ອົງການທ່ອງທ່ຽວ ແຫ່ງຊາດລາວ ຈັດເທສະການ ສະແດງຊ້າງພື້ນເມືອງ ຂື້ນເປັນຄັ້ງ ທີ ສອງ ຢູ່ທີ່ເມືອງປາກລາຍ ແຂວງໄຊຍະບຸຣີ

ງານປະກວດ ການເດີນຊ້າງ ທີ່ຈັດຂື້ນທີ່ ເມືອງ ຫົງສາ ແຂວງ ໄຊຍະບູຣີ. ພາບຖ່າຍ ໃນ ວັນທີ່ 17 ເດືອນ ກຸມພາ ປີ 2007. Photo by AFP

ອົງການທ່ອງທ່ຽວແຫ່ງຊາດລາວ ຈັດເທສະການ ສະແດງຊ້າງພື້ນເມືອງ ຂື້ນເປັນຄັ້ງທີສອງ ຢູ່ທີ່ເມືອງປາກລາຍ ແຂວງໄຊຍະບຸຣີ. ງານດັ່ງກ່າວ ຈະຖືກຈັດຂື້ນລະຫ່ວາງ ວັນທີ 15-17 ກຸມພາ ໂດຍຈະມີຊ້າງ ມາສະແດງໃນງານນັ້ນ ຈຳນວນ 70 ໂຕ.

ຕາມລາຍການໃນງານສະແດງນັ້ນ:

1- ວັນທຳອິດ ຈະມີພິທີບວງສວງ ຈັດແຈງຂະບວນຊ້າງ ອາບນ້ຳໃຫ້ຊ້າງ ພາລະກິດ ຂອງຄວານຊ້າງ ການສະແດງຊ້າງເສິກ, ສັມະນາວິຊາການ ອານຸຮັກຊ້າງ. ໃນຕອນກາງຄືນກໍມີ ການຄົບງັນ ລື້ນເລິງຕ່າງໆເ ຊັ່ນວ່າ ການສະແດງດົນຕຣີຄອນເຊີຕ.

2- ວັນທີສອງ ມີການສະແດງ ສິນລະປະວັທະນະທັມ ຂອງເມືອງປາກລາຍ ການຊ່ວງເຮືອ, ການແຂ່ງຂັນບັ້ງໄຟ, ການສະແດງຕ່າງໆຂອງຊ້າງ, ການປະກວດຊ້າງປະຈຳປີ.

ໃນຕອນກາງຄືນ ກໍມີການຄົບງັນຕ່າງໆ ການສະແດງດົນຕຣີຄອນເຊີ້ດ ແລະການສາຍຊີເນມາ ໃນກາງເດີ່ນ. ໃນວັນສຸດທ້າຍ ກໍມີພິທີທາງສາດສະໜາ ແລະການສູ່ຂັວນໃຫ້ຊ້າງ ສະແດງການຝຶກແອບລູກຊ້າງ, ເອົາຊ້າງແລ່ນແຂ່ງກັນ, ການປະກວດຮູບແຕ້ມ.

ຄາດວ່ານັກທ່ອງທ່ຽວ ຈາກປະເທດເພື່ອນບ້ານ ໂດຍສະເພາະ ຈາກປະເທດໄທ ຈະ ເດີນທາງເຂົ້າໄປທ່ອງທ່ຽວ ໃນງານດັ່ງກ່າວ ເປັນຈຳນວນ ຫລວງຫລາຍ ຍ້ອນວ່າ ການເດີນທາງ ໄປເມືອງປາກລາຍ ກໍພຽງແຕ່ຂ້າມດ່ານສາກົນ ຂົວມິຕະພາບລາວ-ໄທ ນ້ຳເຫືອງ ທີ່ຕັ້ງຢູ່ລະຫ່ວາງ ເມືອງທ່າລີ ແຂວງເລີຽຂອງໄທ ກັບ ເມືອງແກ່ນທ້າວ ແຂວງໄຊຍະບູຣີ ຂອງລາວ ແລ້ວນັ່ງຣົຖໄປເມືອງປາກລາຍ ປະມານ 20 km ເທົ່ານັ້ນ.

ສົມເນ ຣາຍງານ