ບັນຫາເງິນເຟີ້ ຕ້ອງແກ້ໄຂ ຢ່າງຮີບດ່ວນ

ຣັຖບານລາວ ຍອມຮັບ ວ່າ ບັນຫາເງິນເຟີ້ ເປັນບັນຫາສໍາຄັນ ທີ່ຕ້ອງແກ້ໄຂ ຢ່າງຮີບດ່ວນ ແລະ ເຊື່ອໝັ້ນ ວ່າ ແຜນການແກ້ໄຂ ຂອງຣັຖບານລາວ ດໍາເນີນໄປ ຖືກຕ້ອງແລ້ວ.
ຈະເຣີນສຸກ ຣາຍງານ
2008-07-09
ອີແມວລ໌
ຄໍາເຫັນ
Share
ພິມ

ທ່ານ ບົວ​ສອນ ບຸ​ຜາ​ວັນ, ນາຍົກ ຣັຖມົນຕຣີລາວ ​ສ​ເນີ ຄວາ​ມຄິດ​ເຫັນ ​ໃນມື້​ທໍ​າອິດ ຂອງ​ກອງ​ປະຊຸມ ສມັຍ​ສາມັນ ຄັ້ງ​ທີ 5 ຂອງ​ສະພາ​ແຫ່ງ​ຊາດ ຂຸດ​ທີ 6, ​ແລະ ​​ກ່າວ​ເຖິງ ​ສະພາບ​ການ ຫລາຍ​ດ້ານ ​ໂດຍ​ລວມ ຂອງ​ສປປລາວ, ​ໂດຍ​ສະ​ເພາະ ຢ່າງ​ຍິ່ງ ບັນຫາ ​ເງິນ​ເຟີ້ ​ແລະ ​ເສ​ຖກິດ, ທີ່​ໄດ້​ຮັບ ​ຜົນ​ກະທົບ ​ໂດຍ​ກົງ ຈາກຣາຄາ ນໍ້າມັນ​ແພງ, ​ເງິນ​ດອນ​ລາ ສະຫະຣັດ ຕົກ​ຕໍ່າ, ຊຶ່ງສົ່ງ​ຜົນ ​ຕໍ່ຣາຄາ​ອາຫານ ​ແລະ ຜລິດ​ຕະພັນ ຕ່າງໆ ສູງ​ຂຶ້ນ. ​ທ່ານ ​ຊີ້​ແຈງ ​ໂຕ​ເລກ ​ໃນ​ປີ 2008 ນີ້ວ່າ:

“​ແລະ ​ໃນ​ເດືອນ​ ພຶ​ສພາ ທີ່​ຜ່ານ​ມາ ​ໄດ້​ເພີ້​ມຂຶ້ນ ​ເຖິງ 2 ​ໂຕ​ເລກ ຄື 10.3 ສ່ວນ​ຮ້ອຍ, ສ່ວນ​ເງິນ​ເຟີ້ ສະ​ເລັ່ຍ ​ໃນ 5 ​ເດືອນ ຂອງ​ຕົ້ນ​ປີ 2008 ນີ້, ​ແມ່ນ​ເທົ່າ​ກັບ 7.51 ສ່ວນ​ຮ້ອຍ, ຊຶ່ງ​ໃນ​ນັ້ນ ການ​ຄຸ້ມ​ຄອງ ຣາຄາ​ ສິນ​ຄ້າ ສະກັດ​ກັ້ນ ​ໃຫ້​ເງິນ​ເຟີ້ ​ແມ່ນ​ສິ່ງ​ທີ່​ ຕ້ອງ​ເອົາ​ໃຈ​ໃສ່ ກ່ອນ​ອື່ນ​ໝົດ.”

ທ່ານ ກ່າວ​ຕໍ່​ໄປ ວ່າ ​ເງິນ​ເຟີ້ ທີ່​ເພີ້​ມຂຶ້ນນັ້ນ, ມາ​ຈາກ ສິນຄ້າ ອຸປ​ໂພ​ກ ບໍຣິ​ໂພ​ກ ​ແພງ​ຂຶ້ນ, ​ໂດຍ​ສະ​ເພາະ ຣາຄາ​ນໍ້າມັນ ​ເປັນ​ໂຕ​ຈູງ ​ແລະ ​ສົ່ງ​ຜົນ ກະທົບ ​ໂດຍ​ລວມ ຕໍ່​ການຈະ​ເຣີນ​ເຕີບ​ໂຕ ທາງ​ດ້ານ​ເສ​ຖກິດ ​ແລະ ຕໍ່​ຊີວິດ ການ​ເປັນ​ຢູ່ ຂອງ​ປະຊາຊົນ.

