ລາວ ແລະ ໄທ ຈະສົ່ງຊາວເຜົ່າມົ້ງ ກັບຄືນ ສປປລາວ ໃນທ້າຍເດືອນເມສານີ້


2008.04.02

ທາງການລາວ ແລະ ໄທ ຈະຮ່ວມກັນ ເລິ້ມຈັດສົ່ງຊາວລາວເຜົ່າມົ້ງ ຈາກບ້ານຫ້ວຍນ້ຳ ຂາວ ເມືອງເຂົາຄໍ້ ແຂວງເພັດສະບູນຂອງໄທ ກັບຄືນປະເທດລາວອີກໃນເດືອນເມນານີ້ ແລະຈະຈັດສົ່ງໄປໃຫ້ໝົດພາຍທ້າຍປີນີ້.

ເມື່ອວັນທີ່ 31 ມິນາທີ່ຜ່ານມາ ຄະນະກັມມະການຮ່ວມມື ເພື່ອຮັກສາ ຄວາມສງົບຮຽບຮ້ອຍ ຕາມເຂດຊາຍແດນລາວ ແລະ ໄທ ໄດ້ປະຊຸມກັນ ຢູ່ນະຄອນຫລວງວຽງຈັນ ແລະ ໄດ້ຕົກລົງກັນວ່າ ທັງສອງຝ່າຍ ຈະກະຕຽມຈັດສົ່ງ ຊາວລາວເຜົ່າມົ້ງ ທີ່ບ້ານຫ້ວຍນ້ຳຂາວນັ້ນ ກັບຄືນປະເທດ ເທື່ອລະເລັກລະໜ້ອຍ ແລະ ໃຫ້ສຳເຣັດພາຍໃນປີ 2008 ນີ້.

ຕໍ່ບັນຫາທີ່ວ່າ ຖ້າປະເທດທີ່ສາມ ຢາກຮັບເອົາຊາວເຜົ່າມົ້ງ ເຫລົ່ານັ້ນ ໄປຕັ້ງຖິ່ນຖານ ປະເທດເຫລົ່ານັ້ນ ຕ້ອງເຮັດແນວໃດ? ທ່ານ ຢົ້ງ ຈັນທະລັງສີ ໂຄສົກກະຊວງການຕ່າງ ປະເທດລາວ ໄດ້ກ່າວຕອບ ບັນຫານັ້ນ ວ່າ:

“ແມ່ນພວກຂະເຈົ້າ ກະໄດ້ແຈ້ງເຈຕນາລົມ ອອກໄປແລ້ວວ່າ, ພວກຂະເຈົ້າ ພ້ອມທີ່ຈະພິຈາລະນາ ແຕ່ວ່າ ບົນຫລັກການວ່າ ຄົນເຫລົ່ານີ້ ຕ້ອງກັບມາຢູ່ ໃນດິນແດນລາວ ເສັຍກ່ອນ.”

ແຕ່ເຖິງຢ່າງໃດກໍດີ ທ່ານ ຢົ້ງ ກ່າວຕື່ມວ່າ ຈົນເຖິງປັດຈຸບັນ ຍັງບໍ່ມີປະເທດໃດ ໄດ້ແຈ້ງເຈດຈຳນົງວ່າ ຈະຮັບເອົາຊາວເຜົ່າມົ້ງ ເຫລົ່ານັ້ນ ດັ່ງ ທ່ານໄດ້ກ່າວ ອີກຕອນນຶ່ງ ວ່າ:

“ມາຮອດ ປັດຈຸບັນ ບໍ່ທັນມີເທື່ອ. ຕາມຫລັກການແລ້ວ ໝາຍຄວາມວ່າ ທາງຝ່າຍລາວນີ້ ພ້ອມທີ່ຈະພິຈາຣະນາ ຕາບໃດ ປະເທດທີ 3 ມາຂໍນໍາ ຣັຖບານລາວ ລະກະຄົນມົ້ງເຫລົ່ານີ້ ແມ່ນກັບຄືນມາຮອດ ປະເທດລາວແລ້ວ.”

ໃນຣະຍະປະມານນຶ່ງປີ ທີ່ຜ່ານມາ ທາງການລາວ ແລະ ໄທ ໄດ້ຈັດສົ່ງຊາວລາວເຜົ່າມົ້ງ ກັບຄືນປະເທດລາວແລ້ວ ສາມຄັ້ງ ລວມທັງໝົດ 203 ຄົນ ແລະ ປັດຈຸບັນຍັງເຫລືອຢູ່ ບ້ານຫ້ວຍນ້ຳຂາວ ເກືອບ 8,000 ຄົນ; ໃນຂະນະນີ້ ທາງການໄທ ໄດ້ສິ້ນສຸດການສຳຣວດ ແລະ ເຮັດບັນຊີຣາຍຊື່ ຂອງພວກເຂົາ ສຳເຣັດຮຽບຮ້ອຍແລ້ວ ລໍຖ້າ ແຕ່ຈະຈັດສົ່ງ ໃຫ້ແກ່ເຈົ້າໜ້າທີ່ ທາງການລາວ.

ອາວະຣີ ຣາຍງານ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.