ຄົນງານລາວ ເສັຍຊີວິດ ໃນປະເທດໄທ ຍ້ອນອຸບັດຕິເຫດ

2008-03-25
ອີແມວລ໌
ຄໍາເຫັນ
Share
ພິມ

ສົບຄົນງານລາວ ທີ່ເສັຽຊີວິດ ຈາກອຸປະຕິເຫດ ຣົຖຂວໍ້າ ໃນແຂວງອຸບົນຣາຊະທານີ ຂອງໄທ ເມື່ອບໍ່ນານມານີ້ ໄດ້ຖືກສົ່ງກັບລາວ ເປັນທີ່ຮຽບຮ້ອຍແລ້ວ. ຜູ້ທີ່ໄດ້ຮັບບາດເຈັບ ຈໍານວນນຶ່ງ ຍັງເຂົ້າໂຮງພະຍາບານ ຕໍ່ຢູ່ທີ່ ແຂວງອຸບົນ, ຕາມທີ່ເຈົ້າໜ້າທີ່ຕຳຣວດໄທ ທ່ານນຶ່ງ ໄດ້ເປີດເຜີຽ:

“ທາງພີ່ນ້ອງ ຂອງຜູ້ຕາຍ ຈາກຝັ່ງລາວ ໄດ້ຕິດຕໍ່ມາຮັບເອົາສົບ ຂອງຜູ້ຕາຍ ຈຳນວນ 9 ສົບ ເປັນທີ່ຮຽບຮ້ອຍແລ້ວ, ສ່ວນຜູ້ທີ່ໄດ້ຮັບບາດເຈັບ ແດ່ເລັກນ້ອຍ ກໍໄດ້ກັບຄືນ ໄປລາວ ແລ້ວເຊັ່ນກັນ, ແຕ່ຕອນນີ້ ຍັງເຫລືອຜູ້ບາດເຈັບ ທີ່ກຳລັງໄດ້ຮັບການປິ່ນປົວ ໃນແຂວງ ອີກ 4 ຄົນ ໂດຍຄ່າໄຊ້ຈ່າຍດູແລຮັກສາ ຄົນງານຈຳນວນ 22 ຄົນດັ່ງກ່າວ ທາງປະກັນ ຂອງໄທ ຈະເປັນຜູ້ອອກໃຫ້ໝົດ.”

ຄົນງານລາວ 22 ຄົນ ທີ່ວ່ານີ້ ແມ່ນເດີນທາງມາຈາກ ເມືອງລະຄອນເພັງ ແຂວງ ສາຣະວັນ ເມື່ອສັປະດາຜ່ານມາ ເພື່ອຈະໄປຊອກຫາ ເຮັດວຽກ ຢູ່ທີ່ບາງກອກ ປະເທດໄທ.

ໃນຂະນະທີ່ ໂດຍສານ ໄປນຳຣົຖກະບະນັ້ນ ຣົຖໄດ້ເກີດອຸປະຕິເຫດ ປີ້ນຂໍ້ວາ ຢູ່ເຂດ ເມືອງເຂັມມະຣາຊ, ແຂວງອຸບົນຣາຊະທານີ ເຮັດໃຫ້ມີຜູ້ເສັຽຊີວິດ ແລະ ໄດ້ຮັບບາດເຈັບຍ້ອນ 10 ກ່ວາຄົນ. ທ່ານວ່າ ທາງບໍຣິສັດປະກັນໄພ ຂອງຣົຖຍິນດີ ທີ່ຈະຈ່າຍຄ່າ ການທຳ ຊາປະນະກິດສົບ ແກ່ຍາດຂອງຜູ້ຕາຍ ປະມານ ຄົນລະ 35,000 ບາດ, ສ່ວນຜູ້ໄດ້ຮັບ ບາດເຈັບ ຈຳນວນ 13 ຄົນນັ້ນ ທາງບໍຣິສັດປະກັນໄພ ກໍຈະໃຫ້ການດູແລ ທຸກຄົນ.

ສ່ວນຄົນຂັບຣົຖນັ້ນ ເຈົ້າໜ້າທີ່ ໄທໄດ້ຈັບ ໄປສືບສວນ ແລະ ຕັ້ງຂໍ້ຫາວ່າ ພາຄົນງານ ຕ່າງດ້າວ ເຂົ້າປະເທດແບບຜິດກົດໝາຍ ແລະ ຂັບຣົຖ ໂດຍປະມາດ. ຜູ້ຕ້ອງຫາອ້າງວ່າ ໄດ້ພາຄົນງານລາວ ເຂົ້າມາ ໃນແຂວງອຸບົນ ເທົ່ານັ້ນ. ຈາກການສອບສວນ ຂອງເຈົ້າໜ້າທີ່ ຕຳຣວດ ພົບວ່າ ຄົນງານລາວ ທີ່ເຂົ້າປະເທດ ແບບມີໜັງສືຜ່ານດ່ານມີ ພຽງແຕ່ 8 ຄົນ ເທົ່ານັ້ນ ສ່ວນເຫລືອ ແມ່ນເຂົ້າປະເທດ ແບບຜິດກົດໝາຍ.

ສເນີ ໂດຍ ສົມເນ

ຄໍາເຫັນ (0)
Share
ເຕັມຫນ້າ