ສເນີ ຫລຸດຜ່ອນ ຄ່າໄຟຟ້າ ໃຫ້ກະເສຕກອນ ທີ່ໄດ້ຮັບຜົນກະທົບ

ສະມາຊິກ ສະພາແຫ່ງຊາດ ສເນີໃຫ້ ກະຊວງ ກະສິກໍາ-ປ່າໄມ້ ພິຈາຣະນາ ຫລຸດຜ່ອນ ຣາຄາ ໄຟຟ້າ ສໍາລັບກະເສຕກອນ ທີ່ໄດ້ຮັບ ຜົນກະທົບ ໃນຣະດູຝົນ.
ມະນີຈັນ ຣາຍງານ
2008-07-23
ອີແມວລ໌
ຄໍາເຫັນ
Share
ພິມ

ເນື່ອງ​ຈາກ ​ມັກ​ເກີດ​ນໍ້າ​ຖ້ວມ ​ໃນ​ຊ່ວງ ຣະດູ​ຝົນ ​ໃນ​ພື້ນ​ທີ່-​ເຂດ​ຕ່າງໆ ຂອງ​ລາວ ຊຶ່ງ​ສ້າງ​ ຄວາມ​ກະທົບກະ​ເທືອ​ນ ​ໃສ່ຣາຍ​ໄດ້ ​ຂອງ​ຊາວ​ກະ​ເສຕກອນ ​​ເຖິງ​ຂັ້ນ​ວ່າ ຫ​ລຸບທຶນ​ນັ້ນ ຜູ້ຕາງໜ້າ ສະມາຊິກ ​ສະພາ ຈຶ່ງ​​ໄດ້​ ສ​ເນີ​ໃຫ້ ທາງຣັຖບານ ​ພິຈາຣະນາ ຫລຸດຣາຄາ​ ຄ່າ​ໄຟຟ້າລົງ ​ເພື່ອ​ຊ່ວຍ​ ພີ່ນ້ອງ ​ກະ​ເສຕກອນ. ຜູ້ຕາງໜ້າ ສະມາຊິກ ​ສະພາ ກ່າວ​ໂດຍ ​ມີ​​ໃຈຄວາມ​ສໍາຄັນ ຕອນ​ນຶ່ງ​ວ່າ:

“ຫລາຍ​ບ່ອນ ​ກໍ​ຄື​ວ່າ ຄ່າ​ໄຟຟ້າ ​ແພງ​ແທ້ ​ເຮັດ​ຊົນລະປະທານ ​ພວກ​ເຮົາ ​ຄິດ​ໄລ່​ເບິ່ງ​ແລ້ວ ​ໂດຍ​ປະຊຸມ​ກັບ ​ປະຊາຊົນ ​ໃນ​ເຂດ​ຕ່າງໆ ສະພາບ​ຜ່ານ​ມາ ​ດັ່ງ​ນີ້ ​ເກີດ​ມີ​ ໄພ​ນໍ້າ​ຖ້ວມ ຂ້າພະ​ເຈົ້າ ​ຢາກ​ສ​ເນີ ​ໃຫ້​ເຫັນ​ວ່າ ຣັຖບານ ຕ້ອງ​ໃຫ້ ຣາຄາ​ໄຟຟ້າ ​ຫລຸດລົງ ບາງ​ບ່ອນ ​ທີ່​ຖ້ວມໜັກ ຕ້ອງ​ໃຫ້​ລຸດ 50%.”

