ເຂື່ອນໄຟຟ້າປາກແບງ ອາຈກະທົບຕໍ່ຊາວບ້ານ

ປະຊາຊົນ ທີ່ອາສັຍ ຢູ່ຕາມແຄມ ລໍານໍ້າແບງ ແລະ ແຄມແມ່ນໍ້າຂອງ ໃນແຂວງ ອຸດົມໄຊ ອາຈໄດ້ຮັບ ຜົລກະທົບ ຖ້າທາງການລາວ ອະນຸມັດ ໃຫ້ຕ່າງປະເທດ ສ້າງເຂື່ອນນໍ້າແບງ. ໃນຜົລກະທົບ ນັ້ນໃນເບື້ອງຕົ້ນ ພົບວ່າອາຈຈະ ມີປະຊາຊົນ ປະມານ 1 ພັນຄອບຄົວ ໄດ້ຮັບຜົລກະທົບ ຈາກນໍ້າຖ້ວມ ແລະຈະຕ້ອງໄດ້ ໂຍກຍ້າຍອອກໄປ  ແລະຈະມີເນື້ອທີ່ ຫາກິນ ເປັນສວນເປັນນາ ຂອງປະຊາຊົນ ໄດ້ຮັບຄວາມເສັຽຫາຍ. ຕາມຄໍາເວົ້າຂອງ ເຈົ້າໜ້າທີ່ ຫ້ອງການພລັງງານ ແລະບໍ່ແຮ່:

"ຕົວນີ້ ບັນຫາຜົລກະທົບ ທັງເຂດເໜືອ ເຂດໃຕ້ ສ່ວນໃຫຍ່ຫັ້ນກໍ ພື້ນທີ່ຕໍ່າ ບາງກໍຣະນີ ກໍປາສຈາກບໍ່ໄດ້ ສົມມຸດວ່າ ເປັນຮົ້ວສວນປູກ ໝາກໄມ້ ລົ້ມລຸກຂອງ ປະຊາຊົນ ບາງເທື່ອ ກໍຈະຖ້ວມຢູ່".

ໃນຊ່ວງຕົ້ນເດືອນ ມິນາ ປີ 2010 ທາງການລາວ ໂດຍກະຊວງແຜນການ ແລະການລົງທຶນ ໄດ້ເຊັນສັນຍາ ທໍາການສໍາຣວດ ອອກແບບໃນເບື້ອງ ຕົ້ນສໍາເຣັດແລ້ວ  ແລະທາງບໍຣິສັດ ຜູ້ຮັບເໝົາຂອງຈີນ ກໍາລັງລົງພື້ນທີ່ ເພື່ອສໍາຣວດອອກແບບ ຢ່າງລະອຽດ.

ໜັງສືພິມ ປະຊາຊົນ ຂອງທາງການລາວ ຣາຍງານວ່າ ເຂື່ອນປາກນໍ້າແບງ ທາງພາກເໜືອ ຂອງປະເທດລາວ ຄາດວ່າຈະມີ ກໍາລັງປັ່ນໄຟ 34 ແມັກກາວັດ ແລະຈະ ໃຊ້ເງິນທຶນ 70 ລ້ານໂດລາ.

ຝ່າຍຈີນເວົ້າວ່າ ການສໍາຣວດໃນ ເບື້ອງຕົ້ນພົບວ່າ ເຂື່ອນໄຟຟ້າປາກແບງ ຊຶ່ງຈະສ້າງກັ້ນ ລໍານໍ້າແບງ ສາຂາແມ່ນໍ້າຂອງ ໃນເຂດແຂວງ ອຸດົມໄຊ ມີຄວາມເປັນໄປ ໄດ້ສູງ ໂດຍບໍ່ມີຜົລ ກະທົບໃດໆ ຕໍ່ສະພາບແວດລ້ອມ ເພາະເປັນໂຄງການ ພລັງງານສີຂຽວ.