ຊາວວີເກີ ບໍ່ພໍໃຈຕໍ່ ນະໂຍບາຍ ຂອງຈີນ

ມາດາມ Pelosi ຜູ້ຕໍານິ ວິພາກວິຈານ ປະວັດການ ຣະເມີດສິດທິມະນຸດ ຂອງຈີນ ຢູ່ເລື້ອຍ ນັ້ນກ່າວວ່າ  ການກະທໍາ ຮຸນແຮງແລະຄວາມ ພຍາຍາມ ໃຫ້ມີຄວາມ ເຄັ່ງຕຶງ ທາງດ້ານຊົນເຜົ່າ ຫລາຍຂຶ້ນຢູ່ຕໍ່ໄປ ຈາກທຸກຝ່າຍນັ້ນ ຈະຕ້ອງຖືກ ປະຕິເສດ ແລະວ່າ ຣັຖບານຈີນ ຄວນເອົາບາດກ້າວ ທີ່ຈໍາເປັນຕ່າງໆ ເພື່ອຮັປກັນວ່າ ສິດທິໃນການ ສະແດງ ຄວາມຄິດເຫັນ ຢ່າງສັນຕິ ຂອງປະຊາຊົນ ຈະໄດ້ຮັບການປົກປ້ອງ ແລະຣັຖບານ ຄວນອະນຸຍາດ ໃຫ້ນັກຂ່າວ ນັກສັງເກດການ ແລະ ອົງການຈັດຕັ້ງ ຕ່າງໆສາມາດ ຣາຍງານກ່ຽວກັບ ເຫດການຜັນແປ ທີ່ເກີດຂຶ້ນຢູ່ ເຂດຊີນຈຽງນັ້ນ ໂດຍບໍ່ມີການ ຈໍາກັດໃດໆ.

ຂ່າວ AFP ຣາຍງານວ່າ ຂນະທີ່ທາງການຈີນ ພຍາຍາມທີ່ ຈະຟື້ນຟູຄວາມສງົບ ໃນເມືອງເອກ Urumqi ຂອງ ຊິນຈຽງ ທາງພາກຕາເວນຕົກ ຂອງຈີນຢູ່ນັ້ນ ມາດາມ Pelosi ສະມາຊິກສະພາ ສະພາຜູ້ແທນ ຈາກຣັຖ California ກ່າວຫາວ່າ ນະໂຍບາຍ ແຂງກະດ້າງ ຊຶ່ງທາງການຈີນ ປະຕິບັດ ຢູ່ເຂດຊີນຈຽງ ນັ້ນເຮັດໃຫ້ ສະພາບເຄັ່ງຕຶງ ແລະ ຄວາມບໍ່ພໍໃຈ ມີເພີ່ມຫລາຍຂຶ້ນ ໃນໝູ່ ປະຊາຊົນ ຊາວວີເກີ ແລະກໍເປັນເວລານານ ມາແລ້ວທີ່ ບັນດາຜູ້ນໍາ ທາງການຈີນ ຈະມີການ ເໜັງຕີງ ເພື່ອເຈຣະຈາ ແລະທໍາຄວາມ ເຂົ້າໃຈກັບ ຊາວວິເກີຕໍ່ໄປ.

ພ້ອມກັນນັ້ນ ກໍນັບຖືສິດທິ ຂອງຊົນເຜົ່າສ່ວນນ້ອຍ ຕາມທີ່ໄດ້ບົ່ງໄວ້ ໃນກົດໝາຍ ຂອງຈີນ.