ໃນ​ການລົງ​ພື້ນ​ທີ່ ​​ເຂດ​ຕ່າງໆ ​ເພື່ອ​ຢ້ຽມຢາມ-ພົບ​ປະ-ຫາຣື ກັບ​ປະຊາຊົນ​ ຮວມທັງ​ ຊາວ​ກະ​ເສຕກອນ​ນັ້ນ ​ທ່ານເຫັນ​ວ່າ ບັນຫາ​ ໃນ​ຂະນະ​ນີ້ ​ກໍ​ຄື ຄ່າ​ໄຟຟ້າ​ແພງ ​ຣາຍ​ໄດ້ ​ບໍ່ພໍ​ຈ່າຍ ຣັດຖະບານ ​ຄວນ​ແກ້​​ໄຂບັນຫາ​ນີ້. ຕົ້ນ​ທຶນ​ ຄ່າ​ໄຟຟ້າ​ ຕໍ່​ເອັກ​ຕາຣ ຢູ່​ຣະຫວ່າງ 3 ຫາ 10 ​ເປີ​ເຊັນ  ຣັຖບານ​ ຈະ​ພິຈາຣະນາ​ ຫລຸດ ​​ໃຫ້ໄດ້​ຊໍ່າ​ໃດ ກໍ​ສຸດ​ແລ້ວ. 

ທາງ​ດ້ານ ​ທ່ານ​ສິຕາ​ເຮັ່ງ ຣາຊພົນ ຣັຖມົນຕຣີ ກະຊວງ ​ກະສິກໍາ ​ແລະ​ ປ່າ​ໄມ້ ກໍ​ໄດ້​ກ່າວ ຊີ້​ແຈງ​ວ່າ:

“ສ່ວນ​ຄ່າ ​ໄຟຟ້າ ​ຫຍັງ​ກໍ​ເຫັນ​ດີນໍາ ​ເພິ່ນ​ແຫລະ ​ເພາະວ່າ​ ມັນ​ກໍ​ຜ່ານ​ມາ ຣັຖບານ ກໍ​ມີ​ ນະ​ໂຍບາຍ​ແຫລະ ​ແຕ່​ວ່າ ຄວາມ​ຈິງ​ແທ້ ນະ​ໂຍບາຍ ​ຍັງ​ບໍ່​ທັນ​ຮອດ ​ປະຊາຊົນ ​ເພາະ​ນະ​ໂຍບາຍ​ ຍັງ​ຄາ​ ຢູ່​ເທິງ​ນີ້​ເດ້ະ. 

ທ່ານ​ສິຕາ​ເຮັງ ກ່າວ​ຕໍ່​ໄປ​ວ່າ ຈະ​ປຶກສາ ​ຫາຣືກັບ ​ພາກສ່ວນ ​ທີ່​ກ່ຽວຂ້ອງ ຕໍ່​ໄປ ​ໂດຍ​ສະ​ເພາະ ​ບໍຣິສັດ​ໄຟຟ້າ ​ເພື່ອຊ່ວຍ​ແກ້​​ໄຂບັນຫາ ​ໃຫ້​ປະຊາຊົນ​ ຂັ້ນ​ພື້ນຖານ ທີ່​ໄດ້​ຮັບ ​ຜົນ​ກະທົບ ​​ໂດຍ​ໃຫ້​ຖືກ​ຈຸດ.

ກ່ຽວກັບ ​ບັນຫາ​ ຄ່າ​ໄຟຟ້າ​ແພງ​ນີ້ ປະຊາຊົນ​ລາວ ທົ່ວ​ໄປ ກໍ​ເຄີຍ ​ໄດ້​ໃຫ້​ສໍາພາດ​ ວ່າ ຄ່າ​ໄຟຟ້າ ​ໃນ​ລາວ ​ຄວນ​ຈະ​ມີຣາຄາ​ ຖືກ​ລົງ ​ເພື່ອ​ເປັນ​ ການ​ຊ່ວຍ​ຫລຸດຜ່ອນ ຣາຍຈ່າ​ຍ ຂອງປະຊາຊົນ ທີ່​ມີຣາຍ​ໄດ້ ໜ້ອຍຢູ່​ແລ້ວ. ປະ​ເທດລາວ​ເອງກໍ​ມີ ​ເຂື່ອນ​ຜລິດ​ ໄຟຟ້າ​​​​ໃຊ້ ​ແລະ ​ກະ​ທັງ​ສົ່ງ​ອອກຂາຍ ​ໃຫ້​ປະ​ເທດ​ເພື່ອນ​ບ້ານ.

ເຕັມຫນ້າ