ຣາຄາສິນຄ້າ ປະເພດເຄື່ອງຍ່ອຍ ຢູ່ໃນລາວເພີ້ມຂື້ນ ຍ້ອນວ່າ ຣາຄາສິນຄ້າເຄື່ອງຍ່ອຍ ໃນ ປະເທດໄທ ເພີ້ມຂື້ນ

ຣາຄາສິນຄ້າ ປະເພດເຄື່ອງຍ່ອຍ ຢູ່ໃນລາວເພີ້ມຂື້ນ ຍ້ອນວ່າ ຣາຄາສິນຄ້າເຄື່ອງ ຍ່ອຍ ໃນປະເທດໄທ ເພີ້ມຂື້ນ, ເຮັດໃຫ້ຮ້ານຂາຍອາຫານ ໃນລາວຂື້ນຣາຄາ ອາຫານ.

ນາງ ເກດມະນີ ສີວົງ ເຈົ້າຂອງຮ້ານຂາຍເຄື່ອງຍ່ອຍ ໃນຕະຫລາດ ທາດຫລວງ ນະຄອນຫລວງວຽງຈັນ ກ່າວວ່າ ສິນຄ້າປະເພດເຄື່ອງຍ່ອຍ ໃນປະເທດ ໄທ ມີຣາຄາສູງຂື້ ນນັບຕັ້ງແຕ່ປີ 2007 ເປັນຕົ້ນມາ ເຮັດໃຫ້ສິນຄ້າ ເຄື່ອງຍ່ອຍ ໃນລາວ ເພີ້ມຂື້ນຢ່ງຫລີກລຽງບໍ່ໄດ້ ໂດຍສະເພາະ ນ້ຳມັນພືດ ສຳລັບຄົວກິນ ແລະນົມຂຸ້ນຫວານ.

(ສຽງ) "ນ້ຳມັນແພງ ນ້ຳມັນພືດ 15,000 ກີບ ປະມານ 50 ບາດ ຂວດນຶ່ງ. ເຝີ ຖ້ວຍ 12,000 ກີບ. ຕະກີ້ຂື້ນມາຈາກ 10,000 ກີບ 4-5 ເດືອນ ຜ່ານມານີແຫລະ."

ນ້ຳມັນພືດ ສຳລັບຄົວກິນ ແລະນົມຂຸ້ນຫວານ ເປັນສິນຄ້າ ທີ່ນຳເຂົ້າຈາກ ປະເທດໄທ. ນາງວ່າເມື່ອບໍ່ນານມານີ້ ຣາຄານ້ຳມັນແພງ ຄ່າຂົນສົ່ງກໍແພງ ເຮັດໃຫ້ ຣາຄາສິນຄ້າຕ່າງໆ ທີ່ນຳເຂົ້າຈາກປະເທດໄທ ແພງຂື້ນຕາມໆກັນ.

ຣາຄານ້ຳມັນພືດ ທີ່ຂາຍສົ່ງນັ້ນຂວດລະ 15,000 ກີບ ແຕ່ເມື່ອນຳເອົາມາຂາຍ ໃນຮ້ານແລ້ວ ກໍຕ້ອງໄດ້ຂື້ນຣາຄາຕື່ມ ເພື່ອຈະໃຫ້ໄດ້ກຳໄລ. ນາງວ່າ ທຸກຄັ້ງທີ່ຣາຄານ້ຳມັນແພງ ສິນຄ້າທີ່ນຳເຂົ້າ ຈາກແຂວງໜອງຄາຍ ກໍແພງຂື້ນໂລດ. ປະຊາຊົນພາກັນຈົ່ມ ຢູ່ເປັນປະຈຳ ຕໍ່ສະພາບຣາຄາສິນຄ້າ ຍ່ອຍທີ່ແພງຂື້ນນີ້.

(ສຽງ) "ເຂົາຖາມຣາຄາວ່າແພງ ຫາກໍຂື້ນບໍ ແພງແທ້ ຕະກີ້ຊື້ຢູ່ 12,000 ຂື້ນຮອດ 15,000 ຄືຂາຍ 16,000 ແລ້ວ ເພາະຊື້ເຂົາເຈົາ້ມາ 15,000 ແລ້ວ."

ຕໍ່ສະພາບ ຣາຄາສິນຄ້າແພງນີ້ ນາງວ່າ ກໍມີກັມະການ ລົງມາກວດເລື້ອຍໆ. ຖ້າພົບວ່າ ຮ້ານໃດຂື້ນຣາຄາ ສິນຄ້າແພງເກີນຄວນ ເພິ່ນກໍຕັກເຕືອນໃຫ້ ຫລຸດຣາຄາລົງ. ຜູ້ໃດລະເມີດຫລາຍ ເພິ່ນກໍຢືດໃບອານຸຍາດ ການຄ້າຂາຍ.

ສົມເນ ຣາຍງານ