ເຂື່ອນນໍ້າເທີນ 2 ເຣີ່ມສົ່ງກະແສໄຟ

ໂຄງກາຣສ້າງເຂື່ອນ ນ້ຳເທີນ 2 ທີ່ໄດ້ຮັບ ກາຣປະນາມ ຈາກກຸ່ມອົງການ ປົກປ້ອງ ສະພາບແວດລ້ອມ ແຕ່ໄດ້ຮັບທຶນ ກາຣສນັບສນູນ ຈາກທາງທະນາຄາຣ ໂລກ ຖືກສ້າງສຳເຣັຄ ເປັນທີ່ຮຽບຮ້ອຍ ໄປແລ້ວ ແລະໄດ້ເຣີ່ມສົ່ງກະແສໄຟຟ້າ ໃນປະຣິມານ 1,000 ເມກະວັຕ ໃຫ້ໄທຽ ແຕ່ມື້ວັນຈັນທີ່ 15 ມີນານີ້.

ນອກຈາກເຂື່ອນໄຟຟ້າ ນ້ຳເທີນ 2 ດັ່ງກ່າວນີ້ແລ້ວ ທາງກາຣ ສປປລາວ ຍັງມີໂຄງກາຣ ທີ່ຈະສ້າງເຂື່ອນ ຂຶ້ນຕື່ມຫລາຍໆແຫ່ງ ເພື່ອຊ່ວຍເຮັດໃຫ້ ເມືອງລາວຫລຸດພົ້ນ ຈາກກາຣເປັນ ປະເທສທີ່ທຸກຂ໌ຈົນ ປະເທສໜຶ່ງ ໃນໂລກໃຫ້ໄດ້ ດ້ວຍກາຣຂາຍ ກະແສໄຟຟ້າ ໃຫ້ແກ່ປະເທສ ໃກ້ຄຽງຕື່ມອີກ ໃນຂັ້ນຕໍ່ໆໄປ.

ໂຄງກາຣກໍ່ສ້າງເຂື່ອນ ນ້ຳເທີນ 2 ດັ່ງກ່າວເປັນໂຄງກາຣ ໃຫຍ່ທີ່ສຸດໃນຂົງເຂຕ ໂດຽມີ ກາຣສັມປະທານ ໃນຣະຍະ 25 ປີ ຮວມເປັນມູລຄ່າ ກາຣກໍ່ສ້າງທັງໝົດ 1.45 ພັນລ້ານ (ໜຶ່ງຕື້ ສີ່ແສນ ຫ້າໝື່ນລ້ານ) ດອລລາຣ໌ ສະຫະຣັຖ, ຊຶ່ງໜ້າເຂື່ອນກາຍ ເປັນອ່າງນ້ຳ ທີ່ກວ້າງກວມເນື້ອທີ່ ກວ່າ 450 ຕາຣາງກິໂລແມ໊ຕ, ເຂື່ອນດັ່ງກ່າວ ແມ່ນບໍຣິສັທ ໄຟຟ້າຝຣັ່ງເສສ ເປັນຜູ້ຖືຫຸ້ນ 35% ສ່ວນຣັຖວິສາຫະກິຈ ໄຟຟ້າລາວ ຖືຫຸ້ນ 25% ເຊັ່ນດຽວກັບ ກາຣໄຟຟ້າຝ່າຍຜລິຕ ແຫ່ງປະເທສໄທຽ ຫລື Egat ທີ່ຖືຫຸ້ນ 25% ແລະອີກ 15% ແມ່ນບໍຣິສັທ ອີຕາລຽນ-ໄທຽ ເປັນຜູ້ຖືຫຸ້ນ.

ຢ່າງໃດກໍຕາມ ຫລັງຈາກຣະຍະ 25 ປີ ຫຸ້ນສ່ວນທັ້ງໝົດ ຈະຕ້ອງຕົກຢູ່ພາຍໃຕ້ ກາຣຄຸ້ມຄອງ ຂອງທາງກາຣລາວ ຕາມທີ່ໄດ້ຕົກລົງກັນ ໄວ້ແລ້ວນັ້ນ.