ຣັຖບານ ທະຫານພະມ້າ ຈັບພວກນັກເຄື່ອນໄຫວ 52 ຄົນແລ້ວ ໃນປີນີ້

ພາຍໃນ 3 ເດືອນຕົ້ນປີນີ້, ຣັຖບານ ທະຫານພະມ້າ ໄດ້ຈັບ ແລະ ກັກຂັງ ພວກນັກເຄື່ອນໄຫວ ຢ່າງໜ້ອຍ 52 ຄົນ, ອີງຕາມ ຄໍາເວົ້າ ຂອງອົງການສິດທິມະນຸດ ປະຈໍາປະເທດໄທ ໃນມື້ວັນພຸດນີ້.
ຈະເຣີນສຸກ ຣາຍງານ
2008.04.02

ສະມາຄົມ ຊ່ອຍເຫລືອ ນັກໂທດການເມືອງ ກ່າວໃນຖແລງການ ວ່າ: ພວກທີ່ຖືກກັກຂັງ ສ່ວນຫລາຍ ແມ່ນສະມາຊິກ ຂອງ ພັກສິນນິບາດ ແຫ່ງຊາດ ເພື່ອປະຊາທິປະໄຕ. ນອກຈາກນັ້ນ, ກໍແມ່ນ ພວກນັກຂ່າວ, ນັກຂຽນ, ນັກສຶກ ແລະ ຊາວໜຸ່ມ.

ການຈັບກຸມ ໃນຫລາຍໆ ກໍຣະນີ, ຍາຕິພີ່ນ້ອງ ຂອງຂະເຈົ້າ ກໍບໍ່ຮູ້ ເຖິງສະຖານະການຊໍ້າ. ບາງຄົນ ກໍປະເຊີນ ກັບການກ່າວຫາ ຄະດີອາສຍາກັມ ແລະ ຖືກກັກຂັງ ເປັນເວລາດົນນານ, ໃນຂະນະທີ່ ພວກທີ່ຖືກກັກຂັງ ຄົນອື່ນໆ, ຮວມທັງ ພຣະສົງ ຖືກສົ່ງໄປຍັງ ສູນແຮງງານ, ຊຶ່ງ ຖືກທໍຣະມານ, ບໍ່ໄດ້ກິນເຂົ້າ ແລະ ອ່ອນເພັຍ.

ເມື່ອເດືອນກັນຍາ ຜ່ານມາ, ພຣະສົງ ໄດ້ນໍາພາ ການປະທ້ວງ ຕໍ່ຕ້ານ ຣັຖບານທະຫານພະມ້າ ຄັ້ງຍິ່ງໃຫຍ່ ຊຶ່ງບໍ່ເຄີຍ ມີມາ ໃນຮອບ 20 ປີ. ແລະ ເຮັດໃຫ້ພວກທະຫານ ປາບປາມ ຢ່າງນອງເລືອດ ໂດຍຍິງປືນ ໃສ່ຂະບວນປະທ້ວງ ແລະ ທໍາຮ້າຍ ຂະເຈົ້າ ໃນຖນົນ, ໃນຂະນະທີ່ 3 ພັນກ່ວາຄົນ ຖືກຈັບກຸມ ໃນຣະຫວ່າງ ການປາບປາມ.

ພວກທະຫານ ເວົ້າວ່າ ກຸ່ມຄົນເຫລົ່ານັ້ນ ສ່ວນຫລາຍ ຖືກປ່ອຍໂຕແລ້ວ, ແຕ່ວ່າ ອົງການ ນິຣະໂທດສາກົນ ແລະ ສະມາຄົມ ຊ່ອຍເຫລືອ ນັກໂທດການເມືອງ ເວົ້າວ່າ ຍັງມີພວກທີ່ຖືກກັກຂັງ ຢູ່ປະມານ 700 ຄົນ, ໃນຂະນະທີ່ 40 ຄົນ ຖືກຕັດສິນໂທດ ຈໍາຄຸກ.
ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.