ປ່າໄມ້ ໃນ ສປປລາວ ຍັງເຫລືອພຽງ 35% ຍ້ອນກາຣໃຊ້ເນື້ອທີ່ດິນ ບໍ່ຖືກເປົ້າໝາຍ

2008-03-17
ອີແມວລ໌
ຄໍາເຫັນ
Share
ພິມ

ທ່ານ ຄຳອ້ວນ ບຸບຜາ ຣັຖມົນຕຣີ ປະຈຳສຳນັກງານນາຍົກ ແລະ ປະທານ ອົງກາຣທີ່ດິນ ແຫ່ງຊາຕ ສປປລາວ ຍອມຮັບວ່າ: ກວ່າ 30 ປີຜ່ານມາ ປະເທດລາວ ມີກາຣໃຊ້ພື້ນທີ່ດິນ ຢ່າງຜິດເປົ້າໝາຍ ຫລາຍເກີນໄປ, ເຖີງຂັ້ນ ເຮັດໃຫ້ ຊັພຍາກອນ ທັມມະຊາຕປ່າໄມ້ ຫລຸດລົງ ຢ່າງໜ້າວິຕົກ. ທ່ານ ຄຳອ້ວນ ໄດ້ຍົກຕົວຢ່າງວ່າ: ໃນປີ 1988 ທົ່ວປະເທດລາວ ມີປ່າໄມ້ ເຫລືອຢູ່ ປະມານ 47% ເທົ່ານັ້ນ. ທາງຣັຖບາລ ຈື່ງໄດ້ວາງເປົ້າໝາຍ ຟື້ນຟູປ່າ ໂດຽໃຫ້ ສາມາດ ປົກຫຸ່ມພື້ນທີ່ ທົ່ວປະເທດ ໃຫ້ໄດ້ເຖີງ 70% ໃນປີ 2000; ແຕ່ມາຮອດປີ 2008 ນີ້ ແທນທີ່ຈະມີ ພື້ນທີ່ປ່າໄມ້ ຈະຂຍາຍຕົວອອກ, ຊ້ຳພັດຍິ່ງຫລຸດລົງ ເຫລືອພຽງແຕ່ 35% ເທົ່ານັ້ນ.

ສາເຫຕດັ່ງກ່າວ ຖືເປັນກາຣຫລົມເຫລວ ຂອງທາງຣັຖບາລ ທີ່ບໍ່ສາມາດ ເຮັດໃຫ້ປະຊາຊົນ ຮັບຮູ້ແລະເຂົ້າໃຈ ເຖີງຄຸນຄ່າ ຂອງສິ່ງແວດລ້ອມ ຢ່າງລຶກຊຶ້ງ ຈຶ່ງເຮັດໃຫ້ເກີດມີ ກາຣຕັດໄມ້ ທຳລາຍປ່າ ເພື່ອຜົລປະໂຍດສ່ວນຕົວ ແລະ ຮ້າຍໄປກວ່ານັ້ນ ຍັງມີເຈົ້າໜ້າທີ່ ຈຳນວນໜຶ່ງ ທີ່ບໍ່ປະຕິບັຕ ຕາມນະໂຍບາຍພັກ ແລະ ຣັຖ ກ່ຽວກັບ ວຽກງານ ຈັດສັນທີ່ດິນ ແລະ ວຽກງານ ກະສິກັມ-ປ່າໄມ້ ໃຫ້ໄດ້ດີເທົ່າທີ່ຄວນ. ສະນັ້ນ, ຈຶ່ງເປັນກາຣຍາກ ທີ່ວ່າຈະໃຫ້ ຄົນລາວ ທົ່ວປະເທດ ສາມາດ ມີຣາຍໄດ້ ສເລັ່ຽປະຈຳປີເຖີງ 800 ດອລລາຣ໌ ສະຫະຣັຖ ຕໍ່ຄົນ ໃນອະນາຄົດ.

ສຳຫລັບ ບັນຫາຂ້ອງໃຈ ຂອງປະຊາຊົນ ຕໍ່ຜົລກະທົບ ຈາກໂຄງກາຣ ສ້າງເຂື່ອນ ຫລາຍແຫ່ງ ເກີນໄປ ໃນລາວນັ້ນ, ທ່ານ ຄຳອ້ວນ ໃຫ້ທັສນະວ່າ ມີທັ້ງທາງບວກ ແລະ ທາງລົບ ຊື່ງທາງຣັຖບາລ ຈະຕ້ອງໄດ້ສຶກສາ ວິຈັຍຢ່າງຄັກແນ່ ເພື່ອບໍ່ໃຫ້ ເປັນກາຣທຳລາຍ ສະພາບແວດລ້ອມ ແລະ ຊິວະນາໆພັນ ນັ້ນເຊັ່ນກັນ!!

ຣາຍງານ ໂດຍ ຫວາດ ສີມູນ

ຄໍາເຫັນ (0)
Share
ເຕັມຫນ້າ