​ໂຈນ​ສລັດ ​ແລະ ກໍ​ຕ້ອງ​ໄດ້​ແຂ່ງ​ກັບ ຊາວ​ປະ​ໂມງ ​ຕ່າງ​ດ້າວ​ທີ່ ລັກລອບ​ເຂົ້າ​ມາ ຫາ​ປາ ​ໃນ​ນ່ານນ້ຳ ​ເຂດ​ຫາ​ປາ ​ຂອງ​ຈີນ.

​ເຫດການ​ ທີ່​ເກີດ​ຂື້ນ ຫວ່າງມໍ່ໆ ມາ​ນີ້ ກໍ​ແມ່ນ ​ເມື່ອ​ວັນ​ທີ 20 ມິຖຸນາ ຜ່ານ​ມາ​ ເມື່ອທາງ​ການ ອິນ​ໂດ​ເນ​ເຊັຍ ຈັບ​ຊາວ​ປະ​ມົງຈີນ 75 ຄົນ ​​ແລະ ຝູງ​ເຮືອ 8 ລຳ ຊຶ່ງ​ມາ​ຈາກ​ເຂດ ​ໄບ​ໄຮ ​ແຂວງ ກວງ​ຊີ​ຊວງ ​ໃນ​ຈີນ.