ບັນຫາ​ເງິນ​ເຟີ້ ​ເປັນ​ບັນຫາ ສໍາຄັນ ​ເລັ່ງດ່ວນ ທີ່ຣັຖບານ​ລາວ ຈະ​ຕ້ອງ​ແກ້​ໄຂ ​ແລະ ອອກ​​ແຜນການ ​ແກ້​ໄຂ ບັນຫາ​ ດັ່ງກ່າວ​ແລ້ວ. ​ໃນ​ຂັ້ນ​ຕອນ ຕໍ່​ໄປ ກໍ​ຈະ​ສົ່ງ​ເສີມ ການ​ຜລິດ ​ແລະ ການ​ບໍຣິການ ​ໃຫ້​ແຂງ​ແຮງ, ​ໂດຍ​​ສ້າງ​ເງື່ອນ​ໄຂ ທີ່​ອໍານວຍຄວາມ​ສະດວກ ​​ໃນການ​ຜລິດ ທຸຣະກິດ ຂອງ​ພາກສ່ວນ ​ເສ​ຖກິດ ທຸກຂນາດ ​ເພື່ອ​ສ້າງ​ຜົນ​ຜລິດ ​ໃຫ້​ຫລາຍ​ຂຶ້ນ ​ແລະ ສ້າງຣາຍ​ໄດ້ ​ໃຫ້​ຄອບຄົວ. ທ່ານ ຍົກ​ໂຕ​ຢ່າງ ​ໃນ​ການ​ແກ້​ໄຂ​ບັນຫາ ​ເງິນ​ເຟີ້ ​​ໃນ​ລາວ ວ່າ:

“​ເພື່ອ​ບໍ່​ໃຫ້ ຕົ້ນ​ທຶນ ​ແລະ ຣາຄາ ​ເຂົ້າ ​ແລະ ຄ່າ​ສະບຽງ​ ອາຫານ ​ແພງ​ເກີນ​ ຄວາມ​ເປັນ​ຈິງ, ຣັຖບານ ຈະ ອອກຣະບຽບ ການ​ຄຸ້ມ​ຄອງ ຣາຄາ ປັດ​ໃຈ ຮັບ​ໃຊ້ ການ​ຜລິດ ​ເຊັ່ນ ຣາຄາ ​ແນວ​ພັນ, ຣາຄາ​ຝຸ່ນ, ຣາຄາ​ ອາຫານສັດ. ນອກຈາກ​ນັ້ນ, ກໍ​ຈະ​ຄົ້ນ​ຄວ້າ ນະ​ໂຍບາຍ ອຸດ​ໜູນ ດ້ານ​ພະລັງງານ ຮັບ​ໃຊ້ ດ້ານ​ຜລິດ​ເຂົ້າ ​ແລະ ສະບຽງ​ອາຫານ ຮວມ​ເຖິງ ການ​ປ່ອຍ ສິນ​ເຊື່ອ ຂອງ​ທະນາຄານ ​ເພື່ອ​ສົ່ງ​ເສີມ ການ​ປູກຝັງ ​ແລະ ລ້ຽງສັດ.”

ທ່ານ ກ່າວ​ຕໍ່​ໄປ ອີກ​ວ່າ ນະ​ໂຍບ​າຍ ຂອງ​ສົກ​ປີ 2008-2009 ຈະ​ສືບ​ຕໍ່ ນະ​ໂຍບາຍ ຂອງ​ປີ ທີ່​ຜ່ານ​ມາ ຢ່າງ​ຕໍ່​ເນື່ອງ ​ແລະ ຈະ​ຄຸ້ມ​ຄອງ ອັຕຣາ ​ແລກ​ປ່ຽນ​ເງິນ​ເຟີ້ ​ໃຫ້​ມີ​ຄວາມສງົບ ​ແລະ ການ​ຂາດ​ດຸນ​ ກັບ​ຕ່າງປະ​ເທດ ກໍ​ຈະ​​ໃຫ້​ຫລຸດ​ລົງ​ດ້ວຍ.

ເຕັມຫນ້